Seo Mmušo wa Modimo o Tlago go se Dira

“Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.”​—MATEO 6:10.

1. Ke eng seo go tla ga Mmušo wa Modimo go tlago go se bolela?

GE Jesu a be a ruta balatedi ba gagwe go rapelela Mmušo wa Modimo, o be a tseba gore go tla ga wona go tla fediša nywaga e dikete ya pušo ya batho ya go ipuša ka ntle le Modimo. Nakong ye ka moka, thato ya Modimo e be e sa dirwe lefaseng ka kakaretšo. (Psalme 147:19, 20) Eupša ka morago ga go hlongwa ga Mmušo legodimong, thato ya Modimo e tla dirwa gohle. Nako bakeng sa phetogo e makatšago kudu go tloga pušong ya batho go ya pušong ya Mmušo wa Modimo wa legodimong e batamela kudu.

2. Ke eng seo se tlago go swaya phetogo go tloga pušong ya batho go ya pušong ya Mmušo?

² Seo se swayago phetogo ye e tla ba nako yeo Jesu a e biditšego a re “ma-setla-pelo a mohla woo e tlo ba a maxolo, a a sešoxo a bônwa xo tloxa mola lefase lè thôma xo ba  xôna, a a ka se kexo a ba xôna le ka mohla o mongwê.” (Mateo 24:21) Beibele ga e bolele gore nako yeo e tla ba lebaka le letelele gakaakang, eupša masetla-pelo e tla ba a šoro go feta selo le ge e le sefe seo lefase le kilego la se bona. Mathomong a masetla-pelo a magolo, selo se sengwe se tla direga seo e tlago go ba se se tšhošago o šoro go batho ba bantši lefaseng: go fedišwa ga bodumedi ka moka bja maaka. Seo e ka se be seo se tšhošago go Dihlatse tša Jehofa, ka gobane ke kgale di letetše se. (Kutollo 17:1, 15-17; 18:1-24) Masetla-pelo a magolo a felela ka Haramagedone ge Mmušo wa Modimo o pšhatlaganya tshepedišo ka moka ya Sathane.​—Daniele 2:44; Kutollo 16:14, 16.

3. Jeremia o hlalosa bjang pheletšo ya bao ba sa kwego?

³ Se se tla bolela eng go batho “ba ba sa tsebexo Modimo, le ba ba sa kwexo Ebangedi” mabapi le Mmušo wa gagwe wa legodimong ka diatleng tša Kriste? (2 Ba-Thesalonika 1:6-9) Boporofeta bja Beibele bo re botša gore: “Tsebang, bošula bo a tla, ké byo bo tl’o xo hlakanya ‘thšaba tšohle. Xo tsoxile ‘dimo le lexolo kwa merumong ya lefase. Mehleng yeo babolawa ba Morêna ba tlo tlala naxa mo xo fêla thokô tšohle xo ya kwa dipheletšong tša yôna. Ba ka se llêlwe, ba ka se kukwe ba bolokwa, ba tlo ka morole mašemong.”​—Jeremia 25:32, 33.

Bofelo bja Bokgopo

4. Ke ka baka la’ng Jehofa a swanetšwe ke go fediša tshepedišo ye?

⁴ Jehofa Modimo o kgotleletše bokgopo ka nywaga e dikete, lebaka le letelele ka mo go lekanego bakeng sa gore batho ba dipelo tše di lokilego ba bone gore pušo ya motho ke masetla-pelo. Ka mohlala, go ya ka mothopo o mongwe, lekgolong la bo-20 la nywaga le nnoši, batho ba fetago dimilione tše 150 ba ile ba bolawa dintweng, diphetogelong le ditšharakanong tše dingwe tša selegae. Bošoro bja batho bo ile bja bonwa kudu-kudu nakong ya Ntwa ya II ya Lefase ge ba ka bago dimilione tše 50 ba be ba bolawa, bao bontši bja bona ba ilego ba hwa mahu a sehlogo dikampeng tša tshwenyo tša Nazi. Bjalo ka ge Beibele e boletše e sa le pele, mehleng ya rena ‘batho ba babe le baaroši ba mpefetše kudu ka go fetišiša.’ (2 Timotheo 3:1-5, 13) Lehono, boitshwaro bjo bo gobogilego, bosenyi, bošoro, kgobogo le go nyatša ditekanyetšo tša Modimo ke tšeo di atilego. Ka gona, Jehofa o swanetše ka mo go tletšego go fediša tshepedišo ye e kgopo.

5, 6. Hlalosa bokgopo bjo bo bego bo le gona Kanana ya bogologolo.

⁵ Boemo ga bjale ke bjo bo swanago le bja Kanana nywaga e ka bago 3 500 e fetilego. Beibele e re: “Ba diretše medimo ya bôná ka tše e lexo makxapa, tše Morêna a di hloilexo; ešita le barwa ba bôná le barwedi ba bôná ba ba fišeditše medimo ya bôná.” (Doiteronomio 12:31) Jehofa o ile a tsebiša setšhaba sa Isiraele gore: “Morêna Modimo wa xaxo, dithšaba tšeo ó di raka xe O fihla ka ‘baka la bohlôla bya tšôna.” (Doiteronomio 9:5) Radihistori wa Beibele Henry H. Halley o ile a bolela gore: “Borapedi bja Baali, Asitarothe le medimo e mengwe ya ba-Kanana bo be bo e-na le menyanya e feteletšego kudu ya mašata; ditempele tša bona e be e le mafelo a motheo a kgobogo.”

⁶ Halley o bontšhitše kamoo bokgopo bja bona e bego e le bjo bogolo ka gona, ka gobane go le lengwe la mafelo ao, baepi ba marope ba “hweditše meeta e mentši e na le mašaledi a bana bao ba ilego ba dirwa dihlabelo bakeng sa Baali.” O itše: “Lefelo ka moka le ile la itlhatsela e le mabitla a masea. . . . Ba-Kanana ba be ba rapela ka go nwelela mo go gobogilego e le karolo ya tirelo ya bona ya bodumedi, ba dira pele ga medimo ya bona; gomme ka morago, ba bolaya bana ba bona ba maitšibulo e le sehlabelo go medimo yona ye. Go bonala eka ka tekanyo e kgolo, naga ya Kanana e be e fetogile e swanago le Sodoma le Gomora tekanyong ya setšhaba. . . . Na tlhabologo ya ditšhila tše bjalo e ferošago dibete le e sehlogo e be e e-na le tshwanelo le ge e le efe ya go tšwela pele e le gona ka nako e telele? . . . Baepi ba marope bao ba epago marope a metse ya Kanana ba makatšwa ke ge Modimo a sa ka a e fediša kapejana go feta ka mo a dirilego ka gona.”

Go Tšea Lefase e le Bohwa

7, 8. Modimo o tlo hlwekiša bjang lefase le?

⁷ Go fo swana le ge Modimo a ile a hlwekiša  Kanana, kgaufsinyane o tla hlwekiša lefase ka moka gomme a le nee bao ba dirago thato ya gagwe. “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng.” (Diema 2:21, 22) Le gona mopsalme o re: “Xo se xokae e mobe ó tlo ba a ile . . . Ba bolêta e tlo ba bôná beng ba naxa; ba tlo thaba ka botlalô bya moláô.” (Psalme 37:10, 11) Sathane le yena o tla tlošwa, e le gore “[a] se hlwê [a] aroša dithšaba, xo bê xo fetê nywaxa e sekete.” (Kutollo 20:1-3) Ee, “lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”​—1 Johane 2:17.

⁸ Ge a hlalosa ka boripana kholofelo e kgolo bakeng sa bao ba nyakago go phela ka mo go sa felego lefaseng, Jesu o itše: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.” (Mateo 5:5) Mohlomongwe o be a bolela ka Psalme 37:29, yeo e ilego ya bolela e sa le pele gore: “Baloki e ba beng ba naxa, ba dula mo xo yôna ka mehla le ka mehla.” Jesu o be a tseba gore e be e le morero wa Jehofa gore batho ba dipelo tše di lokilego ba phele lefaseng la paradeise ka mo go sa felego. Jehofa o re: “Lefase le batho le tšohle tše di phelaxo lefaseng di dirilwe ke Nna ka matla a-ka a maxolo . . . Xomme ke di nea, yo ke rataxo xo mo nea.”​—Jeremia 27:5.

Lefase le Lefsa Leo le Kgahlišago

9. Ke lefase la mohuta ofe leo Mmušo wa Modimo o tlago go le tliša?

⁹ Ka morago ga Haramagedone, Mmušo wa Modimo o tla tliša “lefase le lefsa” leo le kgahlišago, “moo xo axilexo tokô.” (2 Petro 3:13) E tla ba kimollo e kgolo gakaakang bakeng sa baphologi ba Haramagedone go lokologa tshepedišong ye e kgopo e gatelelago ya dilo! E tla ba bao ba thabilego gakaakang ge ba tsene lefaseng le lefsa la go loka ka tlase ga pušo ya Mmušo wa legodimong, ka ditšhegofatšo tše kgahlišago le bophelo bjo bo sa felego tšeo ba di bonago!​—Kutollo 7:9-17.

10. Ke dilo dife tše mpe tšeo di ka se sa bago gona ka tlase ga pušo ya Mmušo?

¹⁰ Batho ba ka se hlwe ba tlaišwa ke ntwa, bosenyi, tlala goba gaešita le diphoofolo tšeo di jago nama. “Ke tlo dira kxwêranô ya khutšô le [batho ba-ka], ka fediša dibata tše šoro mo naxeng . . . Dihlare tša naxa di tlo bea dikenyô tša tšôna; mašemo a tlo tšweletša punô; mo naxeng ya xabô ba tlo dula bà iketlile.” “Ke mo ba tl’o xo tšea dithšoša ba rula mexoma ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana. Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.”​—Hesekiele 34:25-28; Mika 4:3, 4.

11. Ke ka baka la’ng re ka ba le kholofelo ya gore mafokodi a mmele a tla fela?

¹¹ Bolwetši, manyami gaešita le lehu di tla fedišwa. “Mo xo ba ba axilexo fá xo ka se bê le e a rexo: Ke a babya! xobane ba dutšexo fá ba lebaletšwe melato.” (Jesaya 33:24) “Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile. . . . Šidio; dilô tšohle ke di dira tše mphsa.” (Kutollo 21:4, 5) Ge a be a le lefaseng, Jesu o ile a bontšha bokgoni bja gagwe bja go dira dilo tšeo ka matla ao Modimo a bego a mo neile ona. Ka thekgo ya moya o mokgethwa, Jesu o ile a sepela naga ka moka a fodiša digole le go fodiša balwetši.​—Mateo 15:30, 31.

12. Go na le kholofelo efe bakeng sa bahu?

¹² Jesu o ile a dira gaešita le ka mo go oketšegilego. O ile a tsoša bahu. Batho ba ikokobeditšego ba ile ba arabela bjang? Ge a be a tsošitše mosetsana wa nywaga e 12, batswadi ba gagwe “ba swarwa ke tlalêlô e kxolo.” (Mareka 5:42) Se e be e le mohlala o mongwe wa seo Jesu a tlago go se dira lefaseng ka bophara ka tlase ga pušo ya Mmušo, ka gobane ka nako yeo “bahu ba tlo tsoxa, bohle, baloki le ba s’a lokaxo.” (Ditiro 24:15) Anke o nagane gore go tla ba le tlalelo e kgolo gakaakang ge dihlopha tša bahu di bušetšwa bophelong ka go latelana gomme ba kopanywa gape le baratiwa ba bona! Ga go na pelaelo gore go tla ba le modiro o mogolo wa go ruta ka tlase ga bolebeledi bja Mmušo e le gore “xo tseba Morêna xo [ka] tlala ‘fase lohle bo-ka meetse xe a nabile lewatleng.”​—Jesaya 11:9.

Bogoši bja Jehofa bo a Hlatselwa

13. Go loka ga pušo ya Modimo go tla bontšhwa bjang?

¹³ Mafelelong a nywaga e sekete ya pušo ya Mmušo, lapa la batho le tla be le bušeditšwe phethegong ya monagano le ya mmele. Lefase e tla ba tšhemo ya lefase ka bophara ya Edene, paradeise. Khutšo, lethabo, tšhireletšego le lekoko la batho le le nago le lerato di tla be di fihleletšwe. Ga go le ka mohla historing ya motho pele ga ge Mmušo o ka buša go ilego gwa bonwa selo se swanago le se. A phapano e kgolo gakaakang yeo e tla bago e bontšhitšwe ka nako yeo magareng ga nywaga e fetilego e dikete ya pušo e šoro ya batho le pušo e kgahlišago ya Mmušo wa Modimo wa legodimong wa nywaga e sekete! Go buša ga Modimo ka Mmušo wa gagwe go tla ba go bontšhitšwe e le mo go phagamego ka mo go feletšego maemong ka moka. Tshwanelo ya Modimo ya go buša, e lego bogoši bja gagwe, e tla ba e hlatsetšwe ka mo go feletšego.

14. Ke eng seo se tlago go diragalela marabele ge nywaga e sekete e fela?

¹⁴ Mafelelong a nywaga e sekete, Jehofa o tla dumelela batho bao ba phethagetšego go diriša kgetho ya bona ya bolokologi ge e le mabapi le yo ba nyakago go mo hlankela. Beibele e bontšha gore “Sathane ó tlo lokollwa kxolexong ya xaxwe.” O tla leka gape go fapoša batho, bao ba bangwe ba bona ba tlago go kgetha go ipuša ka ntle le Modimo. E le gore a thibele ‘go boeletša kotsi yeo,’ Jehofa o tla fediša Sathane, batemona ba gagwe le bohle bao ba rabelago malebana le bogoši bja Jehofa. Ga go le o tee yo a ka ganago gore batho le ge e le bafe bao ba fedišwago ka mo go sa felego ka nako yeo ga se ba ka ba ba le sebaka goba gore tsela ya bona yeo e sa lokago e be e le ka baka la go se phethagale. Aowa, ba tla swana le Adama le Efa bao ba phethagetšego, bao ba ilego ba kgetha ka go rata go rabela malebana le melao ya Jehofa ya go loka.​—Kutollo 20:7-10; Nahume 1:9.

15. Ke tswalano efe yeo bao ba botegago ka go se kwanantšhe ba tlago go ba le yona le Jehofa?

¹⁵ Ka lehlakoreng le lengwe, mohlomongwe bontši bja batho ba tla kgetha go thekga bogoši bja Jehofa. Ge lerabele le lengwe le le lengwe le fedišitšwe, baloki ba tlo ema pele ga Jehofa, ba fentše teko ya mafelelo ya potego e sa kwanantšhego. Ba bao ba botegago ka go se kwanantšhe ka nako yeo ba tla amogelwa ke Jehofa e le barwa le barwedi ba gagwe. Ka gona ba boela tswalanong yeo Adama le Efa ba bilego le yona le Modimo pele ga ge ba ka rabela. Ka gona, Ba-Roma 8:21 e tla phethagatšwa: “Dibopya di tlo hunollwa bohlankeng bya thsenyêxô, di bê le tokoloxô ya xe bana ba Modimo bà e-ya letaxong.” Moporofeta Jesaya o bolela e sa le pele gore: “Lehu [Modimo] ó tlo le tloša ka xo sa felexo; Mong ‘a bohle Morêna ó tlo phomola mexôkxô mahlong ohle.”​—Jesaya 25:8.

Kholofelo ya Bophelo bjo bo sa Felego

16. Ke ka baka la’ng e le mo go swanetšego go lebelela pele moputsong wa bophelo bjo bo sa felego?

¹⁶ A kholofelo e kgahlišago gakaakang yeo e letetšego bao ba botegago, go tseba gore Modimo o tla ba tšhollela ka mo go sa felego mehola e tletšego wa go falala ya moya le ya dilo tše di bonagalago! Mopsalme o ile a bolela ka mo go swanetšego gore: “O khupurolla ‘atla sa xaxo, ‘me ka moka tše di phelaxo O di horiša lethabô [le le swanetšego].” (Psalme 145:16) Jehofa o  kgothaletša bao ba sehlopha sa lefaseng go ba le kholofelo ye ya bophelo Paradeiseng e le karolo ya tumelo ya bona go yena. Le ge kgang ya bogoši bja Jehofa e le bohlokwa kudu, ga a nyake gore batho ba mo hlankele ka ntle le tebelelo ya moputso. Ka Beibeleng ka moka, go botegela Modimo ka go se kwanantšhe gotee le kholofelo ya bophelo bjo bo sa felego ke tšeo di tlemaganego ka mo go tiilego e le dikarolo tše bohlokwa tša tumelo ya Mokriste go Modimo. “E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.”​—Ba-Hebere 11:6.

17. Jesu o ile a bontšha bjang gore ke mo go swanetšego go matlafatšwa ke kholofelo ya rena?

¹⁷ Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Mo o ile a tswalanya go tseba Modimo le merero ya gagwe gotee le moputso woo se se se tlišago. E le mohlala, ge modiradibe a be a kgopela go gopolwa ka morago ga ge Jesu a tlile Mmušong wa gagwe, Jesu o itše: “O tlo ba le Nna Paradiseng.” (Luka 23:43) Ga se a ka a botša monna yo gore a be le tumelo gaešita le ge a se a ka a hwetša moputso. O be a tseba gore Jehofa o nyaka gore bahlanka ba gagwe ba be le kholofelo ya bophelo bjo bo sa felego lefaseng la paradeise bakeng sa go thuša go ba matlafatša ge ba dutše ba lebeletšana le diteko tše di fapa-fapanego lefaseng le. Ka gona, go lebelela pele moputsong ke thušo ya bohlokwa bakeng sa go kgotlelela bjalo ka Mokriste.

Bokamoso bja Mmušo

18, 19. Ke eng seo se tlago go direga ka Kgoši le Mmušo mafelelong a Pušo ya Nywaga e Sekete?

¹⁸ Ka ge Mmušo e be e le mmušo o tlaleletšago wo Jehofa a o dirišitšego go tliša lefase le badudi ba lona phethegong le go boelanywa le yena, ke karolo efe yeo e lego gona bakeng sa Kgoši Jesu Kriste le dikgoši tše e lego baperisita tše 144 000 ka morago ga Nywaga e Sekete? “Xwa tlo kxon’o tla bofêlô mohla a tl’o xo bušetša Modimo Tat’axwe mmušô, mohla a tl’o xo ba a fedišitše bobuši byohle, le boxoši byohle, le tše matla ka moka. Xobane xo mo swanetše xe a e-ba kxoši; manaba a xaxwe ka moka a bê ka tlase xa ‘naô tša xaxwe.”​—1 Ba-Korinthe 15:24, 25.

¹⁹ Ge Kriste a bušetša Mmušo go Modimo, mangwalo ao a bolelago ka wona e le wa ka mo go sa felego a tla kwešišwa bjang? Tšeo Mmušo o di phethilego e tla ba tša ka mo go sa felego. Kriste o tla godišwa ka mo go sa felego ka baka la karolo ya gagwe ya go šomela go hlatselwa ga bogoši bja Modimo. Eupša ka ge sebe le lehu ka nako yeo di tla be di fedišeditšwe sa ruri, gomme batho ba lopolotšwe, se se fediša go nyakega ga gagwe go ba Molopolodi. Pušo ya Nywaga e Sekete ya Mmušo le yona e tla ba e phethilwe ka mo go feletšego; ka gona go ka se hlwe go nyakega mmušo wa tlaleletšo gore o dule o le gona magareng ga Jehofa le batho ba ba kwago. Ka go rialo, “Modimo e [tla ba] Yêna Mo-ba-tšohle-xo-bohle.”​—1 Ba-Korinthe 15:28.

20. Re ka tseba bjang seo bokamoso bo se swaretšego Kriste le ba 144 000?

²⁰ Ke karolo efe ya nakong e tlago yeo Kriste le babuši-gotee le yena ba tlago go ba le yona ka morago ga ge Pušo ya Nywaga e Sekete e fedile? Beibele ga e bolele. Lega go le bjalo, re ka kgonthišega gore Jehofa o tla ba nea ditokelo tše dintši tše oketšegilego tša tirelo tlholong ya gagwe ka moka. Eka ka moka ga rena lehono re ka thekga bogoši bja Jehofa gomme re newe bophelo bjo bo sa felego, e le gore nakong e tlago, re tle re phele bakeng sa go tseba seo Jehofa a se reretšego Kgoši le dikgoši tše e lego baperisita-gotee le yena, gotee le seo a se rerilego ka legohle la gagwe ka moka leo le makatšago!

Dintlha tša Tlhahlobo

• Ke phetogo efe yeo re lego kgaufsi le yona mabapi le pušo?

• Modimo o tlo ahlola bjang ba babe le ba ba lokilego?

• Ke maemo afe ao a tlago go ba gona lefaseng le lefsa?

• Bogoši bja Jehofa bo tla hlatselwa bjang ka mo go tletšego?

[Dipotšišo tša Thuto]

[Seswantšho go letlakala 17]

“Bahu ba tlo tsoxa, bohle, baloki le ba s’a lokaxo”

 [Seswantšho go letlakala 18]

Bao ba botegago ka go se kwanantšhe ba tla boela tswalanong ya kgonthe le Jehofa