Lefase na e fo ba Lefelo la Boitekelo?

A KIMOLLO e kaakang! O tšweletše. Morutwana yo a bego a lebeletšane le dibeke tše pedi tšeo di lapišago tša ditlhahlobo mafelelong o amogela pego e thabišago. Ga bjale a ka kgona go tšwela pele mošomong woo a bego a dutše a o nyaka.

Batho ba bantši ba lebelela bophelo lefaseng ka tsela e swanago. Ba nagana ka bjona e le moleko wa mathomo woo ka moka ga rena re swanetšego go feta go wona. Bao ba “tšwelelago” ba fetela go selo se sengwe se sekaone sebopegong se itšego sa Bophelo bja ka morago ga lehu. Ka kgonthe, e be e tla ba mo go nyamišago ge e ba bophelo bja gona bjale​—e fo ba go ba gona feela go ba bantši​—e be e le bjona bjo bokaone kudu bjoo batho ba ka bo letelago. Gaešita le ge a be a phetše gabotse e bile a atlegile nako e ntši ya bophelo bja gagwe, moanegwa wa Beibele Jobo o ile a lemoga gore: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.”​—Jobo 14:1.

Ge e bontšha kgopolo ya ba bantši, New Catholic Encyclopedia e re: “Letago la legodimong ke pheletšo yeo Modimo a e rulaganyeleditšego motho. . . . Lethabo la motho le ka bonwa le ithekgile ka go ba ga gagwe le lethabo la legodimong.” Nyakišišo ya morago bjale ya Kereke ya Kriste kua United States e ile ya bolela gore 87 lekgolong ya bao go boledišanwego le bona ba dumela gore go bonagala ba tla ya legodimong ka morago ga ge ba hwile.

Ba bantši bao e sego Bakriste le bona ba holofela go tloga lefaseng go ya lefelong le lekaone ka morago ga lehu. Ka mohlala, Mamoseleme a holofela go ya paradeiseng ya legodimong. Balatedi ba dihlotswana tša Naga e Sekilego tša Bobuddha kua China le Japane ba dumela gore ka go bušeletša ka mo go sa felego “Amitabha,” leina la Buddha wa Seetša Seo se sa Lekanyetšwago, ba tla tswalwa gape Nageng e Sekilego goba Paradeiseng ya ka Bodikela, moo ba tlago go phela ka lethabo leo le phagamego.

Ka mo go kgahlišago, Beibele, puku e kgethwa yeo e fetoletšwego kudu le go abja kudu lefaseng, ga e bolele ka lefase e le lefelo leo go ka tšhabjago go lona, leo le swanago le moratho o itšego. Ka mohlala e re: “Baloki e ba beng ba naxa, ba dula mo xo yôna ka mehla le ka mehla.” (Psalme 37:29) Ka Beibeleng gape go hwetšwa polelo ya Jesu yeo e tumilego yeo e rego: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.”​—Mateo 5:5.

Kgopolo yeo e kgomaretšwego ka kakaretšo ya gore go dula ga rena lefaseng ke ga nakwana e bontšha gore lehu ke mojako wa go ya bophelong bjo bo thabišago bja ka morago ga lehu. Ge e ba go le bjalo, gona lehu ka kgonthe ke tšhegofatšo. Eupša, na batho ka kakaretšo ba lebelela lehu ka tsela yeo, goba na ba leka go lelefatša bophelo bjo? Phihlelo e bontšha gore ge batho ba thabela bophelo bjo bobotse le tšhireletšego ka mo go leka-lekanego, ga ba nyake go hwa.

Lega go le bjalo, ka baka la ge bophelo mo lefaseng bo tletše ka bobe le tlaišego, legodimo le sa dutše le lebelelwa ke ba bantši e le lefelo le nnoši la go hwetša khutšo le lethabo tša kgonthe. Na legodimo e fo ba lefelo la khutšo e thabišago, leo ka mo go feletšego le se nago bobe le go se kwane? Le gona, na Bophelo bja ka morago ga lehu bo swanetše go ba feela lefelong le itšego la legodimong? O ka makatšwa ke dikarabo tša Beibele. Hle bala go tšwela pele.