Dipotšišo tše Tšwago go Babadi

Mosadi yo a botegago wa Mokriste o swanetše go gana go fihla bokgoleng bofe mogato wa tlhalo wo o thongwago ke molekane wa gagwe?

Ge lenyalo la batho le thoma, Modimo o itše monna le mosadi ba swanetše go ‘kgomarelana.’ (Genesi 2:18-24) Batho e bile ba sa phethagalago, e lego seo se feleleditšego ka mathata manyalong a mantši, eupša thato ya Modimo ke gore balekane ba sa swanetše gore ba kgomarelane. Moapostola Paulo o ngwadile gore: “Ba ba tšerexo ke ba laêla, è se nna, è le Morêna, xore mosadi a se kê a hlala monna. Xomme xe a ka hlala, a itulêlê à sa tšewe, xoba a boêlanê le monna wa xaxwe; le monna a se kê a hlala mosadi.”​—1 Ba-Korinthe 7:10, 11.

Mantšu a a bontšha gore gare ga batho ba sa phethagalago molekane ka nako e nngwe o phetha ka go tloga. Ka mohlala, Paulo o boletše gore ge e ba molekane a tloga, bobedi bja bona ba swanetše gore ba “itulêlê [ba] sa tšewe [goba go tšea].” Ka baka la’ng? Ka gore, molekane o tlogile eupša bobedi bjo bo sa dutše bo tlemagane gotee mahlong a Modimo. Paulo o be a ka bolela se ka gobane Jesu o beile tekanyetšo bakeng sa lenyalo la Bokriste gore: “Motho e a hlalaxo mosadi wa xaxwe, xe e se ka ’baka la bootswa [Segerika, por·neiʹa], ’me a tšea e mongwê, ó dira bootswa; le e a tšeaxo mohlalwa ó dira bootswa.” (Mateo 19:9) Ee, motheo feela bakeng sa tlhalo wo o fedišago lenyalo go ya ka Mangwalo ke “bootswa,” e lego boitshwaro bjo bo gobogilego bja dikopano tša botona le botshadi. Ka mo go lego molaleng, tabeng yeo Paulo a bego a bolela ka yona, balekane ka bobedi ga se ba kopanela boitshwarong bjo bo gobogilego, ka gona, ge monna goba mosadi a tloga, lenyalo ga se la fela ponong ya Modimo.

Ke moka Paulo o boletše ka boemo bjo Mokriste wa therešo a nago le molekane yo a sa dumelego. Ela hloko tlhahlo ya Paulo ge a re: “Xe xo ka hlala [“tloga,” NW] e a sa dumelexo, a a hlalê [“tloge,” NW]; ’me ngwana wešo xoba kxaetšedi ya rena xa b’a tlêngwa xe xo dutše byalo. Xe e le Modimo, Yêna ó re biletša moláong.” (1 Ba-Korinthe 7:12-16) Ke eng seo mosadi yo a botegago a ka se dirago ge monna wa gagwe yo a sa dumelego a mo tlogela a bile a nyaka go mo hlala ka molao?

Mosadi a ka bona go le kaone gore monna a dule le yena. A ka ba a sa dutše a mo rata, e bile a lemoga dinyakwa tša maikwelo gotee le tša botona le botshadi le go tseba gore yena le bana le ge e le bafe bao ba ka bago ba e-na le bona ba nyaka go hlokomelwa ka dilo tše di bonagalago. A ka ba a holofela gape gore, ge nako e dutše e e-ya monna wa gagwe o tla ba modumedi gomme a phološwa. Lega go le bjalo, ge e ba monna a gata megato ya go fediša lenyalo (motheong wo e sego wa mangwalo), mosadi a ka mo dumelela gore a “tloge” bjalo ka ge Paulo a ngwadile. Selo se swanago se tla šoma ge e ba monna yo a dumelago a nyaditše pono ya Modimo ya lenyalo gomme a phegelela go tloga.

Lega go le bjalo, boemong bjo bo bjalo go ka nyakega gore mosadi a itšhireletše gotee le bana. Bjang? A ka nyaka go dula a hlokomela bana ba gagwe ba rategago e le gore a ka tšwela pele a ba bontšha lerato la bomma, a ba nee tlwaetšo ya boitshwaro le go tsenya ka go bona tumelo yeo e theilwego dithutong tše dibotse tša Beibele. (2 Timotheo 3:15) Tlhalo e ka bea ditshwanelo tša gagwe kotsing. Ka gona, mohlomongwe a ka gata megato gore a emelwe ka mo go swanetšego pele ga balaodi bakeng sa go šireletša tshwanelo ya gagwe ya go hwetša bana ba gagwe le go kgonthišetša gore monna wa gagwe o tlamegile go hlokomela lapa leo a bego a le lahla. Mafelong a mangwe, mosadi yo a akaretšwago mogatong wa tlhalo a ka saena dipampiri tša molao tšeo di hlathollago ditokišetšo tša go hlokomela bana le thekgo ya tša ditšhelete ka ntle le go dumela tlhalo yeo monna wa gagwe a e nyakago. Go a mangwe mafelo, tsela yeo mantšu a dipampiri tše a beilwego ka yona a bontša gore o dumelelana le tlhalo; ka gona ge e ba monna wa gagwe a be a e-na le molato wa bohlotlolo, go saena ga mosadi dipampiri tše go tla bolela gore o a mo lahla.

Ba bantši motseng le phuthegong ba ka se tsebe ditaba ka botlalo, tše bjalo ka ge e ba tlhalo e hweditšwe motheong wa Mangwalo. Ka gona pele dilo di ka fihla bokgoleng bjoo, e be e tla ba bohlale gore mosadi a tsebiše molebeledi yo a okamelago ditaba le mogolo yo mongwe ka phuthegong (go ka ba kaone kudu ge e le ka go ngwala). Ka tsela yeo ditaba tšeo di tla ba gona ge go ka rotoga dipotšišo le ge e le dife​—ka nako yeo goba ka morago.

Anke re boeleng tlhalosong ya Jesu: “Motho e a hlalaxo mosadi wa xaxwe, xe e se ka ’baka la bootswa, ’me a tšea e mongwê, ó dira bootswa; le e a tšeaxo mohlalwa ó dira bootswa.” Ge e ba ge e le gabotse monna a be a e-na le molato wa boitshwaro bjo bo gobogilego bja dikopano tša botona le botshadi eupša a nyaka go dula a nyalane le mosadi wa gagwe,  mosadi (yo a se nago molato mohlaleng wa Jesu) o swanetše go kgetha ge e ba o a mo swarela le go kopanela malao a lenyalo goba go mo lahla. Ge e ba a ikemišeditše go mo swarela le go tšwela pele le monna wa gagwe wa molao, ga a šilafale boitshwarong ka go dira bjalo.​—Hosea 1:1-3; 3:1-3.

Ge e ba monna yo a gobogilego boitshwarong a nyaka tlhalo, mosadi a ka no ba a sa ikemišeditše go mo swarela a holofela gore o tla boa. Go ithekgile ka yena go dira phetho, go ithekgile ka letswalo la gagwe le boemo, ge e ba o tla lwantšhana le mogato wa gagwe wa tlhalo. Mafelong a mangwe mosadi yo a lwantšhanago le tlhalo a ka kgona go saena dipampiri tšeo di dumelelago go newa ga tlhokomelo ya bana le go hlokomelwa ka tša ditšhelete ka ntle le go bontšha gore o dumelelana le tlhalo; go saena ga gagwe dipampiri tše bjalo go ka se bontšhe gore o be a mo lahla. Lega go le bjalo, mafelong a mangwe mosadi yo a bolelago gore o lwantšhana le tlhalo a ka kgopelwa gore a saene dipampiri tšeo di bontšhago gore o dumelelana le tlhalo; go saena dipampiri tše bjalo go tla bontšha ka ntle le pelaelo gore o lahla monna wa gagwe yo a nago le molato.

Bakeng sa go phema kgonagalo ya go se kwešiše, e tla ba gabohlale gore mo tabeng ye le gona mosadi a nee baemedi ba phuthego lengwalo leo le bontšhago megato yeo e tšewago le maemo ao a sepedišanago le yona. A ka bolela gore o boditše monna wa gagwe gore o be a ikemišeditše go mo swarela le go ba mosadi wa gagwe. Seo se tla bontšha gore e hwetšwa ka ntle le go rata ga gagwe; go e na le go lahla monna wa gagwe, o be a sa ikemišeditše go mo swarela. Ka morago ga go bea taba molaleng ka mokgwa woo, gore o be a ikemišeditše go swarela le go dula le yena ba nyalane, go saena ga gagwe dipampiri tšeo di bontšhago feela kamoo ditaba tša ditšhelete le/goba ditaba tša tlhokomelo ya bana di swanetšego go lokišwa ka gona go ka se bontšhe gore o lahla monna wa gagwe. *

Ka morago ga ge a hlatsetše go ikemišetša ga gagwe go lebalela gaešita le ka morago ga tlhalo, yena goba monna wa gagwe ga se ba lokologa go ka nyalwa goba go nyala gape. Ge e ba yena, molekane yo a se nago molato yo go nyaka ga gagwe go swarela go gannwego, ka morago a phetha go mo lahla ka baka la boitshwaro bja gagwe bjo gobogilego, bobedi bja bona ba tla be ba lokologile. Jesu o bontšhitše gore molekane yo a se nago molato o na le tshwanelo ya go dira phetho e bjalo.​—Mateo 5:32; 19:9; Luka 16:18.

[Mengwalo ya ka tlase]