Ke ka Baka La’ng o Swanetše go ba yo a Ikgafago?

Bill ke monna wa lapa yo a lego nywageng ya gagwe ya bo-50 yo e lego morutiši wa thekinolotši ya tša go aga. Ngwageng ka moka, ka ditshenyagalelo tša gagwe, o fetša dibeke tše dintši a thuša go rulaganyetša le go aga Diholo tša Mmušo bakeng sa diphuthego tša Dihlatse tša Jehofa. Emma ke motho yo a sa nyalwago wa nywaga e 22 yo a rutegilego kudu le yo a nago le mangwalo. Go e na le go phegelela dipakane tšeo e lego tša gagwe ka noši le maipshino ka mo go feletšego, o diriša diiri tša ka godimo ga tše 70 kgweding e nngwe le e nngwe e le modiredi, a thuša batho go kwešiša Beibele. Maurice le Betty ba rotše modiro. Go e na le go dira dilo ka go nyefiša mo nakong ye, ba hudugetše nageng e nngwe go yo thuša batho ba moo go ithuta ka morero wa Modimo ka lefase.

BATHO ba ga ba itšee e le ba kgethegilego goba bao e lego bo-moswana-noši. Ke batho feela ba tlwaelegilego bao ba dirago seo ba se lebelelago e le se se nepagetšego go se dira. Ke ka baka la’ng ba diriša nako ya bona, matla a bona, bokgoni bja bona le matlotlo a bona dikgahlegong tša ba bangwe? Seo se ba tutuetšago ke lerato le le tseneletšego la go rata Modimo le la go rata moagišani wa bona. Lerato le le tsošitše moya wa kgonthe wa boikgafo ka go yo mongwe le yo mongwe wa bona.

Re bolela’ng ka moya wa boikgafo? Ee, go ba yo a ikgafago ga go nyake gore motho a phele bophelo bjo thata goba bja go itima dilo. Ga go nyakege gore go akaretše go itima dilo mo go feteletšego moo go re amogago lethabo le kgotsofalo. Go etša ge The Shorter Oxford English Dictionary e bea taba, boikgafo ge e le gabotse bo bolela “go gafa dikgahlego tša motho ka noši, lethabo le dikganyogo ka baka la boikarabelo goba katlego ya ba bangwe.”

Jesu Kriste​—Mohlala o Mogolo

Morwa wa Modimo yo a tswetšwego a nnoši, Jesu Kriste, ke mohlala o mogolo wa motho yo a nago le moya wa boikgafo. Go beng gona ga gagwe pele e e-ba motho, bophelo bja gagwe bo swanetše go ba e be e le bjo bo tutuetšago le bjo bo kgotsofatšago ka tekanyo e phagamego kudu. O be a e-na le tswalano ya kgaufsi le e tseneletšego le Tatagwe le dibopiwa tša moya. Go feta moo, Morwa wa Modimo o dirišitše bokgoni bja gagwe medirong e hlohlago le e kgahlišago e le “mošomedi yo a nago le bokgoni.” (Diema 8:30, 31, NW) Ga go na pelaelo gore o be a phela maemong a phagamego kudu go feta le ge e le afe ao motho yo  a humilego go feta bohle lefaseng a ka bago a kile a a thabela. E le yo a latelago Jehofa Modimo, o be a e-na le boemo bjo bo phagamego le bja tokelo legodimong.

Lega go le bjalo, Morwa wa Modimo “a tšea lebopô la mohlanka, a ba e a swanaxo le batho.” (Ba-Filipi 2:7) O ile a ikemišetša go gafa mehola ka moka yeo a bego a e-na le yona ka go ba motho le go neela bophelo bja gagwe e le topollo e le gore a dirolle tshenyo yeo e bakilwego ke Sathane. (Genesi 3:1-7; Mareka 10:45) Seo se ile sa bolela go tla go phela gare ga batho ba sebe lefaseng leo le rapaletšego matleng a Sathane Diabolo. (1 Johane 5:19, bapiša le NW.) Gape se ile sa bolela go kgotlelela go se iketle le go ba bothateng ga motho ka noši. Lega go le bjalo, go sa šetšwe gore seo se ile sa mo nyaka eng, Jesu Kriste o be a ikemišeditše go dira thato ya Tatagwe. (Mateo 26:39; Johane 5:30; 6:38) Se se ile sa bea lerato la Jesu le potego ya gagwe e sa kwanantšhego tekong ka mo go feletšego. O be a ikemišeditše go fihla bokgoleng bofe? Moapostola Paulo o itše: “A ikokobetša a ba e a kwaxo le xo iša lehung, lehung la [koteng ya tlhokofatšo, NW].”​—Ba-Filipi 2:8.

‘Kgopolo ye e Swanetše go ba mo go Lena’

Re kgothaletšwa gore re latele mohlala wa Jesu. Paulo o kgothaditše ka gore: “Kxopolô ye e swanetšexo xo ba mo xo lena, ké yeo e bexo e le xo Kriste Jesu.” (Ba-Filipi 2:5) Se re ka se dira bjang? Tsela e nngwe ke ka gore “motho a se kê a šetša tša xo ikhola; a a šetšê tša xo hola ba bangwê.” (Ba-Filipi 2:4) Lerato la kgonthe “xa le tsome xo ikhola.”​—1 Ba-Korinthe 13:5.

Batho bao ba kgomegago gantši ba ile ba bontšha boineelo bja go ikgafa ge ba hlankela ba bangwe. Lega go le bjalo, lehono batho ba bantši ke bao ba nago le boithati. Lefase le na le boemo bja kgopolo bja nna-pele. Re swanetše go itiša malebana le moya wa lefase ka gobane ge e ba o atlega go fetoša pono ya rena le boemo bja rena bja kgopolo, mohlomongwe re tla dira gore dikganyogo tša rena e be tša bohlokwa bjo bogolo. Ke moka selo se sengwe le se sengwe seo re se dirago​—kamoo re dirišago nako ya rena ka gona, matla a rena le matlotlo a rena​—se tla laolwa ke dipelaelo tša boithati. Ka baka leo go nyakega gore re lwe ka thata malebana le tutuetšo ye.

Gaešita le keletšo yeo e nago le maikemišetšo a mabotse ka dinako tše dingwe e ka fokodiša moya wa rena wa boikgafo. Ka go lemoga moo tsela ya Jesu ya boikgafo e bego e lebiša gona, moapostola Petro o itše: “Morêna! A k’O lôtêxê.” (Mateo 16:22) Mohlomongwe o ile a hwetša go le thata go amogela boikemišetšo bja Jesu bja go fihla bokgoleng bja lehu dikgahlegong tša bogoši bja Tatagwe le go phološwa ga batho. Ka gona o ile a leka go fetša Jesu matla tabeng ya go phegelela tsela e bjalo.

“Ikxafê”

Jesu o ile a arabela bjang? Pego e re: “A retoloxa a lebêlêla barutiwa ba xaxwe, a sôla Petro a re: Tloxa fá pele xa-ka, wêna Lenaba; xobane xa O eleletše tša Modimo; O eleletša tša batho.” Ke moka Jesu o ile a phuthela lešaba go yena gotee le barutiwa ba gagwe gomme a re: “Xe motho a rata xo nthšala moraxo, a ikxafê a rwalê [kota ya gagwe ya tlhokofatšo, NW] ’me a ntatêlê.”​—Mareka 8:33, 34.

Nywaga e ka bago e 30 ka morago ga ge a neile Jesu keletšo ye, Petro o ile a bontšha gore ka nako yeo o be a kwešiša seo se bolelwago ke boikgafo. Ga se a ka a kgothaletša badumedi-gotee le yena gore ba goge maoto gomme ba itote. Go e na le moo, Petro o ile a ba kgothaletša gore ba lokišeletše menagano ya bona bakeng sa modiro gomme ba tlogele go latela dikganyogo tša bona tša nakong e fetilego tša lefase. Go sa šetšwe diteko, ba be ba swanetše go etiša go dira thato ya Modimo pele maphelong a bona.​—1 Petro 1:6, 13, 14; 4:1, 2.

Tsela e putsago kudu yeo yo mongwe le yo mongwe wa rena a ka e phegelelago ke ya go ikgafela Jehofa, re latela Jesu Kriste ka potego le go dumelela Modimo gore a hlahle mediro ya rena. Paulo o beile mohlala o mobotse tabeng ye. Go ba ga gagwe le maikwelo a go  akgofa ga nako le tebogo ya gagwe ya go leboga Jehofa go ile gwa mo tutueletša gore a tlogele le dikholofelo goba ditebelelo tša lefase tšeo di bego di ka mo šitiša go dira thato ya Modimo. O itše: “Nna nka ikxafa ka ipheletša” go hlankeleng dikgahlego tša ba bangwe. (2 Ba-Korinthe 12:15) Paulo o ile a diriša bokgoni bja gagwe go tšwetša pele dikgahlego tša Modimo, e sego tša gagwe.​—Ditiro 20:24; Ba-Filipi 3:8.

Re ka itlhahloba bjang go bona ge e ba re e-na le pono e swanago le ya moapostola Paulo? Mo gongwe re ka ipotšiša dipotšišo tše di swanago le tše: Ke diriša bjang nako ya-ka, matla a-ka, bokgoni bja-ka le matlotlo a-ka? Na ke diriša dilo tše le dimpho tše dingwe tše bohlokwa feela bakeng sa go tšwetša pele dikgahlego tša-ka ka noši goba na ke di dirišetša go thuša ba bangwe? Na nkile ka nagana ka go tšea karolo ka mo go tletšego kudu modirong o phološago bophelo wa go bolela ditaba tše dibotse, mohlomongwe ke le mogoeledi wa Mmušo wa nako e tletšego? Na nka swarega kutšwanyana medirong e swanago le go aga goba go hlokomela Diholo tša Mmušo? Na ke diriša dibaka tša go thuša bao ba diilago? Na ke direla Jehofa ka gohle kamoo nka kgonago ka gona?​—Diema 3:9.

“Lethabo le Legolo la go Nea”

Lega go le bjalo, na e tloga e le gabohlale go ba yo a ikgafago? Ka kgonthe go bjalo! Paulo o be a tseba go tšwa phihlelong ya gagwe ka noši gore moya o bjalo o tliša meputso e humilego. O be o mo tlišetša lethabo le legolo le kgotsofalo e kgolo kudu ya motho ka noši. O ile a hlalosetša banna ba bagolo ba Efeso se ge a be a gahlana le bona kua Mileto. Paulo o itše: “Dilong ka moka ke Le bonthšitše mokxwa wa xo re motho a itapišê [ka tsela ya boikgafo], xore a hwetšê sa xo hlatlola bafokodi, xo se lebalwê mantšu a Morêna Jesu a a boletšexo a re: [Go na le lethabo le legolo la go nea go feta la go newa, NW].” (Ditiro 20:35) Batho ba dimilione ba hweditše gore go bontšha moya wa mohuta wo go tliša lethabo le legolo mo nakong ye. Gape go tla tliša lethabo nakong e tlago ge Jehofa a putsa bao ba etišago dikgahlego tša gagwe le tša ba bangwe pele ga tša bona.​—1 Timotheo 4:8-10.

Ge a be a botšišwa lebaka leo ka lona a bego a katana go thušeng ba bangwe go aga Diholo tša Mmušo, Bill o ile a hlalosa gore: “Go thuša tšeo gantši e lego diphuthego tše dinyenyane ka tsela ye go nnea kgotsofalo e kgolo ya motho ka noši. Ke thabela go diriša bokgoni le ge e le bofe bjo ke nago le bjona bakeng sa go hola ba bangwe.” Ke ka baka la’ng Emma a kgethile go gafela matla a gagwe le bokgoni bja gagwe go  thušeng ba bangwe go ithuta therešo ya Mangwalo? “Ke be ke sa kgone go akanya ke dira selo le ge e le sefe se sengwe. Ge ke sa le mofsa e bile ke sa kgona go dira bjalo, ke nyaka feela go dira ka gohle ka mo nka kgonago go kgahliša Jehofa le go thuša ba bangwe. Go gafa mehola e itšego ya dilo tše di bonagalago ga se taba ya selo se segolo. Ke dira feela seo ke swanetšego go se dira ka baka la seo Jehofa a ntiretšego sona.”

Maurice le Betty ga ba itshole ge ba sa ka ba kgetha go phela bophelo bja go iketla, ka morago ga nywaga e mentši ya go šoma ka thata go godišeng le go hlokomela lapa la bona. Ka ge ga bjale ba rotše modiro, ba nyaka go tšwela pele ba dira selo se sengwe se se holago le se se nago le morero ka maphelo a bona. Ba re: “Ga re nyake go fo dula ke moka re iketle mo nakong ye. Go thuša ba bangwe go ithuta ka Jehofa nageng e šele go re nea sebaka sa go tšwela pele re dira selo se sengwe se se nago le morero.”

Na o ikemišeditše go ba yo a ikgafago? Se se ka se be bonolo. Go na le ntwa yeo e sa kgaotšego magareng ga dikganyogo tša rena tše di sa phethagalago tša batho le go rata ga rena e le ka kgonthe go kgahla Modimo. (Ba-Roma 7:21-23) Eupša ke ntwa yeo e ka fenywago ge e ba re dumelela Jehofa a hlahla maphelo a rena. (Ba-Galatia 5:16, 17) Ruri o tla gopola modiro wa rena wa boikgafo tirelong ya gagwe gomme o tla re šegofatša ka mo go humilego. Ka kgonthe, Jehofa Modimo o tla ‘bula nthoba tša legodimo a re tšhollela tšhegofatšo wa go tlo re golela.’​—Maleaki 3:10; Ba-Hebere 6:10.

[Seswantšho go letlakala 23]

Jesu o be a e-na le moya wa boikgafo. Na wena o na le wona?

[Diswantšho go letlakala 24]

Paulo o be a lebišitše boitapišo bja gagwe modirong wa go bolela ka Mmušo