Na o a Gopola?

Na o thabetše go bala ditokollo tša morago bjale tša Morokami? Ka gona, bona ge e ba o ka kgona go araba dipotšišo tše di latelago:

• Ke ka baka la’ng re ka kgonthišega gore phethagalo ya boporofeta bja “maxodimo a mafsa le lefase le lefsa” go Jesaya 65:17-19 bo be bo akaretša se se fetago go boa ga ba-Juda bothopša?

Ka gobane moapostola Petro le moapostola Johane ge ba ngwala lekgolong la pele la nywaga C.E., ba ile ba bolela ka phethagalo ya nakong e tlago yeo e akaretšago ditšhegofatšo tšeo di sa tlogo tla. (2 Petro 3:13; Kutollo 21:1-4)​—4/15, matlakala 10-12.

• Ke eng seo e ka bago e le motheo wa dinonwane tša Gerika ya bogologolo mabapi le dika-medimo tše šoro?

Tše e ka ba e be e le go kgabišwa le go kgopamišwa ga taba ya gore pele ga Meetse-fula barongwa ba bangwe ba ile ba ikapeša mebele ya batho gomme ba phela maphelo a se nago boitshwaro le a šoro mo lefaseng. (Genesi 6:1, 2)​—4/15, letlakala 27.

• Ke dikotsi dife tše dingwe tšeo Bakriste bao ba godilego tsebong ba swanetšego go itiša malebana le tšona manyalong?

Ke ga bohlokwa go phema moletlo wa mašata, woo o ka bakelwago ke go nwa kudu e bile go e-na le motantsho wo o sa laolegego wa go tantshetša mminong o llelago godimo. Ka ntle le ge e ba go boletšwe gore pokano ya bogwera e buletšwe motho yo mongwe le yo mongwe, bao ba sego ba laletšwa ga se ba swanela go ba gona. Monyadi o tla kgonthišetša gore Bakriste bao ba nago le boikarabelo ba ba gona go fihlela monyanya o fela nako e sa le gona.​—5/1, matlakala 19-22.

• Ke eng seo se bolelwago ke seo go bolelwago ka sona go Psalme 128:3 ka bana gore ba “etša mahloxedi a mohlware” go dikologa mogopo wa motho?

Gantši mahlogedi a mafsa a mela kutung ya mohlware. Ge kutu e kgolo ya sehlare seo se tšofetšego e sa hlwe e tšweletša dienywa tše dintši, mahlogedi a mafsa a ka thoma go ba dikutu tše matla tšeo di e dikologilego. Ka mo go swanago, batswadi ba ka thabela go ba le bana bao ba enywago dienywa bao ba hlankelago Jehofa gotee le bona.​—5/15, letlakala 27.

• Ke mehola efe e mengwe yeo bana ba e hwetšago boemong bjo bo thabišago ka lapeng?

E ala motheo bakeng sa gore ba be le pono e nepagetšego ka matla a taolo, go ba le tebogo ka ditekanyetšo tše di nepagetšego le ditswalano tše dibotse le ba bangwe. Boemo bjo bjalo bo ka ba thuša gape gore ba age segwera le Modimo.​—6/1, letlakala 18.

• Nageng e nngwe ya Bohlabela bja Kgole, ke eng seo se ilego sa dirwa bakeng sa go godiša kgopolo ya gore Bakriste ka moka ke barwarre?

Diphuthego ka moka di ile tša kgothaletšwa gore di se ke tša bitša batho ba itšego ka maina a kgodišo. Go e na le moo, ka moka ba swanetše go bitšwa ka go lekana e le bana ba o tee.​—6/15, matlakala 21, 22.

• Na Dihlatse tša Jehofa di amogela dihlare tšeo di dirilwego ka madi?

Re dumela gore taelo ya Beibele ya ‘go ila madi’ e akaretša ditšhelo tša madi ka moka goba dikarolo tša wona tša motheo (plasma, disele tše dikhwibidu, disele tše ditšhweu le di-​platelet). (Ditiro 15:28, 29) Ge e le tabeng ya dikarolwana tšeo di tšwago dikarolong tša motheo, Mokriste yo mongwe le yo mongwe o itirela phetho ka noši, a gopola seo Beibele e se bolelago gotee le tswalano ya gagwe le Modimo.​—6/15, matlakala 29-31.

• Na ruri go a kgonega go hwetša khutšo ya ka gare lehono?

Ee. Ka go diriša Beibele, Jesu Kriste o hlahla batho go ya tseleng ya borapedi bjo bo sekilego le khutšong e hlalositšwego go Jesaya 32:18. Go feta moo, bao ba hwetšago khutšo e bjalo ba na le tebelelo ya go thabela khutšo ya ka mo go sa felego lefaseng e le go phethagatša Psalme 37:11, 29.​—7/1, letlakala 7.

• Ke tema efe yeo George Young a e kgathilego historing ya mehleng yeno ya pušo ya Modimo?

Go thoma ka 1917, o ile a ipontšha e le morwadi wa seetša wa ditaba tše dibotse tša Mmušo dinageng tše dintši. Bodiredi bja gagwe bo ile bja mo iša Canada ka moka, dihlakahlakeng tša Caribbean, Brazil le dinageng tše dingwe tša Amerika Borwa, Bogareng bja Amerika, Sepania, Portugal, go yeo ka nako yeo e bego e le Soviet Union le United States.​—7/1, matlakala 22-7.

• Ke eng seo 1 Ba-Korinthe 15:29 e se bolelago ge e bolela ka ba bangwe gore “ba ba kolobeletšwaxo bahu . . . ba re’ng xe ba kolobeletšwa bahu”?

Ntlha ke gore ge Bakriste ba tlotšwa ka moya o mokgethwa, ba inwa tseleng ya bophelo yeo e lebišago lehung la bona le go tsošetšwa ga bona ga ka morago bophelong bja legodimong.​—7/15, letlakala 17.

• Ke eng seo moapostola Paulo a bego a se dira nakong yeo e hlalositšwego e le nywaga yeo go sa bolelwego selo ka yena?

E ka ba e le gore mohlomongwe o be a thuša go hloma goba go tiiša diphuthego kua Siria le Tsilitsia. A mantši a mathata ao a boletšwego go 2 Ba-Korinthe 11:23-27 a swanetše go ba a ile a direga nakong ye, go bontšha gore o be a tšwela pele ka bodiredi bjo mafolofolo.​—7/15, matlakala 26, 27.

• Ke eng seo se ka re thušago go ba le teka-tekano ditebelelong tša rena?

Gopola gore Jehofa o a kwešiša. Go mo rapela go ka re thuša go leka-lekanya tsela ya rena ya go nagana gape go bontšha boipoetšo. Thušo e nngwe ke ya go hwetša pono e nngwe ka go bolela le mogwera yo a godilego tsebong.​—8/1, matlakala 29, 30.