Kamoo o ka Batamelago Kgaufsi le Modimo ka Gona

Jakobo 4:8 e re: “Batamêlang Modimo, le Yêna a Le batamêlê.” E le pontšho ya kamoo Jehofa Modimo a nyakago gore batho ba be le tswalano ya kgaufsi le yena, o ile a neela Morwa wa gagwe bakeng sa rena.

GE A arabela go mpho yeo e lerato, moapostola Johane o ngwadile gore: “Rena a re Mo rateng [Modimo], xobane ó re ratile pele.” (1 Johane 4:19) Eupša gore rena ka noši re batamele kgaufsi le Modimo, re swanetše go gata megato e itšego. E swana le ditsela tše nne tšeo ka tšona re batamelago kgaufsi le magagabo rena, bjalo ka ge di bontšhitšwe sehlogong se se fetilego. Anke bjale re hlahlobeng megato ye.

Lemoga Dika tša Modimo tše Kgahlišago

Modimo o na le dika tše dintši tše kgahlišago, tše dingwe tše dikgolo e lego lerato la gagwe, bohlale, toka le matla. Bohlale bja gagwe le matla di bontšhwa ka botlalo bobedi legohleng leo le lego kgole gotee le lefase leo le re dikologilego, go tloga go melalatladi ya dinaledi e megolo go ya go diathomo tše nyenyane. Mopsalme o ngwadile gore: “Maxodimo a re anêxêla boxolo bya Modimo; medirô ya ‘atla tša xaxwe e rêtwa ke leratadima.”​—Psalme 19:1; Ba-Roma 1:20.

Tlholo gape e bontšha lerato la Modimo. Ka mohlala, tsela yeo re dirilwego ka yona e bontšha gore Modimo o nyaka gore re thabele bophelo. O re file bokgoni bja go bona mebala, go latswa le go dupa, go thabela mmino, go sega, go thabela bobotse le go re nea bokgoni bjo bongwe bjo bontši le mekgwa ya go kgethologanya yeo e sego e bohlokwa gakaalo bophelong. Ee, Modimo ruri ke yo a neago, yo botho le yo lerato​—dika tšeo ka ntle le pelaelo di tlaleletšago go beng ga gagwe “Modimo yo a thabilego.”​—1 Timotheo 1:11, NW; Ditiro 20:35.

Jehofa o thaba ka boikgantšho ka gobane go dirišwa ga bogoši bja gagwe le go thekgwa ga bjona ke dibopiwa tša gagwe tše bohlale go theilwe kudu leratong. (1 Johane 4:8) Ke therešo gore Jehofa ke Mmuši wa Legohle, eupša o swara batho, kudu-kudu bahlanka ba gagwe ba botegago, ka tsela yeo tate yo lerato a swarago bana ba gagwe ka yona. (Mateo 5:45) Ga a ba ganele selo seo se ba loketšego. (Ba-Roma 8:38, 39) Bjalo ka ge go boletšwe, o ile a ba a neela bophelo bja Morwa wa gagwe yo a tswetšwego a nnoši bakeng sa rena. Ee, lerato la Modimo ke lebaka leo re lego gona le go ba le kholofelo ya bophelo bjo bo sa felego.​—Johane 3:16.

Jesu o re neile kwešišo e tseneletšego ka botho bja Modimo ka gobane o ile a ekiša Tatagwe ka mo go phethagetšego. (Johane 14:9-11) O be a se na boithati ka mo go feletšego, e le yo a naganelago le wa tlhaologanyo. Lebakeng le lengwe, Jesu o ile a lebantšhwa le monna yo e bego e le sefoa e bile a na le bothata bja go bolela. O ka nagana gore monna yoo mohlomongwe a ka ba a be a sa lokologa gare ga mašaba. Ka mo go kgahlišago, Jesu o ile a iša monna yo lefelong la ka thokwana gomme a mo fodišetša moo. (Mareka 7:32-35) Na o leboga batho bao ba naganelago maikwelo a gago le bao ba hlomphago seriti sa gago? Ge e ba go le bjalo, gona ka kgonthe o tla batamela kgaufsi kudu le Jehofa le Jesu ge o dutše o ithuta ka mo go oketšegilego ka bona.

Nagana ka Dika tša Modimo

Motho yo mongwe a ka ba le dika tše kgahlišago, eupša re swanetše go nagana ka motho yoo bakeng sa gore re batamele kgaufsi le yena. Go a swana le ka Jehofa. Go naganišiša ka dika tša gagwe ke mogato wa bobedi wa bohlokwa bakeng sa go batamela kgaufsi le yena. Kgoši Dafida, monna yo a bego a rata Jehofa e le ka kgonthe e bile a “kxahla pelo ya [Jehofa]” o itše: “Ke eleletša tša mehla ya kxalê; ke êlêlwa tšohle O kilexo wa di dira; ke xopola medirô ya ‘atla tša xaxo.”​—Ditiro 13:22; Psalme 143:5.

 Ge o lebelela mehlolo ya tlholo goba o bala Lentšu la Modimo, Beibele, na ka go swana le Dafida o naganišiša ka seo o se bonago le seo o se balago? Nagana ka morwa yo a sa tšwago go amogela lengwalo le le tšwago go tatagwe yo a nago le maikwelo a tseneletšego a borutho ka yena. Na o tla lebelela lengwalo leo bjang? Ge e le gabotse a ka se ke a fo lebelela dikagare tša lona ka go di tshediša mahlo gomme kapejana a le fošetša ka laiking. Go e na le moo, o tla ithuta lona, gomme a tšee ntlha e nngwe le e nngwe le tshekamelo e nngwe le e nngwe go lona. Ka mo go swanago, Lentšu la Modimo le swanetše go ba la bohlokwa go rena, go fo swana le kamoo le bego le le ka gona go mopsalme yo a ilego a opela ka gore: “Melaô ya xaxo ke e rata xakaka’ng! Ke eleletša yôna mehla yohle.”​—Psalme 119:97.

Boloka Poledišano e Botse

Poledišano e botse ke matla a tswalano e nngwe le e nngwe. E akaretša go bolela le go theetša​—e bile e sego feela ka monagano eupša gape le ka pelo. Re bolela le Mmopi ka thapelo, yeo e lego tsela ya borapedi ya go bolela ka go lebanya le Modimo. Jehofa o thabela dithapelo tša bao ba mo ratago le go mo hlankela le bao ba dumelago Jesu Kriste e le moemedi wa Gagwe yo mogolo.​—Psalme 65:2; Johane 14:6, 14.

Nakong e fetilego, Modimo o ile a bolela le batho ka ditsela tše fapa-fapanego, go akaretša ka dipono, ditoro le ka barongwa. Lega go le bjalo, mehleng ya lehono o dira bjalo ka Lentšu la gagwe le ngwadilwego, Beibele e Kgethwa. (2 Timotheo 3:16) Lentšu leo le ngwadilwego le na le mehola e mentši. Le ka balwa ka nako le ge e le efe. Go swana le lengwalo, le ka thabelwa leboelela. E bile ga le hlaselwe ke diphošo tšeo gantši di swayago go anega mo go dirwago ka molomo. Ka gona nagana ka Beibele e le kgoboketšo e kgolo ya mangwalo ao a tšwago go Tatago yo lerato wa legodimong, le gona o mo dumelele go bolela le wena ka mehla ka mangwalo a.​—Mateo 4:4.

Ka mohlala, Beibele e bontšha pono ya Jehofa ka se se lokilego le se se fošagetšego. E hlalosa morero wa gagwe bakeng sa batho le lefase. E bile e utolla ditirišano tša gagwe le mehuta e mentši ya batho le ditšhaba, go tloga go barapedi ba botegago go ya go manaba a šoro. Ka go ba le ditirišano tša gagwe le batho tšeo di begilwego ka tsela ye, Jehofa o re neile seswantšho se se feletšego sa semelo sa gagwe. O utolla lerato la gagwe, lethabo, manyami, pefelo, kgaugelo le kwelobohloko​—ee, mehuta ya dikgopolo tša gagwe le maikwelo a gagwe, le mabaka a kwagalago bakeng sa se​—tšohle ka tsela yeo batho ba ka kgonago go di kwešiša.​—Psalme 78:3-7.

Ka morago ga ge o badile karolo ya Lentšu la Modimo, o ka holega bjang go baleng ga gago? E bile, o ka batamela bjang kgaufsi le Modimo ka mo go kgethegilego? Sa pele, nagana ka seo o se badilego le go ithuta sona mabapi le Modimo bjalo ka motho, o dumelele dintlha di fihlelele pelo ya gago. Gomme ka thapelo botša Jehofa dikgopolo tša gago le maikwelo a ka gare-gare mabapi le taba yeo o e etšego hloko le kamoo o tla lekago go holwa ke yona. Yeo ke poledišano. Ke therešo gore ge e ba o na le dilo tše dingwe monaganong wa gago, ka ntle le pelaelo tšeo di ka akaretšwa thapelong ya gago.

Dira Dilo Gotee le Modimo

Beibele e bolela ka banna ba itšego ba botegago ba kgale bao ba sepetšego le Modimo wa therešo, goba pele ga gagwe. (Genesi 6:9; 1 Dikxoši 8:25) Seo se bolela’ng? Sa bohlokwa ke gore ba phetše letšatši le lengwe le le lengwe eka Modimo o be a e-na le bona. Ee, ba be ba dira dibe. Lega go le bjalo ba be ba rata melao ya Modimo le melao ya motheo, e bile ba phetše ka go dumelelana le morero wa Modimo. Jehofa o kgahlegela ba bjalo,  e bile o na le taba le bona, bjalo ka ge go bontšhitšwe go Psalme 32:8 gore: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.”

Le wena Jehofa e ka ba mogwera wa gago wa kgaufsi-ufsi​—yo a sepelago le wena, yo a nago le taba le wena le yo a go neago keletšo ya botate. Moporofeta Jesaya o hlalositše Jehofa e le yo a ‘go rutago tše di go holago, a go sepedišago mo tseleng ye o swanetšego go e swara.’ (Jesaya 48:17) Ge re dutše re bona mehola ye, re kwa go ba gona ga Jehofa “ka letsogong [la rena] le letona,” go fo swana le ge Dafida a ile a dira.​—Psalme 16:8, bapisa le NW.

Leina la Modimo​—Ke le Lebišago Tlhokomelo Dikeng tša Gagwe

Madumedi a mantši gotee le palo e oketšegago ya diphetolelo tša Beibele di palelwa ke go diriša le go tsebatša leina la Modimo ka noši. (Psalme 68:4) Lega go le bjalo, mongwalong wa mathomo wa Sehebere, leina leo​—Jehofa​—le tšwelela ka makga a 7000! (Ka mokgwa o feto-fetogago, ge ba dutše ba tloša leina la Modimo, bafetoledi ba bantši  ba Beibele ba boloka maina a mantši a medimo ya maaka yeo e boletšwego mongwalong wa mathomo, e bjalo ka Baali, Bele, Merodaka le gaešita le Sathane!)

Batho ba bangwe ba nagana gore go tlogelwa ga leina la Modimo ke taba e sa rego selo. Eupša nagana: Na go thata goba go bonolo go hlagolela tswalano ya kgaufsi e edišeditšwego le motho yo a se nago leina? Direto tše bjalo ka Modimo le Morena (tšeo di dirišwago gape le go medimo ya maaka) di ka lebiša tlhokomelo go matla, taolo le maemo a Jehofa, eupša leina la gagwe le nnoši ke lona le mo hlaolago ka mo go tiilego. (Ekisodo 3:15; 1 Ba-Korinthe 8:5, 6) Leina la Modimo wa therešo ka noši le bontšha dika le dimelo tša gagwe. Rathutatumelo Walter Lowrie ka mo go swanetšego o boletše gore: “Motho yo a sa tsebego Modimo ka leina ruri ga a mo tsebe bjalo ka motho.”

Ela hloko mohlala wa Maria, Mokatholika yo a botegago yo a dulago Australia. Ge Dihlatse tša Jehofa di kopana le yena la mathomo, Maria o ile a dumelela Dihlatse go mmontšha leina la Modimo ka Beibeleng. O ile a arabela bjang? “Ge ke bona leina la Modimo ka Beibeleng la mathomo, ke ile ka lla. Ke be ke kgomegile kudu go tseba gore ge e le gabotse nka tseba le go diriša leina la Modimo ka noši.” Maria o ile a tšwela pele go ithuta Beibele, e bile ka lekga la mathomo bophelong bja gagwe, o ile a tseba Jehofa bjalo ka motho le gona o ile a kgona go aga tswalano e swarelelago le yena.

Ee, re ka ‘batamela kgaufsi le Modimo,’ gaešita le ge re ka se mmone ka mahlo a rena a nama. Re ka “bona” semelo sa gagwe se sebotse ka mo go kgahlišago menaganong ya rena le dipelong gomme ka go dira bjalo ra gola leratong leo re mo ratago ka lona. Lerato le bjalo ke “yôna tlêmô ya botlalô.”​—Ba-Kolose 3:14.

[Seswantšho go letlakala 7]

Go naganišiša ka tlholo ya Jehofa ke tsela e nngwe ya go batamela kgaufsi le yena