Go Fodiša Dintho tša Ntwa

ABRAHAM o be a le madireng a botšhošetši ka nywaga e 20. * Eupša o tlogetše go lwa gomme a ka se tsoge a ile ntweng gape. Ge e le gabotse, ba bangwe ba bao e kilego ya ba manaba a gagwe ga bjale ke bagwera ba gagwe ba kgaufsi-ufsi. Ke eng seo se mo fetošitšego? Ke Beibele. E neile Abraham kholofelo le temogo, ya mo thuša go lebelela ditaba tša batho go ya ka pono ya Modimo. Beibele e tlošitše kganyogo ya gagwe ya go rata go lwa, gomme o ile a thoma go fola manyaming, bohlokong, lehloyong le kgalefong tša gagwe. O hweditše gore Beibele e na le sehlare se matla sa go alafa.

Beibele e thuša motho bjang go alafa dintho tša maikwelo? E be e ka se fetoše seo se diragaletšego Abraham. Lega go le bjalo, go bala le go naganišiša ka Lentšu la Modimo go dirile gore go nagana ga gagwe go dumelelane le ga Mmopi. Ga bjale o na le kholofelo ka bokamoso, gomme dilo tšeo di tlago pele bophelong bja gagwe bjale di fetogile. Dilo tšeo di lego bohlokwa go Modimo ke tše bohlokwa le go yena. Gatee-tee ge se se thomile go direga, dintho tša pelo ya gagwe di ile tša thoma go fola. Ke kamoo Abraham a thušitšwego ka gona go fetoga.

Go Wela Ntweng ya Selegae

Abraham o belegwe ka bo-1930 Afrika. Ka morago ga ntwa ya bobedi ya lefase, naga ya gabo e be e bušwa ke naga ya kgaufsi e matla, eupša magagabo Abraham a mantši a be a nyaka tokologo. Ka 1961, Abraham o ile a tsenela mokgatlo wa tokologo wo o ilego wa thoma ntwa ya botšhošetši malebana le naga ya kgaufsi e matla.

Abraham o hlalosa ka gore: “E be e le manaba a rena. Ba be ba ikemišeditše go re bolaya, ka gona re ile ra tšwa lesolo la go yo ba bolaya.”

Bophelo bja Abraham bo be bo e-⁠ba kotsing gantši, ka gona ka 1982, ka morago ga nywaga e 20 ya go lwa ntwa ya dibetša, o ile a tšhabela Yuropa. Ga bjale o be a feleletša nywaga ya gagwe ya bo-40 gomme ka ge a ile a ikhwetša a e-⁠na le nako ya go naganišiša, o ile a hlahlobišiša tsela ya gagwe ya bophelo. Go diragetše’ng ka ditoro tša gagwe? Bokamoso bo be bo hupere’ng? Abraham o ile a kopana le ba bangwe ba Dihlatse tša Jehofa gomme a thoma go ba gona dibokeng tša bona. O ile a gopola gore kua Afrika nywaga e mmalwa pele ga moo, o be a ile a bala pampišana yeo a bego a e neilwe ke Hlatse. Pampišana e be e hlalosa ka paradeise yeo e tlago go ba gona lefaseng le mmušo wa legodimong wo o tla tlago o buša batho. Na seo e be e ka ba therešo e le ka kgonthe?

 Abraham o re: “Ka Beibeleng ke ithutile gore nywaga yeo ka moka ke e feditšego ke e-⁠lwa e be e le go senya nako. Mmušo o nnoši wo o tlago go swara yo mongwe le yo mongwe ka toka ke Mmušo wa Modimo.”

Kapejana ka morago ga ge Abraham a kolobeditšwe bjalo ka Hlatse ya Jehofa, monna yo a bitšwago Robert o ile a tšhaba Afrika go ya motseng wa Yuropa woo Abraham a bego a dula go wona. Robert le Abraham ba lwele ntweng e swanago eupša ka mahlakoreng a lwantšhanago. Robert gantši o be a ipotšiša ka morero wa kgonthe bophelong. E be e le monna wa bodumedi, gomme ka ge a badile dikarolo tše dingwe tša Beibele, o be a tseba gore leina la Modimo ke Jehofa. Ge Dihlatse tše di tšwago phuthegong ya gabo Abraham di be di ithapa go thuša Robert go kwešiša Beibele kaone, o ile a dumela ka ntle le go dika-dika.

Robert o hlalosa gore: “Go tloga mathomong, ke be ke kgahlišitšwe ke tsela yeo Dihlatse di dirišago leina la Jehofa le la Jesu ka yona, ba dumela gore ke batho ba fapanego. Seo se be se dumelelana le seo ke bego ke šetše ke se tseba go tšwa ka Beibeleng. Dihlatse gape di apara ka bothakga gomme ke tše botho go batho ba bangwe, go sa šetšwe gore ke ba setšhaba sefe. Dilo tše bjalo di bile le mafelelo a tseneletšego go nna.”

Manaba e ba Bagwera

Robert le Abraham bao e kilego ya ba manaba, ga bjale ke bagwera ba kgaufsi. Ba hlankela bjalo ka baebangedi ba nako e tletšego phuthegong e tee ya Dihlatse tša Jehofa. Abraham o hlalosa gore: “Nakong ya ntwa, gantši ke be ke ipotšiša gore go kgonega bjang gore batho ba tšwago dinageng tša kgaufsi​—⁠bao bontši bja bona e lego ba bodumedi bjo bo swanago​—⁠ba hloyane. Nna le Robert re be re tsena kereke e tee, lega go le bjalo re ile ra ya ntweng go ya go lwantšhana. Ga bjale bobedi bja rena re Dihlatse tša Jehofa, gomme tumelo ya rena e re kopantše.”

Robert o oketša ka gore: “Phapano ke yona yeo. Ga bjale re tumelong yeo e re dirago karolo ya borwarre bja kgonthe. Le ka mohla re ka se ye ntweng gape.” Beibele e bile le tutuetšo e matla dipelong tša ba e kilego ya ba manaba. Lehloyo le kgalefo di šutheletše go botana le bogwera ganyenyane-ganyenyane.

Ka nako e swanago yeo Abraham le Robert ba bego ba le ntweng, masogana a mangwe a mabedi a be a le ka mahlakoreng a mabedi a lwantšhanago a ntwa e nngwe yeo e bego e le magareng ga dinaga tše pedi tše di agišanego. Go se go ye kae Beibele e ile ya ba bjalo ka sehlare se se šomago sa go alafa dipelo tša bona ka mo go swanago. Bjang?

Bolaya​—⁠Ke Moka o hwe Lehu la Mohwela-tumelo

Gabriel yo a godišeditšwego lapeng la bodumedi, o be a rutilwe gore naga ya gabo e be e le kgabagareng ya ntwa e kgethwa. Ka gona, ge a e-⁠na le nywaga e 19, o ile a ithapa bakeng sa tirelo ya bohlabani gomme a kgopela go išwa lefelong la ntwa. Ka dikgwedi tše 13 o be a le dintweng tše šoro kudu, ka dinako tše dingwe a le bokgole bja khilomithara le seripa feela go tloga go lenaba. O re: “Ke gopola tiragalo e tee ka mo go kgethegilego. Molaodi wa rena o be a re boditše gore lenaba le tlo hlasela bošegong bjoo. Re be re tšhogile moo e lego gore re ile ra thuthupiša kanono ya rena bošego ka moka.” O be a lebelela batho ba  nageng ya kgaufsi le ya gabo bjalo ka manaba a gagwe, a swanelwago ke lehu. “Maikemišetšo a-⁠ka e be e le go bolaya ba bantši ka mo go ka kgonegago. Ke moka, ka go swana le ba bantši ba bagwera ba-ka, ke be ke nyaka go hwa lehu la mohwela-tumelo.”

Lega go le bjalo, ge nako e tšwela pele Gabriel o ile a thoma go gakanega. O ile a tšhabela dithabeng, a nanabela mellwaneng a tsena nageng e sa lwego, gomme a ya Yuropa. O ile a dula a botšiša Modimo lebaka leo ka lona bophelo bo lego thata gakaakaa, le go botšiša ge e ba mathata e be e le kotlo e tšwago go Modimo. O ile a kopana le Dihlatse tša Jehofa, tšeo di ilego tša mmontšha go tšwa Beibeleng lebaka leo ka lona bophelo bo tletšego mathata lehono.​—⁠Mateo 24:​3-14; 2 Timotheo 3:​1-⁠5.

Ge Gabriel a be a dutše a ithuta Beibele, ke mo a bego a napa a lemoga gore e hupere therešo. “Ke ithutile gore re ka phela ka mo go sa felego lefaseng la paradeise. Ka mo go makatšago kudu, se ke selo seo ke bego ke se hlologela ge ke be ke sa le ngwana.” Beibele e ile ya homotša Gabriel, ya fodiša pelo ya gagwe yeo e bego e tshwenyegile go fihla ka nako yeo. Dintho tša gagwe tše tseneletšego tša maikwelo di ile tša thoma go fola. Ka gona nakong ya ge a gahlana le Daniel, yo e kilego ya ba lenaba la gagwe, Gabriel ga se a ka a kwa a sa mo hloile le gatee. Eupša ke eng seo se dirilego gore Daniel a tle Yuropa?

“Ge e ba o le Gona e le ka Kgonthe, Nthuše hle!”

Daniel o godišitšwe e le Mokatholika gomme ge a e-⁠na le nywaga e 18 o ile a biletšwa tirelong ya bohlabani. O ile a romelwa go ya go lwa ntweng yeo Gabriel a bego a e-⁠lwa go yona eupša ka lehlakoreng le lengwe. Kgaufsi le lefelo la ntwa, Daniele o be a nametše tanka ya ntwa ge e be e otlwa ka go lebanya ke sethuthupi. Bagwera ba gagwe ba ile ba bolawa, gomme yena a gobala o šoro gomme a swarwa e le mogolegwa. O ile a fetša dikgwedi sepetlele le kampeng pele ga ge a išwa nageng e bego e se ntweng. A le noši e bile a se na selo, o ile a nagana ka go ipolaya. Daniel o ile a rapela Modimo gore: “Ge e ba o le gona e le ka kgonthe, nthuše hle!” Letšatši le le latelago, Dihlatse tša Jehofa di ile tša mo etela gomme di ile tša kgona go araba bontši bja dipotšišo tša gagwe. Mafelelong, o ile a ya Yuropa e le mofaladi. Daniel o ile a buša a kopanela le Dihlatse gomme a ithuta Beibele. Seo a ithutilego sona se ile sa fokotša pelaelo ya gagwe le kgalefo.

Gabriel le Daniel ga bjale ke bagwera ba paale, ba kopantšwe borwarreng bja moya bjalo ka Dihlatse tša Jehofa tšeo di kolobeditšwego. Gabriel o re: “Lerato la-ka la go rata Jehofa le tsebo ya Beibele di nthušitše go bona dilo ka mokgwa wo a di bonago ka gona. Daniel ga e sa le lenaba la-ka. Nywageng e fetilego ke be nka rata go mmolaya. Beibele e nthutile selo seo se fapanego ka mo go feletšego​—⁠go rata go mo hwela.”

Daniel o re: “Ke bone batho ba madumedi a fapa-fapanego le ditšhaba ba bolayana. Gape go be go e-⁠na le batho ba bodumedi bjo bo swanago ka mahlakoreng a lwantšhanago a ntwa ba bolayana.  Ge ke be ke bona se, ke ile ka ikwa gore Modimo o be a swanetše go bewa molato. Ga bjale ke a tseba gore Sathane ke yena a bakago dintwa tše ka moka. Nna le Gabriel ga bjale re badumedi gotee. Le ka mohla re ka se hlwe re e-⁠lwa gape!”

“Lentšu la Modimo ké le le Phelaxo, ké le Matla”

Ke ka baka la’ng Abraham, Robert, Gabriel le Daniel ba ile ba fetoga kudu ka mokgwa wo? Ba kgonne bjang go tloša lehloyo le manyami tšeo di bego di metše ka medu dipelong tša bona?

Yo mongwe le yo mongwe wa banna ba o badile, a naganišiša gomme a ithuta therešo e tšwago Beibeleng, yeo e lego e ‘phelago le e matla.’ (Ba-Hebere 4:​12) Mongwadi wa Beibele ke Mmopi wa batho, yo a tsebago go tutuetša pelo ya motho yo a ratago go theetša le go ithuta go dira botse. “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong.” Ge feela mmadi a itumelela go hlahlwa ke Beibele, o thoma go ba le mekgwa le ditekanyetšo tše difsa tša go phela. O thoma go ithuta kamoo Jehofa a lebelelago dilo. Mogato wo o tliša mehola e mentši, go akaretša go fodiša dintho tša ntwa.​—⁠2 Timotheo 3:⁠16.

Lentšu la Modimo le hlalosa gore ga go na setšhaba, morafo goba sehlopha sa moloko seo se lego kaone go feta se sengwe goba seo e lego se sebe go feta se sengwe. “Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” Mmadi yo a amogelago se o thušwa ganyenyane-ganyenyane go fenya maikwelo a lehloyo la semorafo goba la botšhaba.​—⁠Ditiro 10:​34, 35.

Diporofeto tša Beibele di bontšha gore Modimo kgaufsinyane o tla bea Mmušo wa gagwe wa Mesia legatong la tshepedišo ye ya gona bjale ya pušo ya motho. Ka mmušo wo, Modimo o tlo ‘fediša dintwa go fihla mafelelong a lefase.’ Mekgatlo yeo e thekgago dintwa le go kgothaletša batho go lwa go tšona e tla fedišwa. Batho bao ba bolailwego dintweng ba tla tsošwa gomme ba newa sebaka sa go phela lefaseng la paradeise. Ga go yo a tlago go tšhaba mohlasedi goba mogateledi.​—⁠Psalme 46:⁠9; Daniele 2:​44; Ditiro 24:⁠15.

Bakeng sa batho bao ba tlago go ba ba phela nakong yeo, Beibele e re: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele . . . Ba ka se itapiše, ’me ya ba lefêla; ba ka se tswale bana ba xo tlo hwa ka pela.” Ga go na tshenyo goba kgobalo yeo e ka se fodišwego. Go ba le tumelo kholofelong e bjalo ganyenyane-ganyenyane go tloša manyami le dillo pelong ya motho.​—⁠Jesaya 65:​21-⁠23.

Beibele ka kgonthe ke sehlare se matla sa pelo. Dithuto tša yona di šetše di fodiša dintho tša ntwa. Bao e kilego ya ba manaba ba kopanywa borwarreng bjo tee bja ditšhaba-tšhaba. Mokgwa wo wa phodišo o tla tšwela pele tshepedišong e mpsha ya Modimo go ba go fihla ge go se sa na lehloyo le kgalefo, dillo le manyami dipelong tša batho. Mmopi o holofetša gore “tša kxalê di ka se hlwê di tsebywa, le mo pelong ya motho di ka se hlwê di rotoxa.”​—⁠Jesaya 65:⁠17.

[Mengwalo ya ka tlase]

[Ntlhakgolo go letlakala 4]

“Ka Beibeleng ke ithutile gore nywaga yeo ka moka ke e feditšego ke e-⁠lwa e be e le go senya nako”

[Ntlhakgolo go letlakala 5]

Beibele e ka ba le tutuetšo e matla dipelong tša ba e kilego ya ba manaba

[Ntlhakgolo go letlakala 6]

Lehloyo le kgalefo di šuthelela go botana le bogwera ganyenyane-​ganyenyane

[Ntlhakgolo go letlakala 6]

Ge feela mmadi a itumelelela go hlahlwa ke Beibele, o thoma go ba le mekgwa le ditekanyetšo tše difsa tša go phela

[Seswantšho go letlakala 7]

Bao e kilego ya ba manaba ga bjale ba kopane borwarreng bja ditšhaba-tšhaba

[Mothopo wa Seswantšho go letlakala 4]

Refugee camp: UN PHOTO 186811/J. Isaac