Bagoeledi Ba Mmušo Ba A Bega

Go Nošetša Dipeu tša Therešo Kua Chile

LEGANATENG la ka leboa la Chile, go ka feta nywaga e mentši pele ga ge pula e ka tla. Eupša ge e fihla, naga yeo e omilego ya mafsika ao a phatlaletšego e fetoga khapete ya kgonthe ya matšoba a mebala-bala. Pontšho ye yeo e kgahlišago e tanya basepedi ba go boga naga go tšwa nageng ka moka.

Lega go le bjalo, tiragalo yeo e kgahlišago kudu e direga gare ga batho ba Chile. Meetse a therešo ya Beibele a elelela khutlong e nngwe le e nngwe ya naga, gomme batho ba bantši ba dipelo tše di botegago ba a “khukhuša” ba fetoga barutiwa ba Jesu Kriste. Tsela e nngwe yeo e dirišwago go gaša meetse a a therešo ke mogala. Diphihlelo tše di latelago di bontšha mafelelo a mabotse ao a fihlelelwago ka mokgwa wo wa go nea bohlatse.

• Moebangedi wa nako e tletšego yo a bitšwago Karina o ile a kgopelwa gore a dire pontšho ya kamoo re ka neago bohlatse ka mogala lenaneong la kopano ya tikologo. Lega go le bjalo, Karina o be a se a ka a ba le karolo sebopegong se bjalo sa modiro wa go nea bohlatse. Bakeng sa go mo kgothaletša gore a be le karolo lenaneong la kopano, mogolo gotee le mosadi wa gagwe ba ile ba hlahloba le Karina tše dingwe tša dintlha tša kamoo go ka newago bohlatse ka mogala. Ba ile ba ba ba mo kgothaletša go rapelela tlhahlo ya Jehofa tabeng ye. O ile a dira bjalo gomme mafelelong a phetha ka go leka go letša mogala.

Karina o ile a kgetha nomoro ya mogala ya motsana o lego kgaufsi. Moswari wa megala o ile a araba gomme Karina a hlalosa morero wa go mo leletša. Karabo ya moswari wa megala e be e le e kgahlišago, gomme go ile gwa dirwa dithulaganyo bakeng sa go boledišana gape lebakeng la matšatši a mararo. Leeto la go boela ka mogala le ile la feleletša ka thuto ya Beibele go dirišwa poroutšha ya Ke Eng Seo Modimo a se Nyakago go Rena? Ga e sa le go tloga ka nako yeo, ba ile ba thabela dithuto tšeo di kgahlišago le tšeo di phelago gomme Karina o ile a romela dipuku bakeng sa go araba dipotšišo tša mosadi.

• Bernarda o ile a gata mogato wa pele wa go nea bohlatse go monna yoo a ilego a kgotla dinomoro tša gagwe tša mogala ka phošo. Go e na le go bontšha go tenega, Bernarda o ile a itsebiša e le yo mongwe wa Dihlatse tša Jehofa gomme a nea thušo. Go ile gwa latela poledišano gomme monna o ile a theetša ge a hlalosa kamoo Mmušo wa Modimo kgaufsinyane o tlago go fediša go hloka toka ka gona. Monna o ile a nea Bernarda nomoro ya gagwe ya mogala gomme o ile a dira maeto a go boela ka mogala. Go e nngwe ya dipoledišano tša bona, o ile a mmalela karolo ya puku ya Tsebo e Išago Bophelong bjo bo sa Felego. O ile a botšiša gore a ka hwetša bjang kopi, gomme Bernarda o ile a mo romela yona gotee le Beibele. Go ile gwa dirwa dithulaganyo tša gore a etelwe ke ngwanabo rena wa lefelong leo, yoo ga bjale a tšwelago pele go “nošetša” “semela” se seo se golago.

Ee, mobung wo o omilego wa lefase le, dipeu tšeo di utagetšego di emetše go hloga ge di fihlelelwa ke meetse a therešo ao a neago bophelo. Dikete tša bao ba nyorilwego di tšwela pele go “hloxa” le go ‘khukhušetša’ go ba bahlanka ba botegago ba Jehofa Modimo.​—Jesaya 44:3, 4.