Agwa ke Lerato

“Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.”​—⁠MATEO 22:⁠37.

1. (a) Dilo tše dingwe tšeo Mokriste a di hlagolelago ke dife? (b) Seka se bohlokwa kudu sa Bokriste ke sefe, gomme ka baka la’ng?

MOKRISTE o hlagolela dilo tše dintši e le gore a tle a be modiredi yo a atlegilego. Puku ya Diema e gatelela bohlokwa bja tsebo, kwešišo le bohlale. (Diema 2:​1-10) Moapostola Paulo o ile a ahla-ahla go nyakega ga tumelo e tiilego le kholofelo e matla. (Ba-Roma 1:​16, 17; Ba-Kolose 1:⁠5; Ba-Hebere 10:​39) Kgotlelelo le boitshwaro le tšona di bohlokwa. (Ditiro 24:​25; Ba-Hebere 10:​36) Lega go le bjalo, go na le seka se tee seo ge e ba se se gona se dirago gore dika tše dingwe ka moka di rone gomme e bile se ka ba sa di dira gore di hloke mohola. Seka seo ke lerato.​—⁠1 Ba-Korinthe 13:​1-3, 13.

2. Jesu o ile a bontšha bjang bohlokwa bja lerato, gomme se se rotoša dipotšišo dife?

² Jesu o bontšhitše bohlokwa bja lerato ge a be a re: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​35) Ka ge lerato e le leswao le le hlaolago la Mokriste wa therešo, re swanetše go botšiša dipotšišo tše bjalo ka tše di rego, Lerato ke eng? Ke ka baka la’ng le le bohlokwa gakaakaa mo Jesu a itšego go feta dilo tše dingwe ka moka, ke lona le hlaolago barutiwa ba gagwe? Re ka hlagolela lerato bjang? Ke mang yo re swanetšego go mo rata? Anke re ahla-ahleng dipotšišo tše.

Lerato ke Eng?

3. Lerato le ka hlaloswa bjang, gomme ke ka baka la’ng le akaretša monagano gotee le pelo?

³ Tlhaloso e nngwe ya lerato ke ‘maikwelo a kgokagano e borutho ya motho ka noši goba maikwelo a tseneletšego, go kgahlegela ba bangwe ka borutho goba go ba rata.’ Ke seka seo se tutueletšago batho go direla ba bangwe botse, ka dinako tše dingwe ba dira se ka boikgafo bjo bogolo bja motho ka noši. Lerato, bjalo ka ge le hlaloswa ka Beibeleng, le akaretša monagano gotee le pelo. Monagano goba tlhaologanyo di kgatha tema ka gobane motho yo a ratago o dira se ka tsebo, a lemoga gore yena gotee le batho ba bangwe bao a ba ratago, ka moka ba na le mafokodi gotee le dika tše kgahlišago. Tlhaologanyo e akaretšwa ka mo go oketšegilego ka ge go e-⁠na le bao Mokriste a ba ratago​—⁠mohlomongwe ka dinako tše dingwe a dira se ka go lwantšhana le ditshekamelo tša gagwe tša tlhago​—⁠ka gobane a tseba go tšwa go seo a se badilego Beibeleng gore Modimo o nyaka gore a dire bjalo. (Mateo 5:​44; 1 Ba-Korinthe 16:​14) Lega go le bjalo, lerato ge e le gabotse le tšwa pelong. Lerato la kgonthe bjalo ka ge le utollwa ka Beibeleng le ka mohla ga le hlahlwe ke tlhaologanyo feela. Le akaretša potego e tseneletšego le boitlamo bjo bo tletšego bja maikwelo.​—⁠1 Petro 1:⁠22.

4. Lerato ke tlemo e matla ka tsela efe?

⁴ Batho bao ba nago le boithati ka pelong ke ka sewelo ba kgonago go ba le tswalano e lerato e le ka kgonthe ka gobane motho yo a ratago o ikemišeditše go etiša dikgahlego tša ba bangwe pele ga tša gagwe ka noši. (Ba-Filipi 2:​2-⁠4) Mantšu a Jesu a rego “lešexo la monei le phala la monewa” ke a therešo ka mo go kgethegilego ge go nea go dirwa ka lerato. (Ditiro 20:​35) Lerato ke tlemo e  matla. (Ba-Kolose 3:​14) Gantši le akaretša bogwera, eupša ditlemo tša lerato di tiile go feta tša bogwera. Tswalano ya lerato magareng ga monna le mosadi wa gagwe ka dinako tše dingwe e hlaloswa e le lerato; lega go le bjalo, lerato leo Beibele e re kgothaletšago go le hlagolela ke leo le swarelelago kudu go feta botse bja ka ntle. Ge batho ba babedi ba ratana e le ka kgonthe, ba tšwela pele ba dula gotee gaešita le ge tswalano ya mmele e se sa kgonega ka baka la mefokolo ya botšofadi goba ka baka la ge yo mongwe wa bona a fetogile sekoka.

Lerato​—⁠Seka se Bohlokwa

5. Ke ka baka la’ng lerato e le seka sa bohlokwa go Mokriste?

⁵ Ke ka baka la’ng lerato e le seka sa bohlokwa go Mokriste? Sa pele, ka gobane Jesu o ile a kgothaletša balatedi ba gagwe go ratana. O itše: “Lena Le baxwêra ba-ka, xe Le dira tše ke Le laêlaxo tšôna. Se Nna ke Le laêlaxo sôna ké xore Le ratanê.” (Johane 15:​14, 17) Sa bobedi, ka gobane Jehofa ke mothofatšo wa lerato, gomme ka ge re le barapedi ba gagwe re swanetše go mo ekiša. (Ba-Efeso 5:⁠1; 1 Johane 4:​16) Beibele e re go monya tsebo ka Jehofa le Jesu go bolela bophelo bjo bo sa felego. Re ka bolela bjang gore re tseba Modimo ge e ba re sa leke go ba bjalo ka yena? Moapostola Johane o itše: “E a se naxo leratô xa a tsebe Modimo, xobane Modimo ké Yêna leratô.”​—⁠1 Johane 4:⁠8.

6. Lerato le ka leka-lekanya bjang dibopego tše di sa swanego tša maphelo a rena?

⁶ Lerato le bohlokwa ka baka la lebaka la boraro: Le re thuša go leka-lekanya dibopego tše di sa swanego tša maphelo a rena gomme la tlaleletša tutuetšo e botse go seo re se dirago. Ka mohlala, go bohlokwa go tšwela pele re monya tsebo ya Lentšu la Modimo. Go Mokriste, tsebo e bjalo e swana le dijo. E mo thuša go gola ka botlalo le go dira dilo ka go dumelelana le thato ya Modimo. (Psalme 119:​105; Mateo 4:⁠4; 2 Timotheo 3:​15, 16) Lega go le bjalo, Paulo o lemošitše ka gore: “Temoxô [tsebo, NW] yôna e a xoxomoša; se se axišaxo ké leratô.” (1 Ba-Korinthe 8:⁠1) Aowa, ga go na selo se phošo ka tsebo e nepagetšego. Ke rena re nago le bothata​—⁠re na le ditshekamelo tša sebe. (Genesi 8:​21) Ge e ba tutuetšo e leka-lekanyago dilo ya lerato e se gona, tsebo e ka dira gore motho a ikgogomoše, a inagane gore o phala ba bangwe. Se se ka se ke sa direga ge e ba ruri a tutuetšwa ke lerato. “Leratô . . . xa le na xo ikxanthša, xa le ikxoxomoše.” (1 Ba-Korinthe 13:⁠4) Mokriste yo a tutuetšwago ke lerato ga a ikgogomoše gaešita le ge a hwetša tsebo e tseneletšego. Lerato le mo dira gore a dule a ikokobeditše gomme le mo thibela go nyaka go itirela leina.​—⁠Psalme 138:⁠6; Jakobo 4:⁠6.

7, 8. Lerato le re thuša bjang go lebiša tlhokomelo dilong tše bohlokwa kudu?

⁷ Paulo o ngwaletše ba-Filipi gore: “Xomme se ke se kxopêlaxo ké xore leratô la lena le fêlê lè tlala lè e-⁠ya lè na le tsebô le temoxô ya ruri, xore Le tsebê xo hlaoloxanya boló le bobe, xore Le bê basekexi ba-ila-bosodi, xo bê xo tlê letšatši la Kriste.” (Ba-Filipi 1:​9, 10) Lerato la Bokriste le tla re thuša go latela kgothatšo ye gore re kgonthišege ka dilo tše bohlokwa kudu. E le mohlala, ela hloko mantšu a Paulo go Timotheo: “Xe motho a nyaka bolebeledi, ó duma modirô o botse.” (1 Timotheo 3:⁠1) Ngwageng wa tirelo wa 2000, palo ya diphuthego lefaseng ka bophara e oketšegile ka 1 502, ya dira palo-moka e mpsha ya tše 91 487. Ka go rialo, go tloga go nyakega bagolo ba oketšegilego, gomme bao ba katanelago tokelo ye ba swanetšwe ke go retwa.

⁸ Lega go le bjalo, bao ba katanelago ditokelo tša bolebeledi ba tla boloka teka-tekano e botse ge e ba ba gopola morero wa tokelo e bjalo. Go fo ba le matla a taolo goba botumo ga se sona selo sa bohlokwa. Bagolo bao ba thabišago Jehofa ba tutuetšwa ke lerato la go mo rata le la go rata banababo bona. Ga ba nyake botumo goba go nyaka go ba le tutuetšo. Moapostola Petro, ka morago ga go eletša bagolo ba phuthego go boloka boemo bjo bobotse bja kgopolo, o ile a gatelela go nyakega ga “boikokobetšô.” O ile a eletša bohle ka phuthegong gore: “Ikokobetšeng ka tlase xa seatla se matla sa Modimo.” (1 Petro 5:​1-⁠6) Yo mongwe le yo mongwe yo a katanago o dira gabotse go ela hloko mohlala wa bagolo ba bantši lefaseng ka moka bao ba šomago ka thata, ba ikokobeditšego, ka go rialo e le tšhegofatšo diphuthegong tša gabo bona.​—⁠Ba-Hebere 13:⁠7.

Maikemišetšo a Mabotse a re Thuša go Kgotlelela

9. Ke ka baka la’ng Bakriste ba dula ba gopola ka ditšhegofatšo tšeo Jehofa a di holofeditšego?

⁹ Bohlokwa bja go tutuetšwa ke lerato bo bonwa  ka tsela e nngwe. Bao ba phegelelago boineelo go Modimo ka baka la lerato, Beibele e ba holofetša ditšhegofatšo tše humilego gona bjale le ditšhegofatšo tše dibotse ka mo go sa hlathegego nakong e tlago. (1 Timotheo 4:⁠8) Mokriste yo a dumelago ka mo go tiilego dikholofetšo tše le yo a kgodišegilego gore Jehofa “ba ba Mo nyakaxo ó a ba putsa,” o thušwa go ema a tiile tumelong. (Ba-Hebere 11:⁠6) Bontši bja rena re hlologetše go phethagala ga dikholofetšo tša Modimo gomme re boeletša maikwelo a moapostola Johane a gore: “Amene! Tlaa Morêna Jesu!” (Kutollo 22:​20) Ee, go naganišiša ka ditšhegofatšo tšeo re di boloketšwego ge e ba re botega go re matlafaletša go tiišetša, go etša ge go dula ga Jesu a gopola ka “lethabo leo le bego le beilwe ka pele ga gagwe,” go mo thušitše go tiišetša.​—⁠Ba-Hebere 12:​1, 2, NW.

10, 11. Go tutuetšwa ke lerato go re thuša bjang go tiišetša?

¹⁰ Lega go le bjalo, go thwe’ng ge e ba kganyogo ya rena ya go phela lefaseng le lefsa e le yona tutuetšo ya rena e nnoši ya go hlankela Jehofa? Gona re ka ba bao ba felago pelo gabonolo goba ra bontšha go se kgotsofale ge dilo di e-⁠ba thata goba ge dilo di sa direge bjalo ka ge re holofetše goba ka nako yeo re di holofetšego ka yona. Re ka ba kotsing e šoro ya go gogolega. (Ba-Hebere 2:⁠1; 3:​12) Paulo o boletše ka yo e kilego ya ba modirišani wa gagwe Dema, yo a ilego a mo hlanogela. Ka baka la’ng? Ka gobane o “[ratile] lefase lé la byale.” (2 Timotheo 4:​10) Batho le ge e le bafe bao ba hlankelago feela ka mabaka a boithati ba kotsing ya go dira se se swanago. Ba ka goketšwa ke dibaka tša gona bjale tšeo di newago lefaseng gomme ya ba bao ba sa ratego go ikgafa gona bjale ba holofetše ditšhegofatšo tšeo di tlago.

¹¹ Le ge e le mo go swanetšego le ga tlhago go ba le kganyogo ya go amogela ditšhegofatšo tša nakong e tlago le kimollo e holofetšwego ya go imollwa ditekong, lerato le aga tebogo ya rena ya go leboga seo e swanetšego go ba sa bohlokwa-hlokwa maphelong a rena. Selo sa bohlokwa ke thato ya Jehofa, e sego ya rena. (Luka 22:​41, 42) Ee, lerato le a re aga. Le re dira gore re kgotsofalele go letela Modimo wa rena ka go se fele pelo, re kgotsofetše ka ditšhegofatšo le ge e le dife tšeo a di neago le go kgodišega gore ka nako ya gagwe e swanetšego re tla amogela selo se sengwe le se sengwe seo a se holofeditšego​—⁠le go feta moo. (Psalme 145:​16; 2 Ba-Korinthe 12:​8, 9) Ge re sa dutše re letile, lerato le re thuša go tšwela pele re hlankela ka ntle le boithati ka gobane “leratô . . . xa le tsome xo ikhola.”​—⁠1 Ba-Korinthe 13:​4, 5.

Bakriste ba Swanetše go Rata Mang?

12. Go ya ka Jesu, ke mang yo re swanetšego go mo rata?

¹² Jesu o neile molao wa kakaretšo mabapi le yo re swanetšego go mo rata ge a be a tsopola dipolelo tše pedi go tšwa Molaong wa Moše. O itše: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka,” gomme “Wa xeno O mo ratê ka mokxwa wo O ithataxo ka wôna.”​—⁠Mateo 22:​37-⁠39.

13. Re ka ithuta bjang go rata Jehofa, gaešita le ge re ka se mmone?

 ¹³ Go tšwa mantšung a Jesu, go molaleng gore sa pele-pele re swanetše go rata Jehofa. Lega go le bjalo, ga se ra belegwa re e-⁠na le lerato leo le tletšego la go rata Jehofa. Ke selo seo re swanetšego go se hlagolela. Ge re be re e-⁠kwa ka yena la mathomo, re ile ra gogelwa go yena ke seo re se kwelego. Ganyenyane-ganyenyane, re ile ra ithuta kamoo a lokišeditšego batho lefase ka gona. (Genesi 2:​5-23) Re ithutile kamoo a ilego a dirišana le batho ka gona, kamoo a sa kago a re lahla ge sebe se be se thoma go wela lapa la motho, eupša a gata megato ya go re lopolla. (Genesi 3:​1-5, 15) O ile a dirišana ka botho le bao ba bego ba botega, gomme mafelelong o ile a neela Morwa wa gagwe yo a tswetšwego a nnoši bakeng sa gore re lebalelwe dibe tša rena. (Johane 3:​16, 36) Tsebo ye yeo e oketšegago e dirile gore tebogo ya rena ya go leboga Jehofa e gole. (Jesaya 25:⁠1) Kgoši Dafida o boletše gore o ile a rata Jehofa ka baka la tlhokomelo ya Gagwe e lerato. (Psalme 116:​1-⁠9) Lehono, Jehofa o a re hlokomela, o a re hlahla, o a re matlafatša le go re kgothatša. Ge re ithuta ka yena ka mo go oketšegilego, ke mo lerato la rena le tsenelelago kudu.​—⁠Psalme 31:​23; Tsefanya 3:​17; Ba-Roma 8:⁠28.

Re ka Bontšha Bjang Lerato la Rena?

14. Ke ka tsela efe re ka bontšhago gore lerato la rena la go rata Modimo ke la kgonthe?

¹⁴ Ke therešo gore ba bantši lefaseng ka bophara ba re ba rata Modimo, eupša mokgwa wo ba dirago dilo ka wona o ganetšana le seo ba se bolelago. Re ka tseba bjang gore re rata Jehofa e le ka kgonthe? Re ka bolela le yena ka thapelo gomme ra mmotša kamoo re ikwago ka gona. Gape re ka dira dilo ka mokgwa wo o bontšhago lerato la rena. Moapostola Johane o itše: “Yo leratô la Modimo le tletšexo xo Yêna sa ruri, ké yo a yaxo ka Lentšu la xaxwe; ké sôna se re tsebaxo ka sôna xe re le ba xaxwe.” (1 Johane 2:⁠5; 5:⁠3) Gare ga dilo tše dingwe, Lentšu la Modimo le re botša gore re kopane gotee le go phela maphelo a hlwekilego le a boitshwaro. Re phema boikaketši, re bolela therešo gomme ra boloka monagano wa rena o hlwekile. (2 Ba-Korinthe 7:⁠1; Ba-Efeso 4:​15; 1 Timotheo 1:⁠5; Ba-Hebere 10:​23-25) Re bontšha lerato ka go nea thušo ya dilo tše di bonagalago go bao ba hlokago. (1 Johane 3:​17, 18) Gape ga re lese go botša ba bangwe ka Jehofa. Se se akaretša go ba le karolo boboleding bja lefase ka bophara bja ditaba tše dibotse tša Mmušo. (Mateo 24:​14; Ba-Roma 10:​10) Go kwa Lentšu la Modimo dilong tše bjalo ke bohlatse bja gore lerato la rena la go rata Jehofa ke la kgonthe.

15, 16. Lerato la go rata Jehofa le kgomile bjang maphelo a mantši ngwagola?

¹⁵ Lerato la go rata Jehofa le thuša batho go dira diphetho tše dibotse. Ngwagola, lerato le bjalo le tutueditše batho ba 288 907 go neela maphelo a bona go yena le go bontšha phetho yeo ka kolobetšo ya meetseng. (Mateo 28:​19, 20) Boineelo bja bona bo be bo e-⁠na le morero. Bo ile bja swaya phetogo maphelong a bona. Ka mohlala, Gazmend e be e le yo mongwe wa dinaletšana tša maemo a godimo tša kgwele-ntlatlana kua Albania. Ka nywaga e mentši, yena le mosadi wa gagwe ba ile ba ithuta Beibele, gomme mafelelong ba swanelega e le bagoeledi ba Mmušo go sa šetšwe ditšhitišo. Ngwagola, Gazmend o ile a kolobetšwa, ke yo mongwe wa bagoeledi ba 366 bao ba kolobeditšwego kua Albania ngwageng wa tirelo wa 2000. Kuranta e ile ya gatiša sehlogo mabapi le yena gomme ya re: “Bophelo bja gagwe bo na le morero, gomme ka baka la se, yena le lapa la gagwe ba thabela matšatši a thabišago  kudu bophelong bja bona. Go yena, ga go sa le bohlokwa go bona gore a ka holega gakaakang bophelong, eupša go e na le moo se bohlokwa ke gore a ka nea gakaakang bakeng sa go thuša batho ba bangwe.”

¹⁶ Ka mo go swanago, kgaetšedi yo a sa tšwago go kolobetšwa yo a šomelago khamphani ya peterole kua Guam o ile a hwetša maemo a lekago. Ka morago ga ge a hlatlogetše maemong a godimo mošomong wa boiphedišo ka lebaka la nywaga e mentši, mafelelong o ile a newa sebaka sa go ba mosadi wa mathomo wa go ba motlatša-mopresidente historing ya khamphani. Lega go le bjalo, ga bjale o be a neetše bophelo bja gagwe go Jehofa. Ka gona ka morago ga go ahla-ahla ditaba le monna wa gagwe, kgaetšedi yo mofsa o ile a gana maemo ao gomme go e na le moo a rulaganyetša go šoma mošomo wa nakwana e le gore a ka dira tšwelopele gore e be modiredi wa nako e tletšego, mmulamadibogo. Lerato la go rata Jehofa le mo tutueleditše go nyaka go mo hlankela e le mmulamadibogo go e na le go tšwetša pele dikgahlego tša tša ditšhelete tša lefase le. Ge e le gabotse, lefaseng ka bophara lerato le bjalo le tutueditše ba 805 205 go ba le karolo dibopegong tše di sa swanego tša bodiredi bja bobulamadibogo ngwageng wa tirelo wa 2000. A pontšho ya lerato le tumelo yeo babulamadibogo bao ba e bontšhitšego!

Go Tutueletšega go Rata Jesu

17. Ke mohlala ofe o mobotse wa lerato wo re o bonago go Jesu?

¹⁷ Jesu ke mohlala o mobotse wa motho yo a tutueditšwego ke lerato. Pele ga ge e e-⁠ba motho wa nama, o ratile Tatagwe a ba a rata le batho. Bjalo ka mothofatšo wa bohlale, o itše: “Ké xe kè na naê’ kè le mohlankana w’axwe, kè mo kxahla mehla yohle, kè bapala pele xa xaxwe ka mehla, kè bapala mo ’faseng la xaxwe lohle, kè kxahlwa ke bana ba batho.” (Diema 8:​30, 31) Lerato la Jesu le ile la mo tutueletša go tlogela bodulo bja gagwe bja legodimong gomme a belegwa e le lesea leo le sa kgonego go ikemela. O ile a dirišana le ba boleta le ba ikokobeditšego ka go se fele pelo gomme a tlaišega ka diatleng tša manaba a Jehofa. Mafelelong o ile a hwela batho ka moka koteng ya tlhokofatšo. (Johane 3:​35; 14:​30, 31; 15:​12, 13; Ba-Filipi 2:​5-11) A mohlala o mobotse gakaakang wa maikemišetšo a mabotse!

18. (a) Re hlagolela bjang lerato la go rata Jesu? (b) Ke ka tsela efe re bontšhago gore re rata Jesu?

¹⁸ Ge bao ba nago le boemo bjo bobotse bja pelo ba bala dipego tša bophelo bja Jesu ka Diebangeding gomme ba naganišiša ka gore ke ditšhegofatšo  tše dintši gakaakang tšeo tsela ya gagwe ya potego e ba tlišeditšego tšona, se se dira gore lerato le le tseneletšego le gole ka gare ga bona. Rena lehono re bjalo ka bao Petro a bego a bolela le bona ge a be a re: “Ké [Jesu] yo Le mo rataxo Lè sešo la mmôna.” (1 Petro 1:⁠8) Lerato la rena le bontšhwa ge re bontšha tumelo go yena le go ekiša bophelo bja gagwe bja boikgafo. (1 Ba-Korinthe 11:⁠1; 1 Ba-Thesalonika 1:⁠6; 1 Petro 2:​21-25) Ka April 19, 2000, palomoka ya ba 14 872 086 e ile ya gopotšwa ka mabaka a rena a go rata Jesu ge ba be ba le Segopotšong sa ngwaga le ngwaga sa lehu la gagwe. Yeo e bile palo e kgolo gakaakang! Gape ke mo go kgothatšago gakaakang go tseba gore ba bantši gakaakaa ba kgahlegela phološo yeo e tlišwago ke sehlabelo sa Jesu! Ka kgonthe, re agwa ke lerato leo Jehofa le Jesu ba re ratago ka lona le lerato leo re nago le lona ka bona.

19. Ke dipotšišo dife tšeo di lego mabapi le lerato tšeo di tlago go ahla-ahlwa sehlogong se se latelago?

¹⁹ Jesu o itše re swanetše go rata Jehofa ka pelo ya rena ka moka, ka moya ka moka, ka tlhaologanyo ka moka le ka matla a rena ka moka. Eupša gape o itše re swanetše go rata moagišani wa rena bjalo ka ge re ithata. (Mareka 12:​29-31) Se se akaretša mang? Le gona lerato la go rata moagišani le re thuša bjang go boloka teka-tekano e botse le boikemišetšo bjo bo swanetšego? Dipotšišo tše di tla ahla-ahlwa sehlogong se se latelago.

Na o a Gopola?

• Ke ka baka la’ng lerato e le seka se bohlokwa?

• Re ka ithuta bjang go rata Jehofa?

• Boitshwaro bja rena bo hlatsela bjang gore re rata Jehofa?

• Re bontšha bjang lerato la rena la go rata Jesu?

[Dipotšišo tša Thuto]

[Diswantšho go letlakala 10, 11]

Lerato le re thuša go letela tlhakodišo ka go se fele pelo

[Seswantšho go letlakala 12]

Sehlabelo se segolo sa Jesu se re tutueletša go mo rata