Lethabo la ka mo go sa Felego​—Legodimong Goba Lefaseng?

NA LETHABO la gago le ithekgile kudu ka gore o dula kae? Batho ba bantši ba be ba tla dumela ka ntle le go dika-dika gore lethabo le ithekgile kudu ka mabaka a bjalo ka bophelo bjo bobotse, morero bophelong le ditswalano tše botse le ba bangwe. Seema sa Beibele se e bea ka tsela ye: “Xo ja morôxo rè ratana, xo phala mola xò hlabilwe kxomo e nonnexo rè hlôyana.”​—Diema 15:17.

Lega go le bjalo, ke mo go nyamišago gore legae la rena la lefaseng le na le histori e telele ya lehloyo, bošoro le dibopego tše dingwe tša bokgopo. Eupša go thwe’ng ka legodimo goba lefelo la moya moo batho ba bantši ba holofelago go ya gona ka morago ga ge ba hwile? Na ka mehla e be e dutše e le lefelo la khutšo e thabišago le boiketlo, leo le se nago tšhitišo ya mohuta le ge e le ofe, ka ge ka tlwaelo go naganwa bjalo?

Beibele e ruta gore Modimo o dula legodimong gotee le dibopiwa tša moya tše dimilione tšeo di bitšwago barongwa. (Mateo 18:10; Kutollo 5:11) Ba ba hlaloswa e le “barwa ba Modimo” ba moya. (Jobo 38:4, 7, PK) Go swana le batho, barongwa le bona ke dibopiwa tšeo di nago le tokologo ya go ikgethela; ga se diroboto. Ka gona, ka lebaka la se, le bona ka mo go swanago ba ka kgetha go dira seo se lokilego goba go dira seo se sa lokago. Na barongwa ba ka kgetha go dira seo se sa lokago? E ka ba mo go makatšago go ba bangwe go tseba gore nywaga e dikete e fetilego, palo e kgolo ya barongwa e ile ya dira bjalo, ge e le gabotse ba ile ba dira sebe malebana le Modimo​—ba ile ba rabela malebana le yena!​—Juda 6.

Marabele Legodimong

Sebe se ile sa bonagala lefelong la moya ka baka la borabele bjo bo bakilwego ke morongwa, yo a ilego a bitšwa Sathane (Moganetši) le Diabolo (Mothomeletši). Yo yo e kilego ya ba morongwa yo a kwago o ile a kgetha go dira seo se sa lokago ka go ithatela ga gagwe. Ka morago ga moo o ile a ba tutuetšo e gobošago go dibopiwa tše dingwe tša moya, moo e lego gore mehleng ya Noage, pele ga Meetse-fula, palo e kgolo ya tšona e ile ya tlatša Sathane go rabeleng malebana le Modimo.​—Genesi 6:2, mongwalo wa ka tlase wa NW; 2 Petro 2:4.

Barongwa ba babe ga se ba rakwa legodimong gatee-tee. Go e na le moo, go tsena ga bona go ile gwa kgotlelelwa​—mohlomongwe ka dithibelo tše itšego​—lebaka la nywaga e dikete. * Lega go le bjalo, ge kgotlelelo ya Modimo ka badiradibe ba e fela, ba ile ba “rakwa” legodimong, e le gore mafelelong ba tle ba fedišwe. Ka morago lentšu le le lego legodimong le itše: “Thabang-xê, lena Maxodimo, le ba ba axilexo xôna.” (Kutollo 12:7-12) Ka mo go lego molaleng, barongwa ba botegago ba ile ba thaba kudu gore, mafelelong, legodimo le be le se sa na bahlola-mpherefere bao ba babe!

Go ela hloko ditaba tše tšeo ka kakaretšo di sa tsebjego, go bonagala gore go ka se be le khutšo ya kgonthe neng le neng ge dibopiwa tše bohlale di hlokomologa melao le melao ya motheo ya Modimo. (Jesaya 57:20, 21; Jeremia 14:19, 20) Ka lehlakoreng le lengwe, ge ka moka ba e-kwa molao wa Modimo, khutšo le boiketlo di a aparela. (Psalme 119:165; Jesaya 48:17, 18) Ka gona ge e ba batho ka  moka ba ratile le go kwa Modimo gotee le go ratana, na lefase e be e ka se be bodulo bjo bo kgahlišago e le ka kgonthe le bja lethabo? Beibele e araba ka ee!

Eupša go thwe’ng ka bao ba ganago ka boithati go fetoša ditsela tša bona tše kgopo? Na ba tla šitiša ka mo go sa felego khutšo ya bao ba tlogago ba nyaka go dira thato ya Modimo? Aowa, Modimo o ile a lebeletšana le barongwa ba kgopo legodimong, gape o tla lebeletšana le batho ba kgopo mo lefaseng.

Lefase Leo le Hlwekišitšwego

Modimo o itše: “Maxodimo ké sedulô sa-ka sa boxoši; lefase ké boxatô bya dinaô tša-ka.” (Jesaya 66:1) Ka ge e le yena tlhora e phagamego ya bokgethwa, Modimo a ka se ke a dumelela “boxatô bya dinaô” tša gagwe bo šilafatšwa ka bobe ka mo go sa felego. (Jesaya 6:1-3; Kutollo 4:8) Bjalo ka ge a ile a tloša meoya e kgopo legodimong, ka gona o tla fediša batho ka moka ba kgopo lefaseng, bjalo ka ge ditemana tše di latelago tša Beibele di bontšha:

“Ba babe ba tlo lôba; baleta-Morêna e tlo ba beng ba naxa.”​—Psalme 37:9.

“Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”​—Diema 2:21, 22.

“Se se loketšexo Modimo ké xe ba ba Le hlokofatšaxo a tlo ba bušetša thlokofatšô. ’Me lena ba le hlokofatšwaxo le rena ó tlo re lapološa mohla wa kutollô ya Morêna Jesu xe a e-tšwa lexodimong à na le Barongwa ba xaxwe ba matla. Ba ba sa tsebexo Modimo, le ba ba sa kwexo Ebangedi ya Mong wa rena Jesu Kriste, ó tlo ba lefetša ka dikxabo tša mollô. Bôná-bao, kôtlô e tl’o xo ba wêla ké thsenyêxô ye e sa felexo, ké xo tlo senyêxêla kxolê le sefahloxô sa Morêna, kxolê le letaxô la matla a xaxwe.”​—2 Ba-Thesalonika 1:6-9.

“Lefase [la batho ba kgopo] le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”​—1 Johane 2:17.

Na Lefase le tla Dula le na le Khutšo?

Gaešita le ge Mangwalo a bontšha gabotse gore go kgotlelela ga Modimo bobe go na le mellwane ya gona, re ka kgonthišega bjang gore bobe, ge bo šetše bo fedišitšwe, bo ka se ke bja ba gona gape? Go feta moo, ka morago ga Meetse-fula a mehleng ya Noage, go se go ye kae bo ile bja aparela gape go fihla bokgoleng bjoo Modimo a ilego a swanelwa ke go thibela maano a batho ba kgopo ka go raranya leleme la bona.​—Genesi 11:1-8.

Lebaka la rena le legolo bakeng sa go ba le kgodišego ya gore bobe bo ka se tsoge gape ke gore lefase le ka se hlwe le bušwa ke batho bjalo ka ge go bile bjalo kapejana ka morago ga Meetse-fula. Go e na le moo, le tla be le bušwa ke Mmušo wa Modimo. O buša o le legodimong, Mmušo wo e tla ba mmušo o nnoši wa lefase. (Daniele 2:44; 7:13, 14) O tla gata mogato kapejana malebana le yo mongwe le yo mongwe yo a lekago go tšweletša bobe gape. (Jesaya 65:20) Ge e le gabotse, mafelelong o tla fediša mothomi wa bokgopo​—Sathane Diabolo​—gotee le batemona, e lego barongwa ba kgopo bao ba ilego ba mo latela.​—Ba-Roma 16:20.

Go oketša moo, batho ba ka se tshwenyege ka dijo, diaparo, madulo le mošomo​—tšeo go hlokega ga tšona lehono go dirago gore batho ba phele bophelo bja bosenyi. Ee, lefase ka moka le tla be le fetošitšwe paradeise e tšweletšago yeo e nago le mokhora bakeng sa bohle.​—Jesaya 65:21-23; Luka 23:43.

Sa bohlokwa kudu, Mmušo o tla ruta balata ba wona ka tsela ya bophelo yeo e nago le khutšo mola ka nako e swanago o ba godišetša tlhoreng ya phethego ya batho. (Johane 17:3; Ba-Roma 8:21) Ka morago ga moo, batho ba ka se hlwe ba tshwenywa ke mafokodi le ditshekamelo tša sebe, seo sa dira gore go kwa Modimo ka mo go phethagetšego e be mo go kgonegago gotee le mo go thabišago, bjalo ka ge go be go le bjalo tabeng ya motho  yo a phethagetšego Jesu. (Jesaya 11:3) Ge e le gabotse, Jesu o ile a dula a botegela Modimo ka go se kwanantšhe gaešita le ge a lebeletšane le teko e kgolo le tlaišo​—dilo tšeo e tlago go ba tše di sa tsebjego ka mo go sa felego bophelong bja Paradeise.​—Ba-Hebere 7:26.

Lebaka Leo ba Bangwe ba Yago Legodimong

Lega go le bjalo, babadi ba bantši ba Beibele ba hlokometše mantšu a Jesu a rego: “Ngwakong wa Tate xo na le madulô a mantši. . . . ke ya xo Le lokišetša sebaka.” (Johane 14:2, 3) Na se ga se ganetšane le kgopolo ya bophelo bjo bo sa felego lefaseng la paradeise?

Dithuto tše ga di thulane. Ge e le gabotse, di a thekgana. Sa pele, Beibele e bolela gore ke feela palo e lekanyeditšwego ya Bakriste ba botegago​—ba 144 000​—bao ba tsošwago e le dibopiwa tša moya bakeng sa go phela legodimong. Ke ka baka la’ng ba newa moputso wo o kgahlišago? Ka gobane ba bopa sehlopha seo Johane a se bonego ponong bao ba bego “bà phedile, bà buša le Kriste nywaxa e sekete.” (Kutollo 14:1, 3; 20:4-6) Ge ba bapišwa le ba dimilione tše dikete lefaseng, ba 144 000 ka kgonthe ke “mohlatswana o monyenyane.” (Luka 12:32) Go feta moo, go ba le phihlelo ka mathata ao a tlwaelegilego bathong, ka go swana le Jesu ba tla kgona go “re kwêla bohloko xe re fôkôla” ge ba dutše ba hlokometše go kgopamollwa mekgwa ga batho le go tsošološwa ga lefase.​—Ba-Hebere 4:15.

Lefase​—Legae la Batho la ka mo go sa Felego

Ka go nea sehlabelo sa topollo sa Jesu Kriste, Modimo o ile a thoma go kgoboketša ba 144 000 mo e ka bago nywaga e 2 000 e fetilego gomme dipontšho ke tša gore sehlopha se ga bjale se feletše. (Ditiro 2:1-4; Ba-Galatia 4:4-7) Lega go le bjalo, sehlabelo sa Jesu e be e se sa dibe tša ba 144 000 feela, eupša sa “tša lefase ka moka.” (1 Johane 2:2) Ka gona, bohle bao ba bontšhago tumelo go Jesu ba na le tebelelo ya bophelo bjo bo sa felego. (Johane 3:16) Bao ba robetšego mabitleng eupša ba le ka kgopolong ya Modimo ba tla tsošetšwa e sego legodimong, eupša bakeng sa go phela lefaseng leo le hlwekišitšwego. (Mmoledi 9:5; Johane 11:11-13, 25; Ditiro 24:15) Ke eng seo se tla ba letelago moo?

Kutollo 21:1-4 e araba ka gore: “Šoo ngwakô wa Modimo mo xare xa batho . . . ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.” (Mongwalo o sekamego ke wa rena.) Nagana​—batho ba lokollwa lehung gomme bohloko le go lla tšeo le di bakago di se sa hlwa di le gona! Mafelelong, morero wa Jehofa wa mathomong bakeng sa lefase le batho o tla fihla phethagatšong ya wona ya letago.​—Genesi 1:27, 28.

Kgetho ya Rena​—Bophelo Goba Lehu

Adama le Efa le ka mohla ga se ba ka ba newa kgetho ya go ya legodimong. Kgetho ya bona e be e le go kwa Modimo gomme ba phele ka mo go sa felego lefaseng la paradeise goba go se mo kwe gomme ba hwe. Ka manyami, ba ile ba kgetha go se kwe ka baka leo ba boela “leroleng” la lefase. (Genesi 2:16, 17; 3:2-5, 19) Le ka mohla e be e se morero wa Modimo ka lapa la batho ka kakaretšo gore ba hwe gomme ba dule legodimong ka go feta lebitleng. Modimo o bopile dimiriate tša barongwa gore di dule legodimong; dibopiwa tše tša moya ga se batho bao ba hlokofetšego le bao ba tsošeditšwego go phela legodimong.​—Psalme 104:1, 4; Daniele 7:10.

Ke eng seo re swanetšego go se dira gore re hwetše ditšhegofatšo tša go phela ka mo go sa felego Paradeiseng mo lefaseng? Mogato wa mathomo ke go ithuta Lentšu la Modimo, Beibele e Kgethwa. Jesu o ile a bolela thapelong ya gagwe gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”​—Johane 17:3.

Go diriša tsebo e bjalo ke mogato o mongwe wa go ya lethabong la ka mo go sa felego Paradeiseng. (Jakobo 1:22-24) Bao ba phelago ka Lentšu la Modimo ba na le tebelelo ya go iponela ka noši phethagatšo ya diporofeto tše bjalo tše di kgahlišago tše bjalo ka bjo bo begilwego go Jesaya 11:9, yeo e rego: “Xo [batho] ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”

[Mengwalo ya ka tlase]

 [Diswantšho go letlakala 7]

“Baloki e ba beng ba naxa, ba dula mo xo yôna ka mehla le ka mehla.”​—Psalme 37:29