Jehofa o Matlafatša yo a Lapilego

“Ba ba lapilexo [Jehofa] ó ba nea matla, ba ba fôkôlaxo ó ba kxoniša tše ntši.”​—JESAYA 40:29.

1. Bontšha matla ao a lego dilong tšeo Modimo a di bopilego.

JEHOFA ke yo a sa lekanywego ka matla. Gona go na le matla a magolo gakaakang dilong tšeo a di bopilego! Athomo e nyenyane​—yona kago ya dilo ka moka​—ke e nyenyane kudu mo e lego gore lerothi la meetse le na le diathomo tše dibilione tše lekgolo. * Bophelo ka moka lefaseng la rena bo ithekgile ka matla ao a tšweletšwago ke dikarabelo tša diathomo letšatšing. Eupša go nyakega matla a makaaka’ng a letšatši bakeng sa go thekga bophelo bja lefaseng? Lefase le amogela feela tekanyo e nyenyane kudu ya matla ka moka ao a tšweletšwago ke letšatši. Lega go le bjalo, setsebi sa dipalo Mohlomphegi Fred Hoyle pukung ya gagwe ya Astronomy o boletše gore tekanyo e nyenyane kudu ya matla a letšatši ao a welago lefaseng ke yeo e sa lekanywego go feta matla ka moka ao a dirišwago diintasetering tša lefase.

2. Ka kakaretšo, ke eng seo Jesaya 40:26 e se bolelago mabapi le matla a Jehofa?

² Go sa šetšwe gore re nagana ka athomo goba re lebiša tlhokomelo ya rena legohleng le legolo kudu, re kgahlišwa ke matla a magolo a Jehofa. Ga go pelaelo gore o be a ka re: “Llalang Le bônê tša kwa xodimo; ké mang e a di hlodilexo, a di nthša byalo ka mohlape wo o badilwexo? a di  bitša tšohle ka maina, mo xo boati byo bokaakaa xwa se hlôkwê le setee, ka xobane è le yo matla a maxolo”! (Jesaya 40:26) Ee, Jehofa ke yo “mogolo ka matla,” (NW) gomme ke Mothopo wa “matla a maxolo” ao a dirišitšwego go dira gore legohle ka moka le be gona.

Go Nyakega Matla a Fetago a Tlwaelegilego

3, 4. (a) Ke dilo dife tše dingwe tšeo di ka re lapišago? (b) Ke potšišo efe yeo e nyakago go elwa hloko?

³ Le ge Modimo a se na matla a lekanyeditšwego, batho ba a lapa. Gohle moo re yago gona, re bona batho ba lapilego. Ba tsoga ba lapile, ba ya mošomong goba sekolong ba lapile, ba boa gae ba lapile gomme ba ya go robala ba se ba fo lapa eupša ba fedile. Ba bangwe ba kganyoga eka ba ka ya felwana-tsoko gomme ba ikhutše kamoo ba nyakago ka gona. Re le bahlanka ba Jehofa, le rena re a lapa, ka gobane bophelo bja rena bja boineelo go Modimo bo nyaka go katana ka matla. (Mareka 6:30, 31; Luka 13:24; 1 Timotheo 4:8) E bile go na le mabaka a mangwe a mantši ao a re fetšago matla.

⁴ Gaešita le ge re le Bakriste, ga re bao ba sa kgongwego ke mathata ao batho ba lebeletšanago le wona ka kakaretšo. (Jobo 14:1) Bolwetši, poela-morago go tša ditšhelete goba mathata a mangwe a tlwaelegilego bophelong a ka baka go nyama ka mafelelo a wona a fokodišago. Go tlaleletša go ditlhohlo tše ke diteko tše di makatšago go bao ba tlaišetšwago go loka. (2 Timotheo 3:12; 1 Petro 3:14) Ka lebaka la dikgateletšego tša letšatši le letšatši tša lefaseng le kganetšo modirong wa rena wa go bolela ka Mmušo, ba bangwe ba rena re ka lapa kudu moo e lego gore re ikwa re nyefiša tirelong ya Jehofa. Go feta moo, ka boiteko bja go roba potego ya rena go Modimo, Sathane Diabolo o diriša selo se sengwe le se sengwe seo a nago le sona. Ka gona, re ka hwetša bjang matla a moya ao a nyakegago bakeng sa gore re se ke ra lapa gomme ra tlogela?

5. Ke ka baka la’ng go nyakega matla a ka godimo ga a motho bakeng sa go phetha bodiredi bja Bokriste?

⁵ Bakeng sa matla a moya, re swanetše go ithekga ka Jehofa, Mmopi yo a nago le matla ka moka. Moapostola Paulo o bontšhitše gore bodiredi bja Bokriste bo tla nyaka mo go oketšegilego go feta matla a tlwaelegilego a batho ba sa phethagalago. O ngwadile gore: “Lehumô leo re le swere ka dibya tša letsopa; xore matla a maxolo e bê a Modimo, e sexo a rena.” (2 Ba-Korinthe 4:7) Bakriste ba tloditšwego ba phetha “bodiredi bja go bolela poelano” ka go thekgwa ke bagwera ba bona bao ba nago le kholofelo ya lefaseng. (2 Ba-Korinthe 5:18, PK; Johane 10:16; Kutollo 7:9) Ka ge rena batho ba sa phethagalago re dira modiro wa Modimo re lebeletšane le tlaišo, re ka se ke ra fo o dira ka matla a rena ka noši. Jehofa o re thuša ka moya wa gagwe o mokgethwa, gomme ka go rialo mafokodi a rena a godiša matla a gagwe. Le gona re homotšwa gakaakang ke kgonthišetšo ya gore “baloki ba tlo thêkxwa ke Morêna”!​—Psalme 37:17.

‘Jehofa ke Matla a Rena a Magolo’

6. Mangwalo a re kgonthišetša bjang gore Jehofa ke Mothopo wa rena wa matla?

⁶ Tatago rena wa legodimong ke yo “mogolo ka matla” gomme a ka re matlafatša gabonolo. Ge e le gabotse, re botšwa gore: “Ba ba lapilexo [Jehofa] ó ba nea matla, ba ba fôkôlaxo ó ba kxoniša tše ntši. Masoxana a a lapa a kxathala, le ba matla ba a kxopya ba wa. Xe e le baholofedi ba Morêna bôná ba fiwa matla a mafsa, ba hlatloxa bo-ka nong; ba kxanyêla bà sa lape, ba sepela bà sa fêle matla.” (Jesaya 40:29-31) Ka lebaka la dikgateletšo tše di oketšegago, ka dinako tše dingwe re ka ikwa bjalo ka mokitimi yo a lapilego yo maoto a gagwe go bonalago a mo imela. Eupša lefelo leo go thopšago sefoka go lona lebelong la bophelo le kgaufsinyane, gomme ga se ra swanela go tlogela. (2 Koronika 29:11) Lenaba la rena, Diabolo, le dikologa “bo-ka tau e bôpaxo” gomme le nyaka go re thibela. (1 Petro 5:8) Anke re gopoleng gore ‘Jehofa ke matla a rena le kotse ya rena,’ gomme o dirile ditokišetšo tše dintši ‘bakeng sa go nea yo a lapilego matla.’​—Psalme 28:7.

7, 8. Go na le bohlatse bofe bja gore Jehofa o matlafaditše Dafida, Habakuku le Paulo?

⁷ Jehofa o ile a nea Dafida matla a nyakegago bakeng sa go tšwela pele a lebeletšane le mapheko a magolo. Ka gona, ka tumelo e tletšego le kgodišego, Dafida o ngwadile gore: “Ka Modimo re tlo [hwetša matla a magolo, NW]; ké Yêna a tl’o xo xatakêla manaba a rena.” (Psalme 60:12) Jehofa gape o ile a matlafatša Habakuku e le gore a ka  phetha kabelo ya gagwe e le moporofeta. Habakuku 3:19 e re: “Morêna Mong à bohle ké Yêna matla a-ka; ó mpha maoto a dithsêpê, ó nthsepediša mo ke phaxamaxo.” Gape seo se lemogegago ke mohlala wa Paulo, yo a ngwadilego gore: “Ke kxôna tšohle ka [Modimo] Eo a mphaxo matla.”​—Ba-Filipi 4:13.

⁸ Bjalo ka Dafida, Habakuku le Paulo, re swanetše go bontšha tumelo bokgoning bja Modimo bja go re matlafatša le matleng a gagwe a go re phološa. Re lemoga gore Morena yo a Phagamego Jehofa ke Mothopo wa rena wa “matla a magolo,” ga bjale anke re eleng hloko ditsela tše dingwe tšeo ka tšona re ka hwetšago matla a moya ditokišetšong tše Modimo a di dirago ka bontši.

Ditokišetšo tša Moya Bakeng sa go re Matlafatša

9. Ke tema efe yeo dikgatišo tša Bokriste di e kgathago bakeng sa go re fepa?

⁹ Go ithuta Mangwalo ka phišego ka thušo ya dikgatišo tša Bokriste go ka re matlafatša le go re thekga. Mopsalme o opetše ka gore: “Yo šexo ké monna eo a . . . [thabelago] molaô wa Morêna, molaô woo a o akanya mosexare le bošexo, a swana le sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.” (Psalme 1:1-3) Bjalo ka ge re swanetše go ja bakeng sa go boloka matla a mmele, re swanetše go ja dijo tša moya tšeo di newago ke Modimo ka Lentšu la gagwe le ka dikgatišo tša Bokriste bakeng sa go boloka matla a rena a moya. Ka gona, thuto e nago le morero le go naganišiša ke tša bohlokwa.

10. Ke neng moo re ka hwetšago nako ya go ithuta le go naganišiša?

¹⁰ Ke mo go putsago e le ka kgonthe go naganišiša ka “madiba a diphiri tša Modimo.” (1 Ba-Korinthe 2:10) Eupša re ka hwetša neng nako ya go naganišiša? Morwa wa Aborahama Isaka “ó be a tšwetše naxeng [e le gore a naganišiše, NW] è le mantšibua.” (Genesi 24:63-67) Mopsalme Dafida ‘o be a naganišiša ka Modimo ge a phafoga bošego.’ (Psalme 63:6) Re ka ithuta Lentšu la Modimo gomme ra naganišiša ka lona mesong, mantšiboa, bošego​—ge e le gabotse, nako e nngwe le e nngwe. Thuto e bjalo gotee le go naganišiša di lebiša go e nngwe ya ditokišetšo tša Jehofa tša moya tšeo di matlafatšago​—thapelo.

11. Ke ka baka la’ng re swanetše go bea bohlokwa bjo bogolo thapelong ya ka mehla?

¹¹ Thapelo ya ka mehla go Modimo e thuša go re matlafatša. Ka gona, anke re ‘phegeleleng thapelong.’ (Ba-Roma 12:12) Ka dinako tše dingwe, re swanetše go dira kgopelo e lebanyago bakeng sa bohlale le matla a nyakegago gore re lebeletšane le moleko ka katlego. (Jakobo 1:5-8) Gape anke re lebogeng le go tumiša Modimo ge re bona go phethagatšwa ga merero ya gagwe goba re bona gore o re matlafaleditše go tšwela pele tirelong ya gagwe. (Ba-Filipi 4:6, 7) Ge e ba re dula re le kgaufsi le Jehofa ka thapelo, le ka mohla a ka se ke a re lahla. Dafida o opetše ka gore: “Anthe, nna Mohlakodiši wa-ka ké Modimo.”​—Psalme 54:4.

12. Ke ka baka la’ng re swanetše go kgopela Modimo moya wa gagwe o mokgethwa?

¹² Tatago rena wa legodimong o a re matlafatša le go re tiiša ka moya wa gagwe o mokgethwa goba matla a šomago. Paulo o ngwadile gore: “Kè khunamêla Tata xo Mong wa rena Jesu Kriste . . . Xore ka lehumô la letaxô la xaxwe a Le fê xo tiêlêla matla mothong wa teng ka Môya wa xaxwe.” (Ba-Efeso 3:14-16) Re swanetše go rapelela moya o mokgethwa, re kgodišege gore Jehofa o tla re šegofatša ka wona. Jesu o itše: Ge e ba ngwana a kgopela hlapi, na tate yo lerato o tla mo nea noga? Ga go bjalo le gatee. Ka gona, o ile a phetha ka gore: “Xe ešita lena Le lexo ba babe [le go ba ba kgopo le go feta], Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo ó ba nea Môya o mokxêthwa.” (Luka 11:11-13) Anke re rapeleng ka kgodišego e bjalo gomme ka mehla re gopole gore bahlanka ba botegago ba Modimo ba ka “tiišwa matla” (PK) ka matla a moya wa gagwe.

Phuthego ke Thušo e Matlafatšago

13. Re swanetše go lebelela bjang diboka tša Bokriste?

¹³ Jehofa o re matlafatša ka diboka tša phuthego ya Bokriste. Jesu o itše: “Mo ba babedi le xe e le ba bararo ba kaxo phuthêxa ka Leina la-ka, Nna ke tlo ba xare xa bôná.” (Mateo 18:20) Ge Jesu a be a dira kholofetšo yeo, o be a bolela ka ditaba tšeo di nyakago go elwa hloko ke bao ba etelelago pele ka phuthegong. (Mateo 18:15-19) Lega go le bjalo, mantšu a gagwe a šoma kudu-kudu go diboka tša rena ka moka, dikopano tše dinyenyane le tše dikgolo, tšeo di bulwago le go phethwa ka thapelo leineng la gagwe. (Johane 14:14) Ka gona ke tokelo go ba gona dipokanong tše bjalo tša Bokriste, go sa šetšwe gore ke ba sego kae bao ba lego gona goba go e-na le ba dikete. Ka gona, anke re bontšheng tebogo bakeng sa ditiragalo tše tšeo di rulaganyeleditšwego go re matlafatša moyeng le go re tutueletša leratong le medirong e mebotse.​—Ba-Hebere 10:24, 25.

14. Ke mohola ofe wo re o hwetšago maitekong a bagolo ba Bakriste?

¹⁴ Bagolo ba Bakriste ba nea thušo ya moya le kgothatšo. (1 Petro 5:2, 3) Paulo o ile a thuša le go kgothatša diphuthego tšeo a bego a di hlankela, bjalo ka ge balebeledi ba basepedi ba dira lehono. Ge e le gabotse, o be a hlologela go ba le badumedi-gotee le yena e le gore go ka ba le go kgothatšana mo go agago. (Ditiro 14:19-22; Ba-Roma 1:11, 12) Anke ka mehla re bontšheng tebogo bakeng sa bagolo ba lefelong la gabo rena le balebeledi ba bangwe ba Bakriste, bao ba kgathago tema e kgolo bakeng sa go re matlafatša moyeng.

15. Badumedi-gotee le rena ka phuthegong ba ipontšha bjang e le “thušo e matlafatšago”?

¹⁵ Badumedi-gotee bao ba dirago phuthego ya rena e ka ba “thušo e matlafatšago.” (Ba-Kolose 4:10, 11, bapiša le NW.) Bjalo ka ‘bagwera ba kgonthe,’ ba ka re thuša dinakong tša kgateletšego. (Diema 17:17) Ka mohlala, ge bahlanka ba 220 ba Modimo ba be ba lokollwa kampeng ya tshwenyo ya Sachsenhausen ka tlase ga taolo ya Nazi ka 1945, ba ile ba lebeletšana le mosepelo wa dikhilomithara tše 200. Ba be ba sepela ka sehlopha, gomme bao ba lego matla kudu ba be ba goga bao ba fokolago ka dikarikana tše mmalwa. Mafelelo e bile afe? Mogwantong wa lehu wo o tšerego maphelo a bagolegwa ba kampeng ya tshwenyo ba fetago 10 000, ga go le o tee wa Dihlatse tša Jehofa yo a hwilego. Dipego tše bjalo tše di tšwelelago ka dikgatišong tša Watch Tower, go akaretša le Yearbook of Jehovah’s Witnesses le Dihlatse tša Jehofa​—Bagoeledi ba Mmušo wa Modimo, di hlatsela gore Modimo o matlafatša batho ba gagwe, e le gore ba se ke ba lesetša.​—Ba-Galatia 6:9. *

Go Matlafatšwa ke Bodiredi bja Rena bja Tšhemo

16. Go tšea karolo ka mehla bodireding go re matlafatša bjang moyeng?

¹⁶ Go tšea karolo ka mehla modirong wa go bolela ka Mmušo go re matlafatša moyeng. Modiro o bjalo o re thuša gore re lebiše tlhokomelo  Mmušong wa Modimo le go ba le pono ya bosafelego le ditšhegofatšo tša bjona. (Juda 20, 21) Dikholofetšo tša Mangwalo tšeo re bolelago ka tšona bodireding bja rena di re nea kholofelo gomme di ka re dira gore re ikemišetše bjalo ka moporofeta Mika, yo a itšego: “Rena re tlo fêla rè e-ya ka tsela ya Morêna Modimo wa rena ka mehla le xo ya xo ile.”​—Mika 4:5.

17. Ke ditšhišinyo dife tšeo di newago mabapi le dithuto tša legae tša Beibele?

¹⁷ Tswalano ya rena ka noši le Jehofa e a matlafatšwa ge re dutše re diriša Mangwalo kudu ge re ruta ba bangwe. Ka mohlala, ge o swara dithuto tša legae tša Beibele ka thušo ya puku ya Tsebo e Išago Bophelong bjo bo sa Felego, ke bohlale go bala le go ahla-ahla mangwalo a mmalwa ao a bontšhitšwego. Se se thuša morutwana gomme sa matlafatša kwešišo ya rena ka noši ya moya. Ge e ba morutwana a e-na le bothata bja go kwešiša taba ya Beibele goba seswantšho, karolo e fetago e tee ya thuto e ka dirišwa bakeng sa go akaretša kgaolo e tee ka pukung ya Tsebo. Re thaba gakaakang go lokišeletša gabotse le go dira boiteko bjo bo oketšegilego bakeng sa go thuša ba bangwe go batamela kgaufsi le Modimo!

18. Bontšha kamoo puku ya Tsebo e dirišwago ka gona ka katlego.

¹⁸ Ngwaga o mongwe le o mongwe, puku ya Tsebo e dirišwa ka mo go atlegago go thuša ba dikete go ba bahlanka ba Jehofa ba ineetšego, gomme se se akaretša ba bantši bao ba se nago setlogo sa Beibele. Ka mohlala, ge e be e sa le ngwana, monna wa mo-Hindu kua Sri Lanka o ile a kwa Hlatse e bolela ka Paradeise. Nywaga e mmalwa ka morago, o ile a ya go yena, gomme go se go ye kae monna wa gagwe a thoma thuto ya Beibele le yena. Ge e le gabotse, lesogana le be le e-tla bakeng sa thuto ka mehla, gomme puku ya Tsebo e ile ya fetšwa ka nako e kopana kudu. O ile a thoma go ba gona dibokeng, a ikaroganya le bodumedi bja gagwe bja kgale gomme a ba mogoeledi wa Mmušo. Ge a be a kolobetšwa, o be a šetše a swara thuto ya legae ya Beibele le motho yo a bego a tlwaelane le yena.

19. Ge re dutše re tsoma Mmušo pele, re ka kgodišega ka eng?

¹⁹ Go tsoma Mmušo pele go re tlišetša lethabo leo le matlafatšago. (Mateo 6:33) Gaešita le ge re lebeletšana le diteko tše di fapa-fapanego, re tšwela pele ka lethabo le ka phišego re tsebatša ditaba tše dibotse. (Tito 2:14) Bontši bja rena re fihlelela dinyakwa tša tirelo ya nako e tletšego ya bobulamadibogo, gomme ba bangwe ba hlankela moo go nyakegago thušo e kgolo kudu ya baebangedi. Go sa šetšwe gore re godiša dikgahlego tša Mmušo ka lethabo ka ditsela tše goba tše dingwe, re kgodišegile gore Jehofa a ka se ke a lebala modiro wa rena le lerato leo re le bontšhago bakeng sa leina la gagwe.​—Ba-Hebere 6:10-12.

Tšwela Pele ka Matla a Jehofa

20. Re ka bontšha bjang gore re lebelela go Jehofa bakeng sa matla?

²⁰ Ka mešego fela, anke re bontšheng gore re holofela Jehofa le go lebelela go yena bakeng sa matla. Re ka dira bjalo ka go ikhola ka mo go tletšego ka ditokišetšo tša moya tšeo a di dirago ka “molaki e a bôtêxaxo.” (Mateo 24:45) Thuto ya motho ka noši le ya phuthego ya Lentšu la Modimo ka thušo ya dikgatišo tša Bokriste, thapelo e tšwago pelong, thušo ya moya ya bagolo, mehlala e mebotse ya badumedi-gotee bao ba botegago le go tšea karolo ka mehla bodireding di gare ga ditokišetšo tše di matlafatšago tswalano ya rena le Jehofa le go re matlafaletša go phetha tirelo ya gagwe e kgethwa.

21. Baapostola Petro le Paulo ba ile ba bontšha bjang go nyakega ga matla a newago ke Modimo?

²¹ Go sa šetšwe bofokodi bja rena re le batho, Jehofa o tla re matlafaletša go dira thato ya gagwe  ge e ba re ithekga ka yena bakeng sa thušo. A hlokomela go nyakega ga thušo e bjalo, moapostola Petro o ngwadile gore: “Ge e mongwe e le modiredi, a dire ka matla ao Modimo a mo abelago ona.” (1 Petro 4:11, PK) Paulo o ile a bontšha go ithekga ga gagwe ka matla a neilwego ke Modimo ge a be a re: “Ké ka ’baka leo ke thabaxo diphokolong le mabothateng le thšexong le ditlaišexong, kè le tlalelong ka ’baka la Kriste; xobane xe ke fôkôla ké mo ke naxo le matla.” (2 Ba-Korinthe 12:10) Anke re bontšheng kgodišego e swanago gomme re iše tumišo go Morena yo a Phagamego Jehofa, yo a matlafatšago yo a lapilego.​—Jesaya 12:2.

[Mengwalo ya ka tlase]

O tla Araba Bjang?

• Ke ka baka la’ng batho ba Jehofa ba nyaka matla a fetago a tlwaelegilego?

• Ke bohlatse bofe bja Mangwalo bjo bo bontšhago gore Modimo o matlafatša bahlanka ba gagwe?

• Ke ditokišetšo dife tše dingwe tša moya tšeo Jehofa a di dirilego bakeng sa go re matlafatša?

• Re ka bontšha bjang gore re lebelela go Modimo bakeng sa matla?

[Dipotšišo tša Thuto]

 [Seswantšho go letlakala 12]

Tswalano ya rena ka noši le Jehofa e a matlafatšwa ge re dutše re diriša Beibele go ruta ba bangwe