Kamoo o ka Dirago Bagwera ka Gona

“GE O HWEDITŠE MOGWERA O TEE BOPHELONG O ŠOMILE; BA BABEDI KE BA BANTŠI; BA BARARO BA A HLOKWA.”​—Henry Brooks Adams.

POLELO e bjalo e šišinya gore bagwera ba kgonthe ba a hlokwa. Gantši dipolelo tše bjalo ka “Ga ke na yo nka retologelago go yena,” “Nka se bote motho le ge e le ofe,” goba “Mpša ya-ka ke mogwera wa-ka wa potego” di kwewa bathong bao ba lewago ke bodutu kudu bao ba tsomago bogwera.

Go dira le go boloka bogwera bjo bo swarelelago ke tlhohlo. Nyakišišo ya legoro le itšego la bao e ka bago bareki e utolotše gore “25 lekgolong ya badudi ba bagolo ba United States ba tlaišwa ke ‘bodutu bjo bošoro’ gomme . . . kua Fora seripa-gare sa batho se ile sa ikwa se le lekatana o šoro.” Go ata ga dihlopha tša go beana mabaka le mafelo a tša poledišano a computer le bontši bja dipapatšo tša dikuranta tša bao ba tsomago bagwera di bontšha gore batho ba duma go kopana le batho.

Dr. David Weeks, e lego setsebi sa tša tshepedišo ya megalatšhika ya monagano o re bodutu ga bo kgome feela boemo bja motho bja monagano eupša gape le bophelo bja gagwe bjo bobotse bja mmele. “Ke na le palo e phagamego kudu ya balwetši bao ba nago le tlalelo ya go tšhaba dilo le kgateletšego bao ba ka hlaloswago ba lewa ke bodutu. Go na le dikgokagano magareng ga bothata bja kgateletšego le bothata bja go lewa ke bodutu.”

Tlhalo le go arogana bophelong bja lapa di bakela batho bao ba oketšegilego kudu go iphelela ba nnoši. Nyakišišo yeo e dirilwego Brithania e phethile ka gore mathomong a lekgolo la bo-21 la nywaga, bontši bja ba ka bago 30 lekgolong ba baagi ba ditšhaba ba tla be ba le lapeng la motho o tee.

Mangwalo a buduletšwego a ile a bolela e sa le pele gore moya wa boithati o be o tla ata “mehleng ya bofêlô.” (2 Timotheo 3:1-5) Go bonala gore ba bantši ke bao ba nago le kgahlego kudu dilong tše di bonagalago,  tše bjalo ka ntlo goba koloi, goba mešomong ya bona go feta go hlagolela ditswalano le batho ba bangwe. Mongwadi Anthony Storr o re: “Go e na le go lebiša tlhokomelo go molekane le bana, maphelo a bona a theilwe mafelong a bona a mošomo.”

BAGWERA BA KGONTHE KE BA BOHLOKWA KUDU

Bohlokwa bja bophelo bja gago bo ithekgile kudu ka bohlokwa bja bagwera ba gago. Gantši bao ba phelago ba nnoši ga se ba thaba ka gobane ga ba na mogwera yo ba ka abelanago le yena dilo tša bona goba dikgopolo tša bona. Mantšu a a Jesu Kriste ke a therešo: “Lethabo la go nea le feta la go newa.” (Ditiro 20:35, NW) Se bušeletša therešo ye, sereti sa Leisemane George Byron se ngwadile gore: “Bohle bao ba tlago go hwetša lethabo, ba swanetše go le abelana le ba bangwe.”

Mogwera ke eng? Pukuntšu e hlalosa mogwera e le “yo a kgomaganego le yo mongwe ka maikwelo a borutho goba seriti.” Mogwera wa kgonthe a ka thuša go lebiša dikgopolo tša gago dilong tše holago. A ka go kgothatša le go go aga ge go nyakega. A ka ba a nyama gotee le wena. Kgoši Salomo o itše: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” (Diema 17:17) Le ge dilo tše di bonagalago gantši di lahlegelwa ke mohola wa tšona ge nako e dutše e e-ya, bogwera bja kgonthe bo a gola gomme bo a oketšega ge nako e dutše e tšwela pele.

Mangwalo a kgothaletša Bakriste go ‘katološa dipelo’ mabapi le maikwelo a bona a borutho. (2 Ba-Korinthe 6:13) Ke bohlale go batamela ba bangwe. Go Mmoledi 11:1, 2, re bala gore: “Boxôbê bya xaxo bo lahlêlê bodibeng; O tlo buša wa bo hwetša xò fetile mehla e mentši. Hlallêla ba-šupa le ba seswai; ka xobane xa O tsebe kotsi e tl’o xo wêla naxa.” Molao wo wa motheo o šoma bjang bogwereng? Ge e ba o hlagoletše bogwera le batho ba bantši, ba bangwe ba bona ba ka go thuša ge mathata a tšwelela.

Bagwera ba kgonthe ke tšhireletšo go wena ka tsela e itšego. Diema 27:6 e re: “Kxati ya monthati e a bôtêxa.” Gaešita le ge batho ba bantši ba ka go reta, ke bagwera ba kgonthe feela bao ba tlago go go naganela ka mo go lekanego bakeng sa go go bontšha phošo e šoro gomme ba go nea keletšo e agago ka tsela e lerato.​—Diema 28:23.

Bagwera ba go loka ba kgaufsi ba gare ga dimpho tšeo di hlokwago tšeo di ka tšweletšago tutuetšo e agago go wena. Go Ditiro kgaolo 10, re bala ka tiragalo bophelong bja mohlankedi wa madira a Roma Koronelio, yo a ilego a tsebišwa ke morongwa gore dithapelo tša gagwe di kwelwe. A letetše go etelwa ke moapostola Petro, Koronelio o be “a šetše a bileditše mmogo metswalo ya gagwe le ba e lego bagwera ba gagwe ba bohloko.” (PK) Bagwera bao ba pelo-bohloko ba Koronelio ba be ba le gare ga ba-Ntle ba mathomo bao ba sego ba bolotšwa ba go amogela ditaba tše dibotse le go tlotšwa ka moya o mokgethwa, ka tebelelo ya go buša le Kriste  Mmušong wa Modimo. A tšhegofatšo e kaakang bakeng sa bagwera ba pelo-bohloko ba Koronelio!​—Ditiro 10:24, 44.

Lega go le bjalo, o ka dira bagwera bjang? Beibele, yeo e nago le mo gontši mo e ka go bolelago mabapi le bogwera, e araba ka keletšo e šomago. (Bona lepokisi ka mo tlase.)

MOO O KA DIRAGO BAGWERA BA KGONTHE

Lefelo le lekaone kudu la go dira bagwera ba therešo le mabapi le phuthego ya Bokriste. Sa pele go tšohle, o ka ikhweletša sebaka sa go dira bagwera le Jehofa, Mmopi wa gago le Tatago wa legodimong le Jesu Kriste, Mophološi wa gago. Jesu yo a go laletšago go ba mogwera wa gagwe o itše: “Xa xo e a naxo le leratô le le fetišaxo la eo a xafaxo bophelô bya xaxwe ka ’baka la baxwêra ba xaxwe.” (Johane 15:13, 15) Ka go dira bagwera le Jehofa le Jesu Kriste, o ka kgonthišega gore ba tla go “[amogela] meaxong e lexo ya neng le neng.” Ee, bogwera le Jehofa le Jesu bo bolela bophelo bjo bo sa felego.​—Luka 16:9; Johane 17:3.

O ka hwetša bjang bogwera bja bona bjo borutho? Dinyakwa tša go ba moeng ka tenteng ya Jehofa bjalo ka yo mongwe wa bagwera ba gagwe di hlaloswa go Psalme 15. E lebelele ka Beibeleng, gomme o bale ditemana tše hlano tša psalme yeo. Go oketša moo, Jesu Kriste o itše: “Lena Le baxwêra ba-ka, xe Le dira tše ke Le laêlaxo tšôna.”​—Johane 15:14.

Ee, ka go ithuta le go diriša tlhahlo e tšwago ka Lentšung la Modimo Beibele ka kelohloko, o bontšha  gore o nyaka go ba mogwera wa Jehofa le Jesu. Go fihlelela se, gape o swanetše go ba gona ka mehla dibokeng tša Bokriste, moo tsebo ya Jehofa Modimo e rutwago gona. Ineele ka potego go theetšeng Jehofa, gomme o tla batamela kgaufsi le yena le Morwa wa gagwe.

Dibokeng gape o ka ba wa tlwaelana le batho bao ba ratago Jehofa le bao ba bontšhago dienywa tša moya​—lerato, lethabo, khutšo, go se fele pelo, botho, go loka, tumelo, bonolo le boitshwaro​—bophelong bja bona. (Ba-Galatia 5:22, 23) Ge e ba o nyaka e le ka kgonthe go dira bagwera le go tloša bodutu, gona e ba gona dibokeng tša Bokriste beke e nngwe le e nngwe. Go dira bjalo go go bea lefelong leo le swanetšego ka nako e swanetšego bakeng sa go hlagolela bogwera bjo bo swarelelago le batho ba Modimo bao ba šegofaditšwego.

BAGWERA BA KA MO GO SA FELEGO

Bogwera bja kgonthe ke mpho e kgahlišago e tšwago go Jehofa Modimo. E tšwelela semelong sa gagwe ka noši le popegong. Ka baka la moya wa gagwe o lerato le wa go nea kudu, o tladitše lefase ka dibopiwa tše bohlale tšeo o ka bago le bogwera le tšona. Tlwaelana le Bakriste-gotee. Ba kgothatše. Šoma le bona bodireding. Rapela le bona le go ba rapelela ka mehla. Ka go rialo o tla be o ekiša Jehofa le Morwa wa gagwe, Jesu Kriste.

Bogwera ke mpho yeo yo mongwe le yo mongwe a kgonago go e nea le go e amogela. Nakong e tlago yeo e lego kgaufsi, o tla ba le sebaka sa go oketša sehlopha sa gago sa bagwera. O ka dira bagwera le dimilione tšeo di phelago ga bjale, gotee le bao ba tšwago melokong e fetilego bao ba robetšego lehung, ba letetšego tsogo ge “lehu le ka se hlwê le e-ba xôna.” (Kutollo 21:4; Johane 5:28, 29) Dira boiteko gona bjale bja go ba le bogwera, gomme o dire bagwera le bao ba ratago Jehofa. Phegelela bogwera le Jehofa Modimo le Jesu Kriste ka go theetša Lentšu la Modimo leo le buduletšwego. Ka gona, o ka se hlwe o lewa ke bodutu gape go iša ka mo go sa felego.