Mmušo wa Modimo​—Pušo e Mpsha ya Lefase

“Mmušô . . . o tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”​—DANIELE 2:44.

1. Ke kgodišego efe yeo re ka bago le yona ka Beibeleng?

BEIBELE ke kutollo ya Modimo go batho. Moapostola Paulo o ngwadile gore: “Mola Lè tlêlwa ke Lentšu le le bexo le bolêlwa ke rena, Lè sa ka la le amoxêla bo-ka lentšu la batho, la le amoxêla è le la Modimo, la therešô.” (1 Ba-Thesalonika 2:13) Beibele e hupere seo re swanetšego go se tseba mabapi le Modimo: tsebišo mabapi le semelo sa gagwe, merero ya gagwe le dinyakwa tša gagwe go rena. E na le keletšo e kaone-kaone mabapi le bophelo bja lapa le boitshwaro bja letšatši le letšatši. E akaretša diporofeto tšeo di ilego tša phethagatšwa nakong e fetilego, tšeo di phethagalago gona bjale le tšeo di tlago go phethagala nakong e tlago. Ee, “Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong, xore motho wa Modimo e bê yo boló-ka-tlalô, a kxonišwê xo dira medirô e botse ka moka.”​—2 Timotheo 3:16, 17.

2. Jesu o ile a gatelela bjang sehlogo sa Beibele?

² Sa bohlokwa kudu ka Beibeleng ke sehlogo sa yona se segolo: go hlatselwa ga bogoši bja Modimo (tshwanelo ya gagwe ya go buša) ka Mmušo wa gagwe wa legodimong. Jesu o ile a dira seo motheo wa bohlokwa wa bodiredi bja gagwe. ‘Jesu o ile a thoma go goelela a re: Sokologang, gobane mmušo wa magodimo o batametše.’ (Mateo 4:17) O ile a bontšha sebaka seo o swanetšego go ba le sona maphelong a rena, ka go kgothaletša gore: “Sa pele Le tsomê mmušô wa Modimo le tokô ya wôna.” (Mateo 6:33) O ile a ba a bontšha gore o bohlokwa gakaakang ka go ruta balatedi ba gagwe go rapela go Modimo ka gore: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.”​—Mateo 6:10.

Pušo e Mpsha ya Lefase

3. Ke ka baka la’ng Mmušo wa Modimo e le wa bohlokwa bjo bogolo go rena?

³ Ke ka baka la’ng Mmušo wa Modimo e le wa bohlokwa bjo bogolo gakaakaa bathong? Ka gobane kgaufsinyane o tla gata mogato wo o tlago go fetoša pušo ya lefase le ka mo go sa felego. Boporofeta bjo bo lego go Daniele 2:44 bo re: “Mehleng ya dikxoši tšeo [tšeo ga bjale di bušago lefaseng], ké mo Modimo a tl’o xo tsoša mmušô [mmušo legodimong] wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô [mebušo ya lefaseng] e mengwê ka moka wa e fediša; xe e le wôna, o tlo êma xo ya xo ile.” Ge Mmušo wa Modimo wa legodimong o buša ka mo go feletšego, le ka mohla batho ba ka se laole lefase gape. Pušo e aroganego le e sa kgotsofatšego ya batho e tla ba selo sa nakong e fetilego ka mo go sa felego.

4, 5. (a) Ke ka baka la’ng Jesu e le yo a swanelegago kudu go ba Kgoši ya Mmušo? (b) Ke kabelo efe yeo Jesu a tlago go ba le yona nakong e tlago yeo e lego kgaufsi?

⁴ Mmuši yo Mogolo Mmušong wa legodimong, ka tlase ga tlhahlo ya Jehofa ya kgaufsi-ufsi, ke yo a swanelegago gakaone kudu​—Kriste Jesu. Pele ga ge a ka tla lefaseng, o bile gona legodimong e le “mošomedi yo a nago le bokgoni” wa Modimo, e le wa mathomo wa tlholo ka moka ya Modimo. (Diema 8:22-31, bapiša le NW.) “Ké Yêna seswanthšô sa Modimo e a sa bonwexo, tháka-letswálô yá dibopya tšohle. Ka xobane tšohle tša kwa maxodimong le mo ‘faseng di hlodilwe ka Yêna.” (Ba-Kolose 1:15, 16) Gape ge Jesu a be a rometšwe lefaseng ke Modimo, o ile a dira thato ya Modimo ka dinako tšohle. O ile a kgotlelela diteko tše thata kudu gomme a hwa a botegela Tatagwe.​—Johane 4:34; 15:10.

⁵ Jesu o ile a putswa bakeng sa potego ya gagwe e sa kwanantšhego go Modimo gaešita le go iša lehung. Modimo o ile a mo tsošetša legodimong gomme a mo nea tshwanelo ya go ba Kgoši ya Mmušo wa legodimong. (Ditiro 2:32-36) Bjalo ka Kgoši ya Mmušo, Kriste Jesu o tla ba le kabelo e kgolo e tšwago go Modimo ya go eta pele dikete-kete tša dibopiwa tše matla tša moya bakeng sa go tloša pušo ya batho lefaseng le go tloša bokgopo ka moka lefaseng la rena. (Diema 2:21, 22; 2 Ba-Thesalonika 1:6-9; Kutollo 19:11-21; 20:1-3) Ka morago ga moo Mmušo wa Modimo wa legodimong ka tlase ga Kriste e tla ba matla a mafsa a taolo ao a bušago, mmušo o nnoši lefaseng ka bophara.​—Kutollo 11:15.

6. Ke pušo ya mohuta ofe yeo re ka e letelago go tšwa go Kgoši ya Mmušo?

⁶ Lentšu la Modimo le bolela ka Mmuši yo mofsa wa lefase gore: “A neêlwa boxoši le kxodišô le mmušô; dithšaba ka moka le merafô le maleme ya ba bahlanka ba xaxwe.” (Daniele 7:14) Ka gobane Jesu o tla ekiša lerato la Modimo, khutšo le lethabo ka tlase ga pušo ya gagwe e tla ba tše dikgolo. (Mateo 5:5; Johane 3:16; 1 Johane 4:7-10) “Ge e le mabapi le go oketšega ga mmušo wa gagwe le ga khutšo go ka se fele, . . . bakeng sa go o tiiša ka toka le ka toko.” (Jesaya 9:7, Revised Standard Version) E tla ba tšhegofatšo e kaakang go ba le Mmuši yo a bušago ka lerato, toka le toko! Ka gona, 2 Petro 3:13 e bolela e sa le pele gore: “Se re se letetšexo ka xo kwa dikholofedišô tša xaxwe ké maxodimo a mafsa [Mmušo wa Modimo wa legodimong] le lefase le lefsa [lekoko le lefsa la lefaseng], moo xo axilexo tokô.”

7. Mateo 24:14 e phethagala bjang lehono?

⁷ Ka kgonthe Mmušo wa Modimo ke ditaba tše dibotse kudu bakeng sa bohle bao ba ratago seo se lokilego. Ke ka lebaka leo, e le karolo ya pontšho ya gore ga bjale re phela “mehleng ya bofêlô” ya tshepedišo ye e kgopo, Jesu a ilego a bolela e sa le pele gore: “Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.” (2 Timotheo 3:1-5; Mateo 24:14) Boporofeta bjoo bo dutše bo phethagala gona bjale, ka ge Dihlatse tša Jehofa tše ka bago dimilione tše tshelelago dinageng tše 234 di neela diiri tše dimilione tše sekete ka ngwaga di botša ba bangwe ka Mmušo wa Modimo. Ka mo go swanetšego, lefelo le lengwe le le lengwe la tšona la borapedi bakeng sa diphuthego tše ka bago 90 000 lefaseng ka bophara le bitšwa Holo ya Mmušo. Moo, batho ba tlela go ithuta ka mmušo o mofsa o tlago.

Babuši-gotee

8, 9. (a) Babuši-gotee le Kriste ba tšwa kae? (b) Ke kholofelo efe yeo re ka bago le yona ka pušo ya Kgoši le babuši-gotee le yena?

⁸ Go tla ba le babuši-gotee le Kriste Jesu  Mmušong wa Modimo wa legodimong. Kutollo 14:1-4 e ile ya bolela e sa le pele gore batho ba 144 000 ba be ba tla ‘rekollwa bathong’ gomme ba tsošetšwa bophelong bja legodimong. Ba ba akaretša banna le basadi, bao go e na le gore ba hlankelwe, ba ilego ba hlankela Modimo le magagabo bona ka boikokobetšo. “Sa bôná ké xo ba baperisita ba Modimo le ba Kriste; ba tlo buša le Yêna nywaxa e sekete.” (Kutollo 20:6) Palo ya bona ke e nyenyane kudu go e na le “lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka” leo le tlago go phologa bofelo bja tshepedišo ye. Ba le bona ba hlankela Modimo “mosexare le bošexo,” eupša ga ba biletšwa legodimong. (Kutollo 7:9, 15) Ba bopa motheo wa lefase le lefsa e le balata ba Mmušo wa Modimo wa legodimong.​—Psalme 37:29; Johane 10:16.

⁹ Ge a kgetha bao ba tlago go buša le Kriste legodimong, Jehofa o ile a kgetha batho ba botegago bao ba bilego le phihlelo ya bophelo ka mathata a bjona ka moka. Ga go na selo seo batho ba fetilego go sona seo dikgoši tše tšeo e lego baperisita di sa kago tša ba le phihlelo ya sona. Ka gona bophelo bja bona lefaseng bo tla godiša bokgoni bja bona bja go buša batho. Gaešita le Jesu ka noši “ó ithutile xo kwa ka xôna xo tlaišêxa.” (Ba-Hebere 5:8) Moapostola Paulo o ile a bolela ka yena gore: “Moperisita e moxolo e lexo wa rena, xa se a kaxo šitwa xo re kwêla bohloko xe re fôkôla; ké e a lekilwexo mo xo tšohle byalo ka rena; fêla, xa a na sebe.” (Ba-Hebere 4:15) Ke mo go homotšago gakaakang go tseba gore lefaseng le lefsa la Modimo la go loka, batho ba tla bušwa ke dikgoši le baperesita ba lerato le bao ba nago le kwelobohloko!

Na Mmušo e be e le Morero wa Modimo?

10. Ke ka baka la’ng Mmušo wa legodimong e be e se karolo ya morero wa mathomo wa Modimo?

¹⁰ Na Mmušo wa legodimong e be e le karolo ya morero wa mathomo wa Modimo ge a be a bopa Adama le Efa? Pegong ya tlholo ya Genesi, ga go na mo go bolelwago ka Mmušo wo o bego o tla buša batho. Jehofa ka noši e be e le Mmuši wa bona, gomme ge feela ba be ba mo kwa, go be go sa nyakege pušo le ge e ka ba efe e nngwe. Genesi kgaolo 1 e bontšha gore Jehofa o ile a dirišana le Adama le Efa, mohlomongwe ka Morwa wa gagwe wa leitšibolo wa legodimong. Pego e diriša dipolelwana tše bjalo ka “Modimo . . . a bolêla le bôná a re” le “Modimo a re” go bona.​—Genesi 1:28, 29; Johane 1:1.

11. Ke mathomo afe a phethagetšego ao batho ba ilego ba ba le wona?

¹¹ Beibele e re: “Ya re xe Modimo a lebêlêla tšohle tše a di dirilexo, a bôna e le tše botse kudu.” (Genesi 1:31) Selo se sengwe le se sengwe tšhemong ya Edene e be e le se se phethagetšego ka mo go feletšego. Adama le Efa ba be ba phela paradeiseng. Ba be ba e-na le menagano e phethagetšego le mebele e phethagetšego. Ba be ba kgona go boledišana le Modiri wa bona gomme le yena a kgona go boledišana le bona. Le gona ka go dula ba botega, ba be ba tla ba le bana ba phethagetšego. Go be go ka se nyakege mmušo o mofsa wa legodimong.

12, 13. Ge batho ba phethagetšego ba dutše ba ata, ke ka baka la’ng Modimo a be a sa dutše a ka kgona go boledišana le bona?

¹² Ge lapa la batho le dutše le ata, Modimo o be a tla boledišana bjang le bona ka moka? Nagana ka dinaledi tša legodimo. Di kgobokeditšwe gotee ka dihlopha tša dinaledi tše di lego lekatana tšeo di bitšwago melalatladi ya dinaledi. Melalatladi e mengwe ya dinaledi e na le dinaledi tše dimilione tše sekete. E mengwe e na le tše bilione. Le gona bo-rathutamahlale ba akanya gore go na le melalatladi ya dinaledi e ka bago dimilione tše dikete tše 100 legohleng leo le bonwago! Lega go le bjalo, Mmopi o re: “Llalang Le bônê tša kwa xodimo; ké mang e a di hlodilexo, a di nthša byalo ka mohlape wo o badilwexo? a di bitša tšohle ka maina, mo xo boati byo bokaakaa xwa se hlôkwê le setee, ka xobane è le yo matla a maxolo.”​—Jesaya 40:26.

¹³ Ka ge Modimo a ka kgona go lemoga makoko a ka moka a legodimong, ruri e ka se be bothata go yena go lemoga palo e nyenyane kudu ya batho. Gaešita le gona bjale, bahlanka ba gagwe ba dimilione ba mo rapela letšatši le letšatši. Dithapelo tšeo di fihla go Modimo gatee-tee. Ka gona, go boledišana le batho ka moka ba phethagetšego e be e ka se be bothata go yena. O be a ka se nyake Mmušo wa legodimong gore a ba hlokomele. A thulaganyo e kgahlišago gakaakang​—go ba le Jehofa e le Mmuši, go ya go yena ka go lebanya le go ba le tebelelo ya go se hwe le ka mohla, go phelwa ka mo go sa felego lefaseng la paradeise!

‘Motho mo a Yago ga a Ikiše’

14. Ke ka baka la’ng batho ba tla nyaka pušo ya Jehofa ka mo go sa felego?

¹⁴ Lega go le bjalo, batho​—gaešita le bao ba phethagetšego​—ba be ba tla nyaka pušo ya Jehofa ka mo go sa felego. Ka baka la’ng? Ka gobane Jehofa ga se a ba bopa ba e-na le bokgoni bja go ipuša ka katlego ka ntle le pušo ya gagwe. Wo ke molao wa batho, bjalo ka ge moporofeta Jeremia a ile a dumela ka gore: “Morêna, ke a tseba; motho tsela y’axwe xa’ e buše; le monna [“motho,” NW] mo a yaxo xa’ ikiše, le xe a xata a tiiša. Morêna, nkôtlê ka xo ntekanexo.” (Jeremia 10:23, 24) E be e tla ba bošilo go batho go nagana gore ba be ba ka buša setšhaba ka katlego ka ntle le go bušwa ke Jehofa. E be e tla ba go thulana le mokgwa wo ba bego ba dirilwe ka ona. Go ipuša ka ntle le go bušwa ke Jehofa, ka ntle le pelaelo go be go tla feleletša ka boithati, lehloyo, bošoro, bosenyi, dintwa le lehu. ‘Motho o be a tla buša motho gore a mo senye.’​—Mmoledi 8:9.

15. Ke mafelelo afe ao a ilego a ba gona kgethong e mpe yeo batswadi ba rena ba pele ba e dirilego?

¹⁵ Ka manyami, batswadi ba rena ba pele ba ile ba phetha ka gore ba be ba sa nyake Modimo e le Mmuši wa bona, gomme ba ile ba kgetha go phela ka go ipuša ka ntle le yena. E le mafelelo a se, Modimo le ka mohla ga se a ka a ba thekga gore ba phethagale. Ga bjale ba be ba le bjalo ka sedirišwa sa mohlagase seo se kgaotšwego mothopong wa sona wa matla. Ka gona ge nako e dutše e e-ya, ba be ba tla felelwa ke matla gomme ba ema​—ka lehu. Ba ile ba ba bjalo ka mosego o nago le bosodi, gomme boemo bjoo e be e le sohle seo ba bego ba ka se fetišetša go bana ba bona. (Ba-Roma 5:12) “[Jehofa] ké Yêna Lentswê, yo tirô-phethexi, ka xe ‘tsela tša’xwe tšohle di lokile. . . . Ba e sexo bana b’axwe ka dithšila ba a mmêka.” (Doiteronomio 32:4, 5) Ka kgonthe, Adama le Efa ba be ba tutueditšwe ke sebopiwa sa moya sa lerabele seo se ilego sa fetoga Sathane, eupša ba be ba e-na le megopolo e phethagetšego gomme ba ka ba ba ile ba gana ditšhišinyo tša gagwe tše fošagetšego.​—Genesi 3:1-19; Jakobo 4:7.

16. Histori e hlatsela bjang mafelelo a go ipuša ka ntle le Modimo?

¹⁶ Histori e hlatsela kudu mafelelo a go ipuša ka ntle le Modimo. Ka nywaga e dikete, batho ba lekile mohuta o mongwe le o mongwe wa mmušo wa motho, tshepedišo e nngwe le e nngwe ya tša boiphedišo le ya tša selegae. Lega go le bjalo, bokgopo bo tšwela pele “bò xola bò e-ya.” (2 Timotheo 3:13) Lekgolo la bo-20 la nywaga le hlatsetše seo. Le ile la tlala ka lehloyo le šoro le bosenyi bjo bogolo kudu, dintwa, tlala, bodiidi le tlaišego tša nako le ge e le efe historing. Le gona go sa šetšwe gore ke ditšwelopele dife tša tša kalafo tšeo di šetšego di dirilwe, ge nako e dutše e e-ya yo mongwe le yo mongwe o a hwa. (Mmoledi 9:5, 10) Ka go leka go hlahla megato ya bona, batho ba itumeletše go ba bahlaselwa ba Sathane le batemona ba gagwe, moo e lego gore Beibele e bitša Sathane “modimo wa lefase lé.”​—2 Ba-Korinthe 4:4.

Mpho ya Tokologo ya Boikgethelo

17. Mpho ya Modimo ya tokologo ya boikgethelo e be e tla dirišwa bjang?

¹⁷ Ke ka baka la’ng Jehofa a be a tla dumelela batho go ba bao ba lokologilego? Ka gobane o ba bopile ba e-na le mpho e kgahlišago ya tokologo ya boikgethelo, bokgoni bja tokologo ya go ikgethela. Moapostola Paulo o itše: “Mo xo lexo Môya wa Morêna, ké mo xo lexo khunoloxô [“tokologo,” NW].” (2 Ba-Korinthe 3:17) Ga go na yo a nyakago go ba roboto, a nyaka gore motho yo mongwe a mo direle phetho motsotswaneng o mongwe le o mongwe wa letšatši mabapi le seo a tlago go se bolela le go se dira. Eupša Jehofa o be a nyaka gore batho ba diriše mpho yeo ya tokologo ya boikgethelo ka boikarabelo, go bona bohlale bja go dira thato ya gagwe le go dula ba mo kwa. (Ba-Galatia 5:13) Ka gona tokologo e be e ka se be e feletšego, ka ge seo se be se tla feleletša ka bohloka-pušo. Go be go swanetše go ba le go laolwa ga yona ka gare ga mellwane ya melao ya Modimo ya go loka.

18. Ke eng seo Modimo a se bontšhitšego ka go dumelela gore batho ba diriše kgetho ya bolokologi?

¹⁸ Ka go dumelela lapa la batho gore le lokologe, Modimo o bontšhitše gatee ya ba moka gore re nyaka pušo ya gagwe. Mokgwa wa gagwe wa go buša, bogoši bja gagwe, ke tsela e nnoši e lokilego. E feleletša ka lethabo le legolo, kgotsofalo le katlego. Se ke ka gobane menagano ya rena le mebele ya rena Jehofa o be a e diretše go šoma gakaone kudu tumelelanong le melao ya gagwe. “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” (Jesaya 48:17) Kgetho ya bolokologi ka gare ga mellwane ya melao ya Modimo e be e ka se be morwalo eupša e be e tla feleletša ka dijo tša mehuta-huta tše thabišago, magae, bokgabo le mmino. Ge e be e dirišitšwe gabotse, tokologo ya boikgethelo nkabe e ile ya feleletša ka bophelo bjo bobotse bjo bo kgahlišago ka mo go sa felego lefaseng la paradeise.

19. Ke sedirišwa sefe seo Modimo a se dirišago go boelanya batho le yena ka noši?

¹⁹ Eupša ka baka la kgetho ya bona e fošagetšego, batho ba ile ba ikaroganya le Jehofa, ba ba bao ba sa phethagalago, ba senyega gomme ba hwa. Ka gona ba be ba tla nyaka go lokollwa boemong bjoo bjo bo nyamišago gomme ba bušetšwe  tswalanong e swanetšego le Modimo bjalo ka barwa le barwedi ba gagwe. Sedirišwa seo Modimo a se kgethilego go phetha se ke Mmušo, gomme Morekolodi ke Jesu Kriste. (Johane 3:16) Ka thulaganyo ye, bao ba itsholago e le ka kgonthe​—bjalo ka morwa wa lehlaswa wa seswantšho sa Jesu​—ba tla boelanywa le Modimo gomme ba amogelwa gape ke yena e le bana ba gagwe.​—Luka 15:11-24; Ba-Roma 8:21; 2 Ba-Korinthe 6:18.

20. Morero wa Modimo o tlo phethagatšwa bjang ka Mmušo?

²⁰ Ka ntle le go palelwa, thato ya Jehofa e tlo phethagatšwa mo lefaseng. (Jesaya 14:24, 27; 55:11) Ka Mmušo wa gagwe ka tlase ga Kriste, Modimo o tla hlatsela (lokafatša) ka mo go tletšego tshwanelo ya gagwe ya go ba Mmuši wa rena. Mmušo o tla fediša pušo ya batho le batemona bao ba bušago mo lefaseng, gomme wona o nnoši o tla buša go tšwa legodimong ka nywaga e sekete. (Ba-Roma 16:20; Kutollo 20:1-6) Eupša ka nako yeo, bophagamo bja tsela ya Jehofa ya go buša bo tla bontšhwa bjang? Le gona ka morago ga nywaga e sekete, ke tema efe yeo Mmušo o tlago go e kgatha? Sehlogo se se latelago se tla ahla-ahla dipotšišo tše.

Dintlha tša Tlhahlobo

• Sehlogo sa Beibele ke sefe?

• Ke bomang bao ba dirago pušo e mpsha ya lefase?

• Ke ka baka la’ng pušo ya motho ya go ipuša ka ntle le Modimo le ka mohla e ka se ke ya atlega?

• Tokologo ya boikgethelo e swanetše go dirišwa bjang?

[Dipotšišo tša Thuto]

[Seswantšho go letlakala 10]

Thuto ya Jesu e ile ya gatelela pušo ya Modimo ka Mmušo

[Diswantšho go letlakala 12]

Nageng e nngwe le e nngwe Dihlatse tša Jehofa di dira Mmušo thuto ya tšona e kgolo

 [Diswantšho go letlakala 14]

Histori e hlatsela mafelelo a mabe a go ipuša ka ntle le Modimo

[Methopo]

WWI soldiers: U.S. National Archives photo; concentration camp: Oświęcim Museum; child: UN PHOTO 186156/J. Isaac