O Ela Katlego Bjang?

PUKUNTŠU e nngwe e hlalosa katlego e le “go hwetša lehumo, go amogelwa goba bophagamo.” Na yeo ke tlhaloso e feletšego? Na lehumo, go amogelwa goba bophagamo ke kelo e nnoši ya katlego? Pele ga ge o ka araba, ela hloko se: Jesu Kriste ga se a ka a ba le lehumo la dilo tše di bonagalago nakong ya bophelo bja gagwe ka moka. Ga se a ka a amogelwa ke batho ba bantši; goba ga se a ka a lebelelwa ka mo go phagamego ke bahlami ba ditshekamelo ba mehleng ya gagwe. Lega go le bjalo, Jesu e be e le monna yo a atlegilego. Ka baka la’ng?

Ge a be a le mo lefaseng, Jesu o be a ‘ruela Modimong.’ (Luka 12:21) Ka morago ga tsogo ya gagwe, Modimo o ile a mo putsa ka go mo rweša mphapahlogo wa “borêna le letaxô.” Jehofa o ile a godišetša Morwa wa gagwe “boemong bjo bo phagamego kudu gomme ka botho a mo nea leina leo le fetago maina ka moka.” (Ba-Hebere 2:9; Ba-Filipi 2:9, NW) Tsela ya Jesu ya bophelo e ile ya thabiša pelo ya Jehofa. (Diema 27:11) Bophelo bja gagwe bja lefaseng bo be bo atlegile ka gobane bo ile bja fihlelela morero wa bjona. Jesu o dirile thato ya Modimo gomme a tliša kgodišo leineng la Gagwe.  Ka morago ga moo, Modimo o ile a godiša Jesu ka lehumo, kamogelo le bophagamo bja mohuta woo go se nago serutegi, radipolitiki goba thwadi ya tša dipapadi e ka se tsogego e bile le bjona. Jesu ka kgonthe e be e le motho yo a atlegilego kudu yo a kilego a phela lefaseng.

Batswadi ba Bakriste ba lemoga gore ge e ba bana ba bona ba latela mehlaleng ya Kriste, ba huma Modimong ka kgopolo yeo Jesu a bego a le ka yona, ba tla buna ditšhegofatšo tše humilego gona bjale le go thabela meputso e sa lekanywego tshepedišong e tlago ya dilo. Ga go na tsela e kaone bakeng sa mofsa go latela mehlaleng ya Kriste go feta go dira modiro wo Jesu a o dirilego​—ka go tsenela bodiredi bja nako e tletšego ge e ba seo se kgonega.

Lega go le bjalo, ditšong tše dingwe, mokgwa o tlwaetšwego ke wa gore bafsa ba se ke ba tsenela bodiredi bja nako e tletšego. Ge lesogana le fetša sekolo, le ka letelwa gore le hwetše mošomo wa boiphedišo wa nako e tletšego, le nyale gomme le phele bophelo bjo bo tlwaelegilego. Ka dinako tše dingwe, bafsa ba tšwago ditlogong tše bjalo ba dika-dika ka phošo go se tsenele bodiredi bja nako e tletšego. (Diema 3:27) Ka baka la’ng? Ka baka la kgateletšo, ba dumelelana le ditekanyetšo tša setšo tše di apareditšego. Seo ke se se ilego sa direga go Robert. *

Ge Setšo le Letswalo di Thulana

Robert o godišitšwe e le yo mongwe wa Dihlatse tša Jehofa. Nywageng ya gagwe ya mahlalagading, boitshwaro bja gagwe le kgetho ya gagwe ya bagwera di be di sa kgahliše. Mmagwe o ile a thoma go tshwenyega ka yena. Ka gona mmagwe o ile a kgopela mmulamadibogo, e lego modiredi wa nako e tletšego wa Dihlatse tša Jehofa gore a mo kgothatše. Robert o hlalosa seo se ilego sa direga ka morago.

“Ke ile ka leboga e le ka kgonthe kgahlego yeo ngwanešo wa mmulamadibogo a ilego a e bontšha go nna. Mohlala wa gagwe o mobotse o ile wa ntira gore ke nyake go tšea bobulamadibogo bjalo ka modiro wa bophelo ka moka kapejana ka morago ga ge ke feditše sekolo. Yeo ke nako ya ge mma a thoma go tshwenyega gape​—eupša ka lebaka le le fapanego. O a bona, ka setšo sa rena go lokile gore mosetsana e be mmulamadibogo gatee-tee ge a feditše sekolo, eupša mošemane o swanetše gore e be yo a šireletšegilego ka tša ditšhelete pele gomme ka morago ga moo ke gona a ka naganago ka go bula madibogo.

“Ke ile ka hwetša mošomo gomme ka thoma kgwebo ya-ka ka noši. Kapejana ke be ke tsene ka mo go nweletšego kgwebong gomme ke be ke šetše ke fo go dira motlwae go ya dibokeng le boboleding. Letswalo la-ka le ile la thoma go ntshwenya​—ke be ke tseba gore nka kgona go hlankela Jehofa ka mo go tletšego kudu. Lega go le bjalo, e be e le ntwa ya kgonthe go tlogela seo ba bangwe ba se letetšego go nna, eupša ke thabile gore ke dirile bjalo. Ga bjale ke nyetše, gomme nna le mosadi wa-ka re šetše re bile bulamadibogo nywageng e mebedi e fetilego. Morago bjale, ke ile ka kgethelwa go ba mohlanka wa bodiredi ka phuthegong. Ke kgona go bolela ka potego gore ga bjale ke ikwa ke kgotsofetše e le ka kgonthe go hlankeleng Jehofa ka pelo ya-ka ka moka, ka bokgoni bja-ka bjo bo feletšego.”

Makasine wo o kgothaditše bafsa leboelela go ithutela mošomo goba go ba le ditshwanelego tše holago​—ge ba sa dutše ba le sekolong ge e ba go kgonega. Ka morero ofe? Bakeng sa go huma? Aowa. Lebaka le legolo ke gore ba tla kgona go itlhokomela ka mo go swanetšego e le batho ba ba godilego gomme ba hlankele Jehofa ka mo go tletšego ka mo ba ka kgonago ka gona, kudu-kudu bodireding bja nako e tletšego. Lega go le bjalo, gantši go diregile gore masogana le dikgarebe e be bao ba tanywago ke go phegelela modiro wa boiphedišo wa bophelo ka moka moo e lego gore bohlokwa bja bodiredi  bo a fokotšega. Ba bangwe ga ba nagane le gatee ka go tsenela tirelo ya nako e tletšego. Ke ka baka la’ng go se bjalo?

Ditlhaloso tša Robert di nea tshedimošo tabeng ye. Ka morago ga ge a ithutile mošomo wa gagwe, Robert o ile a thoma kgwebo. Go se go ye kae, o be a fatela morago bjalo ka kgogo gomme a sa bone moo a yago gona. Pakane ya gagwe e be e le go ba yo a šireletšegilego ka tša ditšhelete. Eupša na motho le ge e le ofe ka gare goba ka ntle ga phuthego ya Bokriste o kile a fihlelela pakane yeo ka mo go tletšego? Bakriste ba swanetše go katanela go ba bao ba ikarabelago ka tša ditšhelete, ba hlokomele boikarabelo bja bona bja tša ditšhelete ka mafolofolo; eupša gape ba swanetše go lemoga gore dinakong tše tšeo di sa kgonthišetšwego, ke ba mmalwa bao ba fihlelelago ntlha ya gore ba ka ipona ba šireletšegile e le ka kgonthe ka tša ditšhelete. Ke ka lebaka leo kholofetšo ya Jesu yeo e begilwego go Mateo 6:33 e lego e kgothatšago gakaakaa go Bakriste.

Robert o thabela gore o ile a dira phetho ya go latela dikganyogo tša pelo ya gagwe go e na le ditaelo tša setšo sa gagwe. Lehono, o thabela modiro wa bophelo ka moka tirelong ya nako e tletšego. Ee, bodiredi bja nako e tletšego ke modiro o hlomphegago. Robert o na le khutšo ka boyena ka gobane o hlankela Jehofa, bjalo ka ge a re, ‘ka bokgoni bja gagwe bjo bo feletšego.’

Diriša Ditalente tša Gago ka mo go Tletšego

Go na le batho ba bantši bao ba filwego gare ga Dihlatse tša Jehofa. Ba bangwe ba na le bokgoni bjo bo kgethegilego bja bohlale; ba bangwe ba filwe medirong ya diatla. Dimpho tše ka moka di tšwa go Jehofa, “bophelô, le môya, le tšohle ké Yêna a di faxo bohle.” (Ditiro 17:25) Ka ntle le bophelo, dimpho nkabe di se na mohola.

Ka gona, ke mo go swanetšego gore re diriše maphelo a rena ao a neetšwego tirelong ya Jehofa. Se ke seo lesogana le lengwe leo le nago le talente le ilego la phetha ka go se dira. Le phetše lekgolong la pele la nywaga C.E. E le setho sa lapa leo le tumilego, le ile la fetša nako ya lona ya bofsa motseng o tsebjago kudu wa Tareso ya Tsilitsia. Gaešita le ge e be e le mo-Juda ka tswalo, o ile a hwetša bohwa bja go ba modudi wa Roma go tatagwe. Seo se ile sa dira gore a be le ditshwanelo le ditokelo tše dintši. Ge a godile, o ile a ithuta Molao le yo mongwe wa “baprofesara” ba go tuma ba nako yeo​—Gamaliele. Go be go bonala gore pele ga nako e telele, ‘lehumo, go amogelwa le bophagamo’ e be e tla ba tša gagwe.​—Ditiro 21:39; 22:3, 27, 28.

Lesogana le e be e le mang? Leina la gagwe e be e le Saulo. Eupša Saulo o ile a ba Mokriste gomme mafelelong a ba moapostola Paulo. O ile a phaela dikganyogo tša gagwe tša mathomong ka thoko gomme a neela bophelo bja gagwe ka moka tirelong ya Jehofa e le Mokriste. Paulo o ile a tsebja, e sego e le ramolao yo a tumilego, eupša e le mmoledi yo a fišegago wa ditaba tše dibotse. Ka morago ga go fetša nywaga e ka bago e 30 e le moromiwa, Paulo o ile a ngwalela bagwera ba gagwe ba Filipi lengwalo. Go lona o ile a bušeletša tše dingwe tša dilo tšeo a ilego a di fihlelela pele ga ge a ka ba Mokriste, ke moka a re: “Ka ’baka la [Jesu Kriste] ka re: Tšeo ka moka ké thsenyêxêlô; ka re: Ké maudi fêla, xore ke tlê ke humê ka Kriste.” (Ba-Filipi 3:8) Aowa, Paulo ga se a ka a itsholela mokgwa wo a ilego a diriša bophelo bja gagwe ka wona!

Go thwe’ng ka tlwaetšo yeo Paulo a ilego a e amogela go Gamaliele? Na e ile ya ka ya ba e holago go yena? Ee! Ka makga a mmalwa o ile a tsenya letsogo go “lweleng le go hlomeng ditaba tše di lokilego ka molao.” Eupša modiro o mogolo wa Paulo e be e le go ba mmoledi wa ditaba tše dibotse​—selo seo go tsena ga gagwe sekolo pejana le ka mohla go bego go ka se ke gwa mo ruta sona.​—Ba-Filipi 1:7, bapiša le NW; Ditiro 26:24, 25.

Ka mo go swanago lehono, ba bangwe ba dutše ba kgona go diriša dimpho le ditalente tša bona gaešita le thuto ya bona bakeng sa go tšwetša dikgahlego tša Mmušo pele. Ka mohlala, Amy o na le degree ya tša kgwebo ya yunibesithi le e nngwe ya tša molao. O kile a ba le mošomo o lefago gabotse ofising ya tša molao, eupša lehono o hlankela e le modiredi wa moithapi yo a sa lefšego go e nngwe ya diofisi tša makala a Mokgatlo wa Watch Tower. Amy o hlalosa bophelo bja gagwe bja gona bjale ka gore: “Ke dumela gore ke dirile kgetho e kaone kudu e kgonegago bophelong. . . . Ga ke na kganyogo ya go ananya seo ke se dirago le yo mongwe wa dithaka tša-ka tša yunibesithi. Ke ikgantšha ka tsela ya-ka yeo ke e kgethilego. Ke na le sohle seo ke se hlokago le seo ke se nyakago​—bophelo bjo bo kgotsofatšago le bja lethabo le mošomo wo o kgotsofatšago.”

 Amy o ile a kgetha tsela yeo e mo tlišeditšego khutšo ya monagano, kgotsofalo le tšhegofatšo ya Jehofa. Ka kgonthe batswadi ba Bakriste ga ba nyakele bana ba bona seo se sa rego selo!

Katlego Bodireding bja Bokriste

Ee, ke gabohlokwa go ba le pono e nepagetšego ya katlego bodireding bja Bokriste ka bobjona. Ga go thata go ikwa re atlegile ge e ba re ile ra ba le nako e thabišago bodireding bja tšhemo, re sepedišitše dipuku tša Beibele goba re bile le dipoledišano tše di kgahlišago tša Beibele le beng ba magae. Eupša ge e ba re hwetša tsebe e kwago ka sewelo, re ka lekega ka go phetha ka gore re senya nako ya rena. Lega go le bjalo, gopola gore e nngwe ya ditlhaloso tša katlego ke ‘go hwetša kamogelo.’ Na re nyaka go amogelwa ke mang? Ka ntle le pelaelo ke Jehofa. Se re ka se hwetša go sa šetšwe gore batho ba theetša molaetša wa rena goba go se bjalo. Jesu o ile a ruta barutiwa ba gagwe thuto e matla tabeng ye.

O tla gopola gore Jesu o ile a roma baboledi ba 70 ba Mmušo “metseng le metsaneng ka moka ye a tl’o xo tla xo yôna.” (Luka 10:1) Ba be ba swanetše go bolela ditoropong le metsaneng ba sa sepele le Jesu. Ye e be e le phihlelo e mpsha go bona. Lega go le bjalo, Jesu o ile a ba nea ditaelo ka botlalo pele ga ge a ba roma. Ge ba be ba hweditše “mogwera wa khutšo,” (NW) ba be ba swanetše go mo nea bohlatse bjo bo tletšego mabapi le Mmušo. Lega go le bjalo, ge ba be ba sa amogelwe, ba be ba swanetše go sepela, ba se na taba. Jesu o ile a hlalosa gore bao ba bego ba gana go ba theetša ba be ba gana Jehofa ka noši e le ka kgonthe.​—Luka 10:4-7, 16.

Ge ba 70 ba be ba phethile kabelo ya bona ya boboledi, ba ile ba iša pego go Jesu “bà thabilê, ba re: Le meôya e mebe re be re e buša ka Leina la xaxo.” (Luka 10:17) E swanetše go ba e bile mo go thabišago gakaakang go banna bao ba sa phethagalago go leleka dibopiwa tša moya tše matla! Lega go le bjalo, Jesu o ile a lemoša barutiwa ba gagwe ba fišegago gore: “Le se kê la thabêla tšeo, xe meôya e bušwa ke lena. Thabang xobane maina a lena a ngwadilwe kwa maxodimong.” (Luka 10:20, mongwalo o sekamego ke wa rena.) Ba 70 ba be ba ka se be le matla a go leleka batemona ka mehla, goba ba be ba ka se be le mafelelo a kgahlišago bodireding ka mehla. Eupša ge ba be ba dula ba botega, ba be ba tla dula ba amogelwa ke Jehofa.

Na o Leboga Bahlanka ba Nako e Tletšego?

Lesogana ka nako e nngwe le ile la botša mogolo wa Mokriste gore: “Ge ke aloga sekolong se phagamego, ke tla leka go hwetša mošomo. Ge e ba ke sa hwetše mošomo, ke tla nagana ka go tsenela mohuta o itšego wa tirelo ya nako e tletšego.” Lega go le bjalo, seo ga se pono ya ba bantši bao ba tsenetšego bodiredi bja bobulamadibogo. E le gore ba bule madibogo, ba bangwe ba ile ba tlogela dibaka tša go phegelela mešomo e lefago gabotse. Ba bangwe ba ile ba tlogela dibaka tšeo di kgahlišago tša thuto. Ka go swana le moapostola Paulo, ba ile ba dira boikgafo, eupša go swana le Paulo, Robert le Amy ga ba itshole ka dikgetho tšeo ba di dirilego. Ba thabela tokelo ya bona ya go diriša dimpho tša bona go tumiša Jehofa, yo a swanelwago ke sohle seo ba ka kgonago go mo nea sona.

Ka baka la mabaka a fapa-fapanego, Dihlatse tše dintši tše di botegago tša Jehofa ga di boemong bja go bula madibogo. Mohlomongwe di na le boikarabelo bja Mangwalo bjoo di swanetšego go bo hlokomela. Go sa dutše go le bjalo, ge e ba di hlankela Modimo ‘ka pelo ka moka, moya le tlhaologanyo’ ka moka, gona di kgahliša Jehofa. (Mateo 22:37) Gaešita le ge ba sa kgone go bula madibogo bona ka noši, ba lemoga gore bao ba bulago madibogo ba kgethile mošomo o mobotse.

Moapostola Paulo o ngwadile gore: “Le se kê la ipapetša le ba mehla yeno.” (Ba-Roma 12:2) Ka go dumelelana le keletšo ya Paulo, ga se ra swanela go dumelela ditekanyetšo tša setšo goba tša lefase tša tshepedišo ye di bopa kgopolo ya rena. Go sa šetšwe gore o ka kgona go bula madibogo goba go se bjalo, dira tirelo ya Jehofa selo sa bohlokwa bophelong bja gago. O tla atlega ge feela o amogelwa ke Jehofa.

[Mengwalo ya ka tlase]

[Seswantšho go letlakala 19]

O se ke wa fatela morago bjalo ka kgogo gomme o sa bone moo o yago gona