Mahumo a go Nea Kudu a Tliša Lethabo

MOAPOSTOLA Paulo bjalo ka molebeledi wa Mokriste yo lerato o be a kgahlegela kudu badumedi-gotee le yena go tšwa pelong. (2 Ba-Korinthe 11:28) Ka gona, nakong ya nywaga ya bo-50 ya lekgolo la pele la nywaga la Mehla e Tlwaetšwego ya rena o ile a rulaganya kgoboketšo ya tšhelete bakeng sa Bakriste bao ba hlokago kua Judea, o ile a diriša sebaka seo go ruta thuto ya bohlokwa ka go nea kudu. Paulo o ile a gatelela gore go nea o thabile Jehofa o go tšeela godimo: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.”​—2 Ba-Korinthe 9:7.

Ba Bodiiding bjo bo Tseneletšego Eupša ba na le Seatla se se Bulegilego

Bontši bja Bakriste ba lekgolong la pele la nywaga ba be ba se na maemo a phagamego setšhabeng. Paulo o boletše gore magareng ga bona go be go “se na ba bantši ba matla.” E be e le “dilo tše fokolago tša lefase,” “dilo tšeo di hlokomologilwego tša lefase.” (1 Ba-Korinthe 1:26-28, NW) Ka mohlala, Bakriste bao ba bego ba dula Matsedonia ba be ba “sobeletše bohloking” le ‘melekong e mentši.’ Lega go le bjalo, badumedi bao ba Matsedonia bao ba ikokobeditšego ba ile ba kgopela tokelo ya go neela ka tša ditšhelete “modirong woo wa xo thuša bakxêthwa”; Paulo o boletše gore, gape seo ba se neilego, se be se “fetiša moo ba kxônaxo”!​—2 Ba-Korinthe 8:1-4.

Go sa dutše go le bjalo, go nea kudu mo go bjalo ga se gwa ahlolwa ka tekanyo yeo ba e neilego. Go e na le moo, tutuetšo, go rata go nea le boemo bja pelo di be di le bohlokwa. Paulo o bontšhitše Bakriste ba Korinthe gore monagano le pelo ka bobedi di a akaretšwa go direng meneelo. O itše: “Xo ithapa xa lena ke a xo tseba; ke be ke tumiša byôna xe ke botša ba Matsedonia, . . . me mafolofolo a lena a totowetša ba bantši.” Ba be ba ‘kwane le dipelo tša bona’ bakeng sa go nea kudu.​—2 Ba-Korinthe 9:2, 7.

‘Moya wa Bona o ba Tutueleditše’

Moapostola Paulo a ka be a be a gopola mohlala wa pele wa go nea kudu, woo o diregilego lešokeng go feta nywaga-kgolo e 15 pele ga mehla ya gagwe. Meloko e 12 ya Isiraele e be e lokolotšwe bokgobeng Egipita. Mo nakong ye e be e le thitong ya Thaba ya Sinai, ka gona Jehofa o ile a e laela gore e age tabarenakele bakeng sa borapedi le go e hlama ka didirišwa tša borapedi. Se se be se tla nyaka matlotlo a mantši, e bile setšhaba se ile sa laletšwa gore se neele.

Ba-Isiraele bao ba ile ba arabela bjang? “Mang le mang, wa xo tsošwa ke pelo ya xaxwe, le wa xo xapeletšwa ke môya wa xaxwe, a boa à na le mothšêlô wa Morêna, wa tša xo dira Ngwakô wa Kxwêranô.” (Ekisodo 35:21) Na setšhaba se ile sa nea kudu? Se dirile bjalo kudu! Pego e latelago e ile ya newa Moše: “Sethšaba se tliša xo fetiša tše di lekanexo modirô o laetšwexo ke Morêna.”​—Ekisodo 36:5.

Boemo bja ba-Isiraele bja tša ditšhelete morago nakong yeo e be e le bofe? E sego kgale kudu, e be e le makgoba a nyamilego, ‘ba gateletšwe ka go rwešwa morwalo,’ ba phela bophelo ‘bjo galakago,’ bophelo bja “mahloko.” (Ekisodo 1:11, 14; 3:7; 5:10-18) Ka gona, ga go bonale ba be ba humile ka dilo tše di bonagalago. Ke therešo gore ba-Isiraele ba tlogile nageng ya bokgoba bja bona ba na le mehlape le diruiwa. (Ekisodo 12:32) Eupša tšeo di ka ba e be e se tše dintši kudu, ka gore kapejana ka morago ga go tloga Egipita ba ile ba ngongorega ka gore ga ba na nama le bogobe tšeo ba ka di jago.​—Ekisodo 16:3.

Ka gona, ba-Isiraele ba hweditše kae matlotlo ao ba neetšego ka wona go agweng ga tabarenakele? Go bao e bego e le beng ba bona, ba-Egipita.  Beibele e re: “Ba-Isiraele . . . ba kxopetše Ba-Egipita dilô tša silifêra le tša xauta, le diaparô . . . [Ba-Egipita] ba [se] xane xo ba nea.” Ditiro tše tša go nea kudu ga ba-Egipita e be e le tšhegofatšo e tšwago go Jehofa e sego go Farao. Pego ya Modimo e re: “Me Morêna ó ba thušitše, ba hwetša Ba-Egipita e le ba botho, ba ba bexo ba sa xane xo ba nea.”​—Ekisodo 12:35, 36.

Ka gona, nagana kamoo ba-Isiraele ba ikwelego ka gona. Meloko e tlaišitšwe ke bohlanka bjo bo galakago le go amogwa dithoto. Mo nakong ye ba be ba lokologile e bile ba na le matlotlo a humilego a dilo tše di bonagalago. Ba be ba tla ikwa bjang mabapi le go arogana le a mangwe a matlotlo ao? Ba ka ba ba ile ba ikwa gore ba a šometše ka gona ba na le tshwanelo ya go a boloka. Lega go le bjalo, ge ba kgopelwa gore ba neele ka ditšhelete le go thekga borapedi bjo bo hlwekilego, ba ile ba dira bjalo​—e bile e sego ka go dika-dika goba go ngamela! Ga se ba lebala gore Jehofa ke yena a dirilego gore go kgonege gore ba be le dilo tše di bonagalago. Ka gona, ba ile ba neela ka motlalo wa silifera ya bona le gauta le leruo. Ba be ba “ithapa ka pelo.” ‘Dipelo tša bona tša ba tsoša.’ ‘Moya wa bona wa ba tutuetša.’ Ruri e be e le ‘modiro wa go ithapa go Jehofa.’​—Ekisodo 25:1-9; 35:4-9, 20-29; 36:3-7.

Go Lokela go Nea

Bogolo bja moneelo ge e le gabotse ga bo emele ka kgonthe go nea ga monei. Jesu Kriste ka nako e nngwe o ile a bogela ge batho ba tsenya tšhelete ka gare ga lepokisi la tšhelete la tempeleng. Bahumi ba ile ba lahlela tšhelete e ntši, eupša Jesu o ile a kgahlega ge a bona mohlologadi wa modiidi a lahlela ditšhelete tše pedi tša tekanyo ya tlase. O itše: “Mosadi eo wa mohlôlôxadi wa modiitšana ó thšetše xa-xolo xo fetiša bohle ba ba thšetšexo fá polokelong. . . . A thšêla tšohle tše a bexo a na natšô’, è le tšohle tše a bexo a tlo phela ka tšôna.”​—Luka 21:1-4; Mareka 12:41-44.

Ditlhaloso tša Paulo go ba-Korinthe di be di dumelelana le kgopolo ye ya Jesu. Ge e le mabapi le go dira meneelo bakeng sa badumedi-gotee bao e lego badiidi, Paulo o boletše gore: “Xe thatô e botse è le xôna, xo tlo thabêlwa se motho a se swerexo; xe a hlaêlwa, xa xo taba.” (2 Ba-Korinthe 8:12) Ee, meneelo ga se taba ya phadišano goba papišo. Motho o nea go ya kamoo a kgonago ka gona, e bile Jehofa o thabišwa ke moya wa go nea kudu.

Gaešita le ge go se na motho yo a ka humišago Jehofa, yoo dilo ka moka e lego tša gagwe, go neela ke tokelo yeo e neago barapedi sebaka sa go bontšha lerato la bona go yena. (1 Koronika 29:14-17) Meneelo yeo e neelwago, e sego bakeng sa go bontšha ba bangwe goba ka maikemišetšo a boithati, eupša ka boemo bja kgopolo bjo bo lokilego le go tšwetša pele borapedi bja therešo, e tliša lethabo gotee le ditšhegofatšo tša Modimo. (Mateo 6:1-4) Jesu o itše: “Lešexo la monei le phala la monewa.” (Ditiro 20:35) Re ka thabela go ba le  karolo lethabong leo ka go neela ka matla a rena tirelong ya Jehofa ka go beela ka thoko selo se sengwe seo se tšwago dilong tša rena tšeo di bonagalago bakeng sa go thekga borapedi bja therešo le go thuša bao ba swanelegago.​—1 Ba-Korinthe 16:1, 2.

Go Lokela go Nea Lehono

Lehono, Dihlatse tša Jehofa di thabela go bona tšwelopele ya lefase ka bophara ya go bolelwa ga “ditaba tše dibotse tša mmušo.” (Mateo 24:14, NW) Ngwaga-someng wa mafelelo wa lekgolo la bo-20 la nywaga, batho ba fetago 3 000 000 ba ile ba kolobetšwa e le pontšho ya boineelo bja bona go Jehofa Modimo, gomme diphuthego tše mpsha tše 30 000 di ile tša hlongwa. Ee, tee-tharong ya diphuthego tšeo di lego gona lehono tša Dihlatse tša Jehofa di hlomilwe nywaga e lesome e fetilego! Bogolo bja koketšego ye ke ka baka la mafelelo a go šoma ka thata ga banna le basadi ba Bakriste ba ba botegago bao ba neelago ka nako le matla a bona bakeng sa go etela baagišani ba bona le go ba botša ka merero ya Jehofa. Tše dingwe tša dikoketšego ke mafelelo a modiro wa baromiwa, bao ba tlogelago magae a bona gomme ba ye dinageng tšeo di lego kgole bakeng sa go thuša moo ka modiro wa go bolela ka Mmušo. Koketšego e ile ya feleletša ka go rulaganywa ga ditikologo tše mpsha, tšeo di ilego tša dira gore go nyakege go kgethwa ga balebeledi ba bafsa ba tikologo. Go oketša moo, Dibeibele tšeo di oketšegilego di ile tša nyakega bakeng sa go dirišwa boboleding le thutong ya motho ka noši. Go ile gwa nyakega dipuku tše di oketšegilego. E bile dinageng tše dintši, go ile gwa nyakega gore go godišwe meago ya makala goba e tšeelwe sebaka ka meago e megolo. Dinyakwa tše ka moka tše oketšegilego di ile tša ba gona ka thušo ya meneelo ya go ithapa e tšwago bathong ba Jehofa.

Go Nyakega ga Diholo tša Mmušo

Tlhokego e kgolo yeo e bonagetšego ka koketšego ya palo ya Dihlatse tša Jehofa ke ya Diholo tša Mmušo. Dinyakišišo tšeo di dirilwego mathomong a ngwaga wa 2000 di utolotše go nyakega ga Diholo tša Mmušo tše fetago 11 000 ditšhabeng tše hlabologago, moo ditšhelete di lekanyeditšwego. Ela hloko Angola. Go sa šetšwe nywaga ya ntwa ya selegae, naga yeo e ba le koketšego ya 10 lekgolong ka ngwaga palong ya bagoeledi ba Mmušo. Lega go le bjalo, bontši bja diphuthego tše 675 karolong ye e kgolo ya naga ya Afrika di kopanela ka ntle. Go na le Diholo tša Mmušo tše 22 feela nageng yeo, e bile go tše ke tše 12 feela tšeo di nago le mohuta o itšego wa tlhaka.

Kua Democratic Republic of Congo go na le boemo bjo bo swanago. Gaešita le ge go na le mo e nyakilego go ba diphuthego tše 300 motseng-mošate wa Kinshasa, go na le Diholo tša Mmušo tše lesome feela. Nageng ka bophara, naga ye e na le go nyakega ga Diholo tša Mmušo tše fetago 1 500. Ka baka la kgolo ya ka pela dinageng tša Bohlabela bja Yuropa, Russia le Ukraine di bega tlhokego e kopanego ya Diholo tša Mmušo tše makgolo. Kgolo e makatšago kua Latin America e bonagatšwa ke Brazil, mo go nago le Dihlatse tše fetago seripa sa milione le go nyakega mo gogolo ga Diholo tše oketšegilego tša Mmušo.

Bakeng sa go fihlelela dinyakwa dinageng tšeo, Dihlatse tša Jehofa di thomile lenaneo le tšwelago pele la go agwa ga Diholo tša Mmušo. Lenaneo le lefelelwa ka meneelo ya go nea kudu ya borwarre bja lefase ka bophara, bakeng sa gore gaešita le diphuthego tšeo di diilago di ka kgona go ba le lefelo le swanelegago la borapedi.

Go fo swana le nakong ya Isiraele ya bogologolo, go na le mo gontši mo go ka fihlelelwago ka gobane Bakriste ba botegago ‘ba loba Jehofa ka khumo ya bona.’ (Diema 3:9, 10) Sehlopha se Bušago sa Dihlatse tša Jehofa se rata go tšea sebaka se go bontšha tebogo e tseneletšego go yo mongwe le yo mongwe yo pelo ya gagwe e mo tutueleditšego go ba le karolo go neeng mo ga go ithapa. E bile re ka holofela gore moya wa Jehofa o tla tšwela pele o hlohleletša dipelo tša batho ba gagwe go thekga dinyakwa tša modiro wa Mmušo wo o oketšegago ka mehla gore o tšwele pele.

Ge koketšego ya lefase ka bophara e dutše e tšwela pele, anke ka mo go tšwelago pele re lebeleleng dibaka tša go bontšha go kgahlegela le go rata ga rena go neeleng ka matla a rena, nako ya rena le matlotlo a rena. E bile eka re ka hwetša lethabo la kgonthe leo le tlišwago ke moya o bjalo.

[Lepokisi go letlakala 29]

“E DIRIŠENG KA BOHLALE!”

“Ke na le nywaga e lesome. Ke le romela tšhelete ye e le gore le ka reka pampiri goba selo le ge e le sefe se sengwe bakeng sa go dira dipuku.”​—Cindy.

“Ke rata go le romela tšhelete ye gore le re direle dipuku tše dintši. Ke bolokile tšhelete ye ge ke be ke thuša tate. Ka gona e dirišeng ka bohlale!”​—Pam wa nywaga e šupa.

“Ke be ke nyamišitšwe ke ledimo. Ke holofela gore le bolokegile. [R14] ye ke tšhelete ka moka yeo ke nago le yona pankeng.”​—Allison wa nywaga e mene.

“Leina la-ka ke Rudy, gomme ke na le nywaga e 11. Ngwanešo Ralph o na le nywaga e tshela. Gomme kgaetšedi ya-ka Judith o na le nywaga e mebedi le seripa. Re be re dutše re boloka go tšwa moputsong wa rena lebaka la dikgwedi tše tharo bakeng sa go thuša banababo rena [nageng yeo e sentšwego ke dintwa]. Re kgonne go boloka ditolara tše 20 [R138] yeo re e romelago gona bjale.”

“Ke kwela banabešo [bao ba hlasetšwego ke ledimo] bohloko. Ke gotše ditolara tše 17 [R117] ka go šoma le tate. Ga ke romele tšhelete ye bakeng sa selo se itšego ka mo go kgethegilego, ka gona ke tla le dumelela gore le dire phetho.”​—Maclean wa nywaga e seswai.