“Bohlale bo go ba ba Ipoetšago”

“Ke eng seo Jehofa a se kgopelago go wena ge e se . . . go sepela ka boipoetšo le Modimo wa gago?”​—MIKA 6:8, NW.

1, 2. Boipoetšo ke eng, gomme bo fapana bjang le boipoti?

MOAPOSTOLA yo a tumilego o gana go ikgogela tlhokomelo. Moahlodi wa mo-Isiraele yo sebete o ipitša yo monyenyane go bohle lapeng la tatagwe. Motho yo a phagamego kudu yo a kilego a phela o dumela gore ga a na taolo e feletšego. Yo mongwe le yo mongwe wa banna ba o bontšha boipoetšo.

² Boipoetšo bo fapana le boipoti. Motho yo a ipoetšago o leka-lekanya bokgoni bja gagwe le go ba bohlokwa ga gagwe ka tsela e leka-lekanego e bile ga a na boikgodišo goba boikgantšho bja lefeela. Go e na le go ba yo a ikgodišago, yo a ikgantšhago goba yo a ratago maemo, motho yo a ipoetšago o dula a lemoga mafokodi a gagwe. Ka gona, o hlompha le go naganela ka mo go swanetšego maikwelo le dipono tša ba bangwe.

3. Ke ka tsela efe bohlale ‘bo lego go ba ba ipoetšago’?

³ Beibele e bolela ka lebaka le lebotse gore: “Bohlale bo go ba ba ipoetšago.” (Diema 11:2, PK) Motho yo a ipoetšago o bohlale ka gobane o latela tsela yeo Modimo a e amogelago, gomme o phema moya wa go ipota wo o feleletšago ka go se hlompšhe. (Diema 8:13; 1 Petro 5:5) Bohlale bja boipoetšo bo gatelelwa ke tsela ya bophelo ya bahlanka ba Modimo ba bantši. Anke re ahla-ahleng mehlala e meraro yeo e tsopotšwego serapeng sa pele.

Paulo​—‘Mohlanka’ le ‘Molaki’

4. Ke tokelo efe ya moswana-noši yeo Paulo a ilego a e thabela?

⁴ Paulo e be e le motho yo a tumilego gare ga Bakriste ba pele, e bile go le bjalo ka mo go kwešišegago. Nakong ya bodiredi bja gagwe, o ile a sepela dikhilomithara tše dikete lewatleng le nageng, gomme a hloma diphuthego tše dintši. Go oketša moo, Jehofa o ile a šegofatša Paulo ka dipono le mpho ya go bolela ka maleme a šele. (1 Ba-Korinthe 14:18; 2 Ba-Korinthe 12:1-5) O ile a ba a budulela Paulo gore a ngwale mangwalo a 14 ao ga bjale e lego karolo ya Mangwalo a Bakriste a Segerika. Go molaleng gore go ka bolelwa gore maitapišo a Paulo a ile a feta a baapostola ba bangwe ka moka.​—1 Ba-Korinthe 15:10.

5. Paulo o ile a bontšha bjang gore o be a itebelela ka tsela ya boipoetšo?

⁵ Ka ge Paulo a be a eteletše pele modirong wa Bokriste, ba bangwe mo gongwe ba ka letela gore ba hwetše a be a thabela go newa tlhokomelo e kgethegilego, e bile a ikgantšha ka maemo a gagwe a taolo. Lega go le bjalo, ga go bjalo ka gobane Paulo o be a ipoeditše. O be a ipitša “e monyenyane xo baapostola,” gomme a oketša ka gore: “Xa k’a swanêlwa xo bitšwa moapostola, xobane ke tlaišitše phuthêxô ya Modimo.” (1 Ba-Korinthe 15:9) Ka ge e be e le yo a kilego a tlaiša Bakriste, Paulo le ka mohla o be a sa lebale gore e be e le feela ka botho bjo bo sa swanelago moo a bego a ka kgona go  ba le tswalano le Modimo ka mo go feletšego, go se sa bolelwa ka go thabela ditokelo tše kgethegilego tša tirelo. (Johane 6:44; Ba-Efeso 2:8) Le gona, Paulo o be a sa nagane gore dilo tše di kgethegilego tšeo a bego a di fihlelela bodireding di be di mo dira gore e be yo a phagametšego ba bangwe.​—1 Ba-Korinthe 9:16.

6. Paulo o ile a bontšha bjang boipoetšo ditirišanong tša gagwe le ba-Korinthe?

⁶ Boipoetšo bja Paulo bo be bo bonagala kudu-kudu ditirišanong tša gagwe le ba-Korinthe. Go bonagala ba bangwe ba bona ba be ba kgahlišwa ke bao ba bego ba nagana gore ke balebeledi ba ba tumilego, go akaretša Apollo, Kefase le Paulo ka boyena. (1 Ba-Korinthe 1:11-15) Eupša Paulo ga se a ka a kgopela theto ya ba-Korinthe goba gona go diriša kgahlego ya bona ka boithati. Ge a be a ba etetše, ga se a ka a ithola “ka bonatla bya polêlô le bohlale.” Go e na le moo, Paulo o ile a bolela ka yena le bagwera ba gagwe a re: “A batho ba re semê bahlanka ba Kriste le balaki ba diphihlô tša Modimo.” *​—1 Ba-Korinthe 2:1-5; 4:1.

7. Paulo o ile a bontšha bjang boipoetšo gaešita le ge a be a nea keletšo?

⁷ Paulo o be a bontšha boipoetšo le ge a be a swanelwa ke go nea keletšo e matla gotee le tlhahlo. O be a lopa Bakriste-gotee le yena ka “mabobo a Modimo” le ‘ka lerato’ go e na le go diriša matla a maemo a gagwe a taolo a boapostola. (Ba-Roma 12:1, 2; Filemone 8, 9) Ke ka baka la’ng Paulo a ile a dira se? Ka gobane o be a itebelela ka tsela ya kgonthe e le ‘modirišani’ wa bana babo, e sego e le ‘mmuši wa tumelo ya bona.’ (2 Ba-Korinthe 1:24) Ga go na pelaelo gore boipoetšo bja Paulo ke bjona bo thušitšego go mo dira gore a ratwe kudu-kudu diphuthegong tša Bokriste tša lekgolong la pele la nywaga.​—Ditiro 20:36-38.

Go ba le Pono ya Boipoetšo ka Ditokelo tša Rena

8, 9. (a) Ke ka baka la’ng re swanetše go itebelela ka tsela ya boipoetšo? (b) Bao ba nago le tekanyo e itšego ya boikarabelo ba ka bontšha bjang boipoetšo?

⁸ Paulo o beetše Bakriste ba mehleng yeno mohlala o mobotse. Go sa šetšwe gore ke boikarabelo bofe bjo re bo neilwego, ga go na le o tee wa rena yo a swanetšego go nagana gore o phagametše ba bangwe. Paulo o ngwadile gore: “Xe motho a ka ithsema a re: Ke selô, mola à se selô, ó a  iphora.” (Ba-Galatia 6:3) Ka baka la’ng? Ka gobane “ba dirile dibe bohle, ba hlaya letaxô la Modimo.” (Ba-Roma 3:23, mongwalo o sekamego ke wa rena; 5:12.) Ee, le ka mohla ga se ra swanela go lebala gore ka moka ga rena re abetše sebe le lehu go Adama. Ditokelo tše di kgethegilego ga di re phagamiše go tloga boemong bja rena bja tlase bja sebe. (Mmoledi 9:2) Go etša ge go be go le bjalo ka Paulo, ke feela ka botho bjo bo sa swanelago moo e lego gore batho ba kgona go ba le tswalano le Modimo ka mo go feletšego, go se sa bolelwa ka go mo hlankela karolong e itšego yeo e lego tokelo.​—Ba-Roma 3:12, 24.

⁹ Ka baka la go lemoga se, motho yo a ipoetšago ga a ikgantšhe ka ditokelo tša gagwe goba gona go ikgodiša ka dilo tšeo a di fihleletšego. (1 Ba-Korinthe 4:7) Ge a nea keletšo goba tlhahlo, o dira bjalo e le modirišani​—e sego molaodi. Ka kgonthe, e tla ba mo go fošagetšego gore motho yo a nago le bokgoni bjo bogolo medirong e itšego a kgopele theto e tšwago go ba bangwe goba a diriše kgahlego ya badumedi-gotee ka tsela ya boithati. (Diema 25:27; Mateo 6:2-4) Theto e nnoši yeo e swanelwago ke selo le ge e le sefe e tšwa go ba bangwe​—gomme e swanetše go tla e se ya kgopelwa. Ge e ba e e-tla, ga se ra swanela go e dumelela gore e re dire gore re ikgopole kudu go feta kamoo go swanetšego.​—Diema 27:2; Ba-Roma 12:3.

10. Hlalosa kamoo ba bangwe bao ba ka bonagalago e le ba tlasana eupša e ka bago “bahumi tumelong” e le ka kgonthe.

¹⁰ Ge e ba re filwe tekanyo e itšego ya boikarabelo, boipoetšo bo tla re thuša gore re pheme go itheta ka mo go sa swanelago, re nea kgopolo ya gore phuthego e atlega feela ka baka la maiteko a rena le bokgoni bja rena. Ka mohlala, mo gongwe re ka ba re filwe ka mo go kgethegilego tabeng ya go ruta. (Ba-Efeso 4:11, 12) Lega go le bjalo, ge e ba re ipoetša, re swanetše go lemoga gore tše dingwe tša dithuto tše dikgolo kudu tšeo re ithutago tšona dibokeng tša phuthego ga di newe go tšwa sethaleng. Ka mohlala, na ga o kgothatšege ge o bona motswadi yo a se nago molekane yo a tlago Holong ya Mmušo ka mehla a e-tla le bana ba gagwe a ba etetša? Goba motho yo a gateletšegilego yo a tlago dibokeng ka potego go sa šetšwe maikwelo ao a phegelelago a go ikwa a sa swanelege? Goba mofsa yo a dirago tšwelopele ya moya e sa kgaotšego go sa šetšwe ditutuetšo tše di gobogilego tša sekolong le ge e le kae go gongwe? (Psalme 84:10) Batho ba ba ka ba e se bao ba tumilego. Diteko tša potego tšeo ba lebeletšanego le tšona bontši bja tšona ke tšeo di sa hlokomelwego ke ba bangwe. Lega go le bjalo, e ka ba e le “bahumi tumelong” go etša bao ba tumilego kudu. (Jakobo 2:5) Go ba gona, potego ke yona yeo mafelelong e dirago gore motho a amogelwe ke Jehofa.​—Mateo 10:22; 1 Ba-Korinthe 4:2.

Gideoni​—‘Yo Monyenyane’ Lapeng la Tatagwe

11. Gideoni o ile a bontšha boipoetšo ka tsela efe ge a be a boledišana le morongwa wa Modimo?

¹¹ Gideoni, lesogana la senatla la leloko la Manase, le phetše mehleng ya khuduego historing ya Isiraele. Batho ba Modimo ba ile ba tlaišega ka tlase ga kgatelelo ya Midiane ka nywaga e šupa. Lega go le bjalo, bjale go be go fihlile nako ya gore Jehofa a lopolle batho ba gagwe. Ka gona, morongwa o ile a tšwelela go Gideoni gomme a re: “Morêna ó na naxô’, wêna monna yo boxale.” Gideoni o be a ipoeditše, ka gona ga se a ka a tloga a kgotsofatšwa ke theto ye e sa letelwago. Go e na le moo, o ile a botša morongwa ka tlhompho a re: “Mong ’a-ka hlê, xe Morêna à na le rena, dilô tšé ka moka ké ka ’baka la’ng dì re tšwêlêlêla?” Morongwa o ile a hlatholla ditaba ka mo go kwalago gomme a botša Gideoni a re: ‘O tla namolela Isiraele diatleng tša ba-Midiane.’ Gideoni o ile a arabela bjang? Go e na le go amogela kabelo ka phišego e le sebaka sa go itira mogale wa setšhaba, Gideoni o ile a araba ka gore: “Aowii Mong ’a-ka! Ke tlo namolêla Isiraele ka’ng? Etšwe leloko lešo è le lôna le lenyenyane mo xo Ba-Manase,  le nna kè le yêna e monyenyane mo kxorong ya Tata wešo!” A boipoetšo bjo bogolo gakaakang!​—Baahlodi 6:11-15.

12. Gideoni o ile a bontšha bjang bohlale ge a be a phetha kabelo ya gagwe?

¹² Pele a ka romela Gideoni ntweng, Jehofa o ile a mo leka. Bjang? Gideoni o ile a botšwa gore a phušole aletare ya tatagwe ya Baali le go thokga kokwane e kgethwa yeo e bego e eme kgaufsi le yona. Kabelo ye e be e nyaka sebete, eupša Gideoni gape o ile a bontšha boipoetšo le bohlale ka tsela yeo a ilego a e phetha ka yona. Go e na le go iponagatša phatlalatša, Gideoni o ile a šoma lefsifsing la bošego nakong ya ge a be a tla feta a sa bonwe. Go feta moo, Gideoni o ile a tšea kabelo ya gagwe ka šedi e nyakegago. O ile a sepela le bahlanka ba lesome​—mohlomongwe e le bakeng sa gore ba bangwe ba kgone go hlapetša ge ba bangwe ka moka ba be ba mo thuša go phušola aletare le kokwane e kgethwa. * Lega go le bjalo, ka tšhegofatšo ya Jehofa Gideoni o ile a phetha kabelo ya gagwe, gomme ge nako e dutše e e-ya o ile a dirišwa ke Modimo gore a lopolle ba-Isiraele go ba-Midiane.​—Baahlodi 6:25-27.

Go Bontšha Boipoetšo le Bohlale

13, 14. (a) Re ka bontšha bjang boipoetšo ge re fiwa tokelo ya tirelo? (b) Ngwanabo rena A. H. Macmillan o ile a bea bjang mohlala o mobotse tabeng ya go bontšha boipoetšo?

¹³ Go na le mo gontši moo re ka ithutago gona boipoetšong bja Gideoni. Ka mohlala, re arabela bjang ge re fiwa tokelo ya tirelo? Na re nagana pele ka botumo goba leina leo e tlago go le tliša? Goba na re naganišiša ka tsela ya boipoetšo le ka thapelo ge e ba re ka kgona go phethagatša dinyakwa tša kabelo yeo? Ngwanabo rena A. H. Macmillan, yo a feditšego bophelo bja gagwe bja lefaseng ka 1966, o beile mohlala o mobotse tabeng ye. C. T. Russell e lego mopresidente wa pele wa Mokgatlo wa Watch Tower, o kile a kgopela Ngwanabo rena Macmillan gore a nee dikgopolo  tša gagwe mabapi le taba ya gore ke mang yo a ka etelelago modiro pele ge yena a se gona. Poledišanong yeo e ilego ya latela, Ngwanabo rena Macmillan le ganyenyane ga se a ka a ipolelela, le ge go ka ba go ile gwa ba bonolo kudu gore a dire bjalo. Mafelelong, Ngwanabo rena Russell o ile a kgothaletša Ngwanabo rena Macmillan gore a naganišiše ka go amogela kabelo yeo. Nywaga ka morago, Ngwanabo rena Macmillan o ile a ngwala gore: “Ke ile ka ema moo ke tlabegile. Ke ile ka naganišiša ka yona ka mo go tseneletšego, gomme ka e rapelela lebakanyana pele ga ge mafelelong ke be ke mmotša gore ke be ke tla thabela go dira sohle seo nka se kgonago bakeng sa go mo thuša.”

¹⁴ Go se go ye kae ka morago ga moo, Ngwanabo rena Russell o ile a hlokofala, a tlogela sekgoba sa mopresidente wa Mokgatlo wa Watch Tower se se na motho. Ka ge Ngwanabo rena Macmillan e be e le yena yo a bego a swere marapo leetong la mafelelo la boboledi la Ngwanabo rena Russell, ngwanabo rena yo mongwe o ile a bolela go yena a re: “Mac, o na le sebaka se segolo sa go ka se tsokama. O bile moemedi yo a kgethegilego wa Ngwanabo rena Russell ge a be a sepetše, gomme o re boditše ka moka ga rena gore re dire go ya kamoo o laelago ka gona. Ee, o sepetše gomme ga se a ka a hlwa a sa boa. Go bonagala eka ke wena yo a swanetšego go tšwela pele.” Ngwanabo rena Macmillan o ile a arabela ka gore: “Ngwanešo, yeo ga se tsela yeo o swanetšego go lebelela taba ye ka yona. Wo ke modiro wa Morena gomme sebaka se nnoši seo motho a se hwetšago mokgatlong wa Morena ke seo Morena a bonago go swanetše gore a go nee sona; gomme ke kgolwa gore ga ke swanelegele modiro wo.” Ka morago Ngwanabo rena Macmillan o ile a bolelela motho yo mongwe bakeng sa maemo ao. Ka go swana le Gideoni, o be a itebelela ka tsela ya go ipoetša​—e lego pono yeo re dirago gabotse ge re e-ba le yona.

15. Tše dingwe tša ditsela tše di šomago tšeo ka tšona re ka dirišago temogo ge re boledišana le ba bangwe ke dife?

¹⁵ Le rena re swanetše go ba le boipoetšo tseleng yeo re phethago kabelo ya rena ka yona. Gideoni o be a le bohlale, gomme o ile a katanela gore a se ke a galefiša baganetši ba gagwe ka mo go sa nyakegego. Ka mo go swanago, modirong wa rena wa boboledi, re swanetše go ba ba ipoetšago le ba bohlale mabapi le tsela yeo re boledišanago le ba bangwe ka yona. Ke therešo gore re ntweng ya moya bakeng sa go šwalalanya “dibô” le “maanô.” (2 Ba-Korinthe 10:4, 5) Eupša ga se ra swanela go bolela le ba bangwe ka go ba tšeela fase goba go ba nea lebaka le ge e le lefe le le kwalago la gore ba kgopišwe ke molaetša wa rena. Go e na le moo, re swanetše go hlompha dipono tša bona, re bontšhe seo re ka bago re swana le bona ka sona, ke moka re lebiše tlhokomelo dikarolong tše di nepagetšego tša molaetša wa rena.​—Ditiro 22:1-3; 1 Ba-Korinthe 9:22; Kutollo 21:4.

Jesu​—Mohlala o Mogolo wa Boipoetšo

16. Jesu o bontšhitše bjang gore o be a itebelela ka tsela ya boipoetšo?

¹⁶ Mohlala o mobotse kudu wa boipoetšo ke wa Jesu Kriste. * Go sa šetšwe tswalano ya kgaufsi yeo a bego a e-na le yona le Tatagwe, Jesu ga se a ka a dika-dika go dumela gore ditaba tše dingwe di be di se matleng a gagwe gore a ka di laola. (Johane 1:14) Ka mohlala, nakong ya ge mmago Jakobo le Johane a be a kgopela gore barwa ba gagwe ba babedi ba dule ka lehlakoreng la Jesu mmušong wa gagwe, Jesu o itše: “Xe e le xo dula ka mo letsoxong la-ka le letona le xo la ntsôxôšô, xa se mo motho a kaxo newa ke Nna.” (Mateo 20:20-23) Lebakeng le lengwe, Jesu o ile a dumela ka bolokologi gore: “Xa xo se ke kxônaxo xo se dira ka la-ka; . . . xa ke nyake se Nna ke se rataxo, ke nyaka se se ratwaxo ke E a nthomilexo.”​—Johane 5:30; 14:28; Ba-Filipi 2:5, 6.

17. Jesu o ile a bontšha bjang boipoetšo ditirišanong tša gagwe le ba bangwe?

¹⁷ Jesu o be a phagametše batho ba sa phethagalago ka ditsela tšohle, gomme o be a filwe bolaodi bjo bo sa lekanywego ke Tatagwe, Jehofa. Lega go le bjalo, Jesu o be a ipoeditše ditirišanong tša gagwe le balatedi ba gagwe. O be a sa ba imetše ka pontšho ya go goga tlhokomelo ya go bontšha tsebo. O ile a bontšha go kgomega le kwelobohloko gomme a naganela dinyakwa tša bona tša batho. (Mateo 15:32; 26:40, 41; Mareka 6:31) Ka gona, le ge Jesu a be a phethagetše, e be e se motho yo a nyakago gore dilo di dirwe ka mokgwa o phethagetšego. Le ka mohla o be a sa nyake mo gontši go barutiwa ba gagwe go feta kamoo ba bego ba ka kgona go nea ka gona, e bile le ka mohla o be a sa ba imetše tekanyo e fetago yeo ba bego ba ka kgona go e rwala. (Johane 16:12) Ga go makatše ge ba bantši gakaakaa ba be ba hwetša e le yo a lapološago!​—Mateo 11:29.

Ekiša Mohlala wa Jesu wa Boipoetšo

18, 19. Re ka ekiša bjang boipoetšo bja Jesu (a) tseleng yeo re itebelelago ka yona, le (b) tseleng yeo re swarago ba bangwe ka yona?

¹⁸ Ge e ba motho yo a phagamego kudu yo a kilego a phela a bontšhitše boipoetšo, ke mo go swanetšego kudu gakaakang gore re dire bjalo. Batho ba sa phethagalago gantši ba dika-dika go dumela gore le gatee ga ba na taolo e feletšego. Lega go le bjalo, ka go ekiša Jesu, Bakriste ba katanela go ipoetša. Ga se bao ba ikgantšhago kudu go ka nea bao ba swanelegago boikarabelo gore ba be le bjona; e bile ga se bao ba ikgogomošago le bao ba sa ikemišetšago go ka amogela tlhahlo e tšwago go bao ba neilwego matla a go e nea. Ka go bontšha moya wa tirišano, ba dumelela gore dilo tšohle ka phuthegong di dirwe “ka bothakxa le ka molaô.”​—1 Ba-Korinthe 14:40.

¹⁹ Gape boipoetšo bo tla re tutueletša gore re be le teka-tekano dilong tšeo re di letetšego go ba bangwe gotee le gore re naganele dinyakwa tša bona. (Ba-Filipi 4:5) Re ka ba re e-na le bokgoni bjo itšego le dika tšeo re lego matla go tšona tšeo ba bangwe ba ka bago ba se na tšona. Lega go le bjalo, re ka se ke ka mehla ra letela gore ba bangwe ba dire dilo go ya kamoo re bego re tla rata ba di dira ka gona ge e ba re ipoeditše. Ka go tseba gore motho yo mongwe le yo mongwe o na le mafokodi a gagwe, re tla naganela diphošo tša ba bangwe ka boipoetšo bjohle. Petro o ngwadile gore: “Se sexolo-thata a [e] bê leratanô le tletšexo, xobane leratô le bipa dikaroxô tšohle.”​—1 Petro 4:8.

20. Ke eng seo re ka se dirago go fenya tshekamelo le ge e le efe ya go se ipoetše?

²⁰ Ka ge re ithutile, bohlale ka kgonthe bo go ba ba ipoetšago. Ka gona, go thwe’ng ge e ba o hwetša gore o na le ditshekamelo tša go ba yo a sa ipoetšego goba yo a ipotago? O se ke wa nyema moko. Go e na le moo, latela mohlala wa Dafida yo a ilego a rapela ka gore: “Nna molata wa xaxo, O nkêfêlê maipoti, a se ké a mpuša.” (Psalme 19:13) Ka go ekiša tumelo ya banna ba swanago le Paulo, Gideoni le​—ka godimo ga ba bangwe ka moka​—Jesu Kriste, rena ka noši re tla iponela therešo ya mantšu a rego: “Bohlale bo go ba ba ipoetšago.”​—Diema 11:2, PK.

[Mengwalo ya ka tlase]

Na o a Gopola?

• Boipoetšo ke eng?

• Re ka ekiša bjang boipoetšo bja Paulo?

• Ke eng seo re ka ithutago sona mabapi le boipoetšo mohlaleng wa Gideoni?

• Jesu o beile bjang mohlala o mogolo wa boipoetšo?

[Dipotšišo tša Thuto]

[Seswantšho go letlakala 15]

Boipoetšo bja Paulo bo mo dirile gore a ratwe ke Bakriste-gotee le yena

[Seswantšho go letlakala 17]

Gideoni o ile a diriša bohlale go phetheng thato ya Modimo

[Seswantšho go letlakala 18]

Jesu, Morwa wa Modimo, o bontšha boipoetšo go tšohle tšeo a di dirago