Phihlelo

Go Hlankela ka Moya ka Moka go sa Šetšwe Diteko

KA GE GO ANEGA RODOLFO LOZANO

Ke belegetšwe Mexico, motseng wa Gómez Palacio, Durango State, ka September 17, 1917. Phetogelo ya Mexico e be e kgatlampana. Gaešita le ge phetogelo e fedile ka 1920, dikhuduego tikologong yeo re bego re dula go yona di tšwetše pele ka nywaga e mentši ka morago ga moo, di dira gore bophelo bo be thata kudu.

NAKONG e nngwe, ge mma a be a tsebile gore go be go tla ba le thulano magareng ga mašole a marabele le madira, o ile a mpoloka ka ngwakong le bo-mogolo’a-ke ba bararo gotee le dikgaetšedi tše pedi ka matšatši a mmalwa. Re be re e-⁠na le dijo tše nyenyane, gomme ke gopola ke khuta le kgaetšedi ya-ka yo monyenyane ka tlase ga malao. Ka morago ga moo, mma o ile a phetha ka go re iša United States rena bana, moo tate a bego a tla re latela ka morago.

Re fihlile California ka 1926, pejana ga ge Tšhaparego e Kgolo e wela United States. Re ile ra hudugela kae le kae moo re bego re ka hwetša mošomo gona, mafelong a go swana le San Joaquin Valley, Santa Clara, Salinas le King City. Re ile ra ithuta go šoma mašemong le go buna mehuta ka moka ya dienywa le merogo. Gaešita le ge bofseng bja-ka ke šomile mošomo o lapišago, fela e bile nako e thabišago kudu bophelong bja-ka.

Go Fihlelelwa ke Therešo ya Beibele

Ka March 1928, Morutwana wa Beibele, ka ge Dihlatse tša Jehofa di be di bitšwa bjalo ka nako yeo, o ile a re etela. E be e le mokgalabje yo a bolelago Sepaniše yo a bitšwago Esteban Rivera. Sehlogo sa pukwana ye a e tlogetšego se se rego, “Where Are the Dead?,” se ile sa nkgahliša kudu, go etša ge go ile gwa ba bjalo ka dikagare. Gaešita le ge ke be ke sa le yo monyenyane, ke ile ka  tšwela pele ka thuto ya Beibele le go kopanela le Barutwana ba Beibele. Ge nako e dutše e e-⁠ya, mma le kgaetšedi ya-ka yo monyenyane Aurora le bona ba ile ba ba batumiši ba fišegago ba Jehofa.

Magareng a bo-1930, Holo ya Mmušo e ile ya agwa San Jose, e agelwa phuthego ya Seisemane. Ka ge batho ba bantši ba setlogo sa ma-Sepania ba be ba šoma dipolaseng tša tikologong yeo, re ile ra thoma go dira boboledi go bona le go swara Thuto ya Morokami. Re be re dira se ka thušo ya Dihlatse tša setlogo sa Sepaniše tše tšwago San Francisco, e lego bokgole bja dikhilomithara tše 80. Ge nako e dutše e e-⁠ya, re ile ra ba le ba 60 bao ba bago gona dibokeng tša Sepaniše Holong ya Mmušo ya San Jose.

Mafelelong, ka February 28, 1940, ke ile ka bontšha boineelo bja-ka go Jehofa ka kolobetšo ya meetseng kopanong San Jose. Ngwageng o latelago ke ile ka kgethwa ke le mmulamadibogo, modiredi wa nako e tletšego wa Dihlatse tša Jehofa. Ke moka ka April 1943, ke ile ka laletšwa go hudugela Stockton, motse o lego mo e ka bago bokgole bja dikhilomithara tše 130, bakeng sa go yo hloma phuthego ya Sepaniše. Ka nako yeo, ke be ke hlankela ke le molebeledi yo a okamelago wa phuthego ya Seisemane ya San Jose, gomme ke be ke bile ke hlokomela Dihlatse tšeo di bolelago Sepaniše moo. Ka morago ga go rulaganyetša gore ba bangwe ba hlokomele boikarabelo bjo, ke ile ka hudugela Stockton.

Potego e a Lekwa

Go thoma ka 1940, ke ile ka biletšwa pele ga lekgotla la tirelo ya bohlabani leboelela, eupša nako e nngwe le e nngwe boemo bja-ka ke le yo a ganago ka baka la letswalo bo be bo hlompšha. Kapejana ka morago ga ge United States e tsene ntweng ya bobedi ya lefase ka December 1941, kgatelelo e tšwago lekgotleng la bolaodi e ile ya gola le go feta. Mafelelong ka 1944, ke ile ka išwa kgolegong. Ge ke be ke letetše go ahlolwa, ke ile ka bewa ka lebatong la ka tlase le disenyi. Ka go lemoga gore ke be ke le yo mongwe wa Dihlatse tša Jehofa, bontši bja bona ba ile ba botšiša dipotšišo mabapi le kamoo bosenyi bjo ba bego ba bo dirile bo bego bo tla kgoma boemo bja bona pele ga Modimo.

Dihlatse tša San Jose di ile tša ntefelela peile e le gore ke lokollwe, ge ke sa letile tsheko. Ramolao wa Los Angeles yo a bego a emela balatofatšwa melatong ya ditshwanelo tša selegae o ile a amogela taba ya-ka ka ntle le tefišo. Moahlodi o ile a dira phetho ya gore a ntokolle ge feela nka tlogela bobulamadibogo, ka šoma mošomo wa boiphedišo gomme ka ipega go balaodi ba mmušo kgwedi e nngwe le e nngwe. Ga se ka amogela phetho yeo, ka gona ke ile ka ahlolelwa nywaga e mebedi kgolegong ya Sehlakahlakeng sa McNeil kua Washington State. Moo ke ile ka diriša nako ya-ka bakeng sa thuto ya Beibele e tseneletšego.  Ke ile ka ithuta le go tlanya. Lebakeng la ka tlase ga nywaga e mebedi, ke ile ka lokollwa ka baka la boitshwaro bjo bobotse. Kapejana ke ile ka rulaganyetša go tšwela pele bodireding bja bobulamadibogo.

Modiro o Okeditšwego

Maregeng a 1947, ke ile ka abelwa go šoma gare ga batho bao ba bolelago Sepaniše ba Colorado City, Texas, gotee le modirišani wa mmulamadibogo. Eupša go be go tonya mo e lego gore re ile ra ya San Antonio bakeng sa tlelaemete e borutho. Lega go le bjalo, moo pula e be e e-⁠na kudu moo bodiredi bja rena bja ntlo le ntlo bo ilego bja šitišega. Go se gwa ya kae re ile ra felelwa ke tšhelete. Re ile ra phela ka disangwetši tša khabetšhe e sa apewago le teye ya lesereng ka dibeke tše dintšinyana. Modirišani wa-ka o ile a boela gae, eupša nna ka šala. Ge Dihlatse tše di bolelago Seisemane di thoma go tseba ka dinyakwa tša-ka tša nama, di ile tša thoma go nthuša.

Seruthwaneng se se latelago, ke ile ka boela kabelong ya-ka Colorado City, gomme mafelelong phuthego e nyenyane ya Sepaniše e ile ya bopša. Ke moka ka hudugela Sweetwater, Texas, moo ke ile ka thuša go hloma phuthego e nngwe ya Sepaniše. Ge ke be ke le Sweetwater, ke ile ka amogela lengwalo leo le bego le ntaleletša sehlopheng sa bo-15 sa Sekolo sa Beibele sa Watchtower sa Gilead bakeng sa tlwaetšo ya boromiwa yeo e thomilego ka February 22, 1950. Ka morago ga go aloga selemong seo kopanong ya ditšhaba-tšhaba kua Lepatlelong la Yankee la New York City, ke ile ka dula dikgwedi tše tharo ntlong-kgolo ya Dihlatse tša Jehofa kua Brooklyn. Moo ke ile ka hwetša tlwaetšo bakeng sa kabelo ya-ka ya ofising ya lekala ya Mexico.

Go Šoma Mexico

Ke fihlile Mexico City ka October 20, 1950. Mo e ka bago dibeke tše pedi ka morago, ke ile ka kgethwa ke le molebeledi wa lekala, kabelo yeo ke ilego ka e dira ka nywaga e mene le seripa. Phihlelo yeo ke e hweditšego tirelong ya bobulamadibogo, kgolegong, Gilead le Brooklyn e bile e holago kudu. Ge ke fihla Mexico, kapejana ke ile ka bona go nyakega ga go aga boemo bja moya bja banababo rena le dikgaetšedi ba Mexico. Kudu-kudu go be go nyakega gore ba thušwe go swarelela ditekanyetšong tša boitshwaro tše di phagamego tša Lentšu la Modimo.

Dinageng tša Latin America, go akaretša le Mexico, e be e le tlwaelo go batho ba babedi go dula gotee ka ntle le go nyalana ka molao. Madumedi a Bojakane, kudu-kudu Kereke ya Roma Katholika, a dumeletše tlwaelo ye yeo e sego ya mangwalo go aparela. (Ba-Hebere 13:⁠4) Ka gona, ba bangwe ba ile ba fetoga ditho tša diphuthego tša Dihlatse tša Jehofa, gaešita le ge ba be ba se ba nyala ka molao. Bjale go ile gwa dirwa thulaganyo ya gore ba ba bjalo ba newe dikgwedi tše tshelelago gore ba lokiše ditaba. Ka ntle le moo ba be ba ka se hlwe ba tsebja e le Dihlatse tša Jehofa.

Go ba bantši, go lokiša maphelo a bona go be go le bonolo. Ba be ba swanelwa feela ke go ngwadiša tswalano ya bona ka molao ka go nyalana. Ba bangwe ba be ba e-⁠na le maemo a raraganego kudu. Ka mohlala, ba bangwe ba nyetše gabedi, gaešita le ka makga a mararo, ba se ba ka ba hlala ka molao le ka mohla. Ge maemo a lenyalo a batho ba Jehofa mafelelong a be a dumelelana le dithuto tša Lentšu la Modimo, ditšhegofatšo tše dibotse tša moya di ile tša thabelwa ka phuthegong.​—⁠1 Ba-Korinthe 6:​9-⁠11.

Mehleng yeo tekanyo ya thuto ya lefase Mexico ka kakaretšo e be e le tlase. Gaešita le pele ke fihla ka 1950, ofisi ya lekala e be e thomile go rulaganya diklase tša go bala le go ngwala diphuthegong. Bjale diklase tše di ile tša rulaganywa lefsa, gomme gwa dirwa dithulaganyo tša go di ngwadiša le mmušo. Ga e sa le go tloga ka 1946, ge dipego di be di thoma go bolokwa, batho ba ka godimo ga 143 000 kua Mexico ba ile ba rutwa go bala le go ngwala diklaseng tšeo di swarwago ke Dihlatse!

Melao ya Mexico e be e le e thibelago kudu mabapi le bodumedi. Lega go le bjalo, nywageng ya morago bjale go bile le diphetogo tše bohlokwa tabeng ye. Ka 1992 go ile gwa fetišwa molao o mofsa mabapi le ditaba tša bodumedi, ka gona ka 1993, Dihlatse tša Jehofa Mexico di ile tša ngwadišwa e le mokgatlo wa bodumedi.

Go nna diphetogo tše e bile mothopo wa lethabo le legolo, e lego selo seo ke bego ke nagana gore se be se ka se kgonege mehleng ya pele. Ka  nywaga e mentši, ke ile ka etela diofisi tša mmušo leboelela gomme ka lebeletšana le boemo bja kgopolo bja go se botwe. Lega go le bjalo, ke mo gobotse go bona kamoo ditaba tše di ilego tša rarollwa ka gona ke Lefapha la tša Molao ofising ya rena ya lekala, moo ga bjale re bago le tšhitišo e nyenyane kudu ge re kopana modirong wa boboledi.

Go Hlankela le Molekane wa Moromiwa

Ge ke be ke fihla Mexico, go be go šetše go e-⁠na le dialoga tše dintši tša dihlopha tša pejana tša Gilead nageng. Yo mongwe wa tšona e be e le Esther Vartanian, Hlatse ya mo-Armenia yo a ilego a thoma go bula madibogo Vallejo, California, ka 1942. Re ile ra nyalana ka July 30, 1955, gomme ka morago ga moo ra tšwela pele kabelong ya rena Mexico. Esther o ile a tšwela pele a le modirong wa boromiwa Mexico City, gomme re ile ra dula lekaleng, moo ke ilego ka tšwela pele ke hlankela gona.

Ka 1947, Esther o ile a fihla kabelong ya gagwe ya mathomo ya boromiwa Monterrey, Nuevo León, Mexico. Go be go e-⁠na le phuthego e tee feela ya Dihlatse tše 40 Monterrey, eupša ka nako ya ge a be a romelwa Mexico City ka 1950, go be go e-⁠na le diphuthego tše nne. Lekaleng la rena kgaufsi le Mexico City, ga bjale go na le bana ba babedi ba malapa ao Esther a ilego a ithuta Beibele le ona ge a be a hlankela Monterrey.

Morago kua ka 1950 tšhemo ya boboledi ya baromiwa Mexico City e be e akaretša bogolo bja motse. Ba be ba phetha kabelo ya bona ka maoto goba ka dipese tša kgale kudu tšeo di tletšego batho. Ge ke be ke fihla bofelong bja bo-1950, go be go e-⁠na le diphuthego tše šupago. Ga bjale, tše di oketšegilego go fihla go tše e ka bago tše 1 600, ka kakaretšo ya bagoeledi ba Mmušo ba ka godimo ga 90 000 Mexico City, gomme ngwagola batho ba ka godimo ga ba 250 000 ba bile gona Segopotšong sa lehu la Kriste moo! Go theoša le nywaga, nna le Esther re bile le tokelo ya go hlankela go tše dintši tša diphuthego tše.

Ge nna le Esther re thoma thuto ya Beibele, ka mehla re leka go dira gore tate wa lapa a be le  kgahlego e le gore lapa ka moka le tle le akaretšwe. Ka gona, re bone malapa a mantši a magolo a e-⁠tla go hlankela Jehofa. Ke dumela gore le lengwe la mabaka a kgolo ya kapejana ya borapedi bja therešo Mexico ke gore malapa gantši a kopanela gotee borapeding bja therešo.

Jehofa o Šegofaditše Modiro

Ga e sa le go tloga ka 1950 tšwelopele ya modiro Mexico e bile e lemogegago, bobedi ka koketšego ya dipalo gotee le diphetogo mokgatlong. E tloga e le lethabo ge ke bile le karolo e nyenyane koketšegong yeo, ke šoma le batho bao ba nago le moya wa go amogela baeng le ba thabilego.

Karl Klein yo a hlankelago e le setho sa Sehlopha se Bušago sa Dihlatse tša Jehofa le mosadi wa gagwe, Margaret, ba ile ba re etela ge ba be ba le maikhutšong nywageng e fetilego. Ngwanabo rena Klein o be a nyaka go kwa boemo bja modiro tšhemong ya rena ya Mexico, ka gona yena le Margaret ba ile ba tla Phuthegong ya San Juan Tezontla, kgaufsi le Mexico City, moo re bego re kopanela gona ka nako yeo. Holo ya rena e be e le e nyenyane, mo e ka bago bophara bja dimithara tše 4,5 le botelele bja dimithara tše 5,5. Ge re be re fihla, ba ka bago 70 ba be ba šetše ba le gona, gomme go be go šetše feela sebaka sa go ema ka maoto. Ba bagolo ba be ba dutše ditulong, ba banyenyane ba dutše dipankeng gomme bana ba banyenyane ba dutše diteneng goba lebatong.

Ngwanabo rena Klein o ile a kgahlwa kudu ke gore bana ka moka ba be ba swere Dibeibele tša bona, ba lebelela ditemana tša Beibele gotee le seboledi. Ka morago ga polelo ya phatlalatša, Ngwanabo rena Klein o ile a bolela ka Mateo 13:​19-23 gomme a bolela gore Mexico go be go e-⁠na le ‘mmu o botse’ wo Jesu a ilego a bolela ka wona. Ga bjale, ba šupago ba bana bao ba bego ba le gona letšatšing leo ba šoma mošomong o mogolo wa go katološa meago ya rena ya lekala kgaufsi le Mexico City. Yo mongwe o hlankela Bethele, gomme ba bangwe ba bantšinyana ke babulamadibogo!

Ge ke be ke e-⁠tla Mexico City, go be go e-⁠na le ditho tše 11 feela lekaleng la rena. Bjale re na le ba 1 350 bao ba šomago setsheng, bao ba ka bago ba 250 ba bona ba dirago modiro wa go aga meago e mefsa ya lekala. Ge modiro wo ka moka o phethilwe, mohlomongwe ka 2002, re tla kgona go dudiša batho ba 1 300 meagong ya rena e katološitšwego. E-⁠fo nagana, ka 1950 re be re e-⁠na le bagoeledi ba Mmušo ba ka tlase ga ba 7 000 nageng ka moka, eupša ga bjale re na le ba ka godimo ga ba 500 000! Pelo ya-ka e phophoma ka lethabo ge ke bona kamoo Jehofa a šegofaditšego maiteko a banababo rena ba ikokobeditšego ba Mexico, bao ba šomago ka thata kudu bakeng sa go mo tumiša.

Go Lebeletšana le Tlhohlo e Kgolo

E nngwe ya ditlhohlo tše dikgolo tše ke bilego le tšona morago bjale e bile bolwetši. Ka kakaretšo, ke be ke dutše ke le motho yo a phetšego gabotse mmeleng. Eupša ka November 1988, ke ile ka hwa lehlakore, e lego moo go ilego gwa kgoma kudu matla a-⁠ka a mmele. Ke leboga Jehofa, ge ka go itšhidulla le ka dikalafo tše dingwe, ke ile ka kaonefala go fihla bokgoleng bjo itšego, eupša dikarolo tše dingwe tša mmele wa-ka ga di arabele ka mokgwa wo ke ratago. Ke tšwela pele ke hwetša kalafo le tlhokomelo ya tša kalafo bakeng sa go phema go opša ke hlogo mo go tseneletšego le ditla-morago tše dingwe tšeo di sa dutšego di le gona.

Gaešita le ge ke sa hlwe ke dira go gontši kamoo ke bego nka rata ka gona, ke hwetša kgotsofalo ka go tseba gore ke kgonne go thuša ba bantši go ithuta ka merero ya Jehofa le go ba thuša go ba bahlanka ba gagwe ba ineetšego. Gape ke thabela go boledišana le banababo rena le dikgaetšedi ba Bakriste ba bantši ka mo go kgonegago ge ba etela lekala la rena; ke ikwa gore re a kgothatšana.

Go tseba gore Jehofa o thabela tirelo ya rena go yena le gore seo re se dirilego ga se lefeela go mmatlafaditše kudu. (1 Ba-Korinthe 15:​58) Go sa šetšwe go se kgone ga-ka go dira dilo tše itšego le bolwetši, ke kgomilwe pelo ke mantšu a Ba-Kolose 3:​23, 24: “Ka moka tše Le di diraxo, Le di dirê ka pelo e rataxo, e ke Le dirêla Modimo, e sexo batho. Le dirê Lè tseba xore moputsô wa bohwa Le tlo o fiwa ke Modimo.” Ka go latela keletšo ye, ke ithutile go hlankela Jehofa ka moya ka moka go sa šetšwe diteko.

[Seswantšho go letlakala 24]

Ka 1942 ge ke be ke le mmulamadibogo

[Seswantšho go letlakala 24]

Mosadi wa-ka o thomile kabelo ya gagwe ya boromiwa Mexico ka 1947

[Seswantšho go letlakala 24]

Ke e-na le Esther lehono

[Diswantšho go letlakala 26]

Ka godimo go le letshadi: Lapa la rena la Bethele la Mexico ka 1952, nna ke ka mo pele

Ka godimo: Ba fetago 109 000 ba ile ba bokana lepatlelong le la Mexico City bakeng sa kopano ya selete ka 1999

Ka tlase go le letshadi: Meago ya rena e mefsa ya lekala yeo bjale e lego kgaufsi le go fela