Na go Rapela go na le Thušo le ge e le Efe?

KA DINAKO tše dingwe, mo e nyakilego go ba motho yo mongwe le yo mongwe o ikwa a nyaka go rapela. Ge e le gabotse, batho ba mo e nyakilego go ba ba tumelo ya bodumedi bjo bongwe le bjo bongwe ba rapela ka potego. Ka mohlala, mo-Buddha a ka bušeletša ka makga a dikete thapelo e rego, “Ke bea tumelo ya-ka go Amida Buddha.”

Ka baka la mathata ao a sa fetogego lefaseng ka bophara, ke mo go kwalago go botšiša gore: Ke eng seo batho ba letetšego go se fihlelela ka go rapela? Na dithapelo tše ka moka di na le thušo le ge e le efe?

Ke ka Baka La’ng Batho ba Rapela?

Batho ba bantši ba ka Bohlabela ba rapela bagologolo ba bona le medimo ya Boshinto goba Botao. Ba dira bjalo ka dikholofelo tša go tšwelela ditlhahlobong tša sekolong, go buna mabele a mabotse goba go thibela malwetši. Ka maiteko a ona, ma-Buddha a holofela go hwetša seetša. Ma-Hindu a rapela ka go ineela go medimo le medimogadi ya yona e rategago bakeng sa tsebo, lehumo le tšhireletšo.

Makatholika a mangwe a holofela go hola batho ka go neela maphelo a ona bjalo ka baitlami ba banna le baitlami ba basadi mafelong a bodulanoši goba a baitlami, ba rapela ka mo go tšwelago pele. Dimilione tša Makatholika di nyaka ditšhegofatšo tšeo di tšwago go Maria ka go rapela dithapelo tšeo di swerwego ka hlogo, mohlomongwe ka thušo ya dipheta tša rosari. Dinageng tša ka Bohlabela, batho ba bantši ba diriša maotwana a dikološwago go sepedišana le dithapelo. Maprotestanta a bušeletša mantšu a Thapelo ya Morena, gaešita le ge a ka  hlalosa maikwelo a ona go Modimo ka bolokologi. Ba-Juda ba bantši ba sepela menabo e metelele bakeng sa go rapela Morakong wa ka Bodikela kua Jerusalema, ba holofetše go tsošološwa ga tempele le mehla e mefsa ya katlego le khutšo.

Gaešita le ge dimilione di katana ka thapelo, lekoko la batho le tlaišwa ka mo go oketšegilego ke mathata a bodiidi, go lemalela dilo tše itšego, malapa a thubegilego, bosenyi le ntwa. Na e ka ba e le gore batho ba ka moka ga ba rapele ka tsela e swanetšego? Tabeng yeo, na go na le yo a kwago dithapelo e le ka kgonthe?

Na go na le yo a Kwago Dithapelo?

Dithapelo di ka se thuše ka selo e le ka kgonthe ge feela di sa kwewe. Ge motho a rapela, go molaleng gore o dumela gore motho yo mongwe yo a lego tikologong e sa bonagalego ya moya o a kwa. Lega go le bjalo, dithapelo ga di fetišwe ke maphoto a modumo feela. Batho ba bantši ba dumela gore motho yo mongwe a ka ba a tseba dikgopolo tša yo a rapelago. Motho yo e ka ba mang?

Go tseba kamoo dikgopolo di thomago ka gona go di-neuron tše dikete tše dimilione tšeo di bopago karolo e kgolo ya bjoko bja rena ke selo seo banyakišiši ba sa se kwešišego. Lega go le bjalo, ka mo go kwagalago, Yo a dirilego bjoko a ka bala dikgopolo tše bjalo. Motho yo ga se yo mongwe ka ntle le Mmopi wa rena, Jehofa Modimo. (Psalme 68:4; Kutollo 4:11) Dithapelo di swanetše go lebišwa go yena. Eupša na Jehofa o ela hloko dithapelo ka moka tše bjalo?

Na Dithapelo ka Moka di a Kwewa?

Kgoši Dafida wa Isiraele ya bogologolo e be e le monna wa thapelo. Bjalo ka mopsalme yo a buduletšwego ke Modimo, o opetše ka gore: “Batho ka moka ba tla xo Wene Mokwi wa dithapêlô.” (Psalme 65:2) Jehofa o kgona go kwešiša dithapelo tšeo di bolelwago ka maleme le ge e le afe a dikete ao a bolelwago ke batho. Taba ya gore ga go na mogopolo wa motho wo o ka kgonago go swara tsebišo e ntši gakaakaa ga e bolele gore Modimo a ka se kgone go ela hloko bohle bao ba mo rapelago ka tsela e amogelegago.

Lega go le bjalo, Jesu Kriste​—yo gape e lego monna wa thapelo​—o ile a utolla gore ga se dithapelo ka moka tšeo di thabišago Modimo. Ela hloko seo Jesu a se boletšego mabapi le mokgwa wo o ratwago kudu wa go bušeletša dithapelo tšeo di swerwego ka hlogo. Go ya ka Jerusalem Bible ya Katholika, o itše: “Dithapelong tša lena le se ke la balabala go etša ge baheitene ba dira, gobane ba nagana gore ka go diriša mantšu a mantši ba tla dira gore ba kwewe.” (Mateo 6:7) Re ka se letele gore Jehofa a theetše dithapelo tšeo di sa bontšhego maikwelo a rena a kgonthe.

Ge se lemoša lebaka leo ka lona dithapelo tše dingwe di sa kgahlišego Modimo, seema sa Beibele se re: “Thlala-molaô, le thapêlo y’axwe ké makxapa.” (Diema 28:9) Seema se sengwe se re: “Morêna ó kxolê le ba babe; ó kwa dithapêlô tša baloki.” (Diema 15:29) Nakong ya ge baetapele ba Juda ya bogologolo ba rwele molato o imelago, Jehofa o boletše gore: “Xe Le emiša matsôxô Lè mpitša, ke tla Le xerula; le xe Le ka atiša dithapêlô, nka se kê ka Le kwa; diatla tša lena di tletše madi.”​—Jesaya 1:1, 15.

Moapostola Petro o boletše ka selo se sengwe seo se ka dirago gore dithapelo di se ke tša amogelega go Modimo. Petro o ngwadile gore: “Lena Banna! Le phedišanê le [basadi ba lena] Lè tseba xore mosadi re ka re ké yêna sebyana se se swanetšexo xo neneketšwa. Ba xodišeng Lè tseba xe le bôná e le baji ba bohwa bya neô ya bophêlô, xore dithapêlô tša lena di se tlo šitišwa.” (1 Petro 3:7) Dithapelo tša monna yo a hlokomologilego keletšo e bjalo di ka se fihle le ka godimo ga tlhaka ya ntlo ya gagwe!

Go molaleng gore go na le dinyakwa tše itšego tšeo di swanetšego go fihlelelwa ge e ba dithapelo di tla kwewa. Lega go le bjalo, ba bantši bao ba rapelago ba bontšha go tshwenyega mo gonyenyane mabapi le go dira seo Modimo a se nyakago go rena. Ke ka baka leo go fišega mo gogolo gakaakaa go sa kago gwa feleletša ka lefase le lekaone.

Ka gona, ke eng seo Modimo a se nyakago gore dithapelo tša rena di kwewe? Karabo e swanetše go sepedišana le lebaka la rena le legolo la go rapela. Ge e le gabotse, ge e ba re nyaka go tseba ge e ba dithapelo di na le mohola le ge e le ofe, re swanetše go kwešiša morero wa tšona. Ke ka baka la’ng Jehofa a ile a dira gore go kgonege bakeng sa rena go boledišana le yena?

[Mothopo wa Seswantšho go letlakala 3]

G.P.O., Jerusalem