Kgaufsinyane Lefase Leo le se Nago Tlalelo

BOPHELO ke bjo bo tšwelago pele e e-ba bjo bo nyakago go gontši kudu, gomme mabaka a go tlalelwa ke a mantši. Ge re tlaletšwe, re ka hwetša go le thata go laola maikwelo a rena. Ka baka leo, gaešita le batho bao ba ratago bophelo ba ka hloka lethabo kudu! Ela hloko mehlala e mmalwa.

Mehleng ya bogologolo, moporofeta Moše o ile a nyema moko kudu moo a ilego a re go Modimo: “Xo kaone xe O mpolaya. Xe O ntebeletše ka botho, xôna a nke ke se hlwê kè bôna bošula byó.” (Numeri 11:15) Ge a be a tšhabela manaba a gagwe, moporofeta Eliya o ile a kgotsa ka gore: “Xo hwetše byalo; Morêna tšea môya [bophelo] wa-ka.” (1 Dikxoši 19:4) Moporofeta Jona yena o itše: “Morêna, byale a k’o tšeê bophêlô bya-ka, xobane xo kaone xe nka hwa, ke se hlwê ke phela.” (Jona 4:3) Eupša, Moše le ge e le Eliya goba Jona ga se ba ka ba ipolaya. Ka moka ga bona ba be ba tseba taelo ya Modimo e rego: “O se kê wa bolaya.” (Ekisodo 20:13) Ka go ba le tumelo e tiilego go Modimo, ba be ba hlokometše gore ga go na boemo bjoo bo se nago kholofelo le gore bophelo ke mpho e tšwago go Modimo.

Go thwe’ng ka mathata ao re lebeletšanago le wona mo nakong ye? Go okeletša kgateletšegong ya maikwelo goba mathateng a mmele, ka dinako tše dingwe re ka swanelwa ke go lebeletšana le go swarwa gampe ke ditho tša lapa, baagišani goba  batho bao re šomago le bona. Beibele e bolela ka batho bao ba tletšego “bobe byohle, le bootswa, le bohlôla, le mexabaru; bà tletše moná le bobolai, le mereba, le maaká, le bomenetša; ké ba dithsêlê, le bophari; ké manaba a Modimo; ké ba lonya; ké baikxoxomoši, baikxanthši, baloxi ba mašula, ba xo se kwe batswadi; xa ba na moxopolô le pôtêxô; xa ba na botho le kxauxêlô.” (Ba-Roma 1:28-31) Go dikologwa ke batho ba bjalo letšatši le letšatši go ka dira gore bophelo bo bonagale bjalo ka morwalo. Re ka thuša bjang bao ba nyakago khomotšo le kimollo?

Go Ikemišetša go Theetša

Mathata le tlaišego di ka dira gore motho a lahlegelwe ke teka-tekano ya gagwe ya monagano. Monna yo bohlale o itše: “Ruri pateletšo e ka gafiša le yo bohlale.” (Mmoledi 7:7, PK) Ka gona motho yo a bolelago ka go ipolaya o swanetše go elwa hloko kudu. Mathata ao a nago le wona, e ka ba a maikwelo, a mmele, a monagano goba a moya a ka nyaka tlhokomelo ya kapejana. Ee, dikalafo tša botsebi di a fapa-fapana, gomme phetho ya motho e swanetše go dirwa mabapi le mehuta ya kalafo.​—Ba-Galatia 6:5.

Lebaka le ge e le lefe bakeng sa maikwelo a go ipolaya, go ba le motho yo a nago le temogo, kwelobohloko le go se fele pelo bakeng sa go mo ntšhetša sa mafahleng go ka dira phapano. Ditho tša lapa le bagwera bao ba ratago go theetša ba ka kgona go thuša. Go okeletša tabeng ya go kwelana bohloko gotee le botho, dikgopolo tšeo di agago go tšwa Lentšung la Modimo e ka ba tšeo di thušago kudu go bao ba lahlegetšwego ke kholofelo.

Thušo ya Moya Bakeng sa Bao ba Gateletšegilego

O ka makatšwa ke go bona kamoo go bala Beibele go ka go kgothatšago ka gona. Gaešita le ge e se puku ya ditaelo ya bophelo bjo bobotse bja monagano, Beibele e ka re thuša go tšea bophelo e le bja bohlokwa. Kgoši Salomo o itše: “Se ke se tsebaxo ké xore xa xo se se botse mo xo bôná, xe e se xo thaba le xo dira tše botse xe ba sa phela. Le xôna, ké neô ya Modimo, xe motho a e-ja, a e-nwa, ’me a bôna tše di botse ka ’tapišô tš’axwe tšohle.” (Mmoledi 3:12, 13) Ka ntle le mošomo o kgotsofatšago woo o neago morero bophelong, dilo tše bonolo​—bjalo ka moya o hlabolago, mahlasedi a letšatši, matšoba, dihlare le dinonyana​—ke dimpho tšeo re di neilwego ke Modimo tšeo re ka di thabelago.

Selo seo se thabišago kudu ke kgonthišetšo ya Beibele ya gore Jehofa Modimo le Morwa wa gagwe, Jesu Kriste, ba na le taba le rena. (Johane 3:16; 1 Petro 5:6, 7) Ka mo go swanetšego, mopsalme o itše: “A xo rêtwê Morena Modimo, ó re rwala ka mehla, Yêna Modimo Mo-re-hlakodiši.” (Psalme 68:19) Gaešita le ge re ka ikwa re se bohlokwa e bile re sa swanelege, Modimo o re laletša gore re mo rapele. Kgonthišega gore ga go le o tee yoo ka boikokobetšo le ka go tšwa pelong, yo a kgopelago thušo ya gagwe a tla nyatšwago.

Ga go le o tee yo a ka letelago ka tshwanelo bophelo bjo bo se nago mathata lehono. (Jobo 14:1) Lega go le bjalo, therešo e tšwago Lentšung la Modimo e bontšhitše batho ba bantši gore go ipolaya ga se tsela e nepagetšego ya go rarolla mathata a bona. Anke o ele hloko kamoo moapostola Paulo a ilego a thuša mohlapetši wa kgolego yo a bego a tlaletšwe, yoo ge “a phafoxa borokong, a bôna mejakô ka moka è bulexile. A khwamola thšoša a rata xo ipolaya ka xe a re baxôlêxwa ba thšabile.” Kapela-pela, mohlapetši yoo wa kgolego o ile a phetha ka gore go ipolaya go be go le kaone go feta lehu leo le lešago dihlong le leo mohlomongwe le tšeago lebaka le letelele ka baka la go palelwa ga gagwe. Moapostola o ile a goeletša ka gore: “O se kê wa itira bošula; re xôna ka moka.” Paulo ga se a ka a emiša ka polelo yeo. Ge e le gabotse, yena le Silase ba ile ba homotša mohlapetši wa kgolego gomme ba araba potšišo ya gagwe e rego: “Marêna! E ka kxôna ke dirê bya’ng xore ke phološwê?” Ba ile ba araba ka gore: “Dumêla Morêna Jesu Kriste; ké mo O tl’o xo phološwa le ba ntlo ya xaxo.” Ke moka ba ile ba bolela lentšu la Jehofa go yena gotee le ba lapa la gagwe, mafelelo ya ba gore o ile “a kolobetšwa le bohle ba lapeng la xabô è sa le lebaka leo.” Mohlapetši yoo wa kgolego le ka moka ba ntlo ya gagwe ba ile ba thaba kudu gomme ba hwetša morero o mofsa bophelong.​—Ditiro 16:27-35.

Lehono, ke mo go lapološago gakaakang go tseba gore Modimo ga a ikarabele bakeng sa bokgopo! Lentšu la gagwe le hlaola moya o kgopo, ‘wo ba rego ke Diabolo le Sathane,’ e le wona wo e lego “motimetši wa lefase ka moka la batho.” Eupša nako ya gagwe e a fela. (Kutollo 12:9, 12) Kgaufsinyane, kgateletšo ka moka yeo Sathane  le batemona ba gagwe ba e tlišitšego godimo ga badudi ba lefase e tla fela ka go tsena ga Modimo ditaba gare. Ka nako yeo lefase le lefsa la Modimo leo le holofeditšwego la go loka le tla tliša phedišo ya ka mo go sa felego dilong tšeo di bakago go hloka kholofelo le go ipolaya.​—2 Petro 3:13.

Khomotšo Bakeng sa Bao ba Nyakago Thušo

Gaešita le gona bjale, bao ba nyemilego moko ba ka hwetša khomotšo go tšwa Mangwalong. (Ba-Roma 15:4) Mopsalme Dafida o opetše ka gore: “Pelo xe e rôbêxile, xe e setlêxile, Wene Modimo O ka se e nyatše.” (Psalme 51:17) Ke therešo gore ka mo go sa phemegego re lebana le diteko tše itšego gomme re kwa mafelelo a go se phethagale. Eupša go monya tsebo e nepagetšego ya Tatago rena wa legodimong yo botho, yo lerato le yo a nago le teka-tekano, go tla re nea kgonthišetšo ya gore re bohlokwa mahlong a gagwe. Modimo e ka ba Mogwera wa rena yo mogolo le Mohlahli. Ge e ba re hlagolela tswalano ya kgaufsi-ufsi le Jehofa Modimo, le ka mohla a ka se ke a re nyamiša. Mmopi wa rena o re: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.”​—Jesaya 48:17.

Go ithekga ka Modimo go thušitše batho ba bantši. Ka mohlala: Mara o be a šetše a fokodišwa ke kgateletšego ya nako e telele ge a be a lahlegelwa ke morwa wa gagwe a nnoši kotsing ya koloi. * O ile a tlalelwa gomme a leka go fediša bophelo bja gagwe. Lega go le bjalo, ga bjale o tsoga e sa le bošego letšatšing le lengwe le le lengwe bakeng sa go hlokomela mošomo wa gagwe wa ka lapeng. O thabela go theetša mmino le go thuša ba bangwe. Kholofelo ya gore “bahu ba tlo tsoxa, bohle, baloki le ba s’a lokaxo,” e tlošitše lebolela le itšego la lehu la masetla-pelo la morwa wa gagwe yo a rategago gomme e matlafaditše tumelo ya gagwe go Modimo. (Ditiro 24:15) Ka ge Mara a se a ka a ba le kganyogo ya go ba bjalo ka morongwa legodimong, mantšu a a Psalme 37:11 a ile a kgoma pelo ya gagwe: “Ba bolêta e tlo ba bôná beng ba naxa; ba tlo thaba ka botlalô bya moláô.”

Mosadi yo mongwe wa mo-Brazil, Sandra, o ile a šoma ka thata kudu bakeng sa gore e be mma wa kgonthe go bana ba gagwe ba bararo. O a dumela: “Ke be ke swaregile kudu moo e lego gore ge tate a be a e-hwa kapejana, gomme ka nako e swanago ke lemoga gore monna wa-ka o ratana le  mosadi yo mongwe, ga se ka ka ka nagana gaešita le ka go rapela Modimo bakeng sa thušo.” A le tlalelong Sandra o ile a leka go ipolaya. Ke eng seo se ilego sa mo thuša go boela sekeng? Go thabela ga gagwe dilo tša moya. “Bošegong bjo bongwe le bjo bongwe pele ke e-ya go robala, ke bala Beibele, gomme ke leka go ipea boemong bja batho bao ke balago ka bona. Gape ke bala dimakasine tša Morokami le Phafoga!, gomme ke rata diphihlelo ka gobane di nthuša go kgotsofalela dilo tšeo ke nago le tšona bophelong.” Ka go tseba gore Jehofa ke mogwera wa gagwe wa potego, o ithutile go ba yo a bolelago ka go lebanya dithapelong tša gagwe.

Bokamoso bjo bo se Nago Tlalelo

Ke khomotšo e kgolo gakaakang go tseba gore go tlaišega ga batho ke ga nakwana! Ka tlase ga pušo ya Mmušo wa Modimo, bana le batho ba bagolo bao ga bjale e lego bahlaselwa ba bošoro, go hloka toka goba kgethollo ba tla thaba. Bjalo ka ge go ile gwa bolelwa e sa le pele go psalme ya boporofeta, Kgoši e kgethilwego ya Jehofa, Jesu Kriste, “ó tlo hlakodiša modiitšana xe a lla, le mohlaki xe a hlôka monamodi.” Go feta moo, “Ó tlo xauxêla mosenyi le mohloki; meôya ya bahumanexi ó tlo e phološa.” Ka kgonthe, “meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.”​—Psalme 72:12-14.

Nako ya go phethagatšwa ga mantšu ao a boporofeta e kgaufsi. Na kgopolo ya go thabela bophelo bjo bo sa felego lefaseng ka tlase ga maemo a bjalo ke yeo e ipiletšago go wena? Ge e ba go bjalo, o na le lebaka la go thaba le go tšeela bophelo godimo e le mpho e tšwago go Modimo. Gomme ge e ba o abelana dikholofetšo tše tšeo di homotšago tša Mangwalo le ba bangwe, o ka tliša lethabo le legolo maphelong a bao ba nyakago thušo lefaseng le leo le se nago maikwelo le lerato.

[Mengwalo ya ka tlase]

[Seswantšho go letlakala 6]

Go na le dinako tše dintši bakeng sa go thaba lehono

[Seswantšho go letlakala 7]

Na o lebeletše pele lefaseng leo le se nago tlalelo?