Boipiletšo Bakeng sa Thušo

MOSADI wa mo-Brazil o ile a lla ka gore: “Modimo o ntebetše!” Ka morago ga lehu leo le sa letelwago la monna wa gagwe, o ile a ba le maikwelo a gore bophelo bja gagwe ga bo sa na morero le ge e le ofe. Na o kile wa leka go homotša motho yo mongwe yo a nyamilego ka mokgwa woo goba yoo mohlomongwe a hlabago mokgoši wa go nyaka thušo?

Ba bangwe ba nyema moko moo e lego gore ba fediša maphelo a bona​—gomme bontši bja bona ke bafsa. Go ya ka kuranta ya Folha de S. Paulo, nyakišišo yeo e dirilwego kua Brazil e bontšha gore “go ipolaya gare ga bafsa go oketšegile ka 26 lekgolong.” Ka mohlala, ela hloko taba ya Walter, * lesogana la kua São Paulo. O be a se na batswadi, a se na legae, a se na nako ya go ba noši e bile a se na bagwera bao a ka ithekgago ka bona. Bakeng sa go fediša manyami a gagwe, Walter o ile a phetha ka go itahlela leporogong.

Mma yo a se nago molekane, Edna o be a šetše a e-na le bana ba babedi ge a be a kopana le monna yo mongwe. Ka morago ga kgwedi feela, ba ile ba thoma go dula gotee legaeng la mmago monna yoo, yoo a bego a nweletše go dirišaneng le meoya gomme e le molemaledi wa bjala. Edna o ile a ba le ngwana yo mongwe gape, a thoma go nwa ka mo go feteletšego gomme a gateletšega kudu moo a ilego a ba a leka go ipolaya. Mafelelong o ile a lahlegelwa ke tshwanelo ya go hlokomela bana ba gagwe.

Go thwe’ng ka batšofadi? Maria e be e le motho yo a ratago boithabišo le yo a bolelago kudu. Lega go le bjalo, ge a dutše a gola, o ile a thoma go tshwenyega ka mošomo wa gagwe wa go ba mooki ka gobane a be a boifa gore o tla dira diphošo. Se se ile sa mo dira gore a ikwe a gateletšegile. Ka morago ga go leka go ikalafa, o ile a nyaka tlhokomelo ya tša kalafo gomme kalafo yeo a ilego a e hwetša e ile ya bonagala e le yeo e nago le thušo. Eupša ge a be a lahlegelwa ke mošomo wa gagwe a e-na le nywaga e 57, kgateletšego e ile ya boa ka mmetela kudu moo e lego gore o be a sa kgone go bona tharollo. Maria o ile a thoma go nagana ka go ipolaya.

Moprofesara José Alberto Del Porto wa Yunibesithi ya São Paulo o re: “Mo e ka bago 10 lekgolong ya batho bao ba gateletšegilego ba leka go ipolaya.” Mookamedi yo mogolo wa tša kalafo wa United States, Dr. David Satcher o bega gore: “Go thata go dumela gore batho ba bantši ba hwile ka go ipolaya go e na le go bolawa, eupša ke therešo e nyamišago.”

Ge e le gabotse, ka dinako tše dingwe maiteko a go ipolaya ke boipiletšo bakeng sa thušo. Ka kgonthe ditho tša lapa le bagwera ba nyaka go dira selo seo se nepagetšego bakeng sa yo a lahlegetšwego ke kholofelo. Ke therešo gore go ka se thuše selo go diriša  dipolelwana tše bjalo ka: “Tlogela go ikwela bohloko,” “Batho ba bantši ba boemong bjo bobe go feta bjoo o lego go bjona” goba “Ka moka ga rena re no fela re e-ba le matšatši ao a sa thabišego nako le nako.” Go e na le go dira bjalo, ke ka baka la’ng o sa be mogwera wa kgonthe le motheetši yo botse? Ee, leka go thuša motho yo a nyemilego moko gore a bone gore bophelo bo na le morero.

Mongwadi wa mo-Fora Voltaire o ngwadile gore: “Motho yo e rego ge a hlasetšwe ke manyami lehono a ipolaya, o be a tla duma go phela ge nkabe a be a ile a leta lebaka la beke.” Ka gona, ke bjang batho bao ba se nago kholofelo ba ka lemogago gore bophelo ke bja bohlokwa?

[Mengwalo ya ka tlase]

[Seswantšho go letlakala 3]

Palo e oketšegago ya bafsa le batho bao ba godilego e a ipolaya

[Seswantšho go letlakala 4]

O ka thuša bjang motho yo a lahlegetšwego ke kholofelo?