Emang ka Botlalo ka Kgodišego e Tiilego

“Ka mehla a katana legatong la lena dithapelong tša gagwe, e le gore mafelelong le ka ema ka botlalo le ka kgodišego e tiilego thatong ka moka ya Modimo.”​—BA-KOLOSE 4:12, NW.

1, 2. (a) Batho ba ka ntle ba ile ba lemoga’ng mabapi le Bakriste ba pele? (b) Puku ya Ba-Kolose e bontšha bjang go kgomega ga lerato?

BALATEDI ba Jesu ba be ba kgomega ka mo go tseneletšego ka barapedi gotee le bona. Tertullian (mongwadi wa lekgolong la bobedi le la boraro la nywaga C.E.) o ile a bolela ka botho bjo ba bego ba bo bontšha ditšhiwana, badiidi le batšofadi. Bohlatse bjoo bja lerato le le bontšhwago ka ditiro bo ile bja kgahla bao ba sa dumelego moo ba bangwe ba ilego ba ba ba bolela ka Bakriste ba re, ‘Bona kamoo ba ratanago ka gona.’

² Puku ya Ba-Kolose e bontšha go kgomega mo go bjalo ga lerato ga moapostola Paulo le mogwera wa gagwe Epafora ka banababo le dikgaetšedi ba Kolose. Paulo o ile a ba ngwalela gore: Epafora “ka mehla o katana legatong la lena dithapelong tša gagwe, e le gore mafelelong le ka ema ka botlalo le ka kgodišego  e tiilego thatong ka moka ya Modimo.” Ka 2001, Dihlatse tša Jehofa di tla diriša e le temana ya tšona ya ngwaga, mantšu a lego go Ba-Kolose 4:12 (NW): ‘Emang ka botlalo le ka kgodišego e tiilego thatong ka moka ya Modimo.’

3. Epafora o ile a rapelela dilo dife tše pedi?

³ O ka bona gore dithapelo tša Epafora tša go rapelela bao a bego a ba rata di na le dibopego tše pedi: (1) gore ‘mafelelong ba ka ema ka botlalo’ le (2) gore ba eme “ka kgodišego e tiilego thatong ka moka ya Modimo.” Tsebišo ye e ile ya akaretšwa ka Mangwalong bakeng sa go re hola. Ka gona ipotšiše, ‘Ke’ng seo nna ka noši ke swanetšego go se dira gore ke eme ka botlalo le ka kgodišego e tiilego thatong ka moka ya Modimo? Le gona ge ke dira bjalo, mafelelo e tla ba afe?’ Anke re boneng.

Katanelang go “Ema ka Botlalo”

4. Ba-Kolose ba be ba swanetše go ba ba “botlalo” ka kgopolo efe?

⁴ Epafora o be a kganyoga ka mo go tseneletšego gore banababo ba moya le dikgaetšedi ba Kolose ‘mafelelong ba eme ka botlalo.’ Lentšu le Paulo a le dirišitšego, leo mo le fetoletšwego e le “botlalo,” le ka ba le kgopolo ya go phethagala, go gola ka mo go feletšego goba go iphetša. (Mateo 19:21; Ba-Hebere 5:14; Jakobo 1:4, 25) Mohlomongwe o a tseba gore go ba ga motho Hlatse e kolobeditšwego ya Jehofa ga go bolele gore ke Mokriste yo a godilego ka mo go feletšego. Paulo o ile a ngwalela ba-Efeso, bao ba bego ba dula ka bodikela bja Kolose, gore badiši le barutiši ba leke go thuša “rena ka moka re bê re fihlêlê botee bya tumêlô le bya tsebô ya xo tseba Morwa wa Modimo, re fihlêlê senna ka botlalô, le boxolwane bya xo lekanêla botlalô bya Kriste.” Mafelong a mangwe Paulo o kgothaditše Bakriste gore ‘temogong e be ba bolo ka tlalo.’ (Mongwalo o sekamego ke wa rena.)​—Ba-Efeso 4:8-13; 1 Ba-Korinthe 14:20, NW.

5. Ke bjang re ka dirago botlalo pakane ya motheo?

⁵ Ge e ba ba bangwe kua Kolose ba be ba sešo ba gola ka mo go feletšego moyeng goba ba iphetša, seo e be e swanetše go ba pakane ya bona. Na se se swanago ga se sa swanela go ba sa therešo lehono? Go sa šetšwe gore re kolobeditšwe nywaga-someng e fetilego goba morago bjale, na re ka kgona go bona gore re tloga re tšwetše pele bokgoning bja rena bja go nea mabaka le tseleng yeo re naganago ka yona? Na re ela hloko melao ya motheo ya Beibele pele re dira diphetho? Na ditaba tšeo di lego mabapi le Modimo le tšeo di kgomago phuthego di tšwela pele e e-ba tše bohlokwa kudu maphelong a rena, go e na le go ba tša sewelo? Mo re ka se ke ra bontšha ditsela ka moka tšeo re ka bontšhago kgolo e bjalo ya go gola ka botlalo, eupša ela hloko mehlala e mebedi.

6. Ke karolong efe yeo go yona motho a ka kgonago go dira tšwelopele mabapi le go phethagala, go etša ge Jehofa a le bjalo?

⁶ Mohlala wa pele: A re re mohlomongwe re goletše tikologong yeo e nago le kgethollo goba lehloyo malebana le batho ba morafo o mongwe, setšhaba se sengwe goba tikologo e nngwe. Ga bjale re a tseba gore Modimo ga a bebe sefahlego le gore le rena ga se ra swanela go beba sefahlego. (Ditiro 10:14, 15, 34, 35) Phuthegong ya gabo rena goba tikologong, go na le batho ba setlogo sela se sengwe, ka  gona re gare ga bona. Lega go le bjalo, ke go fihla bokgoleng bofe mo re bolokago ka gare maikwelo a fošagetšego goba dipelaelo ka batho ba setlogo se bjalo? Na re ‘befelwa ka pela,’ ra akgofela go ba bao ba naganago selo seo se fošagetšego ge e ba yo mongwe wa setlogo se bjalo a dira phošo goba a re šitela go se nene? Ipotšiše, ‘Na ke swanetše go dira tšwelopele e oketšegilego mabapi le go ba le pono ya Modimo ya go se bebe sefahlego?’

7. Go ba ba tletšego re le Mokriste go ka akaretša go ba le pono efe ka ba bangwe?

⁷ Mohlala wa bobedi: Go ya ka Ba-Filipi 2:3, ga se ra swanela go dira “selô ka kxang le ka xo nyaka xo rêtwa. Sa [rena] a e bê xo ipoetša le xo phalana xo xodišaneng.” Re tšwela pele bjang tabeng ye? Motho yo mongwe le yo mongwe o na le mafokodi le moo a lego matla gona. Ge e ba nakong e fetilego re be re kgona go lemoga mafokodi a ba bangwe kapejana, na re dirile tšwelopele, ra se sa letela gore e be bao ba nyakago ba “phethagetše”? (Jakobo 3:2, NW) Ga bjale, go feta pele, na re kgona go bona​—gaešita le go nyaka​—ditsela tšeo ka tšona ba bangwe ba re phalago? ‘Ke swanetše go dumela gore kgaetšedi yo o mphala ka go se fele pelo.’ ‘Motho yo o bontšha tumelo e tiilego kudu.’ ‘Go bolela therešo, o mphala ka go ruta.’ ‘O na le bokgoni kudu tabeng ya go laola pefelo ya gagwe.’ Mohlomongwe ba-Kolose ba bangwe ba be ba swanetše go dira tšwelopele tabeng ye. Na re dira bjalo?

8, 9. (a) Ke ka kgopolo efe Epafora a ilego a rapelela ba-Kolose go “ema” ka botlalo? (b) ‘Go ema ka botlalo’ go bolela’ng mabapi le bokamoso?

⁸ Epafora o ile a rapelela gore ba-Kolose ba ‘eme ka botlalo.’ Ka mo go kwagalago, Epafora o be a rapela Modimo gore go fihla tekanyong yeo ka yona ba-Kolose e bego e le Bakriste ba botlalo, ba ipheditšego, bao ba godilego ka mo go feletšego, ba be ba tla “ema” goba ba dula ba le bjalo.

⁹ Re ka se ke ra akanya gore yo mongwe le yo mongwe yo a bago Mokriste, gaešita le yo a godilego, o tla dula a le bjalo. Jesu o itše morwa wa Modimo wa morongwa “ga se a ka a ema a tiile therešong.” (Johane 8:44, NW) Gomme Paulo o ile a gopotša ba-Korinthe ka ba bangwe ba nakong e fetilego bao ba bego ba ile ba hlankela Jehofa ka nako e itšego eupša ka morago ba palelwa. O ile a lemoša banababo ba tloditšwego ka moya gore: “E a rexo ke eme, a bônê xore a se kê a wa.” (1 Ba-Korinthe 10:12) Se se tiišetša thapelo ya gore ba-Kolose ‘mafelelong ba eme ka botlalo.’ Ge e šetše e le ba botlalo, ba godile ka mo go feletšego, ba be ba swanetše go phegelela, ba sa boele morago, ba lapa goba ba fapoga. (Ba-Hebere 2:1; 3:12; 6:6; 10:39; 12:25) Ka gona e tla ba ba “botlalo” letšatšing la go hlahlobja ga bona le kamogelong ya mafelelo.​—2 Ba-Korinthe 5:10; 1 Petro 2:12.

10, 11. (a) Epafora o re beetše mohlala ofe mabapi le thapelo? (b) Ka go dumelelana le seo Epafora a se dirilego, ke boikemišetšo bofe bjo o tla ratago go bo dira?

¹⁰ Re šetše re ahla-ahlile bohlokwa bja go rapelela ba bangwe ka maina, go ba bao ba lebanyago ge re kgopela Jehofa gore a ba thuše, a ba homotše, a ba šegofatše le go ba nea moya o mokgethwa. Dithapelo tša Epafora tša go rapelela ba-Kolose e be e le tša mohuta woo. Le gona, mantšung ao re ka hwetša​—e bile re swanetše go hwetša​—tšhišinyo e bohlokwa mabapi le seo re se tlišago go Jehofa ka thapelo mabapi le rena ka noši. Ka ntle le pelaelo, re swanetše go kgopela thušo ya Jehofa e le gore rena ka noši ‘mafelelong re eme ka botlalo.’ Na o a e rapelela?

¹¹ Ke ka baka la’ng o sa bolele boemo bja gago thapelong? Bolela le Modimo mabapi le tekanyo yeo ka yona o tšwetšego pele mabapi le go ba wa “botlalo,” yo a godilego ka mo go feletšego le yo a ipheditšego. Mo lope gore a go thuše go lemoga dikarolo tšeo go tšona o sa dutšego o swanetše go gola moyeng. (Psalme 17:3; 139:23, 24) Ka ntle le pelaelo, o na le tšona dikarolo tše bjalo. Ke moka, go e na le go nyema moko ka baka la se, lopa Modimo ka mo go kwagalago, ka mo go lebanyago bakeng sa thušo ya go tšwela pele. Dira se ka makga a fetago le tee. Ge e le gabotse, ke ka baka la’ng o sa ikemišetše gore beke e tlago o rapele go fihla bokgoleng bjo itšego gore ‘mafelelong o eme ka botlalo.’ Gomme ikemišetše go dira se ka mo go oketšegilego ge o hlahloba temana ya nywaga. Dithapelong tša gago, lebiša tlhokomelo ditshekamelong tšeo o ka bago o e-na le tšona tša go boela morago, go lapa goba go fapoga tirelong ya Modimo le gore ke bjang o ka phemago go dira seo.​—Ba-Efeso 6:11, 13, 14, 18.

Rapelela Kgodišego e Tiilego

12. Ke ka baka la’ng ba-Kolose ka mo go kgethegilego ba be ba nyaka “kgodišego e tiilego”?

¹² Epafora gape o ile a rapelela selo se sengwe seo se bego se le bohlokwa ge e ba ba-Kolose mafelelong ba be ba tla hwetšwa ba eme e le ba amogelegago go Modimo. Ke sa bohlokwa ka mo go swanago go rena. E be e le eng? O ile a rapelela gore ba eme “ka kgodišego e tiilego thatong ka moka ya Modimo.” Ba be ba dikologilwe ke bahlanogi le difilosofi  tšeo di jago, tšeo tše dingwe tša tšona di bego di e-na le ponagalo e forago ya borapedi bja therešo. Ka mohlala, ba be ba gatelelwa gore ba boloke matšatši a kgethegilego ka go ikona dijo goba go bina menyanya, bjalo ka ge go kile gwa nyakega borapeding bja ba-Juda. Barutiši ba maaka ba ile ba lebiša tlhokomelo go barongwa, meoya yela e matla yeo e dirišitšwego go tliša Molao go Moše. Akanya o le ka tlase ga dikgateletšo tša mohuta woo! Go be go e-na le dikgopolo tša bontši bjo bo gakantšhago tše di thulanago.​—Ba-Galatia 3:19; Ba-Kolose 2:8, 16-18.

13. Ke go lemoga ntlha efe mo go bego go ka thuša ba-Kolose, gomme seo se ka re thuša bjang?

¹³ Paulo o ile a ganetša ka go gatelela tema ya Jesu Kriste. “Xe Le amoxetše Kriste Jesu Morêna, swarang tsela Lè le ba xaxwe, Le bê ba ba tsemilexo medu, ba ba axilwexo xodimo xa xaxwe, ba ba tiilexo tumelong ka mo Le rutilwexo ka xôna.” Ee, go be go nyakega (go ba-Kolose le go rena) go kgodišega ka botlalo mabapi le tema yeo Kriste a e kgathago morerong wa Modimo le bophelong bja rena. Paulo o hlalositše gore: “Mo xo Yêna ké mo xo axilexo botlalô bya xo ba Modimo ka lebopô la mmele. Xomme le lena Le ba botlalô ka Yêna, e lexo Yêna Hlôxô ya boxoši byohle le mebušô yohle.”​—Ba-Kolose 2:6-10.

14. Ke ka baka la’ng kholofelo e be e le selo sa kgonthe go bao ba lego Kolose?

¹⁴ Ba-Kolose e be e le Bakriste ba tloditšwego ka moya. Ba be ba e-na le kholofelo e tiilego, bophelo magodimong gomme ba be ba e-na le mabaka ka moka a go boloka kholofelo yeo e tagile. (Ba-Kolose 1:5) E be e le “thato ya Modimo” gore ba be le kgodišego e tiilego mabapi le go ba ga kgonthe ga kholofelo ya bona. Na go na le yo mongwe wa bona yo a bego a swanetše go belaela kholofelo yeo? Le gatee-tee! Na e swanetše go ba mo go fapanego lehono go bohle bao ba nago le tebelelo yeo ba e neilwego ke Modimo ya bophelo paradeiseng ya lefaseng? Ruri ga go bjalo! Kholofelo yeo ya kgonthe ka mo go kwagalago ke karolo ya “thato ya Modimo.” Ga bjale, ela hloko dipotšišo tše: Ge e ba o katanela go ba yo mongwe wa “lešaba le lexolo” leo le tlago go phologa ‘masetla-pelo a magolo,’ kholofelo ya gago ke ya kgonthe gakaaka’ng? (Kutollo 7:9, 14) Na ke karolo ya ‘kgodišego ya gago e tiilego thatong ka moka ya Modimo’?

15. Paulo o ile a latelanya lelokelelo lefe leo le bego le akaretša kholofelo?

¹⁵ Ka “kholofelo” ga re bolele ka lehutšo le le sa kwagalego goba boikgopolelo. Re ka bona se ka lelokelelo la dintlha tšeo Paulo a ilego a di nea ba-Roma pejana. Lelokelelong leo, selo se sengwe le se sengwe seo se boletšwego se kgokagana le se se latelago goba se lebiša go sona. Lebiša tlhokomelo moo Paulo a beago “kholofêlô” gona mabakeng ao a a neago: “Re kxanthša le ditlaišêxô rè tseba xore di tšweletša kxôtlêlêlô, kxôtlêlêlô ya tlo tšweletša pôtêxô [“boemo bjo bo amogelegago,” NW]; pôtêxô [“boemo bjo bo amogelegago”] ya tlo tšweletša kholofêlô. Xomme kholofêlô xa e lahletše, ka xe leratô la Modimo le thšolletšwe dipelong tša rena ka Môya o mokxêthwa wo re o filwexo.”​—Ba-Roma 5:3-5.

16. Ge o be o ithuta therešo ya Beibele, ke kholofelo efe yeo o e hweditšego?

¹⁶ Ge Dihlatse tša Jehofa di be di abelana molaetša wa Beibele le wena la mathomo, therešo e itšego e swanetše go ba e ile ya go kgahla, e bjalo ka boemo bja bahu goba tsogo. Go ba bantši, selo se segolo se sefsa seo ba ilego ba se lemoga e bile tebelelo e theilwego Beibeleng ya bophelo paradeiseng ya lefaseng. Gopola ge o be o e-kwa thuto yeo la mathomo. A kholofelo e kgahlišago gakaakang​—bolwetši le botšofadi di ka se hlwe di e-ba gona, o ka phela go ya go ile bakeng sa go thabela dienywa tša boitapišo bja gago, gomme go tla ba le khutšo le diphoofolo! (Mmoledi 9:5, 10; Jesaya 65:17-25; Johane 5:28, 29; Kutollo 21:3, 4) O hweditše kholofelo e kgahlišago gakaakang!

17, 18. (a) Ke bjang lelokelelo leo Paulo a le neilego ba-Roma le lebišago kholofelong? (b) Ke mohuta ofe wa kholofelo woo go bolelwago ka wona go Ba-Roma 5:4, 5, gomme na o na le yona?

¹⁷ Ge nako e dutše e tšwela pele, o swanetše go ba o ile wa lebeletšana le kganetšo goba tlaišo. (Mateo 10:34-39; 24:9) Gaešita le mehleng yeno, Dihlatse dinageng tše di fapa-fapanego magae a tšona a ile a phuruphutšwa goba tša gapeletšwa go ba bafaladi. Tše dingwe di ile tša hlaselwa mmeleng, dipuku tša tšona tša Beibele tša thopša goba tša ba bahlaselwa ba dipego tša maaka ditabeng. Go sa šetšwe mohuta le ge e le ofe wa tlaišo wo o ka bago o ile wa lebeletšana le wona, bjalo ka ge Ba-Roma 5:3 e bolela, o kgonne go thaba tlaišegong, gomme se se bile le mafelelo a mabotse. Bjalo ka ge Paulo a ngwadile, tlaišego e tšweleditše kgotlelelo ka go wena. Ke moka kgotlelelo ya lebiša boemong bja go amogelwa. O ile wa tseba gore o be o dira seo se lokilego, o dira thato ya Modimo, ka gona o ile wa ikwa o kgodišegile gore o be a go amogela. Go ya ka mantšu  a Paulo, o ile wa ikwa o le ‘boemong bja go amogelega.’ Ge a tšwela pele, Paulo o ngwadile gore ‘boemo bjo bo amogelegago bo tšweletša kholofelo.’ Seo se ka bonagala se sa tlwaelega. Ke ka baka la’ng Paulo a ile a lokeletša “kholofêlô” kgole gakaakaa lelokelelong? Na e be e se kgale kudu pele ga moo o e-na le kholofelo, ge o be o e-kwa ditaba tše dibotse la mathomo?

¹⁸ Ka mo go kwagalago, Paulo mo ga a bolele ka maikwelo a rena a mathomo a kholofelo ya bophelo bjo bo phethagetšego. Seo a bolelago ka sona se feta seo; ke seo se tseneletšego, seo se tutuetšago kudu. Ge re kgotlelela ka potego gomme re lemoga gore re amogelwa ke Modimo, se se na le mafelelo a tseneletšego a go tlaleletša kholofelong ya rena ya mathomo le go e matlafatšeng. Kholofelo yeo re  bilego le yona bjale e ba ya kgonthe kudu, e tiilego kudu le yeo e re anago hlogo kudu. Kholofelo ye ye e tseneletšego e phadima kudu. E re aparetša ka mo go feletšego, seka se sengwe le se sengwe sa rena. “Xomme kholofêlô xa e lahletše, ka xe leratô la Modimo le thšolletšwe dipelong tša rena ka Môya o mokxêthwa wo re o filwexo.”

19. Ke bjang kholofelo ya gago e swanetšego go ba karolo ya dithapelo tša gago tša ka mehla?

¹⁹ E be e le ka thapelo ya Epafora e tšwago pelong gore banababo le dikgaetšedi ba Kolose ba dule ba kgongwa e bile ba kgodišega ka seo se lego ka pele ga bona, ba e-na le “kgodišego e tiilego thatong ka moka ya Modimo.” Anke yo mongwe le yo mongwe wa rena ka mo go swanago a batamele Modimo ka mehla mabapi le kholofelo ya rena. Dithapelong tša gago tša motho ka noši, akaretša kholofelo ya gago mabapi le lefase le lefsa. Botša Jehofa kamoo o e hlologelago ka gona, ka kgodišego e tletšego gore e tla tla. Mo lope gore a go thuše go nweletša le go godiša kgodišego ya gago. Bjalo ka ge Epafora a ile a rapela gore ba-Kolose ba be le “kgodišego e tiilego thatong ka moka ya Modimo,” le wena dira se se swanago. Dira bjalo leboelela.

20. Ge e ba ba sego kae kudu ba fapoga tseleng ya Bokriste, ke ka baka la’ng se se sa swanela go ba lebaka la go nyema moko?

²⁰ Ga se wa swanela go šitišwa goba wa nyemišwa moko ke taba ya gore ga se bohle bao ba emago ka botlalo le ka kgodišego e tiilego. Ba bangwe ba ka palelwa, ba fapošwa goba ba lapa. Seo se ile sa direga gare ga bao ba bego ba le kgaufsi kudu le Jesu, baapostola ba gagwe. Eupša ge Judase a be a fetoga moeki, na baapostola ba bangwe ba ile ba nyefiša goba ba tlogela? Ga go bjalo le gatee! Petro o ile a diriša Psalme 109:8 go bontšha gore yo mongwe o be a tla tšea sebaka sa Judase. Yo mongwe o ile a kgethwa, gomme babotegi ba ba sa kwanantšhego ba Modimo ka mafolofolo ba ile ba tšwela pele ka kabelo ya bona ya boboledi. (Ditiro 1:15-26) Ba be ba ikemišeditše go ema ka botlalo ka kgodišego e tiilego.

21, 22. Go ema ga gago ka botlalo ka kgodišego e tiilego go tla lemogwa ka kgopolo efe?

²¹ O ka kgodišega e le ka kgonthe gore go ema ga gago ka botlalo ka kgodišego e tiilego thatong ka moka ya Modimo go tla elwa hloko. Go tla bonwa gomme gwa thabelwa. Ke mang?

²² Ke therešo gore banabeno le dikgaetšedi bao ba go tsebago le go go rata ba tla lemoga. Gaešita le ge ba bantši ba sa bolele seo ka mantšu, mafelelo e tla ba a swanago le ao re a balago go 1 Ba-Thesalonika 1:2-6 gore: “Re Le leboxêla xo Modimo ka mehla xe re Le xopola dithapelong tša rena. Xe re le pele xa Modimo Tata wešo, xa re kxaotše xo xopola modirô wa lena wa tumêlô, xe Le itapiša ka tša leratô, Lè kxôtlêlêla Lè holofetše Mong wa rena Jesu Kriste. . . . Ka xe Ebangedi ya rena e sa ka Ya Le tlêla ka polêlô fêla; e Le tletše ka matla le ka Môya-mokxêthwa ka mokxwa o kxodišaxo ruri . . . Lena la tla la ba baetši ba rena le ba Morêna.” Bakriste bao ba botegago ka go se kwanantšhe bao ba go dikologilego ba tla ikwa ka mo go swanago ge ba lemoga gore o ‘eme ka botlalo le ka kgodišego e tiilego thatong ka moka ya Modimo.’​—Ba-Kolose 1:23.

23. Ngwageng wo wo o tlago, boikemišetšo bja gago e swanetšego go ba bofe?

²³ Bjalo ka ge go kgonthišeditšwe, Tatago wa legodimong o tla bona gomme o tla thaba. Kgodišega ka seo. Ka baka la’ng? Ka gobane o eme ka botlalo le ka kgodišego e tiilego “thatong ka moka ya Modimo.” Paulo o ile a ngwalela ba-Kolose ka mo go kgothatšago mabapi le go sepela ga bona ka go “kxahla [Jehofa] xohle, le xo enywa dienywa ka medirô e botse yohle.” (Ba-Kolose 1:10) Ee, go a kgonega go batho bao ba sa phethagalago gore ba mo kgahliše ka botlalo. Banabeno le dikgaetšedi ba ba-Kolose ba dirile bjalo. Bakriste bao ga bjale ba go dikologilego ba dira bjalo. Le wena ka mo go swanago o ka dira bjalo! Ka gona, ngwageng wo wo o tlago, anke dithapelo tša gago tša letšatši le letšatši le ditiro tša gago tša ka mehla di hlatsele gore o ikemišeditše gore ‘mafelelong o eme ka botlalo le ka kgodišego e tiilego thatong ka moka ya Modimo.’

Na o ka Gopola?

• Ke’ng seo se akaretšwago ‘go emeng ga gago ka botlalo’?

• Ke dilo dife tšeo di lego mabapi le wena ka noši tšeo o swanetšego go di akaretša thapelong?

• Bjalo ka ge go šišintšwe go Ba-Roma 5:4, 5, ke mohuta ofe wa kholofelo wo o nyakago go ba le wona?

• Thuto ya rena e go tutueleditše go ba le pakane efe ngwageng o tlago?

[Dipotšišo tša Thuto]

[Seswantšho go letlakala 20]

Epafora o ile a rapelela gore banababo ba eme ka botlalo, ka kgodišego e tiilego mabapi le Kriste le kholofelo ya bona

[Diswantšho go letlakala 23]

Kholofelo ya gago e kgonthišeditšwego le kgodišego e tiilego ba bangwe ba dimilione le bona ba na le tšona