Ke ka Baka La’ng o Swanetše go Rapela?

“LE A rapêla, ’me xa Le fiwe selô, ka xe Le rapêla ka mokxwa o mobe . . . Batamêlang Modimo, le Yêna a Le batamêlê.” (Jakobo 4:3, 8) Mantšu ao a morutiwa wa Jesu Jakobo a ka re hlohleletša go ela hloko mabaka a rena a go rapela.

Thapelo ga se feela sedirišwa sa go botša Modimo seo re se nyakago. Thutong ya gagwe yeo e tumilego ya Thabeng, Jesu o itše: “Tataweno, tše Le di hlôkaxo ó a di tseba Lè sešo la mo kxopêla.” Lega go le bjalo, Jesu o boletše gape gore: “Kxopêlang; ké mo Le tl’o xo fiwa.” (Mateo 6:8; 7:7) Ka gona, Jehofa o nyaka gore re mmotše seo re kwago re se nyaka. Eupša go na le mo gontši kudu thapelong go feta seo.

Bagwera ba kgonthe ga ba boledišane feela ge ba nyaka selo se itšego. Ba a kgahlegelana, e bile tswalano ya bona e a gola ge ba hlalosa maikwelo a bona. Ka mo go swanago, thapelo e na le morero o mogolo go feta go fo kgopela dilo tše di nyakegago. E nea sebaka sa go matlafatša tswalano ya rena le Jehofa ka go hlalosa boineelo bja rena bjo bo tšwago pelong go yena.

Ee, Modimo o re neile tokelo ya thapelo e le gore re ka batamela kgaufsi le yena. Se se ka direga feela ge e ba re hlalosa maikwelo a rena ka noši go Modimo go e na le go reta dithapelo tšeo di swerwego ka hlogo. Ke mo go kgahlišago gakaakang go bolela le Jehofa ka thapelo! Go feta moo, seema sa Beibele se re: “O kxahlwa ke thapêlo ya baloki.”​—Diema 15:8.

Mopsalme Asafa o ile a opela ka gore: “Xe e  le nna ke natefêlwa ke xo ba kxaufsi le Modimo.” (Psalme 73:28) Eupša bakeng sa gore re batamele kgaufsi le Modimo, re swanetše go dira se se fetago go rapela. Ela hloko kamoo pego ye e latelago e bontšhago se:

“E mongwê wa barutiwa ba [Jesu] a mo kxopêla a re: Morêna, re rutê xo rapêla.” Jesu ge a fetola a re: “Xe Le rapêla Le re: Tatawešo wa maxodimong! Leina la xaxo a le kxêthwê; mmušô wa xaxo a o tlê.” (Luka 11:1, 2) Na re ka rapela ka morero ka tsela ye ka ntle le go ithuta pele gore leina la Modimo ke mang le gore le tla kgethagatšwa bjang? E bile na re ka rapela ka go dumelelana le mantšu a a Jesu ge e ba re sa kwešiše seo Mmušo wa Modimo e lego sona? Kwešišo ya ditaba tše e gona ge e ba re hlahloba Beibele ka kelohloko. Tsebo yeo e hweditšwego e tla re thuša go tseba Modimo le go kwešiša ditsela tša gagwe. Go feta moo, go tlwaelana le Jehofa Modimo go tla re dira gore re ikwe re le kgaufsi le yena le go ba ba ineetšego kudu go yena. Ka gona, se se tla re thuša go bolela le yena ka bolokologi kudu ka thapelo.

Thapelo e ka Rarolla Mathata

Go ba le tswalano ya kgaufsi le Jehofa go tla re thuša go rarolla mathata. Ela hloko kamoo se se bego se le ka gona maemong a a latelago. A bontšha gore bao ba bego ba rapela ba be ba kgona go matlafatša tswalano ya bona le Jehofa.

Kua Brazil, mosadi yo a bitšwago Maria o ile a rapela Modimo bakeng sa thušo. O be a nyaka go rabela malebana le ditekanyetšo tša boitshwaro tšeo di bego di amogelega go fihla boemong bjo itšego ka baka la boikaketši bjo a bo bonego setšhabeng. Maria o be a bile a tlogetše monna wa gagwe, bana le lapa. O ile a ba a thoma go diriša dihlare-tagi. Eupša ge a paletšwe ke go hwetša lethabo, o ile a bulela Modimo pelo ya gagwe gomme a rapelela thušo.

Kapejana, Dihlatse tša Jehofa tše pedi di ile tša tla gomme tša tlogelela Maria tokollo ya Morokami wo o nago le taba ya bohlokwa bja go amogela tlhahlo ya Modimo. O ile wa kgoma pelo ya gagwe, gomme a thoma go ithuta Beibele le Dihlatse letšatšing lona leo. Se mafelelong se ile sa lebiša go tsošološweng ga bophelo bja lapa la gagwe. Ge a dutše a ithuta ka Jehofa, o ile a nyaka go bontšha lerato la gagwe bakeng sa gagwe. Maria o itše: “Ke ile ka dira diphetogo boitshwarong bja-ka. Monna wa-ka le ba lapa mathomong ba be ba ganetša go ithuta ga-ka Beibele. Eupša ge ba dutše ba bona diphetogo tšeo ke bego ke di dira, ba ile ba thoma go nkgothatša.” Ka morago, Maria o ile a neela bophelo bja gagwe go Mokwi wa thapelo bakeng sa go mo hlankela.

Gaešita le ge José a be a e-na le mosadi yo mobotse le kgwebo yeo e atlegago Bolivia, o be a sa thaba. Dikopano tša botona le botshadi tša ka ntle ga lenyalo di ile tša bakela gore mosadi wa gagwe a mo tlogele. O ile a nwa ka mo go feteletšego e bile a ikwa a se na mohola. José o re: “Ke ile ka thoma go rapela ka pelo ya-ka ka moka, ke kgopela seo nka se dirago go kgahliša Modimo. Kapejana Dihlatse tša Jehofa di ile tša etela kgwebong ya-ka di ithapela go swara dithuto tša legae tša Beibele ka ntle le tefo, eupša ke ile ka di raka. Se se diregile ka makga a mararo. Nako le nako ge ke be ke rapelela thušo, ba be ba e-tla. Mafelelong, ke ile ka phetha ka gore ke tla ba theetša nakong e tlago. Ke be ke badile Beibele ka moka e bile ke na le dipotšišo tše dintši, eupša ka mehla di be di na le dikarabo tšeo di bego di nkgotsofatša. Go ithuta ka Jehofa go ile gwa nnea morero o mofsa bophelong, gomme bagwera ba-ka gare ga Dihlatse e be e le mehlala e kgothatšago gakaakang! Ke ile ka tlogela kgarebe ya-ka le bagwera ba-ka bao ke bego ke e-nwa le bona. Go se go ye kae, ke be ke boetše go mosadi wa-ka gotee le bana. Ke ile ka kolobetšwa mathomong a 1999.”

Kua Italy, lenyalo la Tamara le be le le mathateng, ka gona o ile a rapelela bohlale. O be a hlagoletše boemo bja kgopolo bjo bogale, ka baka la ge a ile a bethwa le go rakwa ka lapeng ge a e-na le nywaga e 14. Tamara o re: “Ke ile ka hwetša Beibele gomme ka thoma go e bala. Mantšiboeng a mangwe, ke ile ka bala gore ‘go hwetša bohlale go swana le go hwetša lehumo leo le fihlilwego.’ Ke ile ka rapelela bohlale bjoo. (Diema 2:1-6) Mesong e latelago, Dihlatse tša Jehofa di ile tša nketela. Ke ile ka thoma go ithuta Beibele le tšona, eupša go ntšere nako go diriša seo ke bego ke ithuta sona. Mafelelong, ke ile ka  phetha go latela tsela ya Bokriste ya go phela gomme ka kolobetšwa. Ga bjale, gotee le monna wa-ka, ke thuša batho go holwa ke bohlale bja Modimo.”

Beatriz e be e le karolo ya batho ba maemo kua Caracas, Venezuela. Lega go le bjalo o ile a ikhwetša a hladilwe e bile a nyamile. A le tlalelong, o ile a fetša diiri a rapela. Mesong e latelago, go ile gwa kokotwa mojako. A tenegile, o ile a lebelela ka lešobana la mojako gomme a bona batho ba babedi ba swere mekotla ya dipuku. O ile a dira eka ga a gona ka gae, eupša pele banyalani ba sepela, ba ile ba tsenya pampišana ka tlase ga mojako. E be e re, “Tseba Beibele ya Gago.” Na ketelo ya bona e ka be e tswalana le dithapelo tša gagwe bošegong bjo fetilego? O ile a ba bitša gore ba boe. Go se go ye kae ke ge a ithuta Beibele gomme ka morago o ile a kolobetšwa. A thabile mafelelong, Beatriz ga bjale o ruta ba bangwe mabapi le kamoo ba ka hwetšago lethabo ka gona.

Carmen o ile a rapela mabapi le go tlaišwa ke bodiidi. O be a na le bana ba lesome le monna wa setagwa, Rafael. Carmen o itše: “Ke ile ka leka go hwetša tšhelete ka go hlatswetša batho diaparo.” Eupša mokgwa wa Rafael wa go nwa o ile wa fetelela. “E bile ge re thoma go ithuta Beibele le Dihlatse tša Jehofa moo monna wa-ka a ilego a thoma go fetoga. Re ile ra ithuta ka kholofetšo ya Mmušo​—gore Jehofa go se go ye kae o tla fediša lefase la bodiidi le kgateletšo. Dithapelo tša-ka go Modimo mafelelong di be di arabilwe!” Go ithuta ka ditsela tša Jehofa go thušitše Rafael go kgaotša go nwa, gomme a apara “motho e mofsa.” (Ba-Efeso 4:24) Yena le lapa la gagwe ba ile ba kgona go kaonefatša boemo bja bona bja go phela. Rafael o re: “Re ka no ba re sa huma, gomme ga re na ntlo ya rena, eupša re na le dinyakwa tša bophelo gomme re thabile.”

Ge Dithapelo ka Moka di tla Arabja

Na go rapela go ile gwa thuša batho ba ka tsela le ge e le efe? Ka kgonthe go ba thušitše! Le gona na o ile wa lemoga gore mabakeng a mantši dithapelo tša bona di ile tša arabja ge yo mongwe go tšwa phuthegong ya Bokriste a ba thuša go batamela kgaufsi le Jehofa Modimo ka go ithuta Beibele?​—Ditiro 9:11.

Ka gona re na le mabaka a mabotse a go rapela. Kgaufsinyane bjale, thapelo ya gore Mmušo wa Modimo o tle le thato ya gagwe e dirwe lefaseng e tla arabja. (Mateo 6:10) Ka morago ga ge Modimo a tlošitše lefaseng la rena bao ba mo lwantšhago, “xo tseba Morêna xo tlo tlala ’fase lohle.” (Jesaya 11:9) Ke moka bohle bao ba ratago Jehofa ba tla thabela “tokoloxô ya xe bana ba Modimo bà e-ya letaxong”​—gomme dithapelo tša bona di tla arabja e le ka kgonthe.​—Ba-Roma 8:18-21.

[Seswantšho go letlakala 7]

Na o a tseba gore ke ka baka la’ng re swanetše go rapela?