‘Mabaka a Tsošološo’ a Batametše!

Pejana ga ge Jesu a ka rotogela legodimong, ba bangwe ba barutiwa ba gagwe bao ba botegago ba ile ba mmotšiša gore: “Morêna! Mmušô wa Isiraele a O tlo o tsoša lebakeng leno?” Karabo ya Jesu e bontšhitše gore nako e itšego e be e tla feta pele ga ge Mmušo o ka tla. Ka nako yeo, balatedi ba gagwe ba be ba tla ba le mošomo o mogolo wo ba tla o dirago. E be e tla ba dihlatse tša Jesu “Jerusalêma le naxeng ka moka ya Juda le ya Samaria, xo fihla maxomong a lefase.”​—Ditiro 1:6-8.

KABELO yeo e be e ka se ke ya phethwa ka matšatši a sego kae feela, dibeke goba dikgwedi. Lega go le bjalo, ka ntle le tika-tiko barutiwa ba ile ba thoma go bolela. Eupša ga se ba ka ba lahlegelwa ke kgahlego tabeng ya tsošološo. Moapostola Petro o ile a bolela ka yona go lešaba leo le bego le bokane Jerusalema gore: “Ithsoleng-xê, Le sokoloxê, xore Le phomolwê dibe tša lena. Xore xo tlê mabaka a tapoloxô e tšwaxo xo Morêna, xe a tlo roma Jesu Kriste, yo a mmeetšexo bô-lena. Xomme Yêna, lexodimo le swanetše xo ba lè mo xorošitše, xo bê xo tlê mabaka a xo tsoša tšohle, a Modimo a a boletšexo ka melomo ya baporofeta ba bakxêthwa ba xaxwe bohle.” (Mongwalo o sekamego ke wa rena.)​—Ditiro 3:19-21.

‘Mabaka a a tsošološo’ a be a tla tliša “mabaka a tapoloxô” a tšwago go Jehofa. Tsošološo ye e boletšwego e sa le pele e be e tla tla ka megato e mebedi. Wa pele, go be go tla ba le tsošološo e lapološago ya moya yeo ga bjale e tšwelago pele. Wa bobedi, ye e be e tla latelwa ke go hlongwa ga paradeise ya kgonthe mo lefaseng.

Nako ya Tsošološo e a Thoma

Bjalo ka ge moapostola Petro a hlaloseditše lešaba leo le bego le le kua Jerusalema, legodimo ‘le gorošitše Jesu ka bolona.’ Se se bile bjalo go fihla ka 1914, ge Jesu a be a tšea matla a gagwe a bogoši gomme a thoma go buša e le Kgoši e kgethilwego ya Modimo. Ka nako yeo, Petro o be a boletše e sa le pele gore Jehofa o tla “roma” Morwa wa gagwe ka kgopolo ya gore O be a tla dumelela Jesu go phetha karolo ya gagwe e le karolo ya motheo mererong ya Modimo. Beibele e hlalosa tiragalo ye ka polelo ya seswantšhetšo: “A [phuthego ya Modimo ya legodimong] bêlêxa ngwana wa mošemanyana, [Mmušo wa Modimo ka diatleng tša Jesu Kriste] wa xo tlo buša dithšaba tšohle ka molamó wa thsipi; xomme ngwana wa xaxwe a tšewa a rotošetšwa xo Modimo sedulong sa xaxwe sa boxoši.”​—Kutollo 12:5.

Eupša ditšhaba di be di se na boikemišetšo bja go ikokobeletša pušo ya Kriste. Ka kgonthe, di ile tša hlasela balata ba yona ba botegago ka go se kwanantšhe ba lefaseng, bao ba tsebjago lehono e le Dihlatse tša Jehofa. Go swana le diketapele tša bona tša baapostola, Dihlatse ka go se dika-dike di ile tša amogela “modiro wa go nea bohlatse ka Jesu.” (Kutollo 12:17, NW) Kganetšo malebana le modiro wo woo Bakriste ba ba kgonthe ba bego ba o dira e ile ya phulega dinageng ka go latelelana ga tšona. Ka 1918, ditho tšeo di ikarabelago tša sehlopha sa bašomi sa ntlong-kgolo ya Mokgatlo wa Watch Tower kua Brooklyn, New York di ile tša išwa pele ga kgoro ya tsheko ka  ditatofatšo tša maaka gomme tša ahlolelwa lebaka le letelele kgolegong ka mo go sa swanelago. Go ile gwa tšea lebakanyana go bonagala eka modiro wa go nea bohlatse wa mehleng yeno “xo fihla maxomong a lefase” o be o tla palelwa.​—Kutollo 11:7-10.

Lega go le bjalo, ka 1919, ditho tšeo di golegilwego tša sehlopha sa bašomi sa ntlong-kgolo di ile tša lokollwa gomme ka morago tša lokollwa ka mo go feletšego ditatofatšong ka moka tša maaka. Ga se tša ka tša senya nako go tšwetša pele gape modiro wa tsošološo wa moya. Ga e sa le go tloga ka nako yeo, batho ba Jehofa ba be ba dutše ba thabela katlego ya moya yeo e sa kago ya ba gona pele.

Lesolo leo le katološitšwego le ile la dirwa bakeng sa go ruta batho ba ditšhaba ka moka go lemoga dilo tšeo Kriste a laetšego balatedi ba gagwe go di dira. (Mateo 28:20) E be e le mo go lapološago gakaakang go bona ba bangwe bao nakong e fetilego ba ilego ba bontšha dika tša bophoofolo ba fetoša pono ya bona! Ba ile ba apola semelo sa kgale, seo se tšweletšago mekgwa e bjalo ka “pefêlô,” “maroxa” le “dipolêlô tša dihlong,” gomme ba apara semelo se sefsa “seo se mpshafatšwago ka tsebo e nepagetšego go ya ka seswantšho sa [Modimo] Yo a se bopilego.” Ka kgopolo ya moya, mantšu a moporofeta Jesaya a a phethagala gaešita le gona bjale: “Phiri [motho yoo nakong e fetilego a ilego a bontšha dika tše swanago le tša phiri] e tlo dula le kwanyana [motho yo a bontšhago tshekamelo ya go ba boleta]; nkwê e tlo hutama le putšanyana; namane le tau le pholo di tlo dula felô xotee.”​—Ba-Kolose 3:8-10, bapiša le NW; Jesaya 11:6, 9.

Tsošološo e Tšwelago Pele e Batametše!

Go tlaleletša tsošološong yeo e ilego ya tšwelela paradeiseng ya moya lehono, nako ya ge polanete ya rena e tla ba paradeise ya kgonthe e batamela ka lebelo. Karolo e nyenyane ya lefase e be e le paradeise ge Jehofa a be a bea bagologolo ba rena, Adama le Efa tšhemong ya Edene. (Genesi 1:29-31) Ke ka baka leo re kgonago go bolela ka Paradeise e le yeo e tsošološitšwego. Lega go le bjalo, pele ga ge seo se direga, lefase le swanetše le tlošwe bodumedi bja maaka bjo bo sa hlomphego Modimo. Dihlopha tša dipolitiki tša lefase ke tšona di tla dirago se. (Kutollo 17:15-18) Ka nako yeo, dihlopha tša dipolitiki le tša tša kgwebo gotee le bathekgi ba tšona di tla fedišwa. Mafelelong, manaba a Modimo a mafelelo​—Sathane Diabolo le batemona ba gagwe​—ba tla tswalelelwa nywaga e sekete​—tekanyo ya lebaka la modiro wa tsošološo. Ka nako yeo, “xo thabe lešoka le naxa ye e omilexo; le lehanata a le hlalalê, le taxê byalo ka letšoba.” (Jesaya 35:1) Lefase ka moka le tla lokologa tšhitišong. (Jesaya 14:7) Gaešita le dimilione tšeo di hwilego di tla bušetšwa bophelong mo lefaseng. Bohle ba tla latswa mehola ya tsošološo ya sehlabelo sa topollo. (Kutollo 20:12-15; 22:1, 2) Go ka se be le batho ba difofu, difoa goba digole mo lefaseng. “Mo xo ba ba axilexo fá xo ka se bê le e a rexo: Ke a babya!” (Jesaya 33:24) Kapejana ka morago ga Pušo ya Nywaga e Sekete ya Kriste, Diabolo le batemona ba gagwe ba tla lokollwa ka lebakanyana gomme ba tla bona kamoo morero wa Modimo ka lefase o tla bego o šetše o phethagaditšwe go fihla ntlheng yeo. Mafelelong, ba tla fedišetšwa sa ruri.​—Kutollo 20:1-3.

Ge Lefase le fihla bofelong bja nywaga e sekete ya tsošološo, “tšohle tše di bušaxo môya” di tla tumiša Jehofa, gomme di tla dira bjalo ka mo go sa felego. (Psalme 150:6) Na o tla ba gare ga tšona? O ka ba gare ga tšona.