Beibele​—Ke e Rategago le e Gateletšwego

Desiderius Erasmus, seithuti se se tumilego sa mo-Dutch sa lekgolong la bo-16 la nywaga se ngwadile gore: “Nka kganyoga gore dipuku tše kgethwa di fetolelwe ka maleme ka moka.”

KHOLOFELO ya Erasmus e rategago kudu e be e le gore motho yo mongwe le yo mongwe a kgone go bala le go kwešiša Mangwalo. Lega go le bjalo, baganetši ba Beibele ba ile ba ganetša kgopolo e bjalo o šoro. Ge e le gabotse, Yuropa ka nako yeo e be e le lefelo le kotsi ka mo go feteletšego bakeng sa mang goba mang gaešita le go ba sego kae bao ba bego ba nyaka go tseba ka dikagare tša Beibele. Kua Engelane go ile gwa hlongwa molao wa palamente wo o bego o laela gore “mang le mang yo a balago Mangwalo ka Seisemane o swanetše go loba naga, dithoto le bophelo . . . gomme, ge e ba ba tšwela pele ba phegelela goba ba boela morago mokgweng wo ka morago ga go swarelwa, ba swanetše go fegwa pele ka baka la boradia malebana le kgoši, ke moka ba fišwe ka baka la bohlanogi malebana le Modimo.”

Nageng e kgolo ya Yuropa, Lekgotla la Dikotlo tša Bohlanogi la Katholika ka go hloka kgaugelo le ile la tsoma dihlopha “tša bahlanogi,” tše bjalo ka ma-Waldo a Fora, gomme ba ba tšea bakeng sa go ba hlokofatša ka baka la mokgwa wa bona wa go rera “go tšwa diebangeding le diepistoleng gotee le mangwalong a mangwe a makgethwa, . . . ka ge go rera le go hlatholla mangwalo a makgethwa [go be go] ileditšwe ka mo go feletšego go batho feela.” Banna le basadi ba bantši ba ile ba tlaišwa ka tlhokofatšo e kgolo le lehu ka baka la lerato la bona la go rata Beibele. Ba ile ba ipea kotsing ya dikahlolo tše šoro feela bakeng  sa go bolela Thapelo ya Morena goba Melao e Lesome le go di ruta bana ba bona.

Boineelo bjo bo bjalo Lentšung la Modimo bo ile bja tšwela pele bo le dipelong tša basepedi ba bodumedi bao ba bego ba sesa bakeng sa go yo dula Amerika Leboa. Puku ya A History of Private Life​—Passions of the Renaissance e bolela gore go Amerika ya mehleng ya pele, “go bala le bodumedi di be di nyalelana, go hlalosa tlwaelo e theilwego ka mo go feletšego go go swana ga Beibele.” Ge e le gabotse, thuto yeo e phatlaladitšwego kua Boston ka 1767 e boletše gore: “E-ba mafolofolo go baleng lengwalo le lekgethwa. Mesong e mengwe le e mengwe le mantšiboeng a mangwe le a mangwe o swanetše go bala kgaolo ya Beibele ya gago.”

Go ya ka Sehlopha sa Dinyakišišo sa Barna kua Ventura, California, ma-Amerika a fetago 90 lekgolong a na le palogare ya Dibeibele tše tharo. Lega go le bjalo, nyakišišo ya morago bjale e bontšha gore gaešita le ge Beibele e sa dutše e tšeelwa godimo moo, “go tšea nako e balwa, go ithuta yona le go e diriša . . . ke selo sa nako e fetilego.” Ba bantši ga se ba tlwaelana le dikagare tša yona ka mo go tseneletšego. Mongwadi yo mongwe wa dikarolo tša kuranta o boletše gore: “Kgopolo ya gore [Beibele] mohlomongwe e sa dutše e na le mafelelo a tšhoganyetšo mathateng a gona bjale le matshwenyegong e ba gona ka sewelo.”

Go Feto-fetoga ga Kgopolo ya Lefase

Tumelo e tumilego ke ya gore bophelong re ka tšwelela feela ka go bea mabaka le tirišano ya batho. Beibele e swarwa feela bjalo ka e nngwe ya dipuku tše dintši mabapi le dikgopolo tša bodumedi le diphihlelo tša motho ka noši, e sego bjalo ka puku ya ditherešo.

Ka gona batho ba lebeletšana bjang le mathata ao a golago le ditaba tšeo di tshwenyago bophelong? Ba šoma sekgobeng seo se se nago selo sa boemo bja moya, ba se na tlhahlo e tiilego ya boitshwaro le ya bodumedi. Ba swana le dikepe tšeo di se nago dilaola-sekepe, “ba akga-akgelwa morago le pele le go tšewa ke moya o mongwe le o mongwe wa dithuto tša batho, . . . ka boradia le maano a batho.”​—Ba-Efeso 4:14, The Twentieth Century New Testament.

Ka gona, re swanetše go botšiša gore, Na Beibele ke feela puku e nngwe ya bodumedi? Goba na ka kgonthe ke Lentšu la Modimo, leo le nago le tsebišo e šomago le e bohlokwa? (2 Timotheo 3:16, 17) Na Beibele e swanetšwe ke gore re e ele hloko? Sehlogo se se latelago se tla ahla-ahla dipotšišo tše.

[Seswantšho go letlakala 3]

Desiderius Erasmus

[Mothopo]

From the book Deutsche Kulturgeschichte

[Seswantšho go letlakala 4]

Ma-Waldo a be a tsongwa bakeng sa go hlokofatšwa ka baka la go bolela ga ona go tšwa Mangwalong

[Mothopo]

Stichting Atlas van Stolk, Rotterdam