Bagoeledi Ba Mmušo Ba A Bega

Ba Bohlokwa go Jehofa ke Bao ba mo Ratago

LIBANONI e ile ya tsebja ka methopo ya yona ya tlhago ga e sa le go tloga mehleng ya Beibele. (Psalme 72:16; Jesaya 60:13) Seo se bego se ratega kudu e be e le metsedare ya yona e megolo, yeo e bego e nyakwa kudu e le didirišwa tša go aga ka baka la botse bja yona, monkgo o bosana le go swarelela ga yona. Lekgolong la pele la nywaga, selo se sengwe se bohlokwa kudu se ile sa tšwa Libanoni. Ebangedi ya Mareka e bega gore go tloga Tiro le Sidone, tšhemong ya kgale ya Libanoni, “bontši byo boxolo bya ba ba kwilexo tše [Jesu] a di diraxo, ba tla xo Yêna.”​—Mareka 3:8.

Ka mo go swanago lehono, Libanoni e tšwela pele go tšweletša seenywa seo se lego bohlokwa kudu mahlong a Jehofa. Diphihlelo tše di latelago di bontšha se.

• Hlatse ya mofsa yeo e bitšwago Wissam e ile ya kgopelwa gore e nee polelo ya metsotso e 30 klaseng ya yona sekolong. Wissam o ile a phetha ka gore se e be e tla ba sebaka se sebotse sa go nea bohlatse. Ka gona, o ile a diriša puku ya Life​—How Did It Get Here? By Evolution or by Creation? gomme a lokišetša polelo ka sehlogo sa tlholo. Lega go le bjalo, ka morago ga go bona taba, morutiši wa Wissam o ile a bolela gore ka ge e be e le thuto ya bohlokwa kudu, Wissam o be a ka katološetša polelo ya gagwe go metsotso e 45.

Ge Wissam a be a thoma polelo ya gagwe, morutiši wa gagwe o ile a mo tsena ganong gomme a roma yo mongwe gore a yo bitša hlogo ya sekolo. Kapejana hlogo ya sekolo e ile ya fihla gomme Wissam a thoma gape. Ge e dutše e theeditše dipotšišo tšeo Wissam a ilego a di botšiša matsenong a polelo ya gagwe, hlogo ya sekolo e ile ya thaba kudu gomme ya bolela gore barutwana ka moka ba swanetše go hwetša kopi e swantšhitšwego ya polelo.

Ka morago ga lebakanyana, morutiši yo mongwe yoo a bego a feta o ile a lemoga lethabo leo le bego le le kamoo phapošing yeo gomme a botšiša ka seo se bego se direga. Ge a be a botšwa, o ile a botšiša ge e ba Wissam a be a leka go hlatsela tlholo goba tlhagelelo. Karabo e bile gore, “Tlholo.” Ka morago ga ge a tsebile gore Wissam ke yo mongwe wa Dihlatse tša Jehofa, morutiši o ile a botša klase gore: “Le tla ikwela ka polelo ya gagwe gore thutamahlale e thekga tlholo, e sego tlhagelelo.”

Go ile gwa utologa gore morutiši yo o be a e-na le kopi ya puku ya Creation gomme o be a dutše a e dirišetša go nea dithuto yunibesithing! Pele a ka tloga, o ile a botšiša ge e ba a be a ka boa letšatšing le le latelago a e-na le barutwana ba gagwe e le gore Wissam a ka bolela le klase ya gagwe. Seo se ile sa feleletša ka bohlatse bjo bongwe bjo bobotse ka Jehofa.

• Nina wa nywaga e 22 o be a nyoretšwe meetse a therešo. Ka letšatši le lengwe motswala’gwe o ile a mo nea Beibele gomme a mo iša Kerekeng ya Pentekoste. Nina o ile a bala Beibele ka lethabo gomme a ithuta go seo a bego a se bala gore Bakriste ba swanetše go dira boboledi, ka gona o ile a thoma go boledišana le bao a ba tlwaetšego. Yo mongwe le yo mongwe yoo a ilego a bolela le yena o be a mmotšiša gore: “Na o yo mongwe wa Dihlatse tša Jehofa?” Seo se ile sa mo tlaba.

Nywaga e tshela ka morago, Dihlatse tša Jehofa di ile tša etela legaeng la gabo Nina gomme tša mmotša mabapi le Mmušo wa Modimo. Mathomong o ile a leka go swaya dithuto tša tšona diphošo. Lega go le bjalo, o ile a hwetša gore dikarabo tša tšona ka moka e be e le tša tlhaologanyo gomme di theilwe ka Beibeleng.

Seo Nina mafelelong a ilego a ithuta sona​—leina la Modimo, Jehofa; ditšhegofatšo tša Mmušo; le tše dingwe​—se ile sa mo kgonthišetša gore o hweditše therešo. O ile a neela bophelo bja gagwe go Modimo gomme a kolobetšwa. Nywaga e šupago e fetilego Nina o be a dutše a hlankela e le moebangedi wa nako e tletšego. Ka kgonthe, Jehofa o šegofatša bao ba tlogago ba mo rata e le ka kgonthe.​—1 Ba-Korinthe 2:9.