Na Ditekanyetšo tša Boitshwaro tša Beibele ke tše Holago Kudu?

“SETŠHABA se nyaka thulaganyo ya ditekanyetšo tša motheo yeo e neago ditho tša sona tšhireletšego le tlhahlo.” Se se ile sa bolelwa ke mongwadi wa Mojeremane yo a nago le phihlelo e bile e le mogaši thelebišeneng. Ka kgonthe seo se a kwagala. E le gore lekoko la batho e be leo le tsepamego le le atlegilego, batho ba swanetše go ba le motheo o tiilego wa ditekanyetšo tšeo di amogelwago ka kakaretšo tšeo di hlaolago seo se lokilego goba seo se sa lokago, se sebotse goba se sebe. Potšišo ke gore: Ke ditekanyetšo dife tšeo di holago kudu, bobedi bakeng sa setšhaba le bakeng sa ditho tša sona?

Ge e ba ditekanyetšo tša boitshwaro tšeo di lego ka Beibeleng e le ditekanyetšo tšeo di amogelwago, gona di swanetše go thuša batho go phela maphelo a tsepamego le a lethabo. Seo ka tekanyo e kgolo se tla bopa lekoko la batho bao ba lemogago ditekanyetšo tšeo gore e be bao ba thabilego le bao ba tsepamego ka mo go oketšegilego. Na go bjalo? Anke re hlahlobeng seo Beibele e se bolelago ditabeng tše pedi tše bohlokwa: go botega lenyalong le go botega bophelong bja letšatši le letšatši.

Kgomarela Molekane wa Gago

Mmopi wa rena o bopile Adama gomme ka morago a dira Efa go ba modirišani wa gagwe. Go kopanywa ga bona e be e le lenyalo la pele historing  gomme e be e swanetše go ba tswalano ya ka mo go sa felego. Modimo o itše: “Monna ó tlo tloxêla tata’xwê le mma’xwê, a xomarêla mosadi wa xaxwe.” Nywaga e 4 000 ka morago, Jesu Kriste o ile a bušeletša molao wo wa lenyalo bakeng sa balatedi ba gagwe ka moka. Go oketša moo, o ile a ganetša dikopano tša botona le botshadi tša ka ntle ga lenyalo.​—Genesi 1:27, 28; 2:24; Mateo 5:27-30; 19:5.

Go ya ka Beibele, dinotlelo tše pedi tša bohlokwa bakeng sa lenyalo le le thabilego ke lerato le tlhompho ka lehlakoreng la balekane ka bobedi. Monna, yo e lego hlogo ya lapa, o swanetše go bontšha lerato leo le se nago boithati ka go tsoma dilo tšeo di kgahlišago mosadi wa gagwe kudu. O swanetše go dula le yena “ka go ya ka tsebo,” (NW) gomme ga se a swanela go mo “xalefêla.” Mosadi o swanetše go swara monna wa gagwe ka “tlhompho e tseneletšego.” (NW) Ge e ba balekane ba lenyalo ba latela melao ye ya motheo, mathata a mantši a lenyalo a ka phengwa goba a fenywa. Monna o tla nyaka go kgomarela mosadi wa gagwe gomme mosadi a kgomarele monna wa gagwe.​—1 Petro 3:1-7; Ba-Kolose 3:18, 19; Ba-Efeso 5:22-33.

Na molao wa Beibele wa go kgomarela molekane wa gago ka potego o tlaleletša lenyalong le le thabilego? Go ba gona, ela hloko mafelelo a nyakišišo yeo e dirilwego kua Jeremane. Batho ba ile ba botšišwa gore ke dilo dife tšeo di lego bohlokwa bakeng sa lenyalo le lebotse. Go dintlha ka moka yeo e bego e le ka godimo e be e le go botegelana. Na o ka se dumele gore batho bao ba lego lenyalong ke bao ba thabilego kudu ge ba tseba gore balekane ba bona ba a botega?

Go Thwe’ng ge e ba Mathata a Rotoga?

Lega go le bjalo, go thwe’ng ge e ba monna le mosadi ba na le go se dumelelane mo gošoro? Go thwe’ng ge e ba lerato la bona le tapa? Na ga go kaone kudu gore ka tlase ga maemo a bjalo lenyalo le fedišwe? Goba na molao wa Beibele wa go kgomarela molekane wa gago ka potego e sa dutše e le o nago le tlhaologanyo?

Bangwadi ba Beibele ba ile ba lemoga gore banyalani ka moka ba tla ba le mathata ka baka la go se phethagale ga batho. (1 Ba-Korinthe 7:28) Go sa dutše go le bjalo, banyalani bao ba latelago ditekanyetšo tša boitshwaro tša Beibele ba leka go lebalelana le go rarolla mathata a bona gotee. Ee, go na le maemo​—a bjalo ka bootswa goba go tlaišwa mmeleng—​ao go wona e lego gore Mokriste a ka nagana ka karogano goba tlhalo ka mo go swanetšego. (Mateo 5:32; 19:9) Eupša go akgofela go fediša lenyalo ka ntle le lebaka leo le kwagalago kudu goba bakeng sa go tšea molekane yo mongwe go utolla go se hlomphe ba bangwe ka tsela ya boithati. Ruri ga go tliše go tsepama goba lethabo bophelong bja motho. Anke re tšeeng mohlala.

Peter o ile a lemoga gore lenyalo la gagwe le be le lahlegetšwe ke lethabo leo le kilego la ba le lona. * Ka gona, o ile a tlogela mosadi wa gagwe gomme a dula le Monika, yo a bego a tlogetše monna wa gagwe. Dilo di sepetše bjang? Peter o ile a dumela lebakeng la dikgwedi tše mmalwa gore go dula le Monika go “be go se bonolo kudu go etša ge ke be ke nagana gore go tla ba bjalo.” Ke ka baka la’ng go se bjalo? Mafokodi a batho a be a fo bonagala go molekane wa gagwe yo mofsa go fo swana le ge go be go le bjalo go wa kgale. Go mpefatša maemo le go feta, phetho ya gagwe ya lebelo le ya boithati e ile ya mo tsenya mathateng a šoro a tša ditšhelete. Go feta moo, bana ba Monika ba be ba gateletšwe maikwelong ke phetogo e kgolo bophelong bja bona bja lapa.

Bjalo ka ge phihlelo ye e bontšha, ge lenyalo le lebeletšana le mathata a šoro, go tlogela lenyalo ke ka sewelo e lego tharollo. Ka lehlakoreng le lengwe, ge le lebeletšane le tlhaselo e šoro, go phela ka ditekanyetšo tša boitshwaro tša Lentšu la Modimo, Beibele, gantši go ka dira gore lenyalo le dule le leka-lekane gomme gwa le lebiša maemong a boiketlo. Go bile bjalo ka Thomas le Doris.

Thomas le Doris ba be ba šetše ba nyalane ka nywaga e fetago 30 ge Thomas a be a thoma go nwa kudu. Doris o ile a hlaselwa ke kgateletšego, gomme bobedi bja bona ba ile ba boledišana ka tlhalo. Doris o ile a tšhollela yo mongwe wa Dihlatse tša Jehofa sa mafahleng a gagwe. Hlatse e ile ya bontšha Doris seo Beibele e se bolelago mabapi le lenyalo, ya mo kgothaletša gore a se ke a kitimela go dira karogano eupša a thome pele ka go boledišana le monna wa gagwe gore ba leke go hwetša tharollo. Ke seo Doris a ilego a se dira. Ka dikgwedi tše sego kae, go be go  se sa hlwa go naganwa ka tlhalo. Thomas le Doris ba be ba rarolla mathata a bona ba le gotee. Go latela keletšo ya Beibele go ile gwa matlafatša lenyalo la bona gomme gwa ba nea nako ya go lokiša mathata a bona.

Go Botega Dilong ka Moka

Go kgomarela molekane wa lenyalo ka potego go nyaka matla a boitshwaro le lerato la molao wa motheo. Dika tše di swanago di a nyakega bakeng sa go dula o botega lefaseng leo le sa botegego. Beibele e na le mo gontši mo e go bolelago mabapi le potego. Moapostola Paulo o ile a ngwalela Bakriste ba lekgolong la pele la nywaga kua Judea gore: “Re kganyoga go itshwara ka go botega dilong ka moka.” (Ba-Hebere 13:18, NW) Seo se bolela’ng?

Motho yo a botegago o na le therešo gomme ga se moradia. Ke yo a dirišanago le ba bangwe ka tshwanelo​—yo a tsepamego, yo a hlomphegago, e sego yo a forago goba yo a fapošago. Go feta moo, motho yo a botegago ke motho yo ka go botega a sa hlalefetšego magagabo. Batho ba botegago ba tlaleletša moyeng wa go ka botwa le wa kholofelo, wo o lebišago boemong bja kgopolo bjo bo nago le tlhaologanyo le go godiša ditswalano tša batho tšeo di tiilego.

Na batho bao ba botegago ba thabile? Go ba gona, ba na le lebaka la go thaba. Go sa šetšwe kgobogo le go hlalefetša tšeo di atilego​—goba mohlomongwe ka baka la yona​—batho ba botegago ka kakaretšo ba hlompšha ke ba bangwe. Go ya ka nyakišišo yeo e ilego ya dirwa gare ga bafsa, potego ke seka sa boitshwaro seo se bego se phagame kudu ka 70 lekgolong ya bao ba ilego ba arabela. Go feta moo, go sa šetšwe nywaga ya rena, potego ke selo se segolo seo se nyakegago go bao re ba lebelelago e le bagwera.

Christine o be a rutilwe go utswa go tloga ka nako ya ge a be a e-na le nywaga e 12. Ge nywaga e dutše e feta o ile a ba lehodu leo le nago le bokgoni la go phopholetša dipotla. O hlalosa gore: “Go be go e-na le matšatši ao ke bego ke e-tla gae le tšhelete e fihlago go DM 5 000 [R17 000].” Eupša Christine o ile a golegwa makga a mmalwa, gomme o ile a phela a le kotsing ya ka mehla ya go romelwa kgolegong. Ge Dihlatse tša Jehofa di be di mo hlalosetša ka seo Beibele e se bolelago mabapi le potego, Christine o ile a tanywa ke ditekanyetšo tša boitshwaro tša Beibele. O ile a ithuta go kwa keletšo e rego: “E a utswitšexo a se kê a hlwa a utswa.”​—Ba-Efeso 4:28.

Ka nako ya ge Christine a be a kolobetšwa e le yo mongwe wa Dihlatse tša Jehofa, e be e se sa hlwa e le lehodu. O be a katanela go ba yo a botegago dilong ka moka, ka ge Dihlatse di gatelela kudu tabeng ya potego le dikeng tše dingwe tša Bokriste. Kuranta ya Lausitzer Rundschau e bega gore: “Mantšu a bjalo a tša boitshwaro a bjalo ka potego, teka-tekano le lerato la go rata moagišani ke ao a tšeelwago godimo tumelong ya Dihlatse.” Christine o ikwa bjang ka phetogo bophelong bja gagwe? “Ke thabile kudu ga bjale ka ge ke tlogetše go utswa. Ke ikwa gore ke setho seo se hlomphegago sa setšhaba.”

Setšhaba ka Moka se a Holega

Batho bao ba botegelago balekane ba bona le bao ba botegago ga se feela gore ke bao ba thabilego kudu bona ka noši eupša ke bao ba holago setšhaba ka kakaretšo. Bathwadi ba rata bašomi bao ba sa hlalefetšego. Ka moka ga rena re rata go ba le baagišani bao ba botegago, gomme re rata go reka mabenkeleng ao a sepedišwago ke bo-rakgwebo bao ba tsepamego. Na ga re hlomphe bo-radipolitiki, maphodisa le baahlodi bao ba sa nyakego kgobogo? Setšhaba se holega kudu ge ditho tša sona di itshwara ka tsela ya potego ka baka la molao wa motheo, e sego feela ge di thušega ka go dira bjalo.

Go feta moo, balekane ba lenyalo bao ba botegago ke motheo wa malapa a tiilego. Le gona batho ba bantši ba tla dumelelana le radipolitiki wa Yuropa yo a itšego: “Lapa [la setšo] le go fihlela le lehono e sa dutše e le botšhabelo bjo bohlokwa kudu bja tšhireletšego ya batho le leo le nago le morero.” Botee bja lapa leo le nago le khutšo ke moo batho ba bagolo le bana ba nago le sebaka se sekaone kudu sa go ikwa ba šireletšegile maikwelong. Bao ba botegago lenyalong ba thuša go aga setšhaba seo se tiilego.

Nagana kamoo yo mongwe le yo mongwe a bego a tla holega kudu ka gona ge e ba go be go se na balekane bao ba tlogelwago, dikgoro tša tsheko tša tlhalo goba melato ya go godišwa ga bana. Gape go thwe’ng ge e ba go be go se sa na mahodu a go phopholetša dipotla, mahodu a go utswa ka mabenkeleng, bao ba dirišago tšhelete ka mo go sa swanelago, bahlankedi bao ba gobogilego goba bo-rathutamahlale ba baradia? Na seo se kwagala bjalo ka toro feela? E sego go bao ba nago le kgahlego e tseneletšego ka Beibele le  seo e se bolelago mabapi le bokamoso bja rena. Lentšu la Modimo le holofetša gore Mmušo wa Jehofa wa Mesia kgaufsinyane o tla buša lekoko ka moka la batho mo lefaseng. Ka tlase ga Mmušo woo balata ka moka ba wona ba tla rutwa go phela ka go dumelelana le ditekanyetšo tša boitshwaro tša Beibele. Ka nako yeo, “baloki e [tlo] ba beng ba naxa, ba dula mo xo yôna ka mehla le ka mehla.”​—Psalme 37:29.

Ditekanyetšo tša Boitshwaro tša Beibele ke Ditekanyetšo tše Kaone-kaone tša Boitshwaro

Batho ba dimilione bao ba ilego ba hlahloba Mangwalo a Makgethwa ka kelohloko ba lemogile gore keletšo ya Beibele e theilwe bohlaleng bja go boifa Modimo, bjo bo phagametšego kgopolo ya motho kudu. Ba bjalo ba lebelela Beibele e le yeo e ka botwago le yeo e swanelago bophelo lefaseng la rena la mehleng yeno. Ba a tseba gore go tla ba hola kudu go ela hloko keletšo e lego ka Lentšung la Modimo.

Ka gona, batho ba bjalo ba ela hloko keletšo ya Beibele yeo e rego: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Diema 3:5, 6) Ka go dira bjalo, ba kaonefatša maphelo a bona kudu, e bile ba hola le bao ba ba dikologilego. Le gona ba godiša kholofelo e tiilego ‘bophelong bjo bo tlago go tla,’ nakong ya ge ditekanyetšo tša boitshwaro tša Beibele di tla be di latelwa ke batho bohle.​—1 Timotheo 4:8.

[Mengwalo ya ka tlase]

[Ntlhakgolo go letlakala 5]

Ge le lebeletšane le tlhaselo e šoro ya lenyalo, go phela ka ditekanyetšo tša Beibele gantši go ka dira gore lenyalo le dule le leka-lekane gomme gwa le lebiša maemong a boiketlo

[Ntlhakgolo go letlakala 6]

Go sa šetšwe kgobogo e atilego ​—goba mohlomongwe ka baka la yona—​batho ba botegago ka kakaretšo ba hlompšha ke ba bangwe