Badiredi ba Modimo ke Bomang Lehono?

“Xo kxôna xa rena xo tšwa xo Modimo. Ké Yêna a re kxonišitšexo xo ba batseta [“badiredi,” PK] ba Kxwêranô e mphsa.”​—2 BA-KORINTHE 3:5, 6.

1, 2. Ke boikarabelo bofe bjo Bakriste ka moka ba lekgolong la pele la nywaga ba ilego ba tšea karolo go bjona, eupša dilo di ile tša fetoga bjang?

LEKGOLONG la pele la nywaga la Mehla ya rena e Tlwaetšwego, Bakriste ka moka ba ile ba tšea karolo boikarabelong bjo bohlokwa​—boikarabelo bja go bolela ditaba tše dibotse. Ka moka ga bona e be e le batlotšwa e bile e le badiredi ba kgwerano e mpsha. Ba bangwe ba be ba na le boikarabelo bjo bo oketšegilego, bjalo ka go ruta ka phuthegong. (1 Ba-Korinthe 12:27-29; Ba-Efeso 4:11) Batswadi ba be ba e-na le boikarabelo bjo boima ka lapeng. (Ba-Kolose 3:18-21) Eupša ka moka ga bona ba ile ba tšea karolo modirong wa motheo le o bohlokwa wa boboledi. Segerikeng sa mathomo sa Mangwalo a Bakriste, boikarabelo bjo e be e le di·a·ko·niʹa​—tirelo goba bodiredi.​—Ba-Kolose 4:17.

² Ge nako e dutše e e-ya, dilo di ile tša fetoga. Sehlopha seo se tsebjago e le baruti se ile sa tšwelela, seo se ilego sa ikgethela ka noši tokelo ya go bolela. (Ditiro 20:30) Baruti e be e le ba sego kae feela ba bao ba ipitšago Bakriste. Ba bantši ba ile ba tla ba tsebja e le badumedi feela. Le ge badumedi feela ba rutilwe gore ba na le boikarabelo bjo itšego, go akaretša go ntšha meneelo bakeng sa go hlokomela baruti, ba bantši ba fetogile se se fetago go ba batheetši bao ba sego mafolofolo tabeng ya go bolela.

3, 4. (a) Batho ba fetoga bjang badiredi Bojakaneng? (b) Ke mang yo a lebelelwago e le modiredi Bojakaneng, gomme ke ka baka la’ng dilo di fapane magareng ga Dihlatse tša Jehofa?

³ Baruti ba ipolela gore ke badiredi (go tšwa go modiredi, phetolelo ya Selatine ya di·aʹko·nos, “mohlanka”). * Bakeng sa se, ba aloga dikholetšheng goba diseminareng gomme ba a kgethwa. The International Standard Bible Encyclopedia e re: “‘Go kgetha’ le ‘go kgethwa’ ka tlwaelo go šupa maemong a kgethegilego ao a newago baruti goba baperisita ka ditirelo tša bodumedi tšeo di dumeletšwego semmušo, le go gatelela mo go kgokaganago le matla a taolo go tsebatšeng Lentšu goba go laola disakaramente, goba go di dira ka bobedi.” Ke mang yo a kgethago badiredi? The New Encyclopædia Britannica e re: “Dikerekeng tšeo di bolokilego boemo bja histori bja bapišopo, modiredi yo a kgethago ka mehla ke mopišopo. Dikerekeng tša Presbyterian, go kgethwa go laelwa ke badiredi ba sehlopha sa bagolo ba kereke.”

⁴ Ka gona, dikerekeng tša Bojakane, tokelo ya go ba modiredi e thibetšwe kudu. Lega go le bjalo, se ga se bjalo magareng ga Dihlatse tša Jehofa. Ka baka la’ng? Ka gobane go be go se bjalo phuthegong ya Bokriste ya lekgolong la pele la nywaga.

Ke Bomang Bao e Lego Badiredi ba Modimo e le ka Kgonthe?

5. Go ya ka Beibele, bao ba hlankelago e le badiredi ba akaretša bomang?

⁵ Go ya ka Beibele, barapedi ka moka ba Jehofa​—ba legodimong le lefaseng​—ke badiredi. Barongwa ba ile ba direla Jesu. (Mateo 4:11; 26:53; Luka 22:43) Barongwa gape ba “dirêla bao ba xo tlo ja bohwa bya phološô.” (Ba-Hebere 1:14; Mateo 18:10) Jesu e be e le modiredi. O itše: “Morwa-motho e a sa kaxo a tlêla xo dirêlwa, à tlile xo dirêla.” (Mateo 20:28; Ba-Roma 15:8) Ka baka leo, ka ge balatedi ba Jesu ba be ba swanetše gore ba “tšeê ka mohlala wa xaxwe,” ga go makatše gore le bona ba swanetše go ba badiredi.​—1 Petro 2:21.

6. Jesu o bontšhitše bjang gore barutiwa ba gagwe e swanetše go ba badiredi?

⁶ Lebakanyana pele ga go rotogela ga gagwe legodimong, Jesu o itše go barutiwa ba gagwe: “Yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.” (Mateo 28:19, 20) Barutiwa ba Jesu e be e swanetše go ba badiri ba barutiwa​—badiredi. Barutiwa ba bafsa bao ba ba dirilego ba be ba tla ithuta go boloka dilo ka moka tšeo Jesu a di laetšego, go akaretša taelo ya go ya go dira barutiwa. Monna goba mosadi, motho yo mogolo goba ngwana, morutiwa wa therešo wa Jesu Kriste e be e tla ba modiredi.​—Joele 2:28, 29.

7, 8. (a) Ke mangwalo afe ao a bontšhago gore Bakriste ka moka ba therešo ke badiredi? (b) Ke dipotšišo dife tšeo di rotošwago mabapi le go kgethwa?

⁷ Ka go dumelelana le se, ka letšatši la Pentekoste ya 33 C.E., barutiwa ba Jesu ka moka bao ba bego ba le gona, banna le basadi, ba ile ba kopanela go boleleng “matete a Modimo.” (Ditiro 2:1-11) Go feta moo, moapostola Paulo o ngwadile gore: “Motho ó dumêla ka pelo a tseb’o lokafala; ó ipolêla ka molomo a tseb’o phološwa.” (Ba-Roma 10:10) Paulo o boletše mantšu ao, e sego go sehlopha se se lekanyeditšwego sa baruti, eupša ‘go bohle bao ba bego ba le Roma e le baratiwa ba Modimo.’ (Ba-Roma 1:1, 7, bapiša le NW.) Ka mo go swanago, ‘bakgethwa ka moka ba motse wa Efeso le ba ba dumetšego Kriste Jesu’ ba be ba swanetše gore “dinaong [tša bona ba] dulê [ba] itlemeletše xo phafoxela Ebangedi ya khutšô.” (Ba-Efeso 1:1; 6:15) Le gona ka moka bao ba kwelego lengwalo leo le bego le lebišitšwe go ba-Hebere ba be ba swanetše go ‘kgomarela boipolelo bja phatlalatša  bja kholofelo ya bona ba sa šišinyege.’​—Ba-Hebere 10:23.

⁸ Ka gona, ke neng moo motho a bago modiredi? Ka mantšu a mangwe, o kgethwa neng? Le gona o kgethwa ke mang?

Go Kgethwa Bjalo ka Modiredi​—Neng?

9. Jesu o kgethilwe neng, gona ke mang?

⁹ Ge e le mabapi le gore motho o kgethwa neng le gore o kgethwa ke mang, ela hloko mohlala wa Jesu Kriste. O be a se na lengwalo la go kgethwa goba degree e tšwago seminareng se itšego go bontšha gore e be e le modiredi, e bile o be a se a kgethwa ke motho le ge e le ofe. Ka gona, ke ka baka la’ng re ka bolela gore e be e le modiredi? Ka gobane mantšu a buduletšwego a Jesaya a ile a phethagala go yena: “Môya wa Morêna o na le nna, ka xobane ó mpeetše xo bexêla babôtlana ’taba tše di botse.” (Luka 4:17-19; Jesaya 61:1) Mantšu ao ka ntle le pelaelo a bontšha gore Jesu o be a laetšwe go bolela ditaba tše dibotse. Ke mang? Ka ge moya wa Jehofa o mo tloleditše modiro, Jesu ka mo go lego molaleng o kgethilwe ke Jehofa Modimo. Se se diragetše neng? Ge e le gabotse moya wa Jehofa o tlile godimo ga Jesu ge a be a kolobetšwa. (Luka 3:21, 22) Ka gona, o ile a kgethwa ge a be a kolobetšwa.

10. Ke ka mang modiredi wa Mokriste a bago ‘yo a swanelegago ka mo go lekanego’?

¹⁰ Go thwe’ng ka balatedi ba Jesu ba lekgolong la pele la nywaga? Maemo a bona e le badiredi le ona a be a e-tšwa go Jehofa. Paulo o itše: “Xo kxôna xa rena xo tšwa xo Modimo. Ké Yêna a re kxonišitšexo xo ba batseta [“badiredi,” PK] ba Kxwêranô e mphsa.” (2 Ba-Korinthe 3:5, 6) Jehofa o dira bjang barapedi ba gagwe gore ba swanelegele go ba badiredi? Ela hloko mohlala wa Timotheo, yo Paulo a mmiditšego “mohlanka [“modiredi,” PK] wa Modimo, modiriši wa rena Ebangeding ya Kriste.”​—1 Ba-Thesalonika 3:2.

11, 12. Timotheo o ile a dira bjang tšwelopele go fihla e e-ba modiredi?

¹¹ Mantšu a latelago ao a lebišitšwego go Timotheo a re thuša go kwešiša kamoo a bilego modiredi ka gona: “Xe e le wêna O tiêlê mo xo tše O di rutilwexo wa di dumêla, Ò tseba ba O ithutilexo xo bôná. Xobane Mangwalô a makxêthwa O a tseba xo tloxa byaneng. Ké ôna a kxônaxo xo Xo hlalefišetša pholoxô ka tumêlô, Ò dumetše Jesu Kriste.” (2 Timotheo 3:14, 15) Motheo wa tumelo ya Timotheo, yeo e bego e tla mo tutueletša go dira boipolelo bja phatlalatša, e be e le tsebo ya Mangwalo. Na go bala ga motho ka noši ke selo se nnoši seo se bego se nyakega bakeng sa se? Aowa. Timotheo o be a nyaka thušo bakeng sa go hwetša tsebo e nepagetšego le kwešišo ya moya ya seo a se balago. (Ba-Kolose 1:9) Ka go rialo Timotheo o ile a “hlohleletšwa go  dumela.” (NW) Ka ge a tsebile Mangwalo “xo tloxa byaneng,” bahlahli ba gagwe ba mathomo e swanetše go ba e bile mmagwe le makgolo’agwe, yo go bonalago gore tatagwe e be e se modumedi.​—2 Timotheo 1:5.

¹² Lega go le bjalo, go na le mo gontši mo go bego go akaretšwa go beng ga Timotheo modiredi. Ka mohlala, tumelo ya gagwe e be e matlafaditšwe ke go kopana le Bakriste diphuthegong tša kgaufsi. Re tseba bjang? Ka gobane ge Paulo a be a kopana le Timotheo la mathomo, lesogana le be le “hlatsêlwa ke bana babô ba tumêlo ba Lisitara le ba Ikonio.” (Ditiro 16:2) Go oketša moo, mehleng yeo banababo bona ba itšego ba be ba ngwalela diphuthego mangwalo e le gore ba di matlafatše. E bile balebeledi ba be ba ba etela bakeng sa go ba aga. Ditokišetšo tše bjalo di thušitše Bakriste ba swanago le Timotheo go tšwela pele moyeng.​—Ditiro 15:22-32; 1 Petro 1:1.

13. Timotheo o ile a kgethwa neng go ba modiredi, gona ke ka baka la’ng o ka bolela gore tšwelopele ya gagwe ya moya ga se ya felela moo?

¹³ Ka baka la taelo ya Jesu yeo e begilwego go Mateo 28:19, 20, re ka kgodišega gore ka nako e itšego tumelo ya Timotheo e ile ya mo tutueletša go ekiša Jesu gomme a kolobetšwa. (Mateo 3:15-17; Ba-Hebere 10:5-9) Se e be e le seka sa go ineela go Modimo ka moya ka moka ga Timotheo. Timotheo o ile a ba modiredi ge a be a kolobetšwa. Go tloga ka nako yeo go ya pele, bophelo bja gagwe, matla a gagwe le sohle seo a bego a e-na le sona e be e le tša Modimo. Se e be e le karolo e bohlokwa ya borapedi bja gagwe, “tirelo e kgethwa.” Lega go le bjalo, Timotheo ga se a ka a fo dula gomme a hlaba kolobe. O ile a tšwela pele a gola moyeng, a ba modiredi wa Mokriste yo a budulego. Se se diragetše ka baka la tswalano ya kgaufsi ya Timotheo le Bakriste ba budulego ba bjalo ka Paulo, thuto ya gagwe ya motho ka noši le modiro wa gagwe wa phišego wa boboledi.​—1 Timotheo 4:14; 2 Timotheo 2:2; Ba-Hebere 6:1.

14. Lehono, motho yo a “sekametšego ka mo go swanetšego bophelong bjo bo sa felego” o dira tšwelopele bjang mabapi le go ba modiredi?

¹⁴ Lehono, go kgethelwa bodiredi bja Bokriste ke mo go swanago. Yo a “sekametšego ka mo go swanetšego bophelong bjo bo sa felego” o thušwa go ithuta ka Modimo le merero ya gagwe ka thuto ya Beibele. (Ditiro 13:48, NW) Motho o ithuta go diriša melao ya motheo ya Beibele bophelong bja gagwe le go rapela ka tsela e nago le morero go Modimo. (Psalme 1:1-3; Diema 2:1-9; 1 Ba-Thesalonika 5:17, 18) O ikgweranya le badumedi ba bangwe gomme a ikhola ka ditokišetšo le dithulaganyo tšeo di dirwago ke “molaki e a bôtêxaxo yo bohlale.” (Mateo 24:45-47; Diema 13:20; Ba-Hebere 10:23-25) Ka gona o dira tšwelopele ka mosepelo o rulagantšwego wa thuto.

15. Go direga’ng ge motho a kolobetšwa? (Bona gape le mongwalo wa tlase.)

¹⁵ Mafelelong, morutwana wa Beibele ka ge a hlagoletše lerato la go rata Jehofa Modimo le tumelo e tiilego sehlabelong sa topollo, o kganyoga go ineela ka mo go feletšego go Tatagwe wa legodimong. (Johane 14:1) O dira boineelo bjoo ka thapelo ya motho ka noši ke moka a kolobetšwa e le leswao la phatlalatša la tiro yeo ya ka sephiring. Kolobetšo ya gagwe ke tirelo ya gagwe ya go kgethwa ka gobane ke ka nako yeo a lemogwago e le mohlanka yo a ineetšego ka mo go feletšego, di·aʹko·nos, wa Modimo. O swanetše go dula a arogile lefaseng.  (Johane 17:16; Jakobo 4:4) O ineetše boyena ka moka e le “sehlabelo se se phelago, se sekgethwa, se se amogelegago go Modimo” ka ntle le go ipabalela goba go ipeela mellwane. (Ba-Roma 12:1, bapiša le NW.) * Ke modiredi wa Modimo, yo a ekišago Kriste.

Bodiredi bja Bokriste ke Eng?

16. Boikarabelo bjo bongwe bja Timotheo e le modiredi e be e le bofe?

¹⁶ Bodiredi bja Timotheo bo be bo akaretša eng? O be a e-na le mediro e kgethegilego e le mogwera wa mosepedi wa Paulo. Nakong ya ge e e-ba mogolo, Timotheo o ile a šoma ka thata bakeng sa go ruta le go matlafatša Bakriste-gotee le yena. Eupša karolo e kgolo ya bodiredi bja gagwe, go swana le kamoo go bego go le ka gona go Jesu le Paulo, e be e le go bolela ditaba tše dibotse le go dira barutiwa. (Mateo 4:23; 1 Ba-Korinthe 3:5) Paulo o boditše Timotheo gore: “Xe e le wene, phafoxêla tšohle; kxôtlêlêla mabothata, O dirê modirô wa sexoeledi, O bê mohlanka ka botlalô.” (Mongwalo o sekamego ke wa rena.)​—2 Timotheo 4:5.

17, 18. (a) Bakriste ba ba le karolo bodireding bofe? (b) Modiro wa boboledi ke wa bohlokwa gakaaka’ng go modiredi wa Mokriste?

¹⁷ Ke mo go swanago le ka badiredi ba Bakriste lehono. Ba swarega bodireding bja phatlalatša, modirong wa boebangedi, ba lebiša ba bangwe phološong motheong wa sehlabelo sa Jesu le go ruta baikokobetši go bitša leina la Jehofa. (Ditiro 2:21; 4:10-12; Ba-Roma 10:13) Ba hlatsela go tšwa Beibeleng gore Mmušo ke kholofelo e nnoši bakeng sa batho bao ba tlaišegago le go bontšha gore gaešita le gona bjale dilo di ba kaone ge e ba re phela ka melao ya motheo ya Modimo. (Psalme 15:1-5; Mareka 13:10) Eupša modiredi wa Mokriste ga a bolele ka ebangedi ya tša leago. Go e na le moo, o ruta gore ‘boineelo go Modimo bo na le kholofetšo ya bophelo bjono le bjo bo tlago go tla.’​—1 Timotheo 4:8, bapiša le NW.

¹⁸ Ke therešo gore badiredi ba bantši ba na le ditsela tše oketšegilego tša go hlankela tšeo di ka fapanago go tloga go Mokriste yo mongwe go ya go yo mongwe. Ba bantši ba na le boikarabelo bja lapa. (Ba-Efeso 5:21–6:4) Bagolo le bahlanka ba bodiredi ba na le boikarabelo ka phuthegong. (1 Timotheo 3:1, 12, 13; Tito 1:5; Ba-Hebere 13:7) Bakriste ba bantši ba thuša go aga Diholo tša Mmušo. Ba bangwe ba na le tokelo e kgahlišago ya go šoma e le baithapi go le lengwe la magae a Bethele a Mokgatlo wa Watch Tower. Lega go le bjalo, badiredi ka moka ba Bakriste ba tšea karolo boboleding bja ditaba tše dibotse. Ga go na yo a phaelwago ka thoko. Ke go ba le karolo modirong wo mo go hlaolago motho phatlalatša e le modiredi wa kgonthe wa Mokriste.

Boemo bja Kgopolo bja Modiredi wa Mokriste

19, 20. Badiredi ba Bakriste ba swanetše go hlagolela boemo bofe bja kgopolo?

¹⁹ Bontši bja badiredi ba Bojakane ba letela go newa tlhompho e kgethegilego, gomme ba bitšwa ka maina a bjalo ka “moruti” le “tate.” Lega go le bjalo, modiredi wa Mokriste o a tseba gore ke Jehofa a nnoši yo a swanelwago ke tlhompho ya borapedi. (1 Timotheo 2:9, 10) Ga go na modiredi wa Mokriste yo a nyakago tlhompho e bjalo e phagamego goba a fišegela go hwetša maina a kgethegilego. (Mateo 23:8-12) O a tseba gore tlhaloso ya motheo ya di·a·ko·niʹa ke “tirelo.” Lediri leo le tswalanago le yona ka dinako tše dingwe le dirišwa ka Beibeleng mabapi le ditirelo tša motho ka noši, bjalo ka go tliša dijo ditafoleng. (Luka 4:39; 17:8; Johane 2:5) Gaešita le ge go dirišwa ga lona go modiredi wa Mokriste e le mo go phagamego kudu, di·aʹko·nos e sa dutše e le mohlanka.

²⁰ Ka gona ga go na lebaka leo le dirago gore modiredi wa Mokriste a ikgodiše. Badiredi ba kgonthe ba Bakriste​—gaešita le bao ba nago le boikarabelo bjo bo kgethegilego ka phuthegong​—ke makgoba a ikokobeditšego. Jesu o itše: “E a rataxo xo ba e moxolo mo xo lena, a a bê modiredi wa lena. Le e a rataxo xo ba wa pele mo xo lena, a a bê mohlanka wa lena.” (Mateo 20:26, 27) Ge a bontšha barutiwa ba gagwe boemo bjo bo nepagetšego bja kgopolo bjo ba bego ba swanetše go bo hlagolela, Jesu o ile a ba hlapiša maoto, a dira modiro wa mohlanka yo a nyatšegago. (Johane 13:1-15) A tirelo ya boikokobetšo gakaakang! Ka gona, badiredi ba Bakriste ba hlankela Jehofa Modimo le Jesu Kriste ka boikokobetšo. (2 Ba-Korinthe 6:4; 11:23) Ba bontšha boipoetšo ka go hlankelana. E bile ge ba  bolela ditaba tše dibotse, ba hlankela baagišani ba bona bao ba sa dumelego ka ntle le boithati.​—Ba-Roma 1:14, 15; Ba-Efeso 3:1-7.

Kgotlelela Bodireding

21. Paulo o ile a putswa bjang bakeng sa go kgotlelela bodireding?

²¹ Go Paulo, go ba modiredi go nyaka kgotlelelo. O boditše ba-Kolose gore o tlaišegile kudu e le gore a bolele ditaba tše dibotse go bona. (Ba-Kolose 1:24, 25) Lega go le bjalo, ka gobane o ile a kgotlelela, ba bantši ba ile ba amogela ditaba tše dibotse gomme ba ba badiredi. Ba be ba tswetšwe bjalo ka barwa ba Modimo le banababo Jesu Kriste, ka tebelelo ya go ba diphedi tša moya go bapa le yena legodimong. A moputso o kgahlišago gakaakang bakeng sa kgotlelelo!

22, 23. (a) Ke ka baka la’ng badiredi ba Bakriste lehono ba nyaka kgotlelelo? (b) Ke dienywa dife tše kgahlišago tšeo di tlišwago ke kgotlelelo ya Bokriste?

²² Kgotlelelo e a nyakega lehono bakeng sa bao e lego badiredi ba Modimo e le ka kgonthe. Ba bantši ba tlaišwa letšatši le letšatši ke bolwetši goba mahlaba a botšofadi. Batswadi ba šoma ka thata​—bontši bja bona ba se na balekane​—bakeng sa go godiša bana ba bona. Ka sebete, bana sekolong ba gana ditutuetšo tše fošagetšego tšeo di ba dikologilego. Bakriste ba bantši ba lebana le mathata a šoro a tša boiphedišo. E bile ba bantši ba a tlaišwa goba ba lebeletšana le mathata ka baka la “dinako [tša lehono] tše hlobaetšago tšeo go lego thata go lebeletšana le tšona”! (2 Timotheo 3:1, NW) Ee, badiredi ba Jehofa lehono ba nyakilego go ba dimilione tše tshela ba ka bolela gotee le moapostola Paulo gore: “Dilong ka moka re re re bônalê rè le bahlanka [“badiredi,” NW] ba Modimo: ka kxôtlêlêlô e kxolo.” (2 Ba-Korinthe 6:4) Badiredi ba Bakriste ga ba fele matla. Ba swanetše go retwa e le ka kgonthe bakeng sa kgotlelelo ya bona.

²³ Go feta moo, bjalo ka ge go bile bjalo tabeng ya Paulo, kgotlelelo e tliša dienywa tše kgahlišago. Ka go kgotlelela, re boloka tswalano ya rena ya kgaufsi le Jehofa gomme ra thabiša pelo ya gagwe. (Diema 27:11) Re matlafatša tumelo ya rena ka noši le go dira barutiwa, re tlaleletša go borwarre bja Bokriste. (1 Timotheo 4:16) Jehofa o thekgile badiredi ba gagwe le go šegofatša bodiredi bja bona mehleng ye ya bofelo. Ka baka leo, ba mafelelo ba ba 144 000 ba kgobokeditšwe, gomme ba dimilione tše oketšegilego ba na le kholofelo ya kgonthe ya go thabela bophelo bjo bo sa felego lefaseng la paradeise. (Luka 23:43; Kutollo 14:1) Ruri, bodiredi bja Bokriste ke pontšho ya kgaugelo ya Jehofa. (2 Ba-Korinthe 4:1) Eka ka moka ga rena re ka bo tšeela godimo le go leboga gore dienywa tša bjona di tla ba gona ka mo go sa felego.​—1 Johane 2:17.

[Mengwalo ya ka tlase]

Na o ka Hlalosa?

• Ke boikarabelo bofe bjo Bakriste ka moka ba lekgolong la pele la nywaga ba ilego ba tšea karolo go bjona?

• Modiredi wa Mokriste o kgethwa neng, gona ke mang?

• Ke boemo bofe bja kgopolo bjo modiredi wa Mokriste a swanetšego go bo hlagolela?

• Ke ka baka la’ng modiredi wa Mokriste a swanetše go kgotlelela ge a lebeletšane le mathata?

[Dipotšišo tša Thuto]

 [Diswantšho go letlakala 16, 17]

Timotheo o rutilwe Lentšu la Modimo go tloga bjaneng. E bile modiredi yo a kgethilwego ge a kolobetšwa

[Seswantšho go letlakala 18]

Kolobetšo e bontšha boineelo go Modimo e bile e swaya go kgethwa ga motho e le modiredi

[Seswantšho go letlakala 20]

Badiredi ba Bakriste ba ikemišeditše go hlankela