Beibele​—Puku ya go Ithuta ya Bophelo

“LENTŠU la Modimo ké le le phelaxo, ké le matla; ka boxale le phala thšoša efe le efe ya maxale a mabedi . . . ’me le tseba xo fênyêka diakanyô le kxopolô tša pelo.” (Ba-Hebere 4:12) Tlhaloso ye ya seo Lentšu la Modimo le ka se fihlelelago ge e le gabotse e tiišetša Beibele e le se se fetago feela puku e botse.

Mongwadi yo mongwe wa bodumedi o beile taba ka go lebanya gore: “Molaetša wa yona o bohlokwa maphelong a rena go fo swana le go hema ga rena.” Ke moka a oketša ka gore: “Ge o ela hloko taba ya go kganyoga ga rena le go nyakega ga phodišo lehono gomme o bala Beibele ka pono yeo, go latela mafelelo a makatšago.” Go swana le lebone leo le tukago ka go phadima, Beibele e hlabiša seetša ditabeng tše dintši tše raraganego le mathateng a bophelo bja letšatši le letšatši.​—Psalme 119:105.

Ruri bohlale bjo bo bontšhitšwego ka Beibeleng bo na le matla a go bopa go nagana ga rena, bo re thuša go rarolla mathata, bo kaonefatša bohlokwa bja bophelo bja rena le go re hlama ka bokgoni bja go lebeletšana le maemo ao re ka se a fetolego. Sa bohlokwa kudu, Beibele e dira gore re kgone go tseba le go rata Modimo.

Puku Yeo e Neago Morero

Mongwadi wa Beibele, Jehofa Modimo, o ‘tlwaelane le ditsela tša rena ka moka.’ O tseba kudu ka dinyakwa tša rena tša nama, tša maikwelo le tša moya go feta kamoo rena re di tsebago. (Psalme 139:1-3, bapiša le NW.) Ka mo go naganišišitšwego, o bea ditekanyetšo tše di kwagalago bakeng sa boitshwaro bja batho. (Mika 6:8) Ke mo go kwagalago go nyaka go kwešiša metheo yeo le tlhahlo le go ithuta go phela ka yona. Mopsalme o re, go thaba monna wa “xo thabêla molaô wa Morêna. . . . Tšohle tše a di diraxo di a lêtlêxa.” (Psalme 1:1-3) Tebelelo e bjalo ka kgonthe e swanelwa ke gore re e hlahlobe.

Maurice, morutiši yo a rotšego modiro, o be a dumela ka mehla gore Beibele e be e na le bohlokwa bja histori le go balega. Lega go le bjalo, o be a belaela go ba ga yona yeo e buduletšwego ke Modimo. Ka morago ga go theetša tlhaloso ya lebaka leo ka lona Modimo a ilego a nea batho Lentšu la gagwe leo le ngwadilwego, Maurice o ile a hlahloba diporofeto tše di fapa-fapanego tša Beibele. Bjalo ka lesogana, o be a ithutile histori ya bogologolo, dipuku, thutamahlale le thutafase. O dumela gore o be a hlalefile kudu mahlong a gagwe go ka bona mehlala e mentši yeo e thekgago go nepagala ga Beibele. “Ke be ke swaregile  kudu ka boiketlo, mahumo le maipshino a bophelo. Ka manyami, ke ile ka dula ke se na tsebišo e bile ke hlokomologa botse le go ba ga kgonthe ga puku ye e phagamego kudu ye e kilego ya ngwalwa.”

Maurice, ga bjale a le nywageng ya gagwe ya bo-70, a šupa tabeng ya go tšwelela ga Jesu go moapostola Tomase, ka tebogo o bolela gore: “Seatla sa-ka se lebišitšwe ‘nthong e tšwago madi’ yeo ka mo go sa felego e tla tlošago go se kgonthišege ka moka mo go lego mogopolong wa-ka ka gore Beibele e tloga e le ya therešo ka mo go feletšego.” (Johane 20:24-29) Bjalo ka ge moapostola Paulo a boletše ka mo go swanetšego, Beibele e utolla maikemišetšo a pelo gomme e nea morero bophelong. Ruri ke puku ya go ithuta ya bophelo.

E Tsepamiša Bophelo bja Motho yo a Tshwenyegilego

Beibele gape e nea keletšo yeo e thušago batho go tlogela mekgwa e mebe. Daniel o ile a kgona go lwantšha mokgwa o sa hlwekago wa go kgoga, gotee le go tlogela go ya meletlong e sa laolegego le go diriša dino-tagi gampe. (Ba-Roma 13:13; 2 Ba-Korinthe 7:1; Ba-Galatia 5:19-21) Ka kgonthe, go ntšha mekgwa e bjalo ka medu le go apara “motho e mofsa” go nyaka boiteko bja maikemišetšo. (Ba-Efeso 4:22-24) Daniel o re: “E be e le tlhohlo, ka gore ga se ra phethagala.” Lega go le bjalo, o ile a atlega. Ga bjale Daniel o bala Lentšu la Modimo ka mehla gomme le mmoloka kgaufsi le Jehofa.

Ge Daniel a dutše a gola, ka mehla o be a hlompha Beibele ka mo go tseneletšego​—gaešita le ge a se a ka a e bala​—e bile o be a rapela Modimo bošego bjo bongwe le bjo bongwe. Lega go le bjalo, go be go e-na le seo se hlaelelago. O be a se na lethabo. Phetogo e tlile ge a bona leina la Modimo ka Beibeleng ka lekga la mathomo. (Ekisodo 6:3; Psalme 68:4) Ka morago ga moo, o ile a diriša leina Jehofa ge a rapela, gomme dithapelo tša gagwe di ile tša fetoga tšeo di lebanyago kudu. “Jehofa o ile a ba motho wa kgaufsi kudu go nna, gomme o sa dutše e le mogwera wa-ka wa kgaufsi kudu.”

Pele a ithuta Beibele, pono ya Daniel ka bokamoso e be e le e fsifetšego. O re: “Ga go nyakege gore motho a be bohlale kudu gore a bone seo se diregago mo lefaseng. Ke be ke tšhogile, e bile ke ile ka leka go dula ke swaregile e le gore ke se ke ka nagana ka gona.” Ke moka o ile a ithuta gore Modimo o tla hloma toka bakeng sa bohle lefaseng le le hlwekišitšwego, moo batho ba kwago ba ka bago le khutšo le lethabo tša ka mo go sa felego. (Psalme 37:10, 11; Daniele 2:44; Kutollo 21:3, 4) Ga bjale Daniel o na le kholofelo ya kgonthe. Tutuetšo ye e tsepamišago ya Beibele e mo dira gore a kgone go kgomarela pono e nepagetšego ka bophelo.

Thušo Bakeng sa go Fenya Mathata a Maikwelo

George o be a e-na le nywaga e šupa ge mmagwe a e-hwa. O be a boifa go ya go robala, a sa tsebe ge e ba o tla tsoga letšatšing le le latelago. Ke moka o ile a bala seo Jesu a se boletšego mabapi le lehu le tsogo: “Xo tla lebaka leo bohle ba lexo mabitleng ba tl’o xo kwa Lentšu la [Jesu] ka lôna, xomme ba tlo tšwa.” O be a kgomilwe gape ke mantšu a Jesu a rego: “Ké Nna tsoxô le bophelô. E a ntumetšexo ó tlo phela le xe a ka hwa.” (Johane 5:28, 29; 11:25) Megopolo e bjalo e be e kwala e le e kwagalago, e nago le tlhaologanyo le e homotšago. George o re: “Therešo ye ga se e kgahlišago feela mogopolong eupša gape e kgoma le pelo.”

Daniel yo go boletšwego ka yena pejana, le yena o be a na le dipoifo. Mmagwe o be a sa kgone go ikgodišetša yena ka noši, ka gona o ile a romelwa go yo dula magaeng a mantši ao a ilego a golela go ona. Ka mehla o be a ikwa a lahlegile e bile a hlologela go ba yo a tšwago lapeng le lerato. Mafelelong, o ile a hwetša seo a bego a se nyaka ka thuto ya gagwe ya Beibele. Daniel o ile a thoma go kopanela le phuthego ya Bokriste ya Dihlatse tša Jehofa gomme a ba karolo ya lapa la moya, moo a ilego a ba le maikwelo a go amogelwa  le go ratwa ke ba bangwe. Ruri, Beibele ke e holago ka tsela e šomago le e kgotsofatšago maikwelong.

Gopola gore Jehofa o bona seo se lego ka dipelong tša rena gomme o tseba seo re se nyakago. Modimo “ó hlatha dipelo” e bile o nea “motho tše di lebanexo ’tsela tš’axwe.”​—Diema 21:2; Jeremia 17:10.

Keletšo e Šomago Bophelong bja Lapa

Beibele e nea keletšo e šomago mabapi le ditaba tša ditswalano tša batho. George o re: “Dithulano tša semelo goba go se kwešišane di gare ga maemo a gateletšago bophelong.” O lebeletšana bjang le tšona? “Ge e ba ke ikwa gore motho yo mongwe o na le se itšego malebana le nna, ke diriša keletšo ye e lebanyago yeo e lego go Mateo 5:23, 24, [NW] e rego: ‘Dira khutšo le ngwaneno.’ Taba e bonolo ya gore ke kgona go bolela ka thulano e tšweletša dipoelo. Ke kgona go kwa khutšo ya Modimo yeo Beibele e bolelago ka yona. E a šoma. Ke e šomago kudu.”​—Ba-Filipi 4:6, 7.

Ge e ba monna le mosadi ba sa dumelelane, bobedi ba swanetše gore ba “akxofišê xo kwa, [ba] diêxê xo bolêla, [ba] diêxê xo xalefa.” (Jakobo 1:19) Keletšo e bjalo e kaonefatša poledišano. George o oketša ka gore: “Ge ke diriša keletšo ya gore ke rate le go swara mosadi wa-ka go etša ka mokgwa woo ke ithatago ka wona, ke bona mafelelo a kapejana. Go ba bonolo go yena gore a ntlhomphe.” (Ba-Efeso 5:28-33) Ee, Beibele e re ruta kamoo re ka lemogago le go lebeletšana le mafokodi a rena ka gona le kamoo re ka atlegago ka gona go lebeletšaneng le a ba bangwe.

Keletšo Yeo e Swarelelago

Kgoši e bohlale Salomo e itše: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Diema 3:5, 6) Mantšu ao ke ao a sa raraganago, lega go le bjalo ke a matla gakaakang!

Beibele ke tutuetšo ya go dira botse. E dira gore barati ba Modimo ba kgone go fetoša maphelo a bona gore a dumelelane le thato ya gagwe le go hwetša lethabo e le “ba ba sepelago melaong ya Jehofa.” (Psalme 119:1, PK) Go sa šetšwe gore maemo a rena ke afe, Beibele e na le tlhahlo le keletšo tšeo re di nyakago. (Jesaya 48:17, 18) E bale ka mehla, naganišiša ka seo o se balago gomme o se diriše. E tla boloka monagano wa gago o hlwekile e bile o sekametše dilong tšeo di hlwekilego le tše agago. (Ba-Filipi 4:8, 9) O tla ithuta e sego feela kamoo o ka phelago le go thabela bophelo eupša gape le kamoo o ka ratago Mmopi wa bophelo.

Ka go latela tsela e bjalo, Beibele e tla ba seo se fetago feela puku e botse go wena​—go swana le ge e bile bjalo go ba bangwe ba dimilione. Ruri e tla ipontšha e le puku ya go ithuta ya bophelo!

[Seswantšho go letlakala 6]

Beibele e matlafatša phetho ya gago ya go fenya mekgwa e gobatšago

[Seswantšho go letlakala 7]

Beibele e go ruta kamoo o ka batamelago kgaufsi le Modimo