‘Di Bolela Mabapi le go Loka le Lerato’

NYWAGENG ya morago bjale, Dihlatse tša Jehofa kua Fora e be e dutše e le bahlaselwa ba lesolo leo le tseneletšego la kgobošo. Ditherešo tšeo di sa felelago le tsebišo e fošagetšego di ile tša dirišwa ke manaba a tšona bakeng sa go di emela gampe pele ga setšhaba. Mathomong a 1999, Dihlatse tša Jehofa Fora ka bophara di ile tša aba dikopi tše dimilione tše 12 tša pampišana e nago le sehlogo seo se rego People of France, You Are Being Deceived! (Batho ba Fora, le a Forwa!) Pampišaneng ye di ile tša sola dipolelo tšeo di senyago leina tšeo di ilego tša dirwa malebana le tšona.

Matšatši a sego kae ka morago ga lesolo, Mna. Jean Bonhomme, ngaka ya tša kalafo le yo e kilego ya ba setho sa Palamente o ile a romela lengwalo la go dira boipiletšo kuranteng ya lefelong leo. O ngwadile gore: “Dihlatse tša Jehofa di fela di e-tla legaeng la-ka. Di tlela go bolela le nna mabapi le go loka le lerato la lefase ka moka. . . . Ga di gapeletše go tsena. Di bolela ka boleta le go theetša ka botho dipelaelong tša-ka.”

Ge a bolela ka pono ya moya ya Dihlatse tša Jehofa, Mna. Bonhomme o itše: “Go ba ga tšona tšeo di sa hlalefelago ditsela tša lefase, go ka se ke gwa senya ka tsela le ge e le efe. Ka lehlakoreng le lengwe, go se be le bohlale bja lefase ga bo-radipolitiki ba itšego ke moo go beago khutšo ya badudi le kwano ya setšhaba kotsing kudu.”