Bakriste ba Hwetša Lethabo ka go Hlankela

“Lešexo la monei le phala la monewa.”​—DITIRO 20:35.

1. Ke boemo bofe bja kgopolo bjo bo fošagetšego bjo bo atilego lehono, gomme ke ka baka la’ng bo le kotsi?

NYWAGA-SOMENG e fetilego ya bo-1900, polelwana “ke nna ke nna” e be e kwewa gantši. Ge e le gabotse “ke nna ke nna” e bolela gore “nna pele” gomme e bolela boemo bja kgopolo bjo bo kopantšego boithati le megabaru ka go se be le taba le ba bangwe. Re ka kgonthišega gore ngwageng wa 2000, moya wa nna pele ga se wa hwa le gatee. Ke gakae o e-kwa dipotšišo tše di rego, “E ntshwaretše eng?” goba, “Ke tla hwetša eng go yona?” Boemo bja kgopolo bjo bo bjalo bja boithati ga bo lebiše lethabong. Ke seo se fapanego kudu le molao wa motheo woo Jesu a itšego: “Lešexo la monei le phala la monewa.”​—Ditiro 20:35.

2. Go bonwa bjang gore go nea go tliša lethabo?

² Na ke therešo gore go nea go tliša lethabo le legolo go feta go amogela? Ee. Nagana ka Jehofa Modimo. Go yena go na le “mothôpô wa bophelô.” (Psalme 36:9) O re nea dilo ka moka tšeo re di nyakago bakeng sa go re dira gore re thabe le go ba bao ba nago le mohola. Ka kgonthe, ke Mothopo wa “’neô tšohle tše botse, le ’mphô tšôhle di tletšexo.” (Jakobo 1:17) Jehofa, “Modimo yo a thabilego,” o nea ka mehla. (1 Timotheo 1:11, NW) O rata dibopša tša gagwe tša batho, bao a ba neago kudu. (Johane 3:16) Nagana gape le ka lapa la batho. Ge e ba o le motswadi, o tseba gore go nyakega boikgafo bjo bokaakang, le go nea mo gokaakang bakeng sa go godiša ngwana. Le gona ka nywaga e mentši ngwana ga a lemoge boikgafo bjo o bo dirago. O bo tšeela fase ka moka. Lega go le bjalo, go a go thabiša go bona ngwana wa gago a gola ka katlego ka baka la go nea ga gago mo go se nago boithati. Ka baka la’ng? Ka gobane o a mo rata.

3. Ke ka baka la’ng e le mo go thabišago go hlankela Jehofa le badumedi-gotee le rena?

³ Ka mokgwa o swanago, borapedi bja therešo bo hlaolwa ka go nea mo go theilwego leratong. Ka ge re rata Jehofa gomme re rata badumedi-gotee le rena, ke mo go thabišago go ba hlankela, go ikgafela bona. (Mateo 22:37-39) Le ge e le mang yo a rapelago ka maikemišetšo a boithati o feleletša ka lethabo le lenyenyane kudu. Eupša bao ba hlankelago ka go hloka boithati, ba tshwenyegile kudu ka seo ba ka se neago go e na le seo ba holofelago go se amogela, ba hwetša lethabo e le ka kgonthe. Therešo ye e lemogwa ka go ela hloko kamoo mantšu a itšego a Beibele ao a tswalanago le borapedi bja rena a dirišwago ka gona ka Mangwalong. Re tla ahla-ahla a mararo a mantšu a sehlogong se le se se latelago.

Tirelo ya Jesu ya Phatlalatša

4. “Tirelo ya phatlalatša” e ka sebopego sefe Bojakaneng?

⁴ Segerikeng sa mathomo, lentšu le tee la bohlokwa leo le tswalanago le borapedi ke lei·tour·giʹa, leo le fetoletšwego e le “tirelo ya phatlalatša” ka go  New World Translation. Bojakaneng lei·tour·giʹa e tšweleditše polelwana “tirelo ya borapedi bja phatlalatša.” * Lega go le bjalo, ditirelo tša borapedi bja phatlalatša tše di rulagantšwego tša Bojakane ga se tirelo ya phatlalatša yeo e holago e le ka kgonthe.

5, 6. (a) Ke tirelo efe ya phatlalatša yeo e bego e dirwa Isiraele, gona ka mehola efe? (b) Ke tirelo efe ya phatlalatša e kgolo kudu yeo e tšeelago legato yeo e bego e dirwa Isiraele, gomme ka baka la’ng?

⁵ Moapostola Paulo o ile a diriša lentšu la Segerika leo le tswalanago le lei·tour·giʹa ka go lebiša go baperisita ba Isiraele. O itše: “Baperisita bohle ba be ba beilwe xore ba dirêlê Modimo [“tirelo ya phatlalatša,” NW] [e lego sebopego sa lei·tour·giʹa] ka mehla, ba tliša tšôna didimo tšeo xantši.” (Ba-Hebere 10:11) Baperisita ba ba-Lefi ba ile ba dira tirelo ya phatlalatša e bohlokwa kudu Isiraele. Ba ile ba ruta Molao wa Modimo gomme ba neela dihlabelo tšeo di bego di bipa dibe tša batho. (2 Koronika 15:3; Maleaki 2:7) Ge baperisita le batho ba be ba latela Molao wa Jehofa, setšhaba se ile sa ba le mabaka a go thaba.​—Doiteronomio 16:15.

⁶ Go dira tirelo ya phatlalatša ka tlase ga Molao e be e le tokelo ya kgonthe go baperisita ba ba-Isiraele, eupša tirelo ya bona e ile ya kgaotša go ba le mohola le ge e le ofe ge Isiraele e be e ganwa ka baka la go se botege. (Mateo 21:43) Jehofa o ile a rulaganyetša selo seo e lego se segolo kudu​—tirelo ya phatlalatša yeo e dirilwego ke Jesu, Moperisita yo Mogolo kudu. Re bala ka yena gore: “Xe e le Jesu ó na le boperisita byo bo sa šielwexo e mongwê, ka xobane à dula à le xôna neng le neng. Ké tšôna di mo kxonišaxo xo phološa-moka, xo phološa bao ba batamêlaxo ka Yêna, ka xe e le wa xo phela neng le neng le xo ba rapêlêla.”​—Ba-Hebere 7:24, 25.

7. Ke ka baka la’ng tirelo ya Jesu ya phatlalatša e tliša mehola e sa bapišwego?

⁷ Jesu o tšwela pele e le moperisita ka mo go sa felego, a se na bahlatlami. Ka gona, ke yena a nnoši a ka phološago batho ka mo go feletšego. O dira tirelo yeo ya phatlalatša yeo e sa bapišwego, e sego ka tempeleng e dirilwego ke motho, eupša ka tempeleng ya seswantšhetšo, e lego tokišetšo ya Jehofa e kgolo bakeng sa borapedi yeo e ilego ya thoma ka 29 C.E. Jesu ga bjale o hlankela Sekgethwa-kgethweng sa tempele yeo, legodimong. Ke “yêna Molaki [“mohlanka wa phatlalatša,” NW] [lei·tour·gosʹ] wa yôna Ntlo-kxêthwa ya makxonthe ye e hlomilwexo ke Modimo, e sa kaxo ya hlôngwa ke motho.” (Ba-Hebere 8:2; 9:11, 12) Gaešita le ge Jesu a e-na le boemo bjo bo phagamego, o sa dutše e le “mohlanka wa phatlalatša.” O diriša matla a gagwe a taolo a phagamego bakeng sa go nea, e sego go tšea. Go nea mo go bjalo go mo tlišetša lethabo. Ke karolo ya “lethabo leo le bego le beilwe ka pele ga gagwe” gomme seo se ile sa mo matlafaletša go kgotlelela tseleng ya gagwe ka moka lefaseng.​—Ba-Hebere 12:2, NW.

8. Jesu o ile a dira tirelo ya phatlalatša bjang bakeng sa go ema legatong la kgwerano ya Molao?

⁸ Go na le karolo e nngwe ya tirelo ya Jesu ya phatlalatša. Paulo o ngwadile gore: “[Jesu] ó xafetšwe bolaki byo bo fetaxo bya bála kxolê-kxolê, ka xe a tlile a ba Khumedi ya kxwêranô ye e fetaxo yela ka boxolo, kxwêranô ye e tiišitšwexo ka dikholofedišô tše di fetaxo tša yela.” (Ba-Hebere 8:6) Moše o ile a boelanya kgwerano yeo e bego e le motheo wa tswalano ya Isiraele le Jehofa. (Ekisodo 19:4, 5) Jesu o ile a boelanya kgwerano e mpsha, yeo e ilego ya dira gore go tswalwa ga setšhaba se sefsa go kgonege, “ba-Isiraele ba Modimo,” bao ba hlamilwego ka Bakriste ba tloditšwego ka moya go tšwa ditšhabeng tše dintši. (Ba-Galatia 6:16; Ba-Hebere 8:8, 13; Kutollo 5:9, 10) E be e le tirelo ya phatlalatša e botse gakaakang! Re thabile gakaakang go tsebana le Jesu, mohlanka wa phatlalatša yoo ka yena re ka neelago borapedi bjo bo amogelegago go Jehofa!​—Johane 14:6.

Bakriste le Bona ba Nea Tirelo ya Phatlalatša

9, 10. Ke mehuta efe e mengwe ya tirelo ya phatlalatša yeo e dirwago ke Bakriste?

⁹ Ga go na motho yo a dirago tirelo ya phatlalatša ka mo go phagamego bjalo ka ya Jesu. Lega go le bjalo, ge Bakriste ba tloditšwego ba amogela moputso wa bona wa legodimong, ba tšea madulo a bona a go ba kgaufsi le Jesu gomme ba ba le karolo tirelong ya gagwe ya phatlalatša e le dikgoši le baperisita ba legodimong. (Kutollo 20:6; 22:1-5) Lega go le bjalo, Bakriste lefaseng ba dira tirelo ya phatlalatša gomme ba hwetša lethabo le legolo go direng bjalo. Ka mohlala, ge go be go e-na le tlhaelelo ya dijo kua Palestina, moapostola Paulo o ile  a iša meneelo yeo e tšwago go banababo ba Yuropa bakeng sa go thuša go fokotša kgateletšego ya Bakriste ba ba-Juda kua Judea. Yeo e be e le tirelo ya phatlalatša. (Ba-Roma 15:27; 2 Ba-Korinthe 9:12) Lehono, Bakriste ba thabela go nea tirelo e swanago, ba nea thušo ya kapejana ge banababo bona ba lebeletšana le tlhokofatšo, dikotsi tša tlhago goba masetla-pelo a mangwe.​—Diema 14:21.

¹⁰ Paulo o boletše ka tirelo e nngwe ya phatlalatša ge a be a ngwala gore: “Le xe madi a-ka a ka thšollwa ka etša sedimo kè dirêla tumêlô ya lena, moo ke a thaba, ke thaba le lena bohle.” (Ba-Filipi 2:17) Go šoma ga Paulo ka thata bakeng sa ba-Filipi e be e le tirelo ya phatlalatša yeo e bego e newa ka lerato le ka mafolofolo. Tirelo ya phatlalatša e swanago e a dirwa lehono, kudu-kudu ke Bakriste ba tloditšwego, bao ba hlankelago e le “molaki e a bôtêxaxo yo bohlale,” yo a neago dijo tša moya ka nako e swanetšego. (Mateo 24:45-47) Go oketša moo, e le sehlopha, ba ke “boperisita byo bokxêthwa,” bjo bo laetšwego “xo tliša didimo tša môya tše di kxahlišaxo Modimo ka Jesu Kriste” le go “[tsebatša] mabothakxa a Eo a [ba] biditšexo [ba] le lefsifsing, a [ba] biletša seetšeng sa xaxwe se se tlabaxo.” (1 Petro 2:5, 9) Ka go swana le Paulo, ba thabela ditokelo tše bjalo gaešita le ge ba ‘ineela’ go phethagatšeng boikarabelo bja bona. Bagwera ba bona ba “dinku tše dingwê” ba a ba tlatša le go ba thekga modirong wa go botša batho ka Jehofa le merero ya gagwe. * (Johane 10:16; Mateo 24:14) Ke tirelo ya phatlalatša e kgolo le e thabišago gakaakang!​—Psalme 107:21, 22.

Nea Tirelo e Kgethwa

11. Moporofeta wa mosadi Anna o ile a nea bjang mohlala o mobotse bakeng sa Bakriste ka moka?

¹¹ Lentšu le lengwe la Segerika leo le tswalanago le borapedi bja rena ke la·treiʹa, leo le fetoletšwego e le “tirelo e kgethwa” ka go New World Translation. Tirelo e kgethwa e tswalana le ditiro tša borapedi. Ka mohlala, mohlologadi e bile e le moporofeta wa mosadi wa nywaga e 84, Anna, o hlaloswa gore o be “à sa tloxe Ntlong-kxêthwa, à dirêla Modimo [tirelo e kgethwa, NW] [lentšu la Segerika leo le tswalanago le la·treiʹa] ka xo ikôna le ka xo rapêla Modimo bošexo le mosexare.” (Luka 2:36, 37) Anna o be a rapela Jehofa ka mehla. Ke mohlala o mobotse bakeng sa rena ka moka​—ba banyenyane le ba bagolo, banna le basadi. Bjalo ka ge Anna a be a rapela Jehofa ka go tšwa pelong le go mo rapela ka mehla tempeleng, tirelo ya rena e kgethwa e akaretša thapelo le go ba gona dibokeng.​—Ba-Roma 12:12; Ba-Hebere 10:24, 25.

12. Karolo e kgolo ya tirelo ya rena e kgethwa ke efe, gomme ke bjang se e bilego e le tirelo ya phatlalatša?

¹² Moapostola Paulo o ile a bolela ka karolo e kgolo ya tirelo ya rena e kgethwa ge a be a ngwala gore: “Hlatse ya-ka ké Modimo yo ke Mo dirêlaxo moyeng wa-ka xo kwatša Ebangedi ya Morwa wa xaxwe; ó tseba xe ke sa kxaotše xo Le xopola.” (Ba-Roma 1:9) Ee, boboledi bja ditaba tše dibotse ga se feela tirelo ya phatlalatša go bao ba kwago ka yona eupša gape le tiro ya borapedi go Jehofa Modimo. Go sa šetšwe gore re hwetša tsebe e kwago goba go se bjalo, modiro wa boboledi ke tirelo e kgethwa yeo e direlwago Jehofa. Go phegelela ga rena go botša ba bangwe ka dika tše dibotse le merero e holago ya Tatago rena yo a rategago wa legodimong ka kgonthe go tliša lethabo le legolo.​—Psalme 71:23.

Ke Kae Moo re Neago Tirelo e Kgethwa?

13. Kholofelo ya bao ba neago tirelo e kgethwa ka lapeng la ka gare la tempele ya Jehofa ya moya ke efe, gomme ke bomang bao ba thabago le bona?

¹³ Paulo o ile a ngwalela Bakriste ba tloditšwego gore: “Ké xore re fiwa mmušô wo o sa šišinyexexo; xomme a re leboxeng ka xo dirêla Modimo [tirelo  e kgethwa, NW] ka mo xo mo kxahlaxo, ka xo Mo xodiša le xo mmoifa.” (Ba-Hebere 12:28) Ba e-na le tebelelo e nago le kgodišego ya go tšea Mmušo e le bohwa, batlotšwa ga ba šišinyege tumelong ka ge ba rapela Yo Godimo-dimo. Ke bona feela ba ka mo neago tirelo e kgethwa Sekgethweng le ka lapeng la ka gare la tempele ya Jehofa ya moya, gomme ba lebeletše pele ka phišego go hlankeleng le Jesu Sekgethwa-kgethweng, legodimong ka bolona. Bagwera ba bona, sehlopha sa dinku tše dingwe, ba thaba le bona kholofelong ya bona e kgahlišago.​—Ba-Hebere 6:19, 20; 10:19-22.

14. Lešaba le legolo le holwa bjang ke tirelo ya Jesu ya phatlalatša?

¹⁴ Lega go le bjalo, go thwe’ng ka bao ba dinku tše dingwe? Ka ge moapostola Johane a ile a bona e sa le pele, lešaba le legolo la bona le tšweletše mehleng ye ya bofelo, gomme “ba hlatswitše mašela a bôná ba a taxafatša mading a Kwana.” (Kutollo 7:14) Se se bolela gore, bjalo ka barapedi-gotee le bona bao ba tloditšwego, ba bontšha tumelo tirelong ya Jesu ya phatlalatša, e lego go nea ga gagwe bophelo bja gagwe bjo bo phethagetšego bja motho bakeng sa batho. Dinku tše dingwe gape di holwa ke tirelo ya Jesu ya phatlalatša ka gore di ‘kgomarela kgwerano [ya Jehofa].’ (Jesaya 56:6) Aowa, ga se karolo ya kgwerano e mpsha, eupša ba e kgomarela ka gore ba kwa melao e lego mabapi le yona gomme ba dirišana le dithulaganyo tšeo di dirwago ka yona. Ba dirišana le Isiraele ya Modimo, ba iphepa tafoleng e swanago ya moya gomme ba šoma gotee le ditho tša yona, ba reta Modimo phatlalatša le go nea dihlabelo tša moya tšeo di mo kgahlišago.​—Ba-Hebere 13:15.

15. Ke kae moo ba lešaba le legolo le neago tirelo e kgethwa, gomme tšhegofatšo ye e ba kgoma bjang?

¹⁵ Ka gona, ba lešaba le legolo ba bonwa ba “eme pele xa sedulô sa boxoši sa Kwana, bà apere ’kobô tše dithšweu.” Go oketša moo, ba “pele xa sedulô sa boxoši sa Modimo, ’me ba Mo hlankêla [“nea tirelo e kgethwa,” NW] mosexare le bošexo bà le Ntlong e kxêthwa ya xaxwe. ’Me Yêna a dutšexo sedulong sa boxoši ó tlo ba khutiša Ngwakong wa xaxwe.” (Kutollo 7:9, 15) Isiraeleng, basokologi  ba be ba rapela ka lapeng la ka ntle la tempele ya Salomo. Ka mo go swanago, lešaba le legolo le rapela Jehofa ka lapeng la ka ntle la tempele ya gagwe ya moya. Go hlankela moo go ba dira gore ba thabe. (Psalme 122:1) Gaešita le ka morago ga ge wa mafelelo wa bagwera ba bona ba batlotšwa a amogela bohwa bja gagwe bja legodimong, ba tla tšwela pele go nea tirelo e kgethwa go Jehofa e le batho ba gagwe.​—Kutollo 21:3.

Tirelo e Kgethwa Yeo e sa Amogelegego

16. Ke ditemošo dife tšeo di newago mabapi le tirelo e kgethwa?

¹⁶ Mehleng ya Isiraele ya bogologolo, tirelo e kgethwa e be e swanetše go dirwa ka go dumelelana le melao ya Jehofa. (Ekisodo 30:9; Lefitiko 10:1, 2) Ka mo go swanago lehono, go na le dinyakwa tšeo re swanetšego go di latela ge e ba tirelo ya rena e kgethwa e tla amogelega go Jehofa. Ke ka lebaka leo Paulo a ilego a ngwalela ba-Kolose gore: “Xa re kxaotše xo Le rapêlêla le xo Le kxopêlêla xore Le tlatšwê tsebô ya xo tseba thatô ya xaxwe, Le bê le bohlale ka moka le thlaoloxanyô ya Môya. Re Le rapêlêla xore Le swarê ka tsela ye e loketšexo ba Morêna, e bê xo mo kxahla xohle, le xo enywa dienywa ka medirô e botse yohle, la tšwêlêla pele tsebong ya xo tseba Modimo.” (Ba-Kolose 1:9, 10) Ga go tšwe go rena go kgetha mokgwa o nepagetšego wa go rapela Modimo. Tsebo e nepagetšego ya Mangwalo, tlhaologanyo ya moya le bohlale bja Modimo ke tše bohlokwa. Go sego bjalo, mafelelo e ka ba a gobatšago.

17. (a) Tirelo e kgethwa e ile ya gobošwa bjang mehleng ya Moše? (b) Tirelo e kgethwa e ka dirišwa bjang ka mo go fošagetšego lehono?

¹⁷ Gopola ba-Isiraele mehleng ya Moše. Re bala gore: “Modimo a ba fularêla, a ba lesa ba hlankêla [“dira tirelo e kgethwa go,” NW] makôkô a lexodimo.” (Ditiro 7:42) Ba-Isiraele bao ba ile ba bona ditiro tša Jehofa tše matla tšeo a di dirilego bakeng sa bona. Lega go le bjalo, ba ile ba retologela go medimo e mengwe ge ba be ba nagana gore se se tla ba hola. Ba be ba sa botege, gomme go botega ka go se kwanantšhe ke tlamo ge e ba tirelo ya rena e kgethwa e tla ba e thabišago go Modimo. (Psalme 18:25) Ka kgonthe, ke ba mmalwa lehono bao ba bego ba tla hlanogela Jehofa bakeng sa go rapela dinaledi goba dinamane tša gauta, eupša go na le mehuta e mengwe ya borapedi bja diswantšho. Jesu o ile a lemoša malebana le go hlankela “Mahumo” (NW), gomme Paulo o ile a bitša megabaru gore ke borapedi bja diswantšho. (Mateo 6:24; Ba-Kolose 3:5) Sathane o ikgodiša bjalo ka modimo. (2 Ba-Korinthe 4:4) Mehuta e bjalo ya borapedi bja diswantšho ke e atilego gomme ke moreo. Ka mohlala, nagana ka motho yo a itšego yo a ipolelago gore ke molatedi wa Jesu eupša e le yoo pakane ya gagwe ya kgonthe bophelong e lego go huma goba yo a ipotilego e le ka kgonthe gotee le dikgopolo tša gagwe ka noši. Ge e le gabotse o hlankela mang? O fapane gakaaka’ng le ba-Juda ba  mehleng ya Jesaya bao ba ilego ba ena ka leina la Jehofa eupša tumišo ya mediro ya gagwe e megolo ba e iša go medimo ya diswantšho yeo e sa hlwekago?​—Jesaya 48:1, 5.

18. Tirelo e kgethwa e ile ya dirwa bjang gampe nakong e fetilego le lehono?

¹⁸ Jesu gape o ile a lemoša gore: “Xo tlo bá xwa tla lebaka la xe motho à Le bolaya a tl’o xo re ké xôna xe a dirêla Modimo [tirelo e kgethwa, NW].” (Johane 16:2) Saulo, yo a ilego a ba moapostola Paulo, ga go pelaelo gore o be a nagana gore o be a hlankela Modimo ge a be a ‘dumelela polao ya Stefano’ gomme ‘a galefela le go tšhošetša go bolaya barutiwa ba Morena.’ (Ditiro 8:1; 9:1) Lehono, disenyi tše dingwe tša go fsielela moloko ruri le polao ya molokwana-rite le tšona di bolela gore di rapela Modimo. Go na le batho ba bantši bao ba bolelago gore ba rapela Modimo, eupša borapedi bja bona bo lebišwa e le ka kgonthe go medimo ya botšhaba, kgethollo ya meloko, mahumo, motho ka noši goba medingwana e mengwe e itšego.

19. (a) Re lebelela bjang tirelo ya rena e kgethwa? (b) Ke mohuta ofe wa tirelo e kgethwa wo o ka re tlišetšago lethabo?

¹⁹ Jesu o itše: “O khunamêlê Morêna Modimo wa xaxo, O dirêlê Yêna à nnoši [tirelo e kgethwa, NW]!” (Mateo 4:10) O be a bolela le Sathane, eupša ke gabohlokwa gakaakang gore ka moka ga rena re ele hloko mantšu a gagwe! Go direla Morena yo a Phagamego wa legohle tirelo e kgethwa ke tokelo e phagamego le yeo e šiišago. Go ka thwe’ng mabapi le go dira tirelo ya phatlalatša yeo e tswalanywago le borapedi bja rena? Go dira se bakeng sa magagabo rena ke modiro o thabišago wo o tlišago lethabo le legolo. (Psalme 41:1, 2; 59:16) Go sa dutše go le bjalo, tirelo e bjalo e tliša lethabo la kgonthe ge feela e dirwa ka pelo ka moka le ka mokgwa o swanetšego. Ke bomang bao ge e le gabotse ba hlankelago Modimo ka mo go swanetšego? Jehofa o amogela tirelo e kgethwa ya bomang? Re ka araba dipotšišo tše bjalo ge e ba re ahla-ahla lentšu la boraro la Beibele leo le lego mabapi le borapedi bja rena. Se re tla se dira sehlogong se se latelago.

[Mengwalo ya ka tlase]

O tla Araba Bjang?

• Ke tirelo efe ya phatlalatša e kgolo yeo Jesu a ilego a e dira?

• Ke tirelo efe ya phatlalatša yeo Bakriste ba e dirago?

• Tirelo e kgethwa ya Bokriste ke eng, gomme e direlwa kae?

• Ke eng seo re swanetšego go se fihlelela ge e ba tirelo ya rena e kgethwa e tla thabiša Modimo?

[Dipotšišo tša Thuto]

[Seswantšho go letlakala 10]

Batswadi ba hwetša lethabo le legolo ka go nea

[Diswantšho go letlakala 12, 13]

Bakriste ba nea tirelo ya phatlalatša ge ba thuša ba bangwe le ge ba tsebatša ditaba tše dibotse

[Seswantšho go letlakala 14]

Re nyaka tsebo e nepagetšego le kwešišo bakeng sa go kgonthišega gore tirelo ya rena e kgethwa e a amogelega go Modimo