Bonagatša Boemo bja kgopolo bja Kriste

“Modimo, Yêna Mong wa tiišô le khomotšô, lena ka moka a Le fê [boemo bja kgopolo bjo bo swanago le bjo Kriste Jesu a bego a e-na le bjona, NW].”​—BA-ROMA 15:5.

1. Bophelo bja motho bo ka kgongwa bjang ke boemo bja gagwe bja kgopolo?

BOEMO bja kgopolo bo dira phapano e kgolo bophelong. Boemo bja kgopolo bja go se šetše goba bja go ba šedi, boemo bja kgopolo bjo bo nepagetšego goba bjo bo fošagetšego, boemo bja kgopolo bja manganga goba bja go ba le tirišano, boemo bja kgopolo bja dipelaelo goba bja go ba le tebogo bo ka kgoma kudu tsela yeo motho a swaraganago le maemo ka yona le kamoo batho ba bangwe ba arabelago ka gona go yena. Ka go ba le boemo bjo bobotse bja kgopolo, motho a ka kgona go ba yo a thabilego gaešita le maemong a thata kudu. Go motho yo a nago le boemo bjo bobe bja kgopolo, ga go na selo seo se bonagalago se lokile, gaešita le ge​—go ya ka pono e nepagetšego​—bophelo bo le gabotse.

2. Motho o ithuta bjang boemo bja kgopolo?

² Boemo bja kgopolo​—bjo bobotse goba bjo bobe​—bo ka ithutwa. Ge e le gabotse, bo swanetše go ithutwa. Collier’s Encyclopedia ge e bolela ka ngwana yo a sa tšwago go belegwa e re: “Boemo bja kgopolo bjo a feleletšago a e-na le bjona o swanetše go bo hwetša goba go ithuta bjona, go fo swana le ge a hwetša goba a ithuta leleme goba bokgoni le ge e le bofe bjo bongwe.” Re ithuta bjang boemo bja kgopolo? Ka ge e le dilo tše dintši tšeo di tšeago karolo, tikologo le segwera ke tšeo di tutuetšago kudu. Saeklopedia yeo go boletšwego ka yona pejana e re: “Re a ithuta goba go monya, bjalo ka ge eka ke ka mogato wa go monya, boemo bja kgopolo bja bao re gweranego kgaufsi le bona.” Nywaga e dikete e fetilego, Beibele e ile ya bolela selo se se swanago ge e re: “Šika le bahlale O hlalefê; mokxônana-le-mašilo ó tlo thsereana.”​—Diema 13:20; 1 Ba-Korinthe 15:33.

Mohlala wa Boemo bjo bo Nepagetšego bja Kgopolo

3. Ke mang yo a beilego mohlala o mobotse mabapi le boemo bja gagwe bja kgopolo, gomme re ka mo ekiša bjang?

³ Go etša dilong tše dingwe ka moka, tabeng ya boemo bja kgopolo le gona, Jesu Kriste o beile mohlala o phalago yohle. O itše: “Ke Le beetše mokxwa, xore le lena Le dirê se Nna ke se dirilexo.” (Johane 13:15) Gore re swane le Jesu, re swanetše pele re ithute ka yena. * Re ithuta bophelo bja Jesu ka morero wa go dira seo moapostola Petro a se kgothaleditšego: “Ké sôna se Le bileditšwexo sôna; xobane le Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.” (1 Petro 2:21) Pakane ya rena ke gore re swane le Jesu kamoo re ka kgonago ka gona. Seo se akaretša go hlagolela boemo bja kgopolo bjo bo swanago le bja gagwe.

4, 5. Ke karolo efe ya boemo bja Jesu bja kgopolo yeo e gatelelwago go Ba-Roma 15:1-3, gomme Bakriste ba ka mo ekiša bjang?

⁴ Ke eng seo se akaretšwago tabeng ya go ba le boemo bja kgopolo bjo bo swanago le bja Kriste Jesu? Kgaolo 15 ya lengwalo la Paulo le a le ngwaletšego ba-Roma e re thuša go araba potšišo yeo. Ditemaneng tše sego kae tša mathomo tša kgaolo ye, Paulo o bolela ka seka se sebotse kudu sa Jesu ge a re: “Xomme sa rena ba re tiilexo, ké xore re kxôtlêlêlê mefôkôlô ya ba ba sa tiaxo, re lesê xo ithata. Mang le mang a kxahlê ngwan’abô ka xo thakxa le ka xo mo axiša. Xobane Kriste le Yêna xa a ka a ithata, byalo ka xe xo ngwadilwe xwa thwe: Ke wetšwe  ke kxoboxô ya ba Xo kxobaxo.”​—Ba-Roma 15:1-3.

⁵ Bakriste ge ba ekiša boemo bja kgopolo bja Jesu, ba kgothaletšwa gore ba ikemišetše go hlankela dinyakwa tša ba bangwe ka boikokobetšo go e na le go nyaka go kgahliša bona ka noši. Ka kgonthe, go ithapa ka tsela yeo ya boikokobetšo bakeng sa go hlankela ba bangwe ke seka sa bao ba “tiilexo.” Jesu yo a bego a matlafetše moyeng go feta motho le ge e le ofe yo a kilego a phela, o ipoletše ka gore: “Morwa-motho e a sa kaxo a tlêla xo dirêlwa, à tlile xo dirêla, le xo neêla bophelô bya xaxwe xore e bê topollô ya ba bantši.” (Mateo 20:28) Re le Bakriste, le rena ka mo go swanago re nyaka go katanela go hlankela ba bangwe, go akaretša “ba ba sa tiaxo.”

6. Re ka ekiša karabelo ya Jesu kganetšong le kgobošong ka tsela efe?

⁶ Seka se sengwe se sebotse seo Jesu a se bonagaditšego e bile mokgwa wa go nagana le go dira dilo woo o bego o dula e le o agišago. Le ka mohla ga se a ka a dumelela boemo bjo bo fošagetšego bja kgopolo bja ba bangwe bo tutuetša boemo bja gagwe ka noši bjo bo nepagetšego bja kgopolo go hlankeleng Modimo; le rena ga se ra swanela go bo dumelela. Ge a be a gobošwa le go tlaišwa ka baka la go rapela ga gagwe Modimo ka potego, Jesu o ile a kgotlelela ka go se fele pelo a sa belaele. O be a tseba gore kganetšo e tšwago lefaseng le le sa dumelego le le sa kwešišego e ka letelwa ke bao ba lekago go kgahliša baagišani ba bona ‘ka go ba thakga le ka go ba agiša.’

7. Jesu o ile a bonagatša bjang go se fele pelo, gomme ke ka baka la’ng re swanetše go dira ka mo go swanago?

⁷ Jesu o bonagaditše boemo bjo bo nepagetšego bja kgopolo ka ditsela tše dingwe. Ga se a ka a bontšha go felela Jehofa pelo le ka mohla eupša o ile a leta ka go se fele pelo go phethagala ga merero ya Gagwe. (Psalme 110:1; Mateo 24:36; Ditiro 2:32-36; Ba-Hebere 10:12, 13) Go feta moo, Jesu ga se a ka a felela balatedi ba gagwe pelo. O ile a ba botša gore: “Le ithute go nna”; ka ge a be a na le “moya  wa boleta,” thuto ya gagwe e be e le e agago le yeo e lapološago. Le gona ka ge e be e le wa “pelo e kokobetšego,” le ka mohla o be a sa ke a ikgodiša goba go ipota. (Mateo 11:29, NW) Paulo o re kgothaletša gore re ekiše dikarolo tše tša boemo bja kgopolo bja Jesu ge a re: “Kxopolô ye e swanetšexo xo ba mo xo lena, ké yeo e bexo e le xo Kriste Jesu, Eo, à le ka lebopô le Modimo a lexo ka lôna, a se re: xo swana le Modimo xo mo ana hlôxô, A upya a ithlakola, a tšea lebopô la mohlanka, a ba e a swanaxo le batho, a hwetšwa è le motho ka sebele.”​—Ba-Filipi 2:5-7.

8, 9. (a) Ke ka baka la’ng go nyakega gore re katane gore re hlagolele boemo bja kgopolo bjo bo se nago boithati? (b) Ke ka baka la’ng re sa swanela go nyama ge re sa fihlelele boemo bja mohlala woo Jesu a o tlogetšego, gomme Paulo e bile bjang mohlala o mobotse tabeng ye?

⁸ Go bonolo go bolela gore re rata go hlankela ba bangwe le go rata go etiša dinyakwa tša bona pele ga tša rena. Eupša go hlahloba ka potego boemo bja rena bja kgopolo go ka utolla gore dipelo tša rena ga di a sekamela ka mo go feletšego tseleng yeo. Ka baka la’ng? Sa pele, ka gobane re abetše dika tša boithati go Adama le Efa; sa bobedi, ka gobane re phela lefaseng leo le kgothaletšago boithati. (Ba-Efeso 4:17, 18) Go ba le boemo bja kgopolo bjo bo se nago boithati gantši go bolela go hlagolela mokgwa wa go nagana wo o thulanago le tlhago ya rena ya go se phethagale. Seo se nyaka boikemišetšo le boiteko.

⁹ Go se phethagale ga rena mo go bonagalago, mo go fapanago kudu le mohlala o phethagetšego woo Jesu a re tlogeletšego wona, ka dinako tše dingwe go ka re dira gore re nyame. Re ka belaela gore go ba le boemo bja kgopolo bjo Jesu a bego a e-na le bjona go bile go a kgonega. Eupša ela hloko mantšu a Paulo ao a kgothatšago: “Xobane mo xo nna, ke ra nameng ya-ka, ke tseba xore xa xo dule se botse. Se se lexo xôna ké xo rata; xo dira botse xôna xo a hlaya. Xa ke dire botse byo ke bo rataxo; ke dira bobe byo ke sa bo ratexo. Xobane ka thokô ya motho wa teng ke thabêla Molaô wa Modimo. Xomme mo dithong tša-ka ke bôna molaô o šele o lwanthšaxo le molaô wa pelo ya-ka, wa nthopa wa mpušiša molaô wa sebe o lexo dithong tša-ka.” (Ba-Roma 7:18, 19, 22, 23) Ke therešo gore go se phethagale ga Paulo go be go mo thibela leboelela go direng thato ya Modimo go ya kamoo a bego a rata ka gona, eupša boemo bja gagwe bja kgopolo​—tsela yeo a bego a nagana le go ikwa ka yona ka Jehofa le molao wa Gagwe​—bo be bo bea mohlala. Le bja rena bo ka ba bjalo le bjona.

Go Lokiša Boemo bja Kgopolo bjo bo Fošagetšego

10. Ke boemo bofe bja kgopolo bjoo Paulo a ilego a kgothaletša ba-Filipi gore ba bo hlagolele?

¹⁰ Na go a kgonega gore ba bangwe go nyakega gore ba lokiše boemo bja kgopolo bjo bo fošagetšego? Ee. Se go bonagala e be e le sa therešo go Bakriste ba bangwe ba lekgolong la pele la nywaga. Lengwalong la gagwe leo a le ngwaletšego ba-Filipi, Paulo o boletše mabapi le go ba le boemo bjo bo nepagetšego bja kgopolo. O ngwadile gore: “Xa se xore ke šetše ke di hweditše [tša bophelo bja legodimong ka tsogo ya pejana] ka ba e a phethexilexo; se ke se diraxo ké xo di hlômara xore ke bê ke di thopê; ke thopê tšôna-tšeo Kriste a nthopetšexo tšôna. Bana bešo! Nna xa ke ithseme xore ke šetše ke thopile. Se se lexo xôna sé-sé: Ke lebala tša kwa nthaxo; ke ôbêlêla tša kwa pele; ke kxanyêlêla boyô, mo xo lexo mphapahlôxô wa ba xo biletšwa kwa lexodimong ke Modimo ka Jesu Kriste. Ka moka ba re lexo baphethexi, a re bê le kxopolô yeo.” (Mongwalo o sekamego ke wa rena.)​—Ba-Filipi 3:12-15.

11, 12. Jehofa o utolla boemo bjo bo nepagetšego bja kgopolo go rena ka ditsela dife?

¹¹ Mantšu a Paulo a bontšha gore motho le ge e mang, yo e bilego Mokriste, yo a sa bonego go nyakega gore a dire kgatelopele o na le boemo bjo bo fošagetšego bja kgopolo. Yena yoo o paletšwe ke go ba le boemo bja kgopolo bjo bo swanago le bja Kriste. (Ba-Hebere 4:11; 2 Petro 1:10; 3:14) Na boemo bja motho yo bjalo ke bja go hlobogwa? Le gatee. Modimo a ka re thuša gore re fetoše boemo bja rena bja kgopolo ge e ba re rata e le ka kgonthe. Paulo o tšwela pele gore: “Xe Le ka ba le kxopolô e šele, xôna Modimo ó sa tlo Le utollêla se e lexo taba.”​—Ba-Filipi 3:15.

¹² Lega go le bjalo, ge e ba re rata gore Jehofa a re utollele boemo bjo bo nepagetšego bja kgopolo, re swanetše go kgatha tema ya rena. Go ithuta ka thapelo Lentšu la Modimo ka thušo ya dikgatišo tša Bokriste tšeo di newago ke “molaki e a bôtêxaxo yo bohlale” go tla dira gore bao ‘ba nago le kgopolo e šele’ ba kgone go hlagolela boemo bjo bo nepagetšego bja kgopolo. (Mateo 24:45) Bagolo ba Bakriste, bao ba kgethilwego ke moya o mokgethwa  gore ba “dišê phuthêxô ya Modimo,” ba tla thabela go nea thekgo. (Ditiro 20:28) Re leboga kudu gakaakang gore Jehofa o naganela go se phethagale ga rena le go re nea thušo ka lerato! Anke re e amogeleng.

Go Ithuta go ba Bangwe

13. Re ithuta eng mabapi le boemo bjo bo nepagetšego bja kgopolo go tšwa pegong ya Beibele ya Jobo?

¹³ Go Ba-Roma kgaolo 15, Paulo o bontšha gore go naganišiša ka mehlala ya histori go ka re thuša go beakanya boemo bja rena bja kgopolo. O ngwala gore: “Tše di ngwadilwexo kxalê, di ngwaletšwe xo ruta rena, xore re hwetšê kholofêlô ka xo tiišwa le ka xo homotšwa ka ôna mangwalô.” (Ba-Roma 15:4) Go ile gwa nyakega gore ba bangwe ba bahlanka ba Jehofa ba botegago mehleng e fetilego ba lokiše dikarolo tše itšego tša boemo bja bona bja kgopolo. Ka mohlala, ka kakaretšo Jobo o be a e-na le boemo bja kgopolo bjo bobotse. O be a sa ke a phara Jehofa ka bobe le ka mohla, gomme ga go mohla a kilego a dumelela tlaišego e šišinya go bota ga gagwe Modimo. (Jobo 1:8, 21, 22) Lega go le bjalo, o be a na le tshekamelo ya go itokafatša. Jehofa o ile a laela Elihu gore a thuše Jobo tabeng ya go lokiša tshekamelo ya gagwe. Go e na le gore a ikwe a kgopišegile, Jobo o ile a amogela ka boikokobetšo go nyakega ga gore a fetoše boemo bja kgopolo gomme a thoma go dira bjalo di tloga fase.​—Jobo 42:1-6.

14. Re ka swana bjang le Jobo ge e ba re eletšwa mabapi le boemo bja rena bja kgopolo?

¹⁴ Na re be re tla arabela go etša Jobo ge e ba Mokriste-gotee a be a ka re botša ka botho gore re nea ponagalo ya go ba le boemo bjo bo fošagetšego bja kgopolo? Ka go swana le Jobo, eka le ka mohla re se ke ra “tsôta Modimo.” (Jobo 1:22) Ge e ba re tlaišega ka mo go sa swanelago, eka le ka mohla re se ke ra belaela goba ra phara Jehofa molato bakeng sa mathata a rena. Anke re phemeng go leka go itokafatša, re gopola gore go sa šetšwe gore ditokelo tša rena ke dife tirelong ya Jehofa, re sa dutše ‘re se bahlanka ba selo.’​—Luka 17:10.

15. (a) Ke boemo bofe bjo bo fošagetšego bja kgopolo bjoo ba bangwe ba balatedi ba Jesu ba ilego ba bo bontšha? (b) Petro o ile a bontšha bjang boemo bjo bobotse bja kgopolo?

¹⁵ Lekgolong la pele la nywaga, ba bangwe bao ba bego ba theetša Jesu ba be ba bonagatša boemo bjo bo fošagetšego bja kgopolo. Lebakeng le lengwe, Jesu o ile a bolela selo se sengwe seo go bego go le thata go se kwešiša. Ge ba arabela, “barutiwa ba bantši ba xaxwe xe ba e-kwa a r’yalo, ba re: Polêlô yé ké e thata; e ka kowa ke mang?” Bao ba ilego ba bolela ka tsela ye go be go le molaleng gore ba be ba e-na le boemo bjo bo fošagetšego bja kgopolo. Le gona boemo bja bona bjo bo fošagetšego bja kgopolo bo ba dirile gore ba tlogele go theetša Jesu. Pego e re: “Xo tloxa moo ba bantši ba barutiwa ba xaxwe ba xomêla moraxo, ba se hlwe  ba sepela le Yêna.” Na bohle ba be ba e-na le boemo bjo bo fošagetšego bja kgopolo? Aowa. Pego e tšwela pele gore: “Jesu a botšiša ba lesome la metšô e mebedi a re: Afa le lena xa Le rate xo tloxa? Simone Petro a fetola a re: Morêna! Re tlo tloxa rè leba xo mang?” Ge e le gabotse, Petro ka morago o ile a ikaraba ka gore: “O na le mantšu a bophelô byo bo sa felexo.” (Johane 6:60, 66-68) A boemo bjo bobotse gakaakang bja kgopolo! Ge re lebana le ditlhaloso goba ditokišo tabeng ya kwešišo ya Mangwalo tšeo mathomong re ka hwetšago go le thata go di amogela, na e ka se be mo gobotse go bontšha boemo bja kgopolo bjo bo bontšhitšwego ke Petro? E tla ba bošilo gakaakang go kgaotša go hlankela Jehofa goba go bolela ka tsela yeo e thulanago le “mantšu ao a se naxo senyalô” feela ka gobane dilo tše dingwe go le thata go di kwešiša mathomong!​—2 Timotheo 1:13.

16. Ke boemo bofe bjo bo tšhošago bja kgopolo bjo bo ilego bja bonagatšwa ke baetapele ba bodumedi ba ba-Juda ba mehleng ya Jesu?

¹⁶ Baetapele ba bodumedi ba ba-Juda ba lekgolong la pele la nywaga ba ile ba palelwa ke go bontšha boemo bja kgopolo bjoo Jesu a bego a e-na le bjona. Boikemišetšo bja bona bjo bo tiilego bja go se nyake go theetša Jesu bo ile bja bonagatšwa ge a be a tsoša Latsaro bahung. Bakeng sa motho le ge e le ofe yo a nago le boemo bjo bo nepagetšego bja kgopolo, mohlolo woo e be e tla ba pontšho e feletšego ya gore Jesu o romilwe ke Modimo. Lega go le bjalo, re bala gore: “Baperisita ba baxolo le bafarisei ba napa ba kxobêla pitšô, ba re: Re tlo re’ng? Motho é ó dira mehlôlô e mentši. Xe re ka fêla rè mo lesa, bohle ba tlo mo dumêla, ’me Ba-Rôma ba tlo tla ba re amoxa naxa le batho.” Tharollo ya bona e bile efe? “Ké lôna ’tšatši le ba tloxilexo bà tlemile la xo re ba tlo mmolaya.” Ka ntle le go loga maano a go bolaya Jesu, ba ile ba roma batho gore ba yo fediša bohlatse bjo bo phelago bja go ba ga gagwe modira-mehlolo. “Ké mo baperisita ba baxolo ba lakanexo xore le yêna Latsaro ba mmolayê.” (Johane 11:47, 48, 53; 12:9-11) E be e tla ba mo go selekišago gakaakang ge re be re ka kgothaletša boemo bjo bo swanago bja kgopolo ke moka ra tenwa goba ra kgopišwa ke dilo tšeo re swanetšego go di thabela e le ka kgonthe! Ee, e be e tla ba mo go kotsi gakaakang!

Go Ekiša Boemo bjo bo Nepagetšego bja Kgopolo bjo bo Swanago le bja Kriste

17. (a) Daniele o ile a bontšha boemo bja kgopolo bja sebete ka tlase ga maemo afe? (b) Jesu o ipontšhitše bjang e le yo a nago le sebete?

¹⁷ Bahlanka ba Jehofa ba dula ba e-na le boemo bjo bo nepagetšego bja kgopolo. Nakong ya ge manaba a Daniele a be a rera go dira gore go ntšhwe molao wo o thibelago go rapelwa ga modimo le ge e le ofe goba motho le ge e le ofe ka ntle le kgoši lebaka la matšatši a 30, Daniele o ile a tseba gore se se be se tsena-tsenana le tswalano ya gagwe le Jehofa Modimo. Na o be a tla tlogela go rapela Modimo lebaka la matšatši a 30? Aowa, o ile a tšwela pele ka sebete a rapela Jehofa gararo ka letšatši, ka ge e be e le mokgwa wa gagwe. (Daniele 6:7-18) Jesu ka mo go swanago o ile a gana go tšhošetšwa ke manaba a gagwe. Ka Sabatha e nngwe, o ile a gahlana le monna yo a bego a omile seatla. Jesu o be a tseba gore ba-Juda ba bantši bao ba bego ba le gona moo ba be ba ka se kgahlege ge a be a ka fodiša motho ka Sabatha. O ile a ba kgopela ka go lebanya gore ba hlalose maikwelo a bona tabeng ye. Ge ba be ba gana, Jesu o ile a tšwela pele gomme a fodiša monna yoo. (Mareka 3:1-6) Jesu ga se a ka a ikgogela morago go phethagatšeng thomo ya gagwe bjalo ka ge a be a bona gore ke selo se se swanetšego go dirwa.

18. Ke ka baka la’ng ba bangwe ba re ganetša, eupša re swanetše go arabela bjang boemong bja bona bjo bo fošagetšego bja kgopolo?

¹⁸ Dihlatse tša Jehofa lehono di lemoga gore le tšona ga se tša swanela go tšhošetšwa le gatee ke karabelo yeo e sa kgahlišego ya baganetši yeo e ka bago gona. Go sego bjalo, ba tla be ba sa bontšhe boemo bja kgopolo bjo bo swanago le bja Jesu. Ba  bantši ba ganetša Dihlatse tša Jehofa, ba bangwe ke ka baka la go se tsebe selo gomme ba bangwe ke ka baka la gore ba hloile Dihlatse goba molaetša wa tšona. Eupša anke le ka mohla re se ke ra dumelela boemo bja bona bja kgopolo bja go se be le bogwera bo kgoma bja rena bjo bo nepagetšego. Le ka mohla ga se ra swanela go dumelela ba bangwe ba laola tsela yeo re rapelago ka yona.

19. Re ka bonagatša bjang boemo bja kgopolo bjo bo swanago le bja Jesu Kriste?

¹⁹ Jesu ka mehla o be a bontšha boemo bjo bo nepagetšego bja kgopolo go balatedi ba gagwe le dithulaganyong tša Modimo, go sa šetšwe kamoo go ka bego go be go le thata ka gona go dira bjalo. (Mateo 23:2, 3) Re swanetše go ekiša mohlala wa gagwe. Ke therešo gore banababo rena ga ba phethagala, eupša go bjalo le ka rena. Le gona ke kae moo re ka hwetšago bagwera ba bakaone le bao e lego bagwera ba potego go phala bao ba lego borwarreng bja rena bja lefase ka bophara? Jehofa ga se a hlwa a re nea kwešišo e feletšego ya Lentšu la gagwe le le ngwadilwego, eupša ke sehlopha sefe sa bodumedi se se le kwešišago ka mo go oketšegilego? Anke ka mehla re duleng re e-na le boemo bjo bo nepagetšego bja kgopolo, boemo bja kgopolo bjoo Jesu Kriste a bego a e-na le bjona. Gare ga tše dingwe, se se akaretša go tseba mokgwa wa go leta Jehofa, bjalo ka ge re tla ahla-ahla seo sehlogong se se latelago.

[Mengwalo ya ka tlase]

Na o ka Hlalosa?

• Maphelo a rena a kgongwa bjang ke boemo bja rena bja kgopolo?

• Hlalosa boemo bja kgopolo bja Jesu Kriste.

• Re ka ithuta eng boemong bja Jobo bja kgopolo?

• Ke boemo bofe bjo bo nepagetšego bja kgopolo bjo re swanetšego go ba le bjona ge re lebane le kganetšo?

[Dipotšišo tša Thuto]

[Diswantšho go letlakala 7]

Mokriste yo a nago le boemo bjo bo nepagetšego bja kgopolo o katanela go thuša ba bangwe

[Seswantšho go letlakala 9]

Go ithuta ka thapelo Lentšu la Modimo go re thuša gore re be le boemo bja kgopolo bjo bo swanago le bja Kriste