Na ke Dirile Moya o Mokgethwa Mothuši wa-ka wa motho ka Noši?

BO-RATHUTATUMELO, re sa bolele ka batho ka kakaretšo, ba na le dikgopolo tše mmalwa mabapi le go hlaolwa ga moya o mokgethwa wa Modimo. Lega go le bjalo, go se kgonthišege mo go bjalo ga go nyakege. Beibele e hlalosa gabotse seo moya o mokgethwa e lego sona. Go e na le go ba motho, bjalo ka ge ba bangwe ba bolela, ke matla a dirago ao Modimo a a dirišago go phetha thato ya gagwe.​—Psalme 104:30; Ditiro 2:33; 4:31; 2 Petro 1:21.

Ka ge moya o mokgethwa o tswalana kgaufsi kudu le go phethagatšwa ga merero ya Modimo, re swanetše go nyaka gore maphelo a rena a dumelelane le wona. Re swanetše go nyaka gore e be mothuši wa rena wa motho ka noši.

Mothuši​—Ke ka Baka La’ng a Nyakega?

A lebeletše pele go tlogeng ga gagwe lefaseng, Jesu o ile a kgonthišetša barutiwa ba gagwe gore: “Nna ke tlo kxopêla Tate, a tlo Le nea Molwedi [“mothuši,” NW] e mongwê, xore a tlê a dulê le lena xo iša xo sa felexo.” Gape a re: “Xomme ke Le botša therešô xe ke re: Xo a Le hola xe ke tloxa. Xobane xe ke sa tloxe, Molwedi a ka se tle xo lena. Fêla, xe ke ya, ke tlo mo roma a tla xo lena.”​—Johane 14:16, 17; 16:7.

Jesu o ile a nea barutiwa ba gagwe thomo e bohlokwa kudu ka go ba laela gore: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Se e be e ka se be modiro o bonolo, ka gobane o be o tla phethagatšwa go lebeletšanwe le kganetšo.​—Mateo 10:22, 23.

Kganetšo e tšwago ka ntle e be e tla tlaleletšwa ke tekanyo ya kgohlano yeo e tšwago ka phuthegong. Paulo o ile a ngwalela Bakriste ba Roma mo e ka bago ka 56 C.E. gore: “Bana bešo, ke Le rapêla xore Le phafoxêlê ba ba diraxo dikxaoxanô le dikxopišô, bà xana thutô ye Le e rutilwexo. Le ba široxêlê.” (Ba-Roma 16:17, 18) Boemo bjo bo be bo tla mpefala ge baapostola ba hwile. Paulo o ile a lemoša gore: “Xobane nna ke tseba xore mohla kè sepetše, Le tlo tlêlwa ke diphiri tše di jaxo batho, tše di sa sétšexo mohlape. Le mo xo lena beng xo tlo tsoxa banna, ba ba tl’o xo bolêla ditaba tše šele, xore ba xôxê barutiwa ba tloxê le bôná.”​—Ditiro 20:29, 30.

Thušo ya Modimo e be e nyakega bakeng sa go ganetša mapheko a. O dirile bjalo ka Jesu. Ka morago ga tsogo ya gagwe, ka letšatši la Pentekoste ya 33 C.E., balatedi ba gagwe ba ka bago 120 “ka moka ba tlala Môya-mokxêthwa.”​—Ditiro 1:15; 2:4.

Barutiwa ba ile ba lemoga gore moya o mokgethwa wo o ilego wa tšhollwa tiragalong ye e be e le thušo yeo Jesu a bego a e holofeditše. Ka ntle le pelaelo ga bjale ba kwešišitše gakaone sešupo se Jesu a bego a se neile: “Molwedi [“mothuši,” NW] Môya-mokxêthwa, wo Tate a tl’o xo o roma ka Leina la-ka, o tlo Le ruta tšohle, o tlo Le xakolla tšohle tše ke Le boditšexo tšôna.” (Johane 14:26, mongwalo o sekamego ke wa rena.) O ile a ba a o bitša ‘mothuši, moya wa therešo.’​—Johane 15:26, bapiša le NW.

Moya ke Mothuši Bjang?

Moya o be o tla šoma e le mothuši ka ditsela tše mmalwa. Ya pele, Jesu o ile a holofetša gore o be o tla gopotša barutiwa ba gagwe dilo tšeo a bego a ba boditše tšona. Ka se o be a bolela se se fetago go fo ba thuša go gopola mantšu. Moya o be o tla ba thuša go kwešiša ditlhaloso tše di tseneletšego le bohlokwa bja seo a bego a se ruta. (Johane 16:12-14) Ka boripana, moya o be o tla  hlahla barutiwa ba gagwe kwešišong e kaone ya therešo. Moapostola Paulo ka morago o ngwadile gore: “’Me rena, Modimo ó re utolletše tšôna ka Môya wa xaxwe; xobane Môya o fênyêka tšohle, le ôna madiba a diphiri tša Modimo.” (1 Ba-Korinthe 2:10) Bakeng sa gore balatedi ba Jesu ba tloditšwego ba fetišetše tsebo e nepagetšego go ba bangwe, kwešišo ya bona ka noši e be e swanetše gore e be le motheo o tiilego.

Ya bobedi, Jesu o rutile barutiwa ba gagwe go rapela le go dira bjalo leboelela. Ge e ba ka dinako tše dingwe ba be ba sa kgonthišege mabapi le seo ba swanetšego go se rapelela, moya o be o ka ba thekga goba wa ba thuša. “Xe xo le byalo, le wôna Môya ó re hlatlola phôkôlô; xobane rena xa re tsebe se re kaxo se kxopêla; le mokxwa wa xo kxopêla xa re o tsebe. Ké wôna Môya ó re rapedišaxo ka diphêxêlô tše di šitaxo molomo.”​—Ba-Roma 8:26.

Ya boraro, moya o be o tla thuša barutiwa ba Jesu go lwela therešo phatlalatša. O ba lemošitše gore: “Ba tlo Le sekiša dikxorong, ‘me ba tlo Le ôtla mo diphuthexong tša bôná. Ba tlo Le bexa xo babuši le dikxoši ka ‘baka la-ka, ya tlo ba bohlatse xo bôná le xo ba dithšaba. Xe ba Le iša thsekong, Le se kê la phora-phora, la re: Re y’o re’ng? Xobane ka lebaka la xôna Le tlo newa se Le tl’o xo se bolêla; xobane xa se lena Le bolêlaxo, ké Môya wa Tata-weno ó bolêlaxo ka lena.”​—Mateo 10:17-20.

Moya o mokgethwa gape o be o tla thuša go hlaola phuthego ya Bokriste le go tutuetša ditho tša yona go dira diphetho tše bohlale tša motho ka noši. Anke re ahla-ahleng dibopego tše tše pedi tša taba ye ka mo go oketšegilego gomme re bone seo di se bolelago bakeng sa rena lehono.

Go Šoma Bjalo ka Leswao Leo le Hlaolago

Ka nywaga-kgolo ba-Juda ba ile ba hlankela ka tlase ga Molao wa Moše e le batho ba Modimo ba kgethilwego. Ka ge ba ile ba gana Jesu bjalo ka Mesia, o ile a bolela e sa le pele gore go se go ye kae le bona ba tla ganwa: “A xa L’ešo la bala mangwalong mo xo rexo: Lefsika le baaxi ba le nyaditšexo le bile la mothêô wa sekhutlô? Tše byalo xe di dirêxa di tšwa xo Morêna; re bôna è le matete. Ké xôna ke Le botšaxo ke re: Le tlo amoxiwa mmušô wa Modimo; ‘me o tlo fiwa sethšaba se se tl’o xo tšweletša dienywa tša sôna.” (Mateo 21:42, 43) Ge phuthego ya Bokriste e thewa ka Pentekoste ya 33 C.E., balatedi ba Kriste e ile ya ba ‘setšhaba se se tšweletšago dienywa tša sona.’ Go tloga ka nako yeo go ya pele, phuthego ye e be e le mokero wa Modimo wa poledišano. Go dira gore batho ba kgone go lemoga go fetišetšwa mo ga kgaugelo ya Modimo, Modimo o ile a nea leswao leo le hlaolago leo le lego molaleng.

Ka Pentekoste moya o mokgethwa o ile wa dira gore barutiwa ba kgone go bolela ka maleme ao ba sa kago ba ithuta ona, wa dira gore bao ba lebeletšego ba arabele ka go makala gomme ba botšiše gore: “Ké xo re’ng xe ka moka xa rena rè e-kwa bà bolêla ka mmolêlô wa xešo wo re tswáletšwexo xo wôna?” (Ditiro 2:7, 8) Bokgoni bja go bolela ka maleme ao a sa tsebjego, gotee le ‘mehlolo e mentši le dika tša bohlatse tšeo di ilego tša dirwa ke baapostola,’ di ile tša lebiša batho ba ka bago dikete tše tharo go lemoga gore moya wa Modimo o be o šoma e le ka kgonthe.​—Ditiro 2:41, 43.

Gape, ka go bontšha “dienywa tša Môya”​—lerato, lethabo, khutšo, go se fele pelo, botho, bonolo, tumelo, boleta le boitshwaro​—barutiwa ba Kriste ba be ba hlaolwa gabotse e le bahlanka ba Modimo. (Ba-Galatia 5:22, 23) Ge e le gabotse, lerato ka mo go kgethegilego le be le hlaola phuthego ya therešo ya Bokriste. Jesu o ile a bolela e sa le pele gore: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”​—Johane 13:34, 35.

Ditho tša phuthego ya pele ya Bokriste di ile tša amogela tlhahlo ya moya o mokgethwa wa Modimo gomme tša diriša ka mo go holago thušo yeo e o neago. Le ge Bakriste lehono ba lemoga gore Modimo ga bjale ga a tsoše bahu le go dira mehlolo bjalo ka lekgolong la pele la nywaga, ba dumelela dienywa tša moya wa Modimo go ba hlaola e le barutiwa ba kgonthe ba Jesu Kriste.​—1 Ba-Korinthe 13:8.

Mothuši go Direng Diphetho tša Motho ka Noši

Beibele ke setšweletšwa sa moya o mokgethwa. Ka gona, ge e ba re itumelela go tutuetšwa ke Beibele, go bjalo ka ge eka moya o mokgethwa o  be o re hlahla. (2 Timotheo 3:16, 17) E ka re thuša go dira diphetho tše bohlale. Eupša, na re a e dumelela?

Go thwe’ng ka kgetho ya rena ya mošomo? Moya o mokgethwa o tla dira gore re kgone go bona mošomo wo o letetšwego go ya ka pono ya Jehofa. Mošomo wa rena o swanetše go dumelelana le melao ya motheo ya Beibele, gomme seo se kgothaletšwago ke gore o swanetše go re thuša go phegelela dipakane tša pušo ya Modimo. Tšhelete goba bophagamo le botumo tšeo di tswalanago le mošomo ke tša bohlokwa bjo bonyenyane e le ka kgonthe. Sa bohlokwa kudu ke ge e ba o re nea dinyakwa tša bophelo le go re nea nako e lekanego le sebaka sa go phethagatša boikarabelo bja rena bja Bokriste.

Kganyogo ya go thabela bophelo ke e tlwaelegilego le e swanetšego. (Mmoledi 2:24; 11:9) Ka gona Mokriste yo a leka-lekanego a ka phegelela boitapološo bakeng sa go itapološa le go ithabiša. Eupša o swanetše go kgetha boitapološo bjo bo bonagatšago dienywa tša moya, e sego mohuta wo o bonagatšago “medirô ya nama.” Paulo o hlalosa gore: “Medirô ya nama yôna e pepeneneng; ké thlalô, le bootswa, le dithšila, le bohlôtlôlô. Ké xo hlankêla medimo, le boloi, le thlôyanô, le dintwa, le pefêlô, le boxale, le dithsêlê, le boxarexare. Ké moná, le polaô, le botaxwa, le bohori, le tše di swanaxo le tšeo.” Go “ba ba xo kxanthša lefêla, le ba xo rumolana, le ba xo tsebafêlana” le gona go swanetše go phengwa.​—Ba-Galatia 5:16-26.

Ke ka mo go swanago mabapi le go kgetha bagwera. Ke bohlale go ba kgetha go ya ka boemo bja moya, e sego go ya ka ponagalo ya ka ntle goba tšeo ba nago le tšona. Go molaleng gore monna Dafida e be e le mogwera wa Modimo, ka gobane Modimo o ile a mo hlalosa e le “monna wa xo kxahla pelo ya [gagwe].” (Ditiro 13:22) Ka go hlokomologa ponagalo ya ka ntle, Modimo o ile a kgetha Dafida go ba kgoši ya Isiraele, go ya ka molao wa motheo o rego: “Yo batho ba mmôxêlaxo, xa se yêna. Motho ó bôna se se lebanaxo le mahlô a xaxwe; Morêna Yêna ó bôna pelo.”​—1 Samuele 16:7.

Bogwera bja ba dikete bo ile bja fokola ka gobane bo be bo theilwe ponagalong ya ka ntle goba go tšeo motho a nago le tšona. Bogwera bjo bo theilwego mahumong a sa kgonthišegego bo ka fela kapejana. (Diema 14:20) Lentšu la Modimo leo le buduletšwego ka moya le re eletša gore ge re kgetha bagwera, re swanetše go kgetha bao ba ka re thušago go hlankela Jehofa. Le re botša gore re lebiše tlhokomelo go neeng go e-na le go amogeleng ka gobane go nea go tliša lethabo le legolo. (Ditiro 20:35) Nako le maikwelo a lerato di gare ga dilo tše bohlokwa kudu tšeo re ka di neago bagwera ba rena.

Go Mokriste yo a tsomago molekane wa lenyalo, Beibele e nea keletšo e buduletšwego ka moya. Go ya ka kgopolo e itšego e re: ‘Lebelela ka kua ga sefahlego le sebopego. Lebelela maoto.’ Maoto? Ee, ka kgopolo ye ya gore: Na a šomišwa go phetha modiro wa Jehofa wa go bolela ditaba tše dibotse gomme ka go rialo e le a rategago, bjalo ka ge a le bjalo ponong ya gagwe? Na a rwala molaetša wa therešo le ditaba tše dibotse tša khutšo? Re bala gore: “A ratêxa bya’ng maoto a motseta wa ditaba tše di botse dithabeng, sexoeledi sa phološô se se botšaxo Tsione sa re: Modimo wa xaxo ó tšere boxoši!”​—Jesaya 52:7; Ba-Efeso 6:15.

Bjalo ka ge re phela “[dinakong] tše hlobaetšago tšeo go lego thata go lebeletšana le tšona,” re nyaka thušo bakeng sa go dira thato ya Modimo. (2 Timotheo 3:1, NW) Mothuši, moya o mokgethwa wa Modimo, o neile thekgo e matla modirong wa Bakriste lekgolong la pele la nywaga, go akaretša le go ba mothuši wa bona wa motho ka noši. Go ithuta ka phišego Lentšu la Modimo, setšweletšwa sa moya o mokgethwa, ke tsela e kgolo yeo le rena re ka dirago moya o mokgethwa mothuši wa rena wa motho ka noši. Na re šetše re dirile bjalo?

 [Seswantšho se se tletšego letlakaleng 23]