Kholofelo ya Tsogo e Kgonthišeditšwe!
Kholofelo ya Tsogo e Kgonthišeditšwe!
“Ke na le kholofelo go Modimo . . . ya gore go tlo ba le tsogo ya bahu.”—DITIRO 24:15, PK.
1. Ke ka baka la’ng re ka ba le kholofelo tsogong?
JEHOFA o re neile mabaka a kwalago bakeng sa gore re be le kholofelo tsogong. O re neile lentšu la gagwe la gore bahu ba tla tsoga, ba tsogela bophelong gape. Le gona morero wa gagwe ka bao ba robetšego lehung o tla phethagatšwa e le ka kgonthe. (Jesaya 55:11; Luka 18:27) Ge e le gabotse, Modimo o šetše a bontšhitše matla a gagwe a go tsoša bahu.
2. Kholofelo ya tsogo e ka re hola bjang?
2 Go ba le tumelo tokišetšong ya Modimo ya go tsoša bahu ka Morwa wa gagwe Jesu Kriste, go ka re matlafatša dinakong tša kgateletšo. Go ba ga kgonthe ga kholofelo ya tsogo le gona go ka re thuša gore re kgomarele potego ya rena go Tatago rena wa legodimong gaešita le go fihla lehung. Mohlomongwe kholofelo ya rena ya tsogo e tla matlafala ge re dutše re hlahloba ditiragalo tša go tsošetšwa ga ba bangwe bophelong tšeo di ngwadilwego ka Beibeleng. Mehlolo ye ka moka e ile ya phethwa ka matla a tšwago go Morena yo a Phagamego Jehofa.
Ba Amogetše Bahu ba Bona ka Tsogo
3. Eliya o ile a fiwa matla a go dira’ng ge morwa wa mohlologadi wa Tsarepata a hwile?
3 Tlhahlobong e kgahlišago ya tumelo e bontšhitšwego ke dihlatse tša Jehofa tša mehleng ya pele ga Bokriste, moapostola Paulo o ngwadile gore: “Basadi ba boetše ba fiwa bahu ba bona ka tsogo.” (Ba-Hebere 11:35, PK; 12:1) Yo mongwe wa basadi bao e be e le mohlologadi wa modiidi motsaneng wa Fenikia wa Tsarepata. Ka baka la ge a ile a amogela moporofeta wa Modimo Eliya, bupi bja gagwe le makhura a gagwe di ile tša oketšwa ka mohlolo nakong ya tlala yeo e bego e tla lobiša bophelo bja gagwe le bja morwa wa gagwe. Ge ngwana a be a e-hwa ka morago, Eliya o ile a mo robatša malaong, a rapela gomme a inamela mošemane gararo, gomme a lopa ka gore: “Hlê Morêna Modimo wa-ka! A k’O bušetšê môya wa mošemanyana é xo yêna.” Modimo o ile a dira gore moya, goba bophelo, o boele go mošemanyana. (1 Dikxoši 17:8-24) Anke o akanye ka lethabo leo mohlologadi yoo a ilego a ba le lona ge tumelo ya gagwe e be e putswa ka tsogo ya pele yeo e begilwego—ya morwa wa gagwe yo a ratwago!
4. Ke mohlolo ofe woo Elisa a o dirilego Sunema?
4 Mosadi yo mongwe yo a ilego a amogela mohu wa gagwe ka tsogo o be a dula motsaneng wa Sunema. E le mosadi wa monna yo a tšofetšego, o ile a bontšha moporofeta Elisa le mothuši wa gagwe botho. O ile a putswa ka morwa. Lega go le bjalo, ka morago ga nywaga e mmalwa, mosadi o ile a bitša moporofeta yo a ilego a hwetša mošemanyana a hwile ka ntlong ya gagwe. Ka morago ga ge Elisa a rapetše e bile a gatile megato e itšego, “mmele wa ngwana wa huthumêla [ganyenyane-ganyenyane, NW].” O ‘ile a ethimola ga-šupa, a ba a ponyologa.’ Ga go na pelaelo gore tsogo ye e ile ya tlišetša mma gotee le morwa wa gagwe lethabo le legolo. (2 Dikxoši 4:8-37; 8:1-6) Eupša ba tla thaba kudu gakaakang ge ba tsošetšwa bophelong lefaseng ‘tsogong e kaone’—yeo e ba beelago ka pele ga bona kgonagalo ya gore ba se ke ba hlwa ba e-hwa le ka mohla! A lebaka le legolo gakaakang la go bontšha tebogo go Modimo yo lerato wa tsogo, Jehofa!—Ba-Hebere 11:35.
5. Elisa o ile a akaretšwa bjang mohlolong gaešita le ka morago ga lehu la gagwe?
5 Gaešita le ka morago ga lehu la Elisa le poloko ya gagwe, Modimo o ile a matlafatša marapo a gagwe ka moya o mokgethwa. Re bala gore: “Ya re [ba-Isiraele ba bangwe] bà sa boloka mohu e mongwê lebitleng leo, ba bôna xò e-tla será [ba-Moaba]; ba fo lahlêla mohu eo lebitleng la Elisa. Mohu eo xe a xôhlômêla, a wêla mašapong a Elisa; a boêla a phela, a êma ka dinaô.” (2 Dikxoši 13:20, 21) Monna yoo o swanetše go ba a ile a makala le go thaba gakaakang! Akanya lethabo leo le tlago go ba gona ge baratiwa ba rena ba tsošetšwa bophelong ka go dumelelana le morero wo o sa palelwego wa Jehofa Modimo!
Morwa wa Modimo o Ile a Tsoša Bahu
6. Ke mohlolo ofe woo Jesu a ilego a o dira kgaufsi le motse wa Naini, gomme tiragalo ye e ka re kgoma bjang?
6 Morwa wa Modimo, Jesu Kriste, o re neile mabaka a kwalago a go dumela gore bahu ba ka tsošwa, ba e-na le tebelelo ya bophelo bjo bo sa felego. Tiragalo yeo e ilego ya direga kgaufsi le motse wa Naini e ka re thuša gore re lemoge gore mohlolo o bjalo o a kgonega ka matla ao a neilwego ke Modimo. Lebakeng le lengwe, Jesu o ile a gahlana le balli bao ba bego ba rwele setopo sa lesogana ba e-tšwa motseng ba e-ya go se boloka. E be e le ngwana a nnoši wa mohlologadi. Jesu o ile a mmotša gore: “Se llê!” Ke moka a kgwatha leako gomme a re: “Lesoxana, ke ra wene xe ke re: Tsoxa!” Ge a rialo a dula fase gomme a bolela. (Luka 7:11-15) Mohlolo wo ruri o matlafatša kgodišego ya rena ya gore kholofelo ya tsogo e kgonthišeditšwe.
7. Ke eng seo se diregilego mabapi le morwedi wa Jairo?
7 Nagana le ka tiragalo yeo e akaretšago Jairo, mohlankedi yo a okamelago wa sinagoge Kaperenaume. O ile a kgopela Jesu gore a tle gomme a thuše morwedi wa gagwe yo a ratwago wa nywaga e 12, yo a bego a le kgaufsi le go hwa. Go se go ye kae go ile gwa begwa gore ngwanenyana o hwile. A kgothaletša Jairo yo a bego a meditšwe ke manyami gore a bontšhe tumelo, Jesu o ile a ya le yena legaeng la gagwe, moo lešaba le bego le lla gona. Le ile la sega ge Jesu a be a le botša gore: “Ngwanenyana yó xa a ka a hwa; ó robetše.” O be a hwile e le ka kgonthe, eupša Jesu o be a tla tloga a ba bontšha gore batho ba ka tsošetšwa bophelong go fo etša ge ba kgona go tsoga borokong bjo bogolo. A swara ngwanenyana ka seatla, a re: “Ngwan’aka, tsoxa!” O ile a tsoga gatee-tee gomme “batswadi ba xaxwe ba tlabêxa” ka tlalelo. (Mareka 5:35-43; Luka 8:49-56) Ka ntle le pelaelo, ditho tša lapa di tla “tlabêxa” ge baratiwa ba tšona ba hwilego ba tsošetšwa bophelong lefaseng la paradeise.
8. Ke eng seo Jesu a ilego a se dira lebitleng la Latsaro?
8 Latsaro o be a e-na le matšatši a mane a hwile ge Jesu a be a e-tla lebitleng la gagwe gomme a pshikološa lefsika leo le bego le le tswaletše. Ka morago ga gore a rapele phatlalatša e le gore babogedi ba tle ba tsebe gore o be a ithekgile ka matla ao a a newago ke Modimo, Jesu o ile a goeletša ka gore: “Latsaro! Tšwaa O tlê mó!” Gomme o ile a tšwa! Matsogo a gagwe le maoto a gagwe a be a sa dutše a tateditšwe ka mašela a go tatetša bahu, gomme sefahlego sa gagwe se be se khupeditšwe ka lešela. Jesu o ile a bolela ka lentšu le le phagamego a re: “Mo tlemolleng Le mo lesê a ikêlê.” Ge ba bona mohlolo wo, ba bantši bao ba bego ba le moo go tlo homotša dikgaetšedi tša Latsaro, Maria le Mareta, ba ile ba dumela Jesu. (Johane 11:1-45) Na pego ye ga e go tlatše kholofelo ya gore baratiwa ba gago ba ka tsošetšwa bophelong lefaseng le lefsa la Modimo?
9. Ke ka baka la’ng re ka kgodišega gore Jesu mo nakong ye a ka kgona go tsoša bahu?
9 Nakong ya ge Johane Mokolobetši a be a le kgolegong, Jesu o ile a mo romela molaetša wo o thabišago pelo: “Difofu di a bôna; . . . bahu ba a tsoxa.” (Mateo 11:4-6) Ka ge Jesu ge a be a le mo lefaseng a ile a tsoša bahu, ka kgonthe a ka dira bjalo e le sebopiwa se matla sa moya se se filwego matla ke Modimo. Jesu ke “tsoxô le bophelô,” gomme ke mo go homotšago gakaakang go tseba gore kgaufsinyane ‘bohle bao ba lego mabitleng ba tlo kwa lentšu la gagwe gomme ba tlo tšwa’!—Johane 5:28, 29; 11:25.
Ditsogo tše Dingwe di Matlafatša Kholofelo ya Rena
10. O be o ka hlalosa bjang tsogo ya pele yeo e begilwego yeo e dirilwego ke moapostola?
10 Nakong ya ge Jesu a be a romela baapostola ba gagwe e le baboledi ba Mmušo, o itše: “Tsošang bahu.” (Mateo 10:5-8) Ee, gore ba kgone go dira se, ba be ba swanetše go ithekga ka matla a Modimo. Kua Jopa ka 36 C.E., mosadi yo a boifago Modimo Doroka (Thabitha) o ile a robala lehung. Mediro ya gagwe e mebotse e be e akareditše go rokela bahlologadi bao ba diilago diaparo, bao lehu la gagwe le ilego la ba bakela go lla mo gogolo. Barutiwa ba ile ba lokišeletša gore a bolokwe gomme ba romela moapostola Petro, mohlomongwe bakeng sa gore a nee khomotšo. (Ditiro 9:32-38) O ile a ntšha bohle ka phapošing ya ka godimo, a rapela gomme a re: “Tabitha, tsoxa!” O ile a ponyologa, a dula fase, a swara Petro seatla gomme yena a mo emiša. Tsogo ye ya pele yeo e begilwego yeo e dirilwego ke moapostola e ile ya dira gore ba bantši ba fetoge badumedi. (Ditiro 9:39-42) Gape e re nea lebaka le lengwe la go ba le kholofelo tsogong.
11. Tsogo ya mafelelo ya pego ya Beibele e bile efe?
11 Tsogo ya mafelelo ya pego ya Beibele e diregile kua Teroa. Ge Paulo a be a ema moo leetong la gagwe la boraro la boromiwa, o ile a lelefatša polelo ya gagwe go fihla bošego-gare. E le ge le ile la fenywa ke go lapa mohlomongwe le ke phišo ya mabone a mantši le go tlala kudu lefelong leo go bokanwego go lona, lesogana leo le bitšwago Oitiko le ile la robala gomme la kgokologa go tšwa lefasetereng la lebato la boraro. Le ile la “rwalwa [le] hwile,” e sego le idibetše. Paulo o ile a itahlela godimo ga Oitiko, a mo gokarela gomme a botša babogedi a re: “Le se kê la ferekana; bophelô bya xaxwe bo sa le mo xo yêna.” Paulo o be a bolela gore bophelo bja lesogana bo be bo bušeditšwe go yena. Bao ba bego ba le gona ba ile ba “homotšwa xa-xolo.” (Ditiro 20:7-12) Lehono, bahlanka ba Modimo ba hwetša khomotšo e kgolo tsebong ya go tseba gore bao e kilego ya ba badirišani ba bona tirelong ya Modimo, kholofelo ya tsogo e tla phethagala go bona.
Tsogo—Kholofelo Yeo e Lego Kgale e le Gona
12. Ke kgodišego efe yeo Paulo a ilego a e bolela pele ga Mmušiši wa Roma Felikisi?
12 Nakong ya ge a be a lekwa ka pele ga Mmušiši wa Roma Felikisi, Paulo o ile a hlatsela gore: “Ke fela ke dumetše tšohle tše di ngwadilwego molaong le baporofeteng, gomme ke na le kholofelo go Modimo . . . ya gore go tlo ba le tsogo ya bahu, ya ba ba lokilego, le ya ba ba sa lokago.” (Ditiro 24:14, 15, PK) Dikarolo tša Lentšu la Modimo tše bjalo ka “Molao,” di bolela bjang ka go tsošwa ga bahu?
13. Ke ka baka la’ng go ka thwe Modimo o ile a kgonthišetša ka tsogo ge a be a nea boporofeta bja pele?
13 Modimo ka boyena o ile a kgonthišetša ka tsogo ge a be a nea boporofeta bja pele kua Edene. Ge a be a ahlola “nôxa e kxolo,” Sathane Diabolo, Modimo o itše: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Kutollo 12:9; Genesi 3:14, 15) Go longwa ga serethe sa peu ya mosadi go be go bolela go bolawa ga Jesu Kriste. Ge e ba Peu yeo e be e tla pšhatla hlogo ya noga ka morago ga moo, Kriste o be a tla swanelwa ke gore a tsošwe bahung.
14. Ke ka tsela efe Jehofa ‘e sego Modimo wa bahu, eupša e lego wa ba phelago’?
14 Jesu o itše: “Le Mošê ó r’yalo ka taba yela ya sethokxwa sa metlwa, xe a re: Morêna ké Modimo wa Aborahama, Modimo wa Isaka, Modimo wa Jakobo. Xomme Modimo xa se Modimo wa bahu, ké Modimo wa ba ba phelaxo; xobane ba mo phelêla bohle.” (Luka 20:27, 37, 38; Ekisodo 3:6) Aborahama, Isaka le Jakobo ba be ba hwile, eupša morero wa Modimo wa go ba tsoša e be e le o kgonthišeditšwego kudu gore o tla phethagala mo e lego gore go yena go be go le bjalo ka ge eka ba a phela.
15. Ke ka baka la’ng Aborahama a be a e-na le lebaka la go dumela tsogong?
15 Aborahama o be a e-na le lebaka la go ba le kholofelo tsogong, ka gobane ge yena le mosadi wa gagwe Sara ba be ba tšofetše kudu e bile ba be ba hwile ge e le tabeng ya bokgoni bja go belega bana, Modimo o ile a tsošološa matla a bona a go belega ka mohlolo. Se se be se swana le tsogo. (Genesi 18:9-11; 21:1-3; Ba-Hebere 11:11, 12) Ge morwa wa bona Isaka a be a e-na le nywaga e ka bago e 25, Modimo o ile a botša Aborahama gore a mo dire sehlabelo. Lega go le bjalo, ge Aborahama a be a le kgaufsi le go bolaya Isaka, morongwa wa Jehofa o ile a thibela seatla sa gagwe. Aborahama “a gopola gore Modimo a ka kgona le go tsoša [Isaka] bahung; gomme e lego gona fao a mo tšerego ka go ba seswantšho.”—Ba-Hebere 11:17-19, PK; Genesi 22:1-18.
16. Aborahama ga bjale o robetše lehung, o letile’ng?
16 Aborahama o be a holofetše tsogong yeo e bego e tla ba gona ka tlase ga pušo ya Mesia, Peu e holofeditšwego. Go ya ka pono ya gagwe ya pele e e-ba motho, Morwa wa Modimo o ile a lemoga tumelo ya Aborahama. Ge e le motho Jesu Kriste, ka gona o ile a botša ba-Juda gore: “Aborahama tata-weno ó hlalaletše xo tlo bôna ’tšatši la-ka.” (Johane 8:56-58; Diema 8:30, 31) Aborahama ga bjale o robetše lehung, o letetše go tsošetšwa go phela lefaseng ka tlase ga Mmušo wa Modimo wa Mesia.—Ba-Hebere 11:8-10, 13.
Bohlatse bjo bo Tšwago Molaong le go Dipsalme
17. “Tše di ngwadilwexo Molaong” di šupa bjang tsogong ya Jesu Kriste?
17 Kholofelo ya Paulo ya tsogo e be e dumelelana le “tše di ngwadilwexo Molaong.” Modimo o ile a botša ba-Isiraele gore: “Le tlišetšê moperisita ngata ya thakangwaxa. [Ka Nisani 16] ngata yeo ó tlo e ekara pele xa Morêna, xore Le thabêlwê ka yôna.” (Lefitiko 23:9-14) Mohlomongwe e le ge a be a naganne ka molao wo, Paulo o ile a ngwala gore: “Kriste ó tsoxile bahung a ba Yêna thakangwaxa ya ba ba ithôbaletšexo.” Ka ge e le “thakangwaxa,” Jesu o ile a tsošwa ka Nisani 16, 33 C.E. Ka morago, nakong ya go ba gona ga gagwe, go be go tla ba le tsogo ya ‘dithakangwaga tša ka morago’—balatedi ba gagwe ba ba tloditšwego ka moya.—1 Ba-Korinthe 15:20-23; 2 Ba-Korinthe 1:21; 1 Johane 2:20, 27.
18. Petro o bontšhitše bjang gore tsogo ya Jesu e be e boletšwe e sa le pele go Dipsalme?
18 Dipsalme le tšona di thekga taba ya tsogo. Ka letšatši la Pentekoste ya 33 C.E., moapostola Petro o ile a tsopola go tšwa go Psalme 16:8-11, a re: “Dafida ó mmoletše [Kriste] a re: Ke dula kè itebanya le Morêna; ó hleng xa-ka; nka se kê ka šutha. Pelo ya-ka e thabêla tšôna; leleme la-ka le hlaletše; ’me mmele wa-ka o rôbala ò iketlile. Xobane môya wa-ka O ka se kê wa o tloxêla ò le kwa bo-dula-bahu. O ka se kê wa lesa Mokxêthwa wa xaxo à bôna xo bôla.” Petro o okeditše ka gore: “[Dafida] o di bone dì s’e-tla, a bolêla xo tsoxa xa Kriste bahung, a re a ka se kê a leswa à le kwa bo-dula-bahu, mmele wa xaxwe xa wa ka wa bôna xo bôla. Yêna Jesu eo, Modimo ó mo tsošitše bahung.”—Ditiro 2:25-32.
19, 20. Petro o ile a tsopola neng go tšwa go Psalme 118:22, gomme se se ile sa tswalanywa bjang le lehu la Jesu le tsogo ya gagwe?
19 Ka morago ga matšatši, Petro o ile a ema pele ga lekgotla la Sanhedrine gomme a tsopola gape go tšwa go Dipsalme. Ge a botšišwa kamoo a fodišitšego mokgopedi wa segole, moapostola o itše: “Tsebang-xê, lena sethšaba ka moka sa Isiraele: Xe motho é à êma fá pele xa lena à fodile, ké ka Leina la Jesu Kriste wa Natsaretha, yo Le mmapotšexo, yo Modimo a mo tsošitšexo bahung. Ké Yéna lefsika le baaxi ba le nyaditšexo; le bile mothêô wa sekhutlô. Xa xo phološô xo e mongwê; le xôna ka tlase xa lexodimo xa xo Leina le lengwê le batho ba le neilwexo, le re kaxo phološwa ka lona.”—Ditiro 4:10-12.
20 Petro mo o be a tsopola go tšwa go Psalme 118:22, a diriša seo e se boletšego ka lehu la Jesu le tsogo ya gagwe. Ba hlohleletšwa ke baetapele ba bona ba bodumedi, ba-Juda ba ile ba gana Jesu. (Johane 19:14-18; Ditiro 3:14, 15) ‘Go gana ga baagi motheo wa sekhutlo’ go feleleditše ka lehu la Kriste, eupša ‘go ba ga lefsika motheo wa sekhutlo’ go be go bontšha go tsošetšwa ga gagwe letagong la moya legodimong. Bjalo ka ge mopsalme a boletše e sa le pele, ‘se se be se e-tšwa go Jehofa ka boyena.’ (Psalme 118:23) Go dira “lefsika” Motheo wa sekhutlo go be go akaretša go mo phagamiša e le Kgoši e Kgethilwego.—Ba-Efeso 1:19, 20.
Go Matlafatšwa ke Kholofelo ya Tsogo
21, 22. Ke kholofelo efe yeo Jobo a ilego a e bolela bjalo ka ge e begilwe go Jobo 14:13-15, gomme se se ka homotša bjang bao ba hwetšwego lehono?
21 Le ge rena ka borena le ka mohla re se ra ka ra bona motho le ge e le mang yo a tsošitšwego bahung, fela re bone dipego tše dingwe tša Mangwalo tšeo di re kgonthišetšago ka tsogo. Ka gona, re ka kgomarela kholofelo yeo e boletšwego ke monna wa go loka Jobo. Ge a be a tlaišega, o ile a lopa ka gore: “A mola O [Jehofa] kabe O nkuta kwa bo-dula-bahu, . . . Ò mpeetše ’baka sa xo tlo nkxopola! A motho e kabe e re xe a hwile, a bušê a phelê. . . . Wa tlo mpitša ka Xo arabêla, Ò hloloxetšwe ’bopya sa diatla tš’axo.” (Jobo 14:13-15) Modimo ‘o tla hlologela modiro wa diatla tša gagwe,’ a kganyoga ka phišego go tsoša Jobo. Seo se re nea kholofelo e kgolo gakaakang!
22 Setho sa lapa se se boifago Modimo se ka babja o šoro, go etša Jobo, gomme se ka ba sa ineela go lenaba lehu. Bao ba hwetšwego ba ka tšholla megokgo ya manyami, go fo swana le ge Jesu a ile a llišwa ke lehu la Latsaro. (Johane 11:35) Eupša ke mo go homotšago gakaakang go tseba gore Modimo o tla bitša gomme bao ba lego kgopolong ya gagwe ba tla araba! Go tla ba bjalo ka ge eka ba boile leetong—ba sa babje goba ba golofetše, eupša ba phela gabotse kudu.
23. Ba bangwe ba ile ba bontšha bjang kgodišego ya bona kholofelong ya tsogo?
23 Lehu la Mokriste yo a botegago yo a tšofetšego le ile la tutueletša badumedi-gotee go ngwala gore: “Hle amogela kwelobohloko ya rena e tseneletšego mabapi le go lahlegelwa ga gago ke mmago. Go tla tšea lebakanyana le le sego kae go fihlela ge re mo amogela gape—e le yo mobotse e bile a e-na le matla!” Batswadi bao ba lahlegetšwego ke morwa wa bona ba itše: “Re lebeletše pele gakaakang letšatšing leo ka lona Jason a tla bego a tsoga! O tla gaša mahlo ka gohle gomme a bona Paradeise yeo e lego kgale a e hlologetše. . . . Ke tutuetšo e kgolo gakaakang go rena bao ba bego ba mo rata gore re be moo le rena.” Ee, le gona re ka leboga gakaakang gore kholofelo ya tsogo e kgonthišeditšwe!
Karabo ya Gago ke Efe?
• Go ba le tumelo tokišetšong ya Modimo ya go tsoša bahu go ka re hola bjang?
• Ke ditiragalo dife tše di begilwego ka Mangwalong tšeo di re neago lebaka la go ba le kholofelo tsogong?
• Ke ka baka la’ng go ka thwe tsogo ke kholofelo yeo e lego kgale e le gona?
• Ke kholofelo efe e matlafatšago yeo re ka bago le yona ka bahu?
[Dipotšišo tša Thuto]
[Seswantšho go letlakala 10]
Ka matla a tšwago go Jehofa, Eliya o ile a bušetša morwa yo monyenyane wa mohlologadi bophelong
[Seswantšho go letlakala 12]
Ge Jesu a be a tsošetša morwedi wa Jairo bophelong, batswadi ba gagwe ba be ba tlabegile ka tlalelo
[Seswantšho go letlakala 15]
Letšatšing la Pentekoste ya 33 C.E., moapostola Petro o ile a hlatsela ka sebete gore Jesu o be a tsošitšwe bahung