Na o Rarolla Bjang Diphapano?

LETŠATŠI le letšatši re dirišana le dimelo tše di fapa-fapanego. Se gantši se re tlišetša lethabo le dipono tše difsa. Ka dinako tše dingwe, gape se tsoša diphapano, tšeo tše dingwe tša tšona e lego tše dikgolo mola tše dingwe e fo ba go se kwešišane mo go nyenyane bophelong bja rena bja letšatši le letšatši. Go sa šetšwe gore ke tša mohuta mang, tsela yeo re swaraganago le diphapano ka yona e re kgoma monaganong, maikwelong le moyeng.

Go dira seo re se kgonago bakeng go rarolla diphapano ka go dumelelana go tla tlaleletša tabeng ya go thabela ga rena bophelo bjo bobotse le ditswalano tše di nago le khutšo kudu le ba bangwe. Seema sa bogologolo se re: “Pelo-thšweu ké ’phelô bya mmele.”​—Diema 14:30.

Selo seo se fapanego kudu ke therešo e rego: “Motho mo-se-kxône-xo-ithswara ké motse-mothubya ò se n’e merakô.” (Diema 25:28) Ke bomang gare ga rena bao ba bego ba ka rata go itumelela gore ba hlaselwe ke dikgopolo tše di fošagetšego tše di ka re dirago gore re itshware ka ditsela tše di sa swanelago​—ditsela tšeo di ka re gobatšago gotee le ba bangwe? Ge di ka se laolwe, dikarabelo tša kgalefo di ka dira sona seo. Thutong ya Thabeng, Jesu o ile a kgothaletša gore re hlahlobe boemo bja rena bja kgopolo, bjoo bo ka tutuetšago tsela yeo ka yona re rarollago diphapano le ge e le dife tšeo re ka bago le tšona le ba bangwe. (Mateo 7:3-5) Go e na le gore re sole ba bangwe, re swanetše go nagana ka tsela yeo re ka hlagolelago le go kgomarela segwera le bao ba nago le dipono le ditšo tše di sa swanego le tša rena.

Boemo bja Rena bja Kgopolo

Mogato wa pele tabeng ya go rarolla phapano yeo e naganelwago goba ya kgonthe ke go lemoga gore re kgongwa ke dikgopolo tše di fošagetšego le boemo bjo bo fošagetšego bja kgopolo. Mangwalo a re gopotša gore ka moka ga rena re dira sebe le go “hlaya letaxô la Modimo.” (Ba-Roma 3:23) Go oketša moo, temogo e ka utolla gore mothopo wa bothata bja rena ga se motho yo mongwe. Tabeng ye, anke re eleng hloko phihlelo ya Jona.

Ka tlase ga taelo e tšwago go Jehofa, Jona o ile a ikela motseng wa Ninife gore a yo bolela ka kahlolo ya Modimo yeo e batamelago godimo ga badudi ba wona. Mafelelo a thabišago e bile gore bohle ba motse wa Ninife ba ile ba sokologa gomme ba dumela go Modimo wa therešo. (Jona 3:5-10) Jehofa o ile a nagana gore boemo bja bona bja kgopolo bja go bontšha tshokologo bo be bo swanelwa ke tebalelo, ka gona a ba phološa. “Jona, yêna tša mmefêla ka xoxolo, a kxarametšêxa [“a tuka bogale,” PK].” (Jona 4:1) Karabelo ya Jona kgaugelong ya Jehofa e bile e makatšago. Ke ka baka la’ng Jona a swanetše go befelela Jehofa? Go ya ka mo go bonagalago ka gona, Jona o be a nweletše kudu maikwelong a gagwe ka noši, a nagana gore ga a sa tšewa e le selo mahlong a setšhaba. O ile a palelwa ke go lemoga kgaugelo ya Jehofa. Jehofa ka botho o ile a dira gore Jona a ithute thuto e šomago yeo e ilego ya mo thuša gore a fetoše boemo bja gagwe bja kgopolo le gore a bone mohola o mogolo wa kgaugelo ya Modimo. (Jona 4: 7-11) Go molaleng gore boemo bja Jona bja kgopolo ke bjona bjo bo bego bo nyaka go lokišwa, e sego bja Jehofa.

Na le rena ka dinako tše dingwe go ka nyakega gore re fetoše boemo bja rena bja kgopolo tabeng e itšego? Moapostola Paulo o re eletša gore: “Le rakanê pele ka xo xodišana.” (Ba-Roma 12:10) O be a bolela’ng? Ka lehlakoreng le lengwe, o re kgothaletša gore re be bao ba nago le teka-tekano le go swara Bakriste ba bangwe ka tlhompho e tseneletšego le seriti. Se se akaretša go lemoga gore motho yo mongwe le yo mongwe o na le tokelo ya go ikgethela. Paulo gape o re gopotša gore: “Motho ka o tee ka o tee ó rwešwa morwalo e lexo wa xaxwe.” (Ba-Galatia 6:5) Ka baka leo, pele ga ge diphapano di ka baka karogano, e tla ba ga bohlale gakaakang gore re hlokomele ge e ba boemo bja rena bja kgopolo bo nyaka go beakanywa! Re swanetše go katanela gore re bonagatše monagano wa Jehofa gomme re boloke khutšo le ba bangwe bao ba ratago Modimo e le ka kgonthe.​—Jesaya 55:8, 9.

Matseno a Rena

Akanya ka bana ba babedi ba banyenyane ba bakišana sebapadišwa, yo mongwe le yo mongwe a se goga ka matla kudu a lebeletše gore o tla se hwetša. Mantšu a kgalefo a ka ba gona ntweng yeo go fihlela ge mafelelong yo mongwe a langwa goba motho yo mongwe a ba tsena gare.

Pego ya Genesi e re botša gore Aborahama o ile a kwa gore go bile le ngangišano magareng ga badiši ba gagwe le ba motlogolo wa gagwe Loto. Aborahama o ile a gata mogato wa pele wa go tsena Loto gomme a re: “A xo se bê le ntwa mo xo nna le wêna, le mo xo badiši ba-ka le badiši ba xaxo; ka xobane re bana ba motho o tee.” Boikemišetšo bja Aborahama e be e le go dira gore go se be le kgohlano le ge e le efe yeo e tlago go senya tswalano ya bona. Ka tshenyegelo e kaaka’ng? O be a ikemišeditše go gafa tokelo ya gagwe ya go kgetha e le yena yo mogolo; o be a ikemišeditše go gafa se sengwe. Aborahama o ile a dumelela Loto gore a kgethe moo a bego a rata go yo dula gona le lapa la gagwe le mehlape ya gagwe. Mafelelong Loto o ile a ikgethela lefelo le letala la Sodoma le Gomora. Aborahama le Loto ba ile ba kgaogana ka khutšo.​—Genesi 13:5-12.

Bakeng sa go boloka ditswalano tša khutšo le ba bangwe, na re ikemišeditše go itshwara ka moya o swanago le woo Aborahama a ilego a itshwara ka wona? Tiragalo ye ya Beibele e re beela mohlala o mobotse wo o ka ekišwago ge go rarollwa phapano. Aborahama o ile a ipiletša ka gore: “A xo se bê le ntwa.” Kganyogo ya Aborahama e tšwago pelong e be e le gore go fihlelelwe tharollo ya khutšo. Ruri taletšo e bjalo ya go boloka ditswalano tša khutšo e tla re thuša gore re phaele go se kwešišane le ge e le gofe ka thoko. Aborahama ka morago o ile a phetha ka polelwana e rego, “xobane re bana ba motho o tee.” Ke ka baka la’ng a be a ka gafa tswalano yeo ya bohlokwa ka baka la kgetho ya motho ka noši goba boikgantšho? Aborahama o ile a dula a lebišitše tlhokomelo go seo e lego sa bohlokwa. O dirile bjalo ka boitlhompho le kgodišo, ka nako e swanago a nea motlogolo wa gagwe seriti.

Le ge go tsoga maemo ao go wona go ka nyakegago gore motho wa ka ntle a tsene ditaba gare e le gore go rarollwe phapano, go kaone gakaakang ge taba e ka rarollelwa thopeng! Jesu o re kgothaletša gore re gate mogato wa pele tabeng ya go dira khutšo le ngwanabo rena, re kgopele tshwarelo ge e ba go nyakega. * (Mateo 5:23, 24) Go dira bjalo go tla nyaka boikokobetšo goba boipoetšo, eupša Petro o ngwadile gore: “’Me seng sa lena Le phedišanê Lè n’e boikokobetšô; xobane Modimo ó lwa le baikxoxomoši; ba ba ikokobetšaxo ó ba sétša ka kxauxêlô.” (1 Petro 5:5) Tsela yeo ka yona re swarago barapedi-gotee e kgoma tswalano ya rena le Modimo ka go lebanya.​—1 Johane 4:20.

Ka gare ga phuthego ya Bokriste, go ka nyakega  gore re lahlegelwe ke tshwanelo ya rena e le gore re boloke khutšo. Nywageng e mehlano e fetilego palo e kgolo ya bao ga bjale ba kopanelago le Dihlatse tša Jehofa e tsene ka lapeng la Modimo la barapedi ba therešo. Se se thabiša dipelo tša rena gakaakang! Tsela yeo re itshwarago ka yona ruri e kgoma batho ba gotee le ba bangwe ka phuthegong. Le ke lebaka le lebotse la gore re naganišiše ka kgetho ya rena ya boithabišo, ditloša-bodutu, mediro ya boipshino ya bogwera goba mošomo, re naganela taba ya kamoo ba bangwe ba ka re lebelelago ka gona. Na ditiro le ge e le dife tša rena goba mantšu di ka kwešišwa ka mo go fošagetšego gomme ka go rialo tša bakela ba bangwe go kgopišega?

Moapostola Paulo o re gopotša gore: “Ke dumeletšwe dilô tšohle; fêla, xa se xore ka moka di a hola. Ke dumeletšwe dilô tšohle; fêla, xa se xore ka moka di a axiša. A motho a se kê a inyakêla tša xaxwe; a a nyakê sa xo hola ba bangwê.” (1 Ba-Korinthe 10:23, 24) Ka ge re le Bakriste, re kgomega go tšwa pelong ka go aga lerato le botee tša borwarre bja Bokriste.​—Psalme 133:1; Johane 13:34, 35.

Mantšu a Fodišago

Mantšu e ka ba tutuetšo e matla ya go tutueletša go dira dilo tše dibotse. “Polêlô tše di ratêxaxo ké todi ya dinose; di natefêla pelo, le mmele di a tsoša.” (Diema 16:24) Kanegelo ya taba ya ge Gideoni a efoga kgohlano yeo e bego e ka ba gona le ba-Efuraimi e bontšha therešo ya seema se.

Gideoni yo a bego a swaregile kudu ntweng malebana le ba-Midiani, o ile a bitša leloko la ba-Efuraimi gore le tlo thuša. Lega go le bjalo, ka morago ga ge ntwa e fedile, ba-Efuraimi ba ile ba retologela go Gideoni gomme ba ngongorega kudu gore ga se a ka a ba bitša ge ntwa e thoma. Pego e bolela gore “ba mo ômanya ka kudu.” Gideoni o ile a araba ka gore: “Nna ke dirile’ng se se kaxo etša tše lena Le di dirilexo? Hleng dipudutša tša Efuraimi di fetiša punô yohle ya merara ya xa Abiesere! Dikxoši tša Ba-Midiani, Orebe le Seebe, Morêna ó di xafetše diatleng tša lena. Nna ke kxonne’ng se se kaxo lekana le seo Le se dirilexo?” (Baahlodi 8:1-3) Ka mantšu a gagwe ao a kgethilwego gabotse le a fodišago, Gideoni o ile a efoga seo e ka bego e bile ntwa ya masetla-pelo ya merafo. Bao ba leloko la Efuraimi ba ka ba ba be ba e-na le bothata bja go itšeela godimo le bja boikgantšho. Lega go le bjalo, seo ga se sa ka sa thibela Gideoni tabeng ya go phegelela go tšweletša mafelelo a khutšo. Na re ka dira ka mo go swanago?

Ba bangwe ba ka tlalwa ke pelo gomme ya ba dira gore ba re hloye. Lemoga maikwelo a bona gomme o šomele tabeng ya go kwešiša dipono tša bona. Na le rena re ka ba re tsentše letsogo ka tsela e itšego tabeng ya gore ba be le maikwelo ao? Ge e ba go le bjalo, ke ka baka la’ng re sa amogele karolo yeo re bilego le yona go bakeng bothata ke moka re bontšhe go swaba ga rena bakeng sa go godiša bothata. Mantšu a sego kae ao a naganišišitšwego gabotse a ka tsošološa tswalano e senyegilego. (Jakobo 3:4) Ba bangwe bao ba befetšwego ba ka ba ba inyakela feela kgonthišetšo ya rena e botho. Beibele e bolela gore “mollô o tima xe xo se dikxong.” (Diema 26:20) Ee, mantšu ao a kgethilwego ka kelohloko le ao a bolelwago ka moya o nepagetšego a ka “phohliša dipêfêlô” gomme a ipontšha e le ao a fodišago.​—Diema 15:1.

Moapostola Paulo o kgothatša gore: “Xe xo kxônêxa ka thokô ya lena, Le phedišanê xa-botse le batho ka moka.” (Ba-Roma 12:18) Ke therešo gore re ka se kgone go laola maikwelo a ba bangwe, eupša re ka kgatha tema ya rena go godišeng khutšo. Go e na le go ineela dikarabelong tša rena goba tša ba bangwe tša go se phethagale, re ka gata mogato gona bjale gore re diriše melao ya motheo ya Beibele yeo e theilwego motheong o mobotse. Go rarolla diphapano ka tsela yeo Jehofa a re laelago gore re di rarolle ka yona go tla feleletša ka khutšo gotee le lethabo tša rena tša ka mo go sa felego.​—Jesaya 48:17.

[Mengwalo ya ka tlase]

[Seswantšho go letlakala 24]

Na re phegelela tabeng ya gore dilo di dirwe ka tsela ya rena?

[Seswantšho go letlakala 25]

Aborahama o beile mohlala o mobotse tabeng ya go ba yo a ineelago e le gore a rarolle phapano