Go Hlompha Matla a Taolo​—Ke ka Baka La’ng go le Bohlokwa?

KE MANG yo a sa lebogego gore maphodisa a na le matla a go golega disenyi tšeo di utswago dithoto tša rena goba tšeo di beago malapa a rena kotsing? Na ga re thabele taba ya gore dikgoro tša tsheko di na le matla a go otla disenyi bakeng sa go šireletša setšhaba?

Ditirelo tše dingwe tšeo di thušago tša setšhaba tše bjalo ka go lokiša ditsela, tshepedišo ya ditšhila le thuto​—tšeo gantši di lefšago ka makgetho ao a nyakwago ke bao ba lego matleng a taolo a mmušo​—le tšona di ka tla kgopolong. Bakriste ba therešo ba ka pele-pele tabeng ya go lemoga gore tlhompho ya go hlompha matla a taolo ao a hlomilwego ke ya bohlokwa. Eupša tlhompho e bjalo e fihla bokgoleng bofe? Le gona ke dikarolong dife tša bophelo moo tlhompho ya go hlompha matla a taolo e nyakegago?

Matla a Taolo Setšhabeng

Beibele e botša batho ka moka, go sa šetšwe gore ke badumedi goba bao ba sa dumelego gore ba hlomphe matla a taolo a mmušo, ao a šomago bakeng sa go hola setšhaba. Moapostola Paulo wa Mokriste o ile a ngwalela badumedi-gotee le yena kua Roma mabapi le se, gomme ke mo go thušago go ela hloko seo a se bolelago bjalo ka ge se ngwadilwe go Ba-Roma 13:1-7.

Paulo e be e le modudi wa Roma, gomme Roma e be e le mmušo wa lefase ka nako yeo. Lengwalo la Paulo leo le ngwadilwego mo e ka bago ka ngwaga wa 56 C.E., le ile la eletša Bakriste gore e be badudi bao ba beago mohlala. O ngwadile gore: “Batho bohle a ba se xanê xo bušwa ke ba ba filwexo matla a xo buša [“babuši ba bagolo,” NW]; xobane xa xo na mmušô o sa tšwexo xo Modimo; mmušô wo o lexo xôna o beilwe ke Modimo.”

Paulo mo o hlalosa gore go be go ka se be le mmušo le ge e le ofe wa motho ge e ba Modimo a se a o dumelela. Ka kgopolo yeo babuši ba bagolo ba na le boemo bjo bo lekanyeditšwego thulaganyong ya morero wa Modimo. Ka gona go latela taba ya gore “e a nganganaxo le mmušô, ó lwa le molaô wa Modimo.”

Le ge badudi bao ba dirago botse ba ka amogela theto e tšwago go babuši ba bagolo, babuši ba le bona ba na le matla a go otla bafoši. Bao ba dirago dilo tše mpe ba na le lebaka le le kwagalago  la go boifa tshwanelo ya bao ba nago le matla a taolo ya go dira e le “molefetši,” ka ge mebušo e dira bjalo e le “mohlanka wa Modimo.”

Paulo o phetha go bea mabaka ga gagwe ka gore: “Xo swanetše-xê xe re sa xane xo bušwa, e sexo ka xo šia kôtlô, è le ka ’baka la letswalô. Ké ka ’baka leo Le thšêlaxo makxêthô; xobane ké batseta ba Modimo, ba ba beetšwexo wôna modirô woo.”

Boikarabelo bakeng sa tirišo ya makgetho bo ka diatleng tša babuši ba bagolo, e sego go molefi wa lekgetho. Ka ge e le modudi yo a botegago, Mokriste o boloka letswalo leo le hwekilego. O a tseba gore ka go ikokobeletša babuši ba bagolo le go lefa makgetho a swanetšego go lefša, ga se feela gore o kgomarela molao wa setšhaba seo a dulago go sona eupša gape o phela ka go dumelelana le tšeo Modimo a di nyakago.

Lapa le Matla a Taolo

Go thwe’ng ka matla a taolo ka lapeng? Matšatšing a pele a bophelo bja gagwe, ngwana gantši o inyakela tlhokomelo ka go lla goba gaešita le ka go goeletša. Eupša motswadi yo bohlale o tla lemoga seo e tlogago e le sona seo ngwana wa gagwe a se nyakago gomme a se ke a tsoša kgalefo. Bana ba bangwe, ge ba dutše ba gola, ba newa boikgethelo gomme ba dumelelwa go ipeela ditekanyetšo tša bona ka noši. Ka go hlaelelwa ke phihlelo, ba ka akaretšwa bosenying goba ditirong tše dingwe tše mpe, ba senyetša bobedi lapa le setšhaba ka kakaretšo bjalo ka ge mebušo e mentši yeo e re dikologilego e tseba seo gabotse kudu.

Rosalind Miles e lego mongwadi wa Children We Deserve o re: “Batswadi ba laya bana nako e šetše e ile. Nako ya go thoma ke ya ge ngwana a belegwa.” Ge e ba go tloga mathomong batswadi ba bolela ka lentšu le botho, ba bontšha matla a taolo a nago le tlhokomelo gomme e le bao ba tsepamego ditirong tša bona, bana ba bona kapejana ba tla ithuta go amogela taolo yeo le tayo e lerato tšeo di tšwago go seo.

Beibele e na le tsebišo e ntši mabapi le matla a taolo ka lapeng. Pukung ya Diema, monna yo bohlale Salomo o lebiša tlhokomelo boteeng bja batswadi bao ba boifago Modimo pele ga bana ba bona ka gore: “Ngwan’a-ka! Theetša tayô ya tat’axo; O se nyatšê thutô ya mm’axo.” (Diema 1:8) Ge batswadi ba kgomarela mohuta o bjalo wa go swarišana mo go bjalo mo go nago le teka-tekano pele ga bana ba bona, bana ba tseba moo ba emego gona. Ba ka leka go bapala ka motswadi yo mongwe ka yo mongwe boitekong bja go leka go ikhweletša tsela ya bona ka noši, eupša matla a taolo a kopanego a batswadi ke tšhireletšo bakeng sa bafsa.

Beibele e hlalosa gore monna o na le boikarabelo bjo bogolo bakeng sa katlego ya moya e sego feela ya bana ba gagwe eupša gape le ya mosadi wa gagwe. Se se hlaloswa e le bohlogo. Bohlogo bjo bo swanetše go dirišwa bjang? Paulo o bontšha gore bjalo ka ge Kriste e le Hlogo ya phuthego ka gona le monna ke hlogo ya mosadi wa gagwe. Paulo o oketša ka gore: “Lena Banna, ratang basadi ba lena, byalo ka xe Kriste a ratile phuthêxô, a ikxafa ka ’baka la yôna.” (Ba-Efeso 5:25) Ge monna a latela mohlala wa Jesu gomme a diriša bohlogo ka tsela e lerato, o tla hwetša “tlhompho e tseneletšego” ya mosadi wa gagwe. (Ba-Efeso 5:33, NW) Bana ka lapeng le bjalo le bona ba tla bona mohola wa matla a taolo ao a neilwego ke Modimo gomme ba kgothaletšwa go a amogela.​—Ba-Efeso 6:1-3.

Batswadi bao ba se nago balekane, go akaretša le bao ba lahlegetšwego ke balekane ba bona ka lehu, ba ka lebeletšana le taba ye bjang? Go sa šetšwe gore ke tate goba mma, ba ka lopa ka go lebanya matla a taolo a Jehofa Modimo le a Jesu Kriste. Jesu ka mehla o ile a bolela e le yo a nago le matla a taolo​—a tatagwe le a Mangwalo  a buduletšwego.​—Mateo 4:1-10; 7:29; Johane 5:19, 30; 8:28.

Beibele e nea melao e mentši ya motheo mabapi le mathata ao bana ba lebeletšanego le wona. Ka go hwetša melao ye ya motheo le ka go e latela, motswadi o tla kgona go nea keletšo e lerato le yeo e thušago bakeng sa bana. (Genesi 6:22; Diema 13:20; Mateo 6:33; 1 Ba-Korinthe 15:33; Ba-Filipi 4:8, 9) Batswadi ba ka lebiša gape tlhokomelo dipukung tšeo di theilwego Beibeleng tšeo di reretšwego ka mo go kgethegilego go ba thuša go tlwaetša bana ba bona gore ba leboge mehola ya go hlompha matla a taolo a Mangwalo. *

Phuthego ya Bokriste le Matla a Taolo

“Yó ké Yêna Morwa-moratwa wa-ka, yo ke kxahlwaxo ke Yêna; Le mo kwê.” (Mateo 17:5) Mantšu a ao a boletšwego ke Jehofa Modimo ka noši, a hlalosa Jesu e le yo a bolelago a e-na le matla a Modimo a taolo. Seo a se boletšego se ngwadilwe dipegong tše nne tša Diebangedi tšeo re ka kgonago go lebiša tlhokomelo go tšona gabonolo.

Pejana ga ge a rotogela legodimong, Jesu o ile a botša barutiwa ba gagwe gore: “Ke neilwe matla ka moka lexodimong le lefaseng.” (Mateo 28:18) Ka ge e le Hlogo ya phuthego ya gagwe, ga se feela gore Jesu o ile a bea leihlo la gagwe leo le šeditšego balateding ba gagwe bao ba latelago mehlaleng ya gagwe ba ba tloditšwego lefaseng eupša ga e sa le go tloga go tšhollweng ga moya o mokgethwa ka Pentekoste ya 33 C.E., o ile a ba a ba diriša e le mokero wa therešo, e le “molaki e a bôtêxaxo yo bohlale.” (Mateo 24:45-47; Ditiro 2:1-36) O dirile eng go phetha se ka moka e le gore a matlafatše phuthego ya Bokriste? ‘Ge a rotogela legodimong . . . , o ile a nea dimpho tšeo e lego banna.’ (Ba-Efeso 4:8, NW) ‘Dimpho tše tšeo e lego banna’ ke bagolo ba Bakriste, bao ba kgethwago ke moya o mokgethwa gomme ba newa matla a taolo bakeng sa go hlokomela dikgahlego tša moya tša badumedi-gotee le bona.​—Ditiro 20:28.

Ka lebaka le Paulo o eletša ka gore: “Xopolang baruti ba lena ba ba Le boditšexo Lentšu la Modimo, Le bônê pheletšô ya tsela ya bôná, Le etšê bôná ka tumêlô.” Ka ge banna ba bao ba botegago ba latela megato ya Jesu kgaufsi-ufsi, e tloga e le tsela e bohlale go ekiša tumelo ya bona. Ka gona Paulo o oketša ka gore: “Kwang baruti ba lena, Le laiwê ke bôná, [“ka mehla le lemoga matla a bona a taolo godimo ga lena,” The Amplified Bible] xobane ba diša meôya ya lena; xobane ba tlo sekišwa se ba Le dirilexo sôna. Ba kweng, xore ba dirê bà thabile, e sexo ka diphêxêlô; xobane xo ba diriša ka mokxwa woo xo ka se Le hole selô.”​—Ba-Hebere 13:7, 17.

Ke eng seo se diregago ge taelo e bjalo e nyatšwa? Ditho tše dingwe tša phuthego ya pele ya Bokriste di ile tša dira sona seo gomme tša fetoga bahlanogi. Himeneo le Fileto ba hlaloswa e le banna bao ba ilego ba aroša tumelo ya ba bangwe le bao dipolelo tša bona tša lefeela ‘di ilego tša senya seo e lego se sekgethwa.’ E nngwe ya dipolelo tša bona e be e le gore tsogo e šetše e diragetše, go ya ka bohlatse bjo bo lego gona e ka ba ya moya goba ya seswantšhetšo, ka gona go be go se na tsogo e nngwe bokamosong ka tlase ga Mmušo wa Modimo.​—2 Timotheo 2:16-18.

Bao ba lego matleng a taolo ba ba kgethilwego ba ile ba thuša. Bagolo ba Bakriste ba ile ba kgona go ganetša dingangišano tše bjalo ka gobane bjalo ka baemedi ba Jesu Kriste, ba ile  ba diriša matla a taolo a Mangwalo. (2 Timotheo 3:16, 17) Selo se swanago ke sa therešo lehono ka phuthegong ya Bokriste, yeo e hlaloswago e le “kôkwanê le mothêô wa therešô.” (1 Timotheo 3:15) Le ka mohla dithuto tša maaka di ka se dumelelwe gore di senye “mantšu ao a se naxo senyalô,” ao re a boloketšwego bjalo e le lehumo le lebotse ka matlakaleng a Beibele.​—2 Timotheo 1:13, 14.

Le ge tlhompho ya go hlompha matla a taolo e nyamelela ka lebelo mo lefaseng, ka ge re le Bakriste re lemoga gore matla a swanetšego a taolo setšhabeng, ka lapeng le ka phuthegong ya Bokriste a hlomilwe bakeng sa go re hola. Go hlompha matla a taolo ke gabohlokwa bakeng sa go phela gabotse ga rena mmeleng, maikwelong le moyeng. Ka go amogela le go hlompha matla a bjalo a taolo ao a neilwego ke Modimo, re tla šireletšwa ke babuši ba bagolo kudu​—Jehofa Modimo le Jesu Kriste​—bakeng sa go holega ga rena ga ka mo go sa felego.​—Psalme 119:165; Ba-Hebere 12:9.

[Mengwalo ya ka tlase]

[Ntlhakgolo go letlakala 5]

Beibele e na le tsebišo e ntši mabapi le matla a taolo ka lapeng

[Seswantšho go letlakala 6]

Batswadi bao ba se nago balekane ba ka lopa ka go lebanya matla a taolo a Jehofa Modimo le a Jesu Kriste

[Diswantšho go letlakala 7]

Bakriste ba lemoga gore matla a swanetšego a taolo ka lapeng, ka phuthegong ya Bokriste le setšhabeng a hlomilwe bakeng sa go ba hola

[Mothopo wa Seswantšho go letlakala 4]

Photo by Josh Mathes, Collection of the Supreme Court of the United States