Tsela e Nnoši ya go Fediša Lehloyo

“Ga go na lehloyo ka ntle le poifo. . . . Re hloya seo re se boifago gomme moo go nago le lehloyo, poifo e laletše gona.”​—CYRIL CONNOLLY, MOSEKA-SEKI WA DIPUKU LE MONGWADI.

DITSEBI tše dintši tša tša leago di dumela gore lehloyo le tsemile medu karolong e sa lemogegego ya monagano wa motho. Rathutamahlale wa dipolitiki o itše: “Karolo e kgolo ya lona e ka ba yeo e rulagantšwego ka kgopolong,” le logeletšwe tlhagong ya batho.

Ke mo go kwešišegago gore diithuti tša tlhago ya motho di fihlelele diphetho tše bjalo. Dithuto tšeo di ithutago tšona di theilwe feela go banna le basadi bao ba belegwego ba e-na le “molato” le “dibe,” go ya ka pego e buduletšwego ya Beibele. (Psalme 51:5) Gaešita le Mmopi ka boyena, ge a be a seka-seka boemo bja motho yo a sa phethagalago nywageng e dikete e fetilego, o ile “a bôna bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla.”​—Genesi 6:5.

Kgethollo, go beba sefahlego le lehloyo leo di le bakago ke ditšweletšwa tša go se phethagale ga leabela ga motho le boithati. (Doiteronomio 32:5) Ka manyami, ga go na sedirišwa sa motho goba mmušo, go sa šetšwe gore molao wa tšona e ka ba e le ofe, tšeo di kgonnego go tliša phetogo pelong ya motho ditabeng tše bjalo. Mongwaledi wa naga e šele Johanna McGeary o hlalositše gore: “Ga go na lephodisa la lefaseng ka moka, gaešita le ge le le matla ka tsela le ge e le efe, le ka tsenago ditaba gare bakeng sa go phumola lehloyo leo le dirilego gore Bosnia, Somalia, Liberia, Kashmir le Caucasus di be le tšhollo ya madi.”

Lega go le bjalo, pele ga ge re ka thoma go nyaka ditharollo, re swanetše go hwetša kwešišo ya motheo ya seo se bakago diponagatšo tša lehloyo.

Lehloyo Leo le Hlohleletšwago ke Poifo

Lehloyo le tšwelela ka mehuta e mentši le dibopego tše dintši. Mongwadi Andrew Sullivan o ile a akaretša taba gabotse ka gore: “Go na le lehloyo leo le boifago le lehloyo leo e fo go ba la lenyatšo; go na le lehloyo leo le bontšhago matla le lehloyo leo le tšwago go hlokeng matla; go na le tefetšo, gomme go na le lehloyo leo le tšwago lehufeng. . . . Go na le lehloyo la mogateledi le lehloyo la mohlaselwa. Go na le lehloyo leo le tukago ka go nanya le lehloyo leo le hwelelago. E bile go na le lehloyo leo le thuthupago le lehloyo leo le ka mohla le sa kego le tuka.”

Ka ntle le pelaelo, a mangwe a mabaka a motheo ao a fehlago thulano ya lehloyo mehleng ya rena ke a tša leago le a tša boiphedišo. Go beba sefahlego mo go tseneletšego le go phulega ga lehloyo gantši di hwetšwa mafelong ao go wona sehlopha seo se lego maemong ao a atlegago kudu a tša boiphedišo e lego sona se senyenyane. Gape lehloyo gantši le ba gona moo maemo a bophelo a karolo e itšego setšhabeng a beilwego kotsing ke go kgeregela ga bafaladi.

Ba bangwe ba ka nagana gore ba ba sa tšwago go fihla ba tla tsena phenkgišanong ya mešomo, ba šomela megolo ya tlase goba ba tla bakela bohlokwa bja dithoto gore bo theogele fase. Go sa šetšwe gore dipoifo tše bjalo di a lokafatšwa goba go se bjalo ke taba e nngwe. Poifo ya go boifa go lahlegelwa ke tša boiphedišo le poifo ya gore maemo a setšhaba goba mokgwa wa bophelo o tla fokola ke mabaka a matla ao a hlohleletšago go beba sefahlego le lehloyo.

Ke mogato ofe wa pele wo o swanetšego go gatwa tabeng ya go fedišetšwa sa ruri ga lehloyo? Phetogo ya boemo bja kgopolo.

Go Fetoša Boemo bja Kgopolo

McGeary o itše: “Phetogo ya kgonthe e ka tšwa feela boikemišetšong bja batho bao ba akaretšwago.” Gomme boikemišetšo bja batho bo ka fetošwa bjang? Phihlelo e bontšhitše gore tutuetšo e matla kudu, yeo e tutuetšago kudu le yeo e lego tutuetšo ya kgotlelelo malebana le kgolo ya lehloyo e tšwa Lentšung la Modimo, Beibele. Se ke ka gobane “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.”​—Ba-Hebere 4:12.

Ka mo go dumelegago, go tomolwa ga go beba sefahlego le lehloyo ka medu ga go fo itaragalela, e bile ga go direge ka bošego bjo tee. Eupša go ka dirwa. Jesu Kriste, motutuetši yo mogolo wa dipelo le  yo a dirago matswalo a rena gore a šome o be a kgona go tutuetša batho gore ba fetoge. Ba dimilione ba ile ba atlega go lateleng keletšo e bohlale ya Jesu Kriste e rego: “Ratang manaba a lena; ba ba Le roxaxo Le ba šexofatšê; ba ba Le hlôyaxo Le ba setšê; ba ba Le pharaxo le ba Le hlômaraxo Le ba rapêlêlê.”​—Mateo 5:44.

Ka go dumelelana le dithuto tša gagwe, Jesu sehlopheng sa bagwera ba gagwe bao a ba botago ka go fetišiša o ile a akaretša Mateo yo e bego e le molekgetho, yena yo e kilego ya ba molahlwa yo a hloilwego setšhabeng sa ba-Juda. (Mateo 9:9; 11:19) Go feta moo, Jesu o ile a hloma tsela ya borapedi bjo bo sekilego bjoo mafelelong bo bego bo tla akaretša dikete tša ba-Ntle bao nakong e fetilego ba ilego ba se ke ba akaretšwa e bile ba be ba hloilwe. (Ba-Galatia 3:28) Batho ba tšwago gohle lefaseng leo le bego le tsebja ka nako yeo e ile ya ba balatedi ba Jesu Kriste. (Ditiro 10:34, 35) Batho ba ba ile ba tsebja ka lerato la bona le fetišišago. (Johane 13:35) Ge banna bao ba tletšego lehloyo ba be ba thuma morutiwa wa Jesu Stefano ka mafsika go fihlela a e-hwa, mantšu a gagwe a mafelelo e bile a rego: “Morêna, O se ba balêlê sebe sé!” Stefano o be a kganyogela bao ba mo hloilego dilo tše kaone kudu.​—Ditiro 6:8-14; 7:54-60.

Bakriste ba mehleng yeno ba therešo ka mo go swanago ba ile ba arabela keletšong ya Jesu ya go dira botse, e sego feela go banababo bona ba Bakriste, eupša gaešita le go bao ba ba hloilego. (Ba-Galatia 6:10) Ba šoma ka thata bakeng sa go fediša lehloyo le šoro maphelong a bona. Ka go lemoga ditutuetšo tše matla tšeo di ka ba tsenyago moya wa lehloyo, ba gata mogato o swanetšego le go tšeela lehloyo sebaka ka lerato. Ee, monna yo bohlale wa bogologolo o itše: “Lehlôyô le tsoša phapang. Lerato le bipa dikaroxô tšohle.”​—Diema 10:12.

Moapostola Johane o itše: “Mang le mang e a hloilexo ngwan’abô ké mmolai, xomme Le a tseba, xa xo mmolai e a naxo le bophelô byo bo sa felexo byo bo kaxo dula è le bya xaxwe.” (1 Johane 3:15) Dihlatse tša Jehofa di dumela seo. Ka baka leo, ga bjale di kopane​—go tšwa ditšong tša merafo ka moka, tša setlogo, tša bodumedi le tša bopolitiki—​ya ba setšhaba se tee seo se kopanego, se se se nago le lehloyo, e lego borwarre bja kgonthe bja lefase ka bophara.​—Bona mapokisi a sepedišanago le sehlogo se.

Lehloyo le tla Tomolwa!

Mo gongwe o ka re, ‘Eupša seo se tla lokela batho bao ba akaretšwago. Lega go le bjalo, se se ka se ke sa dira gore lehloyo le nyamelele lefaseng la rena ka mo go feletšego.’ Ke therešo gore gaešita le ge o se na lehloyo ka pelong ya gago, o sa dutše o ka ba mohlaselwa wa lona. Ka gona, re swanetše go lebelela go Modimo bakeng sa tharollo ya kgonthe bothateng bjo bja lefase ka bophara.

Modimo o rera gore mašaledi ka moka a lehloyo  kgaufsinyane a tla tlošwa lefaseng. Se se tla direga ka tlase ga pušo ya mmušo wa legodimong woo Jesu a re rutilego go o rapelela ka gore: “Tata-wešo wa maxodimong! Leina la xaxo a le kxêthwê; mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.”​—Mateo 6:9, 10.

Ge thapelo yeo e arabilwe ka mo go tletšego, maemo ao a gapeletšago gore lehloyo le be gona a ka se hlwe a e-ba gona. Maemo ao a le bakelago a tla be a fedišitšwe. Dipolelo tša maaka, go hloka tsebo le go beba sefahlego di tla be di tšeetšwe sebaka ke tshedimošo, therešo le go loka. Bjale e le ka kgonthe Modimo ‘o tla be a phumotše megokgo ka moka mahlong a bona; le lehu le ka se hlwe le e-ba gona; le ge e le manyami le dillo le bohloko, di ka se hlwe di e-ba gona.’​—Kutollo 21:1-4.

Ga bjale go na le ditaba tše kaone kudu! Go na le bohlatse bjo bo sa ganetšegego bja gore re phela “mehleng ya bofêlô.” Ka gona, re ka kgodišega gore kgaufsinyane re tla bona lehloyo la batho bao ba sa boifego Modimo le nyameletše lefaseng le. (2 Timotheo 3:1-5; Mateo 24:3-14) Lefaseng le lefsa la Modimo leo le holofeditšwego, moya wa kgonthe wa borwarre o tla ba gona ka gobane batho ba tla be ba bušeditšwe phethegong.​—Luka 23:43; 2 Petro 3:13.

Eupša ga se wa swanela go leta go fihla ka nako yeo gore o thabele borwarre bja kgonthe. Ge e le gabotse, bjalo ka ge go bontšhitšwe dipegong tše di sepedišanago le sehlogo se, lerato la Bokriste le šetše le hweditše lefelo leo le ka dulago go lona dipelong tša ba dimilione tšeo mohlomongwe di ka bego di tletše lehloyo. Le wena ka mo go swanago o laleletšwa go ba karolo ya borwarre bjoo bjo lerato!

[Seswantšho go letlakala 7]

Ka tlase ga Mmušo wa Modimo mašaledi ka moka a lehloyo a tla tlošwa lefaseng