Thuša ba Bangwe go Sepela ka mo go Swanelago Jehofa

“Xa re kxaotše xo Le rapêlêla le xo Le kxopêlêla xore Le . . . swarê ka tsela ye e loketšexo ba Morêna, e bê xo mo kxahla xohle, le xo enywa dienywa ka medirô e botse yohle.”​—BA-KOLOSE 1:9, 10.

1, 2. Ke’ng seo ka mo go kgethegilego e ka bago mothopo wa lethabo le kgotsofalo?

“RE DULA polaseng ka gare ga kharabane. Ka go boloka bophelo bja rena bo le bonolo, re hwetša nako e ntši ya go fihlelela batho ka ditaba tše dibotse. Re šegofaditšwe ka mo go humilego ka tokelo ya go thuša ba bantši gore ba neele maphelo a bona go Jehofa.”​—Banyalani, badiredi ba nako e tletšego Afrika Borwa.

² Na o ka se dumele gore go thuša ba bangwe go a thabiša? Ba bangwe ba leka ka mehla go thuša balwetši, bahloki goba ba lewago ke bodutu​—ba hwetša kgotsofalo ka go dira bjalo. Bakriste ba therešo ba kgodišegile gore go abelana le ba bangwe tsebo ya Jehofa Modimo le Jesu Kriste go bopa thušo e kgolo kudu yeo ba ka e neago. Ke se feela seo se ka lebišago ba bangwe go amogeleng topollo ya Jesu, ba hlagolela tswalano e botse le Modimo, gomme ba ba boemong bja go hwetša bophelo bjo bo sa felego.​—Ditiro 3:19-21; 13:48.

3. Ke mohuta ofe wa thušo wo o nyakago tlhokomelo ya rena?

³ Lega go le bjalo, go thwe’ng ka go thuša bao ba šetšego ba hlankela Modimo, bao ba latelago “Tsela”? (Ditiro 19:9, PK) Ka ntle le pelaelo, go ba kgahlegela ga gago ke mo gogolo go feta le ge e le neng, eupša mo gongwe o ka ba o sa bone kamoo o ka dirago mo go oketšegilego ka gona goba go nea thušo e tšwelago pele. Goba boemo bja gago bo ka bonagala bo lekanyetša go ba thuša ga gago, ka go rialo bo lekanyetša kgotsofalo yeo o ka e hwetšago. (Ditiro 20:35) Mabapi le dibopego tše ka bobedi, re ka ithuta pukung ya Ba-Kolose.

4. (a) Paulo o ile a ngwalela ba-Kolose a le ka tlase ga maemo afe? (b) Epafora o bile le letsogo bjang?

⁴ Ge moapostola Paulo a be a ngwalela Bakriste ba Kolose, o be a le Roma a golegilwe ka ngwakong, gaešita le ge a be a ka ba le baeng. Bjalo ka ge o be o tla letela, Paulo o ile a diriša tokologo ya gagwe e lekanyeditšwego go bolela ka Mmušo wa Modimo. (Ditiro 28:16-31) Paulo o be a ka etelwa ke Bakriste-gotee le yena, mohlomongwe ba bangwe ba bile ba golegilwe le yena ka dinako tše dingwe. (Ba-Kolose 1:7, 8; 4:10) Yo mongwe e be e le moebangedi yo a fišegago Epafora yo a tšwago motseng wa Kolose kua Firigia, naga-dimong ya ka bohlabela bja Efeso kua Asia Minor (Turkey ya mehleng yeno). Epafora o bile le letsogo go hlomeng phuthego kua Kolose, gomme o ile a šoma ka thata bakeng sa diphuthego tše di lego kgaufsi le Laoditsea le Hierapoli. (Ba-Kolose 4:12, 13) Ke ka baka la’ng Epafora a ile a ya go bona Paulo Roma, gomme re ka ithuta eng karabelong ya Paulo?

Thušo e Atlegago Bakeng sa Ba-Kolose

5. Ke ka baka la’ng Paulo a ile a ngwalela ba-Kolose seo a ba ngwaletšego sona?

⁵ Bakeng sa go ikopanya le Paulo mabapi le maemo phuthegong ya Kolose, Epafora o ile a tšea leeto le lapišago la go ya Roma. O ile a bega ka tumelo, lerato le maiteko a boebangedi a Bakriste bao. (Ba-Kolose 1:4-8) Lega go le bjalo, gape o swanetše go ba a ile a bolela ka go tshwenyega ga gagwe mabapi le ditutuetšo tše di fošagetšego tšeo di bego di beile boemo bja moya bja ba-Kolose kotsing. Paulo o ile a arabela ka lengwalo leo le buduletšwego leo le bego le ganetša tše dingwe tša dipono tšeo barutiši ba maaka ba bego ba di gaša. O ile a lebiša tlhokomelo ka mo go kgethegilego temeng ya motheo yeo Jesu Kriste a swanetšego go e kgatha. * Na thušo ya gagwe e be e le e lekanyeditšwego go gateleleng ditherešo tša motheo tša Beibele? O be a ka thuša ba-Kolose ka tsela efe e nngwe, gomme ke dithuto dife tšeo re ka ithutago tšona mabapi le go thuša ba bangwe?

6. Ke eng seo Paulo a ilego a se gatelela lengwalong la gagwe leo le yago go ba-Kolose?

⁶ Pejana lengwalong la gagwe, Paulo o neile temogo ka mohuta wa thušo wo re ka o hlokomologago. E be e le mokgwa wa go nea thušo o atlegago go tšwa kgole, Paulo le Epafora ba le kgole le Kolose. Paulo o tiišitše gore: “Modimo Tata xo Mong wa rena Jesu Kriste re mo leboxa ka mehla xe re Le rapêlêla [mongwalo wa ka tlase go NW, “go rapela ka mehla”].” Ee, tše e be e le dithapelo tše lebanyago tša go rapelela Bakriste ba Kolose. Paulo o okeditše ka gore: “Byale le rena, è sa le mola rè di kwa, xa re kxaotše xo Le rapêlêla le xo Le kxopêlêla xore Le tlatšwê tsebô ya xo tseba thatô ya xaxwe, Le bê le bohlale ka moka le thlaoloxanyô ya Môya.”​—Ba-Kolose 1:3, 9.

7, 8. Dithapelo tša rena tša motho ka noši le tša phuthego gantši di akaretša taba efe?

⁷ Re a tseba gore Jehofa ke “Mokwi wa dithapêlô,” ka gona re ka bota go dula ga gagwe a loketše go kwa dithapelo tša rena tšeo di newago ka go dumelelana le thato ya gagwe. (Psalme 65:2; 86:6; Diema 15:8, 29; 1 Johane 5:14) Lega go le bjalo, dithapelo tša rena di bjang ge go tliwa tabeng ya go rapelela ba bangwe?

⁸ Gantši re ka nagana le go rapela mabapi le ‘mokgatlo ka moka wa barwarre ba rena lefaseng.’ (1 Petro 5:9, NW) Goba re ka ya go Jehofa mabapi le Bakriste le ba bangwe tikologong yeo e hlasetšwego ke masetlapelo. Ge barutiwa ba lekgolong la pele la nywaga ba lefelong le lengwe ba be ba e-kwa ka tlala yeo e lego Judea, ba swanetše go ba ba ile ba rapelela banababo bona gantši-ntši gaešita le pele ga ge ba ka romela ditšhelete tša tlhakodišo. (Ditiro 11:27-30) Mehleng ya rena, dithapelo mabapi le borwarre ka moka goba mabapi le sehlopha se segolo sa banababo rena gantši di kwewa dibokeng tša Bokriste, moo ba bantši ba swanetšego go kwešiša gomme ba kgone go re “Amene.”​—1 Ba-Korinthe 14:16.

E-ba yo a Lebanyago Thapelong

9, 10. (a) Ke mehlala efe yeo e bontšhago gore go rapelela batho ba itšego ka go lebanya ke mo go swanetšego? (b) Ke bjang Paulo e bego e le yo a ithekgilego ka go rapelelwa ka go lebanya?

⁹ Lega go le bjalo, Beibele e re nea mehlala ya dithapelo tša go rapelela ba bangwe tšeo e bego e le tše di lebanyago kudu, di lebišitšwe go motho ka o tee ka o tee. Akanya ka polelo ya Jesu e begilwego go Luka 22:31, 32. O be a dikologilwe ke baapostola ba 11 ba botegago. Ka moka ga bona ba be ba tla nyaka thekgo ya Modimo dinakong tše thata tšeo di bego di le ka pele, gomme Jesu o ile a ba rapelela. (Johane 17:9-14) Go sa dutše go le bjalo, Jesu o ile a hlaola Petro, a lopela morutiwa yoo o tee ka go lebanya. Mehlala e mengwe: Elisha o ile a rapelela gore Modimo a thuše monna yo mongwe yo a itšego, modiredi wa gagwe. (2 Dikxoši 6:15-17) Moapostola Johane o ile a rapelela gore Gayo a tšwele pele gabotse mmeleng le moyeng. (3 Johane 1, 2) Le gona dithapelo tše dingwe di ile tša lebišwa dihlopheng tše itšego.​—Jobo 42:7, 8; Luka 6:28; Ditiro 7:60; 1 Timotheo 2:1, 2.

¹⁰ Mangwalo a Paulo a gatelela taba ya dithapelo tšeo di lebanyago kudu. O ile a kgopela gore a rapelelwe goba a rapelelwe gotee le bagwera ba gagwe. Ba-Kolose 4:2, 3 e balega ka gore: “Tiišang thapêlô. Le phakxamê mo xo yôna Lè leboxa. Le rena Le re rapêlêlê xore Modimo a re bulêlê mojakô wa Lentšu, xore xo bolêlwê sephiri sa Kriste, se nna ke tlemilwexo ka ’baka la sôna.” Ela hloko gape mehlala ye e mengwe: Ba-Roma 15:30; 1 Ba-Thesalonika 5:25; 2 Ba-Thesalonika 3:1; Ba-Hebere 13:18.

11. Epafora o be a rapelela bomang ge a be a le Roma?

¹¹ Go be go le bjalo le ka mogwera wa Paulo kua Roma. “Le dumedišwa ke Epafora wa xeno, . . . e a Le lwêlaxo ka dithapêlêlô ka mehla.” (Ba-Kolose 4:12) Lentšu leo le fetoletšwego e le ‘lwela’ le ka bolela “go katana,” bjalo ka sebapadi sa go laetša matla a mmele dipapading tša kgale. Na Epafora o be a rapela ka phišego feela mabapi le sehlopha sa lefaseng ka bophara sa badumedi goba gaešita le mabapi le barapedi ba therešo Asia Minor ka moka? Paulo o ile a bontšha gore Epafora o be a rapelela bao ba lego Kolose ka go lebanya. Epafora o be a tseba boemo bja bona. Ga re ba tsebe ka maina ka moka, le gona ga re tsebe mathata ao ba bego ba lebane le ona, eupša nagana ka tše dingwe tša dikgonagalo. Mohlomongwe Lino yo monyenyane o be a lwantšhana le tutuetšo ya difilosofi tšeo di bego di apareditše, gomme Rufo a ka ba a be a nyaka matla a go gana go  tanywa ke mekgwa ya gagwe ya kgale ya Bojuda. Ka ge a be a e-na le monna yo a sa dumelego, na Peresi o be a nyaka kgotlelelo le bohlale bakeng sa go godišetša bana ba gagwe Moreneng, gomme na Asinkrito yo a bego a tlaišwa ke bolwetši bjo bo sa alafegego o be a sa nyake khomotšo e oketšegilego? Ee, Epafora o be a tseba ba phuthegong ya gabo, gomme o ile a ba rapelela ka go tšwa pelong ka gobane yena gotee le Paulo ba be ba nyaka gore ba bjalo bao ba ineetšego ba sepele ka mo go swanelago Jehofa.

12. Ke bjang re ka bago bao ba lebanyago kudu dithapelong tša rena tša motho ka noši?

¹² Na o bona mohlala bakeng sa rena​—tsela ya gore re thuše ba bangwe? Bjalo ka ge go bontšhitšwe, dithapelo tša phatlalatša dibokeng tša Bokriste ke tša kakaretšo, ka baka la batheetši ba fapa-fapanego. Eupša dithapelo tša rena tša motho ka noši goba tša lapa e ka ba tšeo di lebanyago e le ka kgonthe. Gaešita le ge ka dinako tše dingwe re ka kgopela Modimo gore a hlahle le go šegofatša balebeledi ba basepedi ka moka goba badiši ba moya, na ka dinako tše dingwe re ka se bolele ka go lebanya? Ka mohlala, ke ka baka la’ng o sa rapelele molebeledi wa mosepedi yo a etelago phuthego ya geno ka leina goba moswari wa Thuto ya Puku ya Phuthego ya geno? Ba-Filipi 2:25-28 le 1 Timotheo 5:23 di bontšha go kgomega ga Paulo ka motho ka o tee ka o tee mabapi le boemo bja bophelo bja mmele bja Timotheo le Epafora. Na le rena ka mo go swanago re ka bontšha go kgomega mo go bjalo ka bao ba babjago bao re ba tsebago ka maina?

13. Ke maemong a mohuta ofe moo e lego mo go swanetšego gore ditaba tše di swanetšego di akaretšwe dithapelong tša motho ka noši?

¹³ Ke therešo gore re swanetše go phema go itsenya-tsenya ditabeng tša ba bangwe tša motho ka noši, eupša ke mo go swanetšego gore dithapelo tša rena di bontšhe go kgomega ga kgonthe ka bao re ba tsebago le bao re nago le taba le bona. (1 Timotheo 5:13; 1 Petro 4:15) Ngwanabo rena a ka be a lahlegetšwe ke mošomo wa gagwe, gomme re ka se kgone go mo nea o mongwe. Lega go le bjalo, re ka mmolela ka leina gomme ra lebiša tlhokomelo bothateng bja gagwe dithapelong tša rena tša motho ka noši. (Psalme 37:25; Diema 10:3) Na re hlokometše kgaetšedi yo a sa nyalwago yo a šetšego a gotše eupša a se na monna le bana ka baka la ge a ikemišeditše go nyalwa ‘feela Moreneng’? (1 Ba-Korinthe 7:39) Dithapelong tša gago tša motho ka noši, ke ka baka la’ng o sa kgopele Jehofa gore a mo šegofatše le go mo thuša go tšwela pele ka potego e sa kwanantšhego tirelong ya gagwe? E le mohlala o mongwe, bagolo ba babedi ba ka ba ba neile ngwanabo rena yo a dirilego phošo keletšo. Ke ka baka la’ng yo mongwe le yo mongwe wa bona a sa mmolele ka leina dithapelong tša bona tša motho ka noši nako le nako?

14. Dithapelo tše di lebanyago di tswalana bjang le go thuša ba bangwe?

¹⁴ Go na le dibaka tše dintši tša go ka akaretša batho ka o tee ka o tee bao o ba tsebago dithapelong tša gago tša motho ka noši, bao ba nyakago thekgo ya Jehofa, khomotšo le moya o mokgethwa goba le ge e le sefe sa dienywa tšeo di tšweletšwago ke go dira bjalo. Ka baka la bokgole goba maemo a mangwe, o ka ikwa o hlaelelwa ka thušo ya dilo tše di bonagalago goba e lebanyago yeo o ka e neago. Eupša o se ke wa lebala go rapelela banabeno le dikgaetšedi. O a tseba gore ba nyaka go sepela ka mo go swanelago Jehofa, eupša ba ka ba ba nyaka thušo e le ka kgonthe bakeng sa go dira bjalo ka mo go sa felego. Senotlelo sa go thuša ke dithapelo tša gago.​—Psalme 18:2; 20:1, 2; 34:15; 46:1; 121:1-3.

Katanela go Matlafatša ba Bangwe

15. Ke ka baka la’ng re swanetše go ba le kgahlego ka karolo e phethago ya Ba-Kolose?

¹⁵ Go ba gona, thapelo e tšwago pelong le e lebanyago ga se tsela e nnoši ya go thuša ba bangwe,  kudu-kudu bao ba lego kgaufsi le bao o ba ratago. Puku ya Ba-Kolose e hlalosa seo ka mo go kwagalago. Ditsebi tše dintši di dumela gore ka morago ga ge Paulo a neile tlhahlo mabapi le thuta-tumelo le keletšo e šomago, o ile a tlaleletša ka ditumedišo tša go dumediša motho ka o tee ka o tee. (Ba-Kolose 4:7-18) Ka mo go fapanego, re šetše re hweditše gore karolo ye ya mafelelo ya puku e na le keletšo e bohlokwa, gomme go na le mo gontši mo re ka ithutago gona karolong ye.

16, 17. Ke eng seo re ka se bolelago ka banababo rena bao go boletšwego ka bona go Ba-Kolose 4:10, 11?

¹⁶ Paulo o ngwadile gore: “Aristareko motlêngwa-ka-nna, le Mareka moswa wa Baranaba, yo Le kwilexo malaeledi à re: xe a ka tla xo lena Le mo amoxêlê, ba Le dumedišitše, Le Jesu e a bitšwaxo ka la Justo. Ké bôná ba e lexo ba lebollô. Ké bôná fêla ba e lexo badirišani ba-ka mmušong wa Modimo; ke rolwa pelo ke bôná.”​—Ba-Kolose 4:10, 11.

¹⁷ Paulo moo o ile a hlaola banababo rena ba itšego bao ba bego ba swanelwa ke go bolelwa ka mo go kgethegilego. O ile a re ba be ba le gare ga bao ba bolotšego, ba setlogo sa ba-Juda. Go be go e-na le ba-Juda ba bantši bao ba bolotšego Roma, gomme ba bangwe ga bjale e be e le Bakriste. Go sa dutše go le bjalo, bao Paulo a boletšego ka bona ba be ba ile ba mo thuša. Mohlomongwe ga se ba ka ba dika-dika go gwerana le Bakriste bao ba tšwago go ba-Ntle, gomme ba swanetše go ba ba ile ba kopanela ka lethabo le Paulo go boleleng go ba-Ntle.​—Ba-Roma 11:13; Ba-Galatia 1:16; 2:11-14.

18. Paulo o ile a reta bjang ba bangwe bao ba bego ba e-na le yena?

¹⁸ Ela hloko mantšu a Paulo a rego: “Ba fetogile thušo e matlafatšago go nna.” (NW) O ile a diriša lentšu la Segerika leo le tšwelelago gatee gona mo feela ka Beibeleng. Bafetoledi ba bantši ba le fetolela e le “khomotšo.” Lega go le bjalo, go na le lentšu le lengwe la Segerika (pa·ra·ka·le’o) leo ka mo go tlwaelegilego kudu le fetolelwago e le “khomotšo.”  Paulo o le dirišitše go gongwe lengwalong lona le, eupša e sego go Ba-Kolose 4:11.​—Mateo 5:4; Ditiro 4:36; 9:31; 2 Ba-Korinthe 1:4; Ba-Kolose 2:2; 4:8.

19, 20. (a) Moko wa polelwana yeo Paulo a ilego a e diriša go banababo rena bao ba ilego ba mo thuša kua Roma ke ofe? (b) Ke ka ditsela dife banababo rena bao ba ka bago ba ile ba thuša Paulo?

¹⁹ Bao Paulo a ilego a ba bitša ka maina ba swanetše go ba ba dirile se se fetago go nea khomotšo ya molomo. Lentšu la Segerika leo le fetoletšwego e le “thušo e matlafatšago” go Ba-Kolose 4:11, ka dinako tše dingwe le be le dirišwa ditemaneng tša lefase bakeng sa gore sehlare se fediše kgateletšego. New Life Version e balega ka gore: “Ba bile thušo e kgolo gakaakang go nna!” Today’s English Version e diriša polelwana e rego: “Ba bile thušo e kgolo go nna.” Ke eng seo banababo rena bao ba Bakriste ba bego ba le kgaufsi le Paulo ba ka bago ba se dirile bakeng sa go mo thuša?

²⁰ Paulo o be a ka ba le baeng, eupša go be go e-na le dilo tše dintši tšeo a bego a ka se di dire, tše bjalo ka go reka dinyakwa tša gagwe tša motheo​—dijo le diaparo bakeng sa marega. O be a tla hwetša bjang mangwalo a go phuthwa bakeng sa go ithuta goba go reka dilo tša go ngwala? (2 Timotheo 4:13) Na ga o kgone go akanya ka bana bao babo rena ba thuša Paulo ka dinyakwa tša gagwe, ba dira dilo tša motheo tše bjalo ka go mo rekela dilo goba go mo yela mo a nyakago go yelwa gona? A ka ba a be a nyaka go hlola le go kgothatša phuthego e itšego. Ka ge a be a golegilwe, o be a ka se kgone, ka gona bana bao babo rena ba ka ba ba be ba yela Paulo fao, ba iša melaetša gomme ba e-tla le dipego. E be e le mo go matlafatšago gakaakang!

21, 22. (a) Ke ka baka la’ng mantšu a Ba-Kolose 4:11 a swanetše go re kgoma? (b) Ke ditsela dife tše dingwe tšeo ka tšona re ka dirišago mohlala wa bao ba bego ba e-na le Paulo?

²¹ Seo Paulo a ilego a se ngwala mabapi le go ba “thušo e matlafatšago” se nea temogo mabapi le kamoo re ka thušago ba bangwe ka gona. Ba ka ba ba sepela ka mo go swanetšego Jehofa mabapi le ditekanyetšo tša gagwe tša boitshwaro, ba e-ba gona dibokeng tša Bokriste le go ba le karolo modirong wa boboledi. Ba swanelwa ke mantšu a rena a tebogo bakeng sa seo. Lega go le bjalo, na re ka dira mo go oketšegilego ka go ba ‘dithušo tše matlafatšago’ bjalo ka bao ba dirilego go Paulo?

 ²² Ge e ba o tseba kgaetšedi yo ka bohlale a swareletšego go 1 Ba-Korinthe 7:37 eupša yoo ga bjale a hlokago lapa leo le lego kgaufsi le yena, na o ka mo akaretša medirong e mengwe ya lapa, mohlomongwe go mo laleletša dijong goba go ba gona pokanong e nyenyane ya bagwera goba ba leloko? Go thwe’ng ka go mo laleletša go sepela le lapa la gago go ya kopanong goba maikhutšong? Goba mo kgopele go sepela le wena ka nako e swanetšego ge o e-ya go reka dijo. Go ka dirwa se se swanago ka bahlolo goba bahlologadi goba mohlomongwe bao ga bjale ba sa kgonego go otlela. O ka hwetša e le mo go putsago go kwa diphihlelo tša bona goba go hwetša tsebišo ka tsebo ya bona ya dilo e bjalo ka mokgwa wa go kgetha dienywa goba go kgetha diaparo tša bana. (Lefitiko 19:32; Diema 16:31) Se se ka feleletša ka gore le be bagwera ba pelo-bohloko. Ka gona ba ka ikwa ba lokologile kudu go kgopela thušo ya gago ge e ba ba nyaka dihlare tše itšego khemising goba dilo tše dingwe. Banababo rena bao ba bego ba e-na le Paulo kua Roma ba swanetše go ba ba ile ba nea thušo e šomago le e matlafatšago bjalo ka ge ya gago e ka ba bjalo. Ka nako yeo gotee le gona bjale tšhegofatšo e oketšegilego ke gore ditlemo tša lerato di a tiišwa, gomme re ikemišetša ka go tia go hlankela Jehofa gotee ka potego e sa kwanantšhego.

23. E tla ba mo gobotse go yo mongwe le yo mongwe wa rena go fetša nako re dira eng?

²³ Yo mongwe le yo mongwe wa rena a ka akanya ka maemo a go boletšwego ka ona sehlogong se. Ke mehlala feela, eupša e ka re gopotša maemo a kgonthe ao go ona re ka bago “thušo e matlafatšago” e le ka kgonthe go banababo rena le dikgaetšedi. Ntlha ga se gore re hlagolele tshekamelo ya go kgomega ka tša leago. Yeo e be e se pakane ya banababo rena bao go boletšwego ka bona go Ba-Kolose 4:10, 11. E be e le ‘badirišani mmušong wa Modimo.’ Mafelelo a matlafatšago a be a tswalana ka go lebanya le seo. Eka go ka ba bjalo le ka rena.

24. Lebaka le legolo la go rapelela ba bangwe le go nyaka go matlafatša ba bangwe ke lefe?

²⁴ Re bolela ba bangwe ka maina dithapelong tša rena tša motho ka noši le go dira maiteko a go ba matlafatša ka baka la se: Re dumela gore banababo rena le dikgaetšedi ba nyaka go ‘swara ka tsela e loketšego ba Morena, e be go mo kgahla gohle.’ (Ba-Kolose 1:10) Taba yeo e tswalana le selo se sengwe gape seo Paulo a se boletšego ge a be a ngwala ka dithapelo tša Epafora mabapi le ba-Kolose, gore ba tle ba ‘eme e le ba ba bolo ka-tlalo, ba kgodilwe moka ke seo e lego thato ya Modimo.’ (Ba-Kolose 4:12) Rena ka noši re ka fihlelela bjang seo? Anke re boneng.

[Mengwalo ya ka tlase]

Na o Lemogile?

• Re ka ba ba thušago kudu bjang dithapelong tša rena tša motho ka noši?

• Ke ka kwešišo efe Bakriste ba bangwe e bego e le ‘dithušo tše matlafatšago’ go Paulo?

• Ke maemong a mohuta ofe mo re ka bago ‘dithušo tše matlafatšago’?

• Boikemišetšo bja rena ka go rapelela le go nyaka go matlafatša banababo rena le dikgaetšedi ke bofe?

[Dipotšišo tša Thuto]

[Seswantšho go letlakala 18]

Na o ka akaretša Mokriste yo mongwe ge o e-tšwa le lapa la gago?

[Mothopo]

Courtesy of Green Chimney’s Farm