Go ya Dihlakahlakeng tša Pacific go yo Šoma!

MAFELONG a go leta maema-fofaneng a ditšhaba-tšhaba kua Brisbane le Sydney, Australia go be go e-na le lešata la lethabo kudu go feta la mehleng. Sehlopha sa batho ba 46 se be se emetše go fofela nageng ya letšatši le phadimago ya Samoa gotee le ba bangwe ba 39 bao ba tšwago New Zealand, Hawaii le United States. Merwalo ya bona e be e tloga e le e sa tlwaelegago​—kudu-kudu e le didirišwa tše bjalo ka dinoto, disaga le diboro—​e sego dilo tšeo motho a di tšeago ge a e-ya sehlakahlakeng seo se kgahlišago sa Pacific. Eupša ka nako yeo, thomo ya bona e be e le selo seo se sa tlwaelegago.

Ba sepela ka ditshenyagalelo tša bona, ba be ba le kgaufsi le go fetša dibeke tše pedi e le baithapi bao ba sa lefšego lenaneong la go aga leo le okametšwego ke Ofisi ya Boentšineare ya Tikologo ofising ya lekala la Australia la Dihlatse tša Jehofa. Lenaneo leo le thekgwago ka tša ditšhelete ka meneelo ya go ithapa, le akaretša go aga Diholo tša Mmušo, Diholo tša Kopano, magae a baromiwa le diofisi tša makala goba tša bofetoledi bakeng sa diphuthego tšeo di golago ka lebelo tša Dihlatse tša Jehofa dihlakahlakeng tša Pacific. Anke re tsebaneng le ba bangwe ba bašomi bao ba bilego dihlopheng tša go aga Diholo tša Mmušo dinageng tša gabo bona ka noši.

Max, e lego moruledi o tšwa Cowra, New South Wales, Australia. O nyetše gomme o na le bana ba bahlano. Arnold o tšwa Hawaii. Yena le mosadi wa gagwe ba na le barwa ba babedi e bile ke mmulamadibogo goba modiredi wa nako e tletšego. Ka go swana le Max Arnold o hlankela e le mogolo phuthegong ya gagabo. Ka mo go lego molaleng, banna ba​—ke bao ba swanago le ba bantši ba lego lenaneong​—ga se baithapi ka gobane ba e-na le nako yeo ba sa e dirišego. Go e na le moo, bona le malapa a bona ba bona moo go nyakegago thušo gona gomme ba rata go dira seo ba ka se kgonago bakeng sa go thuša.

Bašomi ba Ditšhaba tše Dintši ba Thuša Moo go Nyakegago Thušo e Bohlokwa

Lefelo le lengwe leo go lona bokgoni bja bona gotee le ditirelo di bego di nyakega e be e le Tuvalu, setšhaba sa Pacific sa batho ba e ka bago ba 10 500 ba dulago sehlopheng seo se lego lekatana sa dihlakahlakana tše nyenyane tše di lego kgaufsi le mogarafase le leboa-bodikela bja Samoa. Dihlakahlaka tše, se sengwe le se sengwe se na le palo-gare ya tikologo ya disekwere-khilomithara tše 2,5. Ka 1994, Dihlatse tše 61 di be di nyaka Holo ya Mmušo e mpsha ka mo go akgofilego gotee le ofisi e kgolwanyane ya bofetoledi.

Karolong ye ya Pacific ya molatšatšing, meago e swanetše go hlangwa le go agwa ka tsela yeo e tla emeletšanago le diphefo tše matla tšeo di tlago leboelela gotee le madimo. Eupša go na le ditlabakelo tše mmalwa tšeo di  tiilego tša go aga tšeo di hwetšagalago dihlakahlakeng. Tharollo ke efe? Sedirišwa se sengwe le se sengwe​—go tloga ka dilo tša go rulela le dikapa go ya go fenitšhara le digareteine, dipitšana tša dintlwana tša ka thoko le dihlogwana tša dišawara, gaešita le dikurufu le dipikiri​—di ile tša romelwa ka sekepe go tšwa Australia.

Pele ga ge didirišwa di ka fihla, sehlopha se senyenyane seo se thomago mošomo pele ga tše dingwe ka moka se ile sa lokišetša lefelo gomme sa thea motheo. Ka morago bašomi ba ditšhaba-tšhaba ba ile ba tla go aga, go penta le go tsenya fenitšhara meagong.

Ka mo go sa letelwago, mošomo wo ka moka kua Tuvalu o ile wa tsoša pefelo ya moruti wa lefelong leo yo a ilego a tsebiša radiong gore Dihlatse di be di aga “Tora ya Babele”! Lega go le bjalo, ditherešo e be e le dife? Mošomi wa moithapi Graeme o hlalosa gore: “Ge batho bao ba bego ba aga Tora ya Babele ya ka Beibeleng ba hwetša gore ba be ba se sa kwešišana ka baka la ge leleme la bona le be le rarantšwe ke Modimo, ba ile ba swanela ke go tlogela modiro wa bona gomme ba tlogele tora e se ya fela. (Genesi 11:1-9) Ke selo seo se fapanego kudu ge go šomelwa Jehofa Modimo. Go sa šetšwe go fapana ga maleme le ditšo, mediro ka mehla e a fetšwa.” Gomme go bile bjalo le ka wo​—ka dibeke tše pedi feela. Ruri, batho ba 163, go akaretša le mosadi wa tona-kgolo ba bile gona tirelong ya go neela.

Doug, molebeledi wa mošomo, ge a nagana ka phihlelo ye o re: “E be e le lethabo go šoma le baithapi bao ba tšwago dinageng tše dingwe. Re na le ditsela tšeo di fapanego tša go dira dilo, mareo a fapanego gaešita le ditsela tše di fapanego tša go ela, eupša ga go na le se tee sa dilo tše seo se ilego sa baka mathata le ge e le afe.” Ka ge bjale a šetše a bile medirong e bjalo e mmalwa, o oketša ka gore: “Se se tiiša ka kgopolong ya-ka gore ka thušo ya Jehofa batho ba gagwe ba ka aga moago le ge e le kae lefaseng le, go sa šetšwe gore lefelo le ka ba lekatana gakaakang goba le le thata gakaakang. Ke therešo gore re na le banna ba bantši bao ba nago le bokgoni eupša ke moya wa Jehofa woo o dirago gore se se kgonege.”

Moya wa Modimo gape o tutueletša malapa a Dihlatse dihlakahlakeng go thuša ka dijo le madulo tšeo go ba bangwe e tlogago e le boikgafo. Gomme di lebogwa ka mo go tseneletšego ke bao ba hwetšago kamogelo e bjalo ya baeng. Ken yo a tšwago Melbourne, Australia o ile a šoma modirong o swanago kua French Polynesia. O re: “Re tlile bjalo ka bahlanka, eupša re be re swarwa bjalo ka dikgoši.” Moo go bego go kgonega, Dihlatse tša lefelong leo le tšona di be di thuša ka modiro wa go aga. Dihlakahlakeng tša Solomon, basadi ba be ba duba khonkhoriti​—ka diatla. Banna le basadi ba lekgolo ba ile ba namela godimo dithabeng tšeo di netšwego ke pula gomme ba theoša ditone tše 40 tša kota. Bafsa le bona ba ile ba thuša. Mošomi yo a tšwago New Zealand o gopola gore: “Ke gopola ngwanabo rena yo mofsa wa sehlakahlakeng yo a bego a rwala mekotla e mebedi goba e meraro ya samente ka nako e tee. Gape o be a thotha lekgwara ka garafo letšatši ka moka phišong le puleng.”

 Go ba le Dihlatse tša lefelong leo tšeo di tšeago karolo modirong go tliša mohola o mongwe. Ofisi ya lekala ya Mokgatlo wa Watch Tower kua Samoa e bega gore: “Banababo rena ba sehlakahlakeng ba ithutile bokgoni bja mediro bjoo ba ka bo dirišago bakeng sa go aga Diholo tša Mmušo le go lokiša moo madimo a sentšego le go aga lefsa. Gape bo ka ba thuša le go hwetša sa go iphediša setšhabeng seo ba bantši ba hwetšago go le thata go dira bjalo.”

Lenaneo la go Aga le Nea Bohlatse bjo Bobotse

Colin o be a le Honiara gomme a bona Holo ya Kopano ya Dihlakahlaka tša Solomon e agwa. A kgahlegile, o ile a ngwalela ofisi ya lekala ya lefelong leo ya Mokgatlo wa Watch Tower molaetša wo ka Seisemane sa Pidgin o rego: “Bohle ke batee gomme ga go le o tee yo a galefago e bile ke lapa le tee.” Kapejana ka morago ga moo, ge a boetše motseng wa gabo Aruligo, wo o lego bokgole bja dikhilomithara tše 40, yena le lapa la gagwe ba ile ba ikagela Holo ya bona ya Mmušo. Gomme ba ile ba romela molaetša o mongwe ofising o rego: “Holo ya rena ya Mmušo go akaretša le sethala ka mo go swanago, e lokile, ka gona na re ka swarela diboka tša rena mo?” Se se ile sa rulaganywa ka pela gomme batho ba ka godimo ga 60 ba ba gona ka mehla.

Moeletši wa European Union o ile a bona moago kua Tuvalu. O ile a botša mošomi gore: “Ke nagana gore motho yo mongwe le yo mongwe o go botša selo se swanago, eupša go nna se e tloga e le mohlolo!” Mosadi yo a šomago moo go lomaganywago megala gona o ile a botšiša moithapi yo mongwe yo a etilego gore: “Go tla bjang gore ka moka ga lena le thabe gakaakaa? Go fiša kudu mo!” Le ka mohla ga se ba ka ba bona Bokriste bo šoma ka tsela e bjalo ya kgonthe le ya boikgafo.

Boikgafo ka Ntle le go Itshola

Beibele go 2 Ba-Korinthe 9:6 e re: “Mo-byala-ka-tséba ó buna wa tséba; mo-byala-ka-thsétšô ó buna wa thsétšo.” Bašomi, malapa a bona le diphuthego tša bona ba tšwela pele go bjala ka go hloka boithati tabeng ya go thuša Dihlatse-gotee kua Pacific. Ross, mogolo yo a tšwago Kincumber kgaufsi le Sydney o re: “Phuthego ya gešo e ile ya neela ka tšhelete ya ka godimo ga dikotara tše tharo ya tšhelete ya-ka ya sefofane gomme molamo wa-ka yoo le yena a ilego a sepela le nna, o ile a neela ka $500 [R1 900] e nngwe.” Mošomi yo mongwe o ile a lefelela leeto la gagwe ka go rekiša koloi ya gagwe. Yo mongwe gape o ile a rekiša karolo ya naga. Kevin o be a nyaka R3 500 e oketšegilego, ka gona o ile a phetha ka go rekiša maeba a gagwe a 16 a bogolo bja nywaga e mebedi. Ka mogwera wa gagwe o ile a hwetša moreki yo a ilego a mo nea yona R3 500 bakeng sa ona!

Danny le Cheryl ba ile ba botšišwa gore: “Na go lefelela leeto la sefofane le go lahlegelwa ke mogolo, tšeo ka moka e lego $6 000 [R23 000], e be e tloga e le mo go swanetšego?” Ba ile ba araba ka gore: “Ee! Gaešita le ge tšhelete yeo e be e ka ba ya tekanyo yeo gabedi, e be e sa dutše e tla ba mo go swanetšego kudu.” Alan yo a tšwago Nelson, New Zealand o okeditše ka gore: “Ka seo ke se lefeletšego go ya Tuvalu, nkabe ke ile ka ya Yuropa gomme ka ba ka šalelwa ke tšhelete e nngwe. Eupša na nkabe ke ile ka hwetša ditšhegofatšo goba ka gahlana le bagwera ba bantši ka mokgwa wo ba ditlogo tše di sa swanego goba ke diretše motho yo mongwe selo se sengwe go e na le go itirela nna ka bonna? Aowa! Gaešita le ge go le bjalo, selo le ge e le sefe seo ke se neilego banababo rena ba sehlakahlakeng, ba mpušeditše seo se fetago seo kgole.”

Senotlelo se sengwe bakeng sa katlego ya lenaneo ke thekgo ya lapa. Le ge basadi ba bangwe ba kgona go sepela le banna ba bona gaešita le go thuša lebaleng, ba bangwe ba na le bana ba nywageng ya go tsena sekolo bao ba swanetšego go ba hlokomela goba ba na le kgwebo ya lapa yeo e swanetšego go šetšwa. Clay o itše: “Go ikemišetša ga mosadi wa-ka go hlokomela bana le lapa ge ke be ke se gona, e bile boikgafo bjo bogolo go feta bja-ka.” Ruri, banna ka moka bao ba ilego ba se kgone go sepela le basadi ba bona ba be ba tla tlaleletša ka “Amene” e tšwago pelong go seo!

Go tloga mola mošomo o phethilwego kua Tuvalu, bašomi ba baithapi ba agile Diholo tša Mmušo, Diholo tša Kopano, magae a baromiwa le diofisi tša bofetoledi kua Fiji, Tonga, Papua New Guinea, New Caledonia le mafelong a mangwe. Mediro e mentši go akaretša le e mengwe bakeng sa mafelo a mangwe kua Borwa-bohlabela bja Asia e sa dutše e rulaganywa. Na go tla ba le bašomi ba lekanego?

Go bonagala seo e ka se be bothata. Ofisi ya lekala la Hawaii e ngwala gore: “Yo mongwe le yo mongwe mo yoo a bilego le karolo medirong ya go aga ya ditšhaba-tšhaba o kgopetše gore a gopolwe ge modiro o mongwe o rulaganywa. Gatee-tee ge ba fihla gae, ba thoma go o bolokela tšhelete.” Lenaneo e ka ba leo le sa atlegego bjang ge o okeletša ditšhegofatšo tšeo di humilego tša Jehofa go ineeleng mo go se nago boithati mo go bjalo?

 [Seswantšho go letlakala 9]

Ditlabakelo bakeng sa modiro

[Diswantšho go letlakala 9]

Sehlopha sa bašomi lefelong la moago

[Diswantšho go letlakala 10]

Ge mediro e fela, re ile ra thabela seo moya wa Modimo o se phethilego