Badiri ba Lentšu la Modimo ba Hwetša Lethabo

Seboledi se sengwe mathomong a Kopano ya Selete ya Dihlatse tša Jehofa ya “Badiri ba Lentšu la Modimo,” se itše: “Re lebelela kopano ye e le e nngwe ya ditokišetšo tša Jehofa bakeng sa go re hlamela modiro o oketšegilego wa Mmušo.” Se tšwetše pele ka gore: “Re itokišeleditše go tlo rutwa mabapi le bophelo bjo bo thabilego bja lapa, go kgothaletšwa go dula kgaufsi le mokgatlo wa Jehofa, go tutueletšwa go boloka phišego ya rena tirelong ya Mmušo le go gopotšwa ka go nyakega ga go dula re phakgame.”

GA E sa le go tloga bofelong bja May 2000, badiri ba lentšu la Modimo ba dimilione gotee le bagwera ba bona ba ile ba kgeregela mafelong a dikete go dikologa lefase bakeng sa go yo amogela thuto e bohlokwa ya Beibele. Ke eng seo ba ithutilego sona kopanong ya matšatši a mararo?

Letšatši la Pele​—⁠Go se Lebale Ditiro tša Jehofa

Polelong ya go bula, modula-setulo o ile a laletša batheetši gore ba ikhweletše ditšhegofatšo tšeo di tlišwago ke borapedi bjo bo kopanego bja Jehofa dikopanong. Bohle bao ba bego ba le gona ba ile ba kgonthišetšwa gore tumelo ya bona e tla godišwa le gore tswalano ya bona ya motho ka noši le Jehofa e tla matlafatšwa.

“Modimo yo a thabilego” o tseba seo re se nyakago bakeng sa gore re thabe re le motho ka o tee ka o tee. (1 Timotheo 1:​11, NW) Ka gona, polelo e rego “Go Dira Thato ya Modimo go Tliša Lethabo,” e ile ya gatelela gore Lentšu la Jehofa, Beibele, le hlalosa tsela e phalago tšohle ya go phela. (Johane 13:​17) Dipoledišano tše dintši le Dihlatse tša Jehofa tša nako e telele di ile tša bontšha kamoo go dira thato ya Modimo ka tlase ga maemo a fapa-fapanego go okeletšago morero maphelong a rena. Polelo e latelago e rego, “E-bang ba Tletšego Lethabo ka Baka la Botse bja Jehofa,” e ile ya gatelela gore bjalo ka “baetši ba Modimo,” Bakriste ba nyaka go tšweletša ‘bothakga ka moka’ maphelong a bona. (Ba-Efeso 5:​1, 9) Tsela e nngwe e kgolo ya go dira se ke ka go bolela ditaba tše dibotse le go dira barutiwa.​—⁠Psalme 145:⁠7.

Poledišano e rego, “Tšwelang Pele le Tiile Bjalo ka Bao ba Bonago Yo a sa Bonwego” e ile ya bontšha kamoo tumelo e tiilego e re thušago ka gona go ‘bona’ Modimo yo a sa bonagalego. Seboledi se hlalositše kamoo batho bao ba sekametšego dilong tša moya ba lemogago dika tša Modimo ka gona, go akaretša le bokgoni bja gagwe bja go tseba gaešita le seo re se naganago. (Diema 5:​21) Bao go boledišanwego le bona ba ile ba anega megato yeo ba e gatilego e le gore ba be le tumelo e tiilego le go etiša dikgahlego tša moya pele maphelong a bona.

Lenaneo la mesong le phethilwe ka polelo ya thwadi e rego, “Retang Jehofa​—⁠Modiri wa Dilo tše di Makatšago.” E ile ya thuša batheetši gore ba lemoge gore ge re ithuta ka mo go oketšegilego ka Jehofa, ke moo re hwetšago mabaka a mantši a go mo tumiša e le Modiri wa dilo tše di makatšago. Seboledi se itše: “Ge re dutše re naganišiša  ka mediro e kgahlišago ya Modimo ya tlholo gotee le dilo ka moka tše makatšago tšeo a re direlago tšona mo nakong ye, tebogo e tšwago pelong e re tutueletša gore re mo rete. Ge re dutše re naganišiša ka dilo tše di makatšago tšeo a di diretšego batho ba gagwe dinakong tše di fetilego, re nyaka go mo reta. Le gona ge re dutše re naganišiša ka dikholofetšo tša dilo tše makatšago tšeo Jehofa a sa tlago go di dira, re nyaka gape ditsela tša go bontšha tebogo.”

Lenaneo la thapama le ile la thoma ka polelo e rego, “Le se ke la Lapa go Dira se Sebotse,” yeo e ilego ya gopotša batheetši bohle gore dikgateletšo tša lefase le di kgonthišetša gore bofelo bo batametše. (2 Timotheo 3:⁠1) Lega go le bjalo, ka go se hwe matwa, re ka bontšha gore re “mohuta o nago le tumelo bakeng sa go boloka moya o phela.”​—⁠Ba-Hebere 10:​39, NW.

Ke keletšo efe ya Beibele yeo e ilego ya newa mabapi le bophelo bja lapa? Tšhiedišano ya pele ya kopano​—⁠“E-kwa Lentšu la Modimo”​—⁠e ile ya thoma ka karolo e rego “Ge o Kgetha Molekane wa Lenyalo.” Go kgetha molekane wa lenyalo ke e nngwe ya diphetho tše dikgolo tšeo batho ba di dirago. Ka gona, Bakriste ba swanetše go leta go tsena lenyalong go fihlela ge ba gotše ka tsebo, gomme ba swanetše go nyala goba go nyalwa “feela Moreneng.” (1 Ba-Korinthe 7:​39) Karolo e latelago ya tšhiedišano e ile ya ahla-ahla kganyogo ya Jehofa ya gore malapa ohle a Bakriste a atlege e le dikarolo tše kopanego tše tiilego tša moya, gomme e ile ya nea ditsela tše di šomago tšeo ka tšona se se ka fihlelelwago. Karolo ya mafelelo e ile ya gopotša batswadi gore go ruta bana ba bona go rata Modimo go thoma ka gore batswadi ba mo rate.

Dintlha tšeo di tšweleditšwego polelong e rego, “Hlokomela Mabare-bare le Lesebo” di thušitše bohle gore ba bone gore le ge go direga dilo tše di makatšago, re swanetše go arabela ka bohlale, e sego ka tsela ya go tšeega, ge re e-⁠kwa dipego tšeo di feteleditšwego. Bakriste ba boemong bjo bobotse ge ba bolela ka seo ba tsebago gore ke therešo​—⁠ditaba tše dibotse tša Mmušo. Ba bantši ba ile ba hwetša polelo e latelago e rego, “Go Lebeletšana ka Katlego le ‘Phatša Nameng’” e le e homotšago le e thabišago. E ile ya ba thuša gore ba bone gore go sa šetšwe diteko tšeo di tšwelago pele tšeo re ka lebeletšanago le tšona, Jehofa a ka re matlafatša ka moya wa gagwe o mokgethwa, Lentšu la gagwe le borwarre bja rena bja Bokriste. Go ile gwa hwetšwa kgothatšo e kgolo phihlelong ya motho ka noši ya moapostola Paulo tabeng ye.​—⁠2 Ba-Korinthe 12:​7-10; Ba-Filipi 4:​11, 13.

Letšatši la pele le ile la phethwa ka polelo e rego, “Go Sepedišana le Mokgatlo wa Jehofa.” Mafelo a mararo ao go wona mokgatlo wa Modimo o tšwetšego pele ka mo go kgethegilego a ile a ahla-ahlwa:  (1) kwešišo e oketšegago ya seetša sa moya e tšwago go Jehofa, (2) bodiredi bjo Modimo a re neilego bjona le (3) dipeakanyo tšeo di lego nakong megatong ya go rulaganya ya mokgatlo. Ka morago seboledi se ile sa bolela ka kgodišego gore: “Re kgahlišwa ke ditebelelo tše di lego kua pele.” Se ile sa botšiša gore: “Na go ka ba le pelaelo le ge e le efe ya gore re na le mabaka ka moka a go boloka kgodišego yeo re bilego le yona mathomong e tiile go ba go fihla mafelelong?” (Ba-Hebere 3:​14) Karabo e be e le molaleng. Seo se ile sa lebiša go lokollweng ga poroutšha e mpsha e nago le sehlogo se se rego O ka ba Mogwera wa Modimo! E tla dira e le thušo e matla ya go ruta bakeng sa go thuša batho bao ba nago le thuto e lekanyeditšwego goba bokgoni bja go bala bakeng sa go ithuta ka Jehofa.

Letšatši la Bobedi​—⁠Tšwelang Pele le Bolela ka Mediro e Makatšago ya Modimo

Ka morago ga go ahla-ahlwa ga temana ya letšatši, letšatši la bobedi la kopano le ile la tšwela pele ka tšhiedišano e rego, “Badiredi ba Lentšu la Modimo.” Karolo ya mathomo e ile ya lebiša tlhokomelo katlegong ya gona bjale ya mošomo wa rena wa lefase ka bophara wa boboledi. Lega go le bjalo, go kgotlelela ga rena modirong wo go hlohlwa ke bontši bja batho bao ba ganago molaetša wa Mmušo. Bagoeledi ba bantši ba nako e telele ba ile ba hlalosa kamoo ba ilego ba kgomarela lethabo la bona bodireding ka go matlafatša monagano wa bona le pelo ya bona gore ba lebeletšane le tlhohlo ya go se thabele goba ya kganetšo. Karolo ya bobedi e ile ya gopotša ba-tla-kopanong gore Dihlatse tša Jehofa di katanela go fihlelela batho kae le kae, bobedi ka tsela e rulaganyeditšwego le yeo e sa rulaganyetšwago. Ge e le karolo ya mafelelo e ile ya hlalosa ditsela tše di fapa-fapanego tšeo ka tšona Bakriste ka moka ba ka katološago bodiredi bja bona bja motho ka noši. Seboledi se ile sa gatelela gore bakeng sa go dira se, re swanetše go etiša Mmušo wa Modimo pele-pele, gaešita le ge go dira bjalo go akaretša tšhitelo e itšego le go ikgafa.​—⁠Mateo 6:​19-⁠21.

Ka ge re phela lefaseng le le sa boifego Modimo leo le tletšego ka kganyogo e sa kgotsofatšwego ya go kganyoga dilo tše di bonagalago, polelo e rego, “Hlagolela Boineelo go Modimo Gotee le go Kgotsofala,” e be e tloga e le nakong kudu. E le ge se theile tše dingwe tša ditlhaloso tša sona go 1 Timotheo 6:​6-10, 18, 19, seboledi se ile sa bontšha kamoo boineelo go Modimo bo thušago Bakriste ka gona  go phema lerato la tšhelete, leo le ka ba arošago gomme la bakela ba bantši bohloko. Se gateletše gore go sa šetšwe gore maemo a rena a tša boiphedišo a bjang, lethabo le ithekgile ka tswalano ya rena le Jehofa le ka bophelo bja rena bjo bobotse bja moya. Ba bantši ba ile ba tutuetšwa ke dintlha tšeo di ilego tša tšweletšwa polelong e rego, “Go se Leše Modimo Dihlong.” Go ile gwa gatelelwa therešo ya gore Jehofa le ka mohla ga a ke a lebala Dihlatse tša gagwe tše botegago. Mohlala wa moswana-noši wa Jesu Kriste​—⁠yo e lego “wa maabane, le wa lehono; ’me e tlo ba Yêna wa neng le neng”​—⁠o tla thuša ba bantši gore ba tšwele pele ba kitima lebelong la bophelo ka kgotlelelo.​—⁠Ba-Hebere 13:⁠8.

Polelo ya kolobetšo e ile ya ruma lenaneo la mesong​—⁠yeo ka mehla e lego karolo e kgolo dipokanong tše dikgolo tša Dihlatse tša Jehofa. E bile lethabo le legolo gakaakang go bona bao ba sa tšwago go ineela ba latela mehlaleng ya Jesu ka go itliša gore ba kolobetšwe meetseng! (Mateo 3:​13-17) Bohle bao ba gatago mogato wo ba šetše ba fihleletše mo gogolo bjalo ka badiri ba lentšu la Modimo. Go feta moo, ge ba kolobetšwa ba fetoga badiredi ba ineetšego ba ditaba tše dibotse, ba hwetša lethabo le legolo ka go tseba gore ba tšea karolo go kgethagatšeng leina la Jehofa.​—⁠Diema 27:⁠11.

Go ile gwa newa keletšo e lebanyago polelong e rego, “Go Nyakega go Gola ka Tsebo ‘Bakeng sa go Kgethologanya Botse le Bobe.’” Ditekanyetšo tša lefase bakeng sa se se lokilego le se se fošagetšego ke tšeo di hlaelago o šoro. Ka gona go nyakega gore re ithekge ka ditekanyetšo tša Jehofa. (Ba-Roma 12:⁠2) Bohle ba ile ba kgothaletšwa gore ba katanele go hwetša kwešišo e nepagetšego ya ditsela tša Modimo le  go gola tsebong. Ka morago, ka go diriša matla a rena a go nagana re tla tlwaeletšwa go “kxetholoxanya botse le bobe.”​—⁠Ba-Hebere 5:​11-⁠14.

Ka morago go ile gwa latela tšhiedišano e rego, “Go Šoma ka Thata Bakeng sa go Hlagolela Boemo bja Moya.” Bakriste ba therešo ba lemoga bohlokwa bja go aga le go kgomarela boemo bja moya. Se se akaretša go šoma ka thata​—⁠go bala, go ithuta le go naganišiša. (Mateo 7:​13, 14; Luka 13:​24) Batho bao ba sekametšego dilong tša moya gape ba rapela “dithapêlô tšohle le ’kxopêlô tšohle.” (Ba-Efeso 6:​18) Re lemoga gore dithapelo tša rena di utolla go tsenelela ga tumelo ya rena le boineelo bja rena, tekanyo ya boemo bja rena bja moya gotee le seo re se lebelelago e le “dilo tša bohlokwa bjo bogolo.” (Ba-Filipi 1:​10) Bohlokwa bja go hlagolela tswalano e borutho le e lerato le Jehofa e swanago le yeo e lego gona magareng ga ngwana yo a kwago le tatagwe yo botho le bjona bo ile bja gatelelwa. Ga re fo ba le bodumedi​—⁠gaešita le ge e le bja therešo​—⁠eupša re nyaka go aga tumelo e tiilego, ‘bjalo ka ge eka re bona Modimo.’​—⁠Ba-Hebere 11:​6, 27.

Taba ya go gola moyeng e ile ya ahla-ahlwa ka mo go tšwelago pele polelong e rego, “Dira Gore Tšwelopele ya Gago e Bonale.” Go ile gwa ahla-ahlwa mafelo a mararo a tšwelopele yeo: (1) go oketša tsebo, kwešišo le bohlale, (2) go tšweletša dienywa tša moya wa Modimo le (3) go phethagatša boikarabelo bja rena re le ditho tša lapa.

Bofelong bja polelo ya go phetha yeo e rego, “Go Sepela Seetšeng se se Tšwelago Pele sa Lentšu la Modimo,” ba-tla-kopanong ba ile ba thabela go amogela puku e mpsha e rego, Boporofeta bja Jesaya​—⁠Seetša Bakeng sa Batho ka Moka I. Ye ke bolumo ya pele ya dibolumo tše pedi tšeo di ahla-ahlago puku ya Beibele ya Jesaya kgaolo ka kgaolo. Seboledi se itše: “Puku ya Jesaya e na le molaetša go rena lehono.” Se tšwetše pele ka gore: “Ee, bontši bja diporofeto tša yona bo ile bja phethagatšwa morago kua mehleng ya Jesaya. Lega go le bjalo, bontši bja diporofeto tša Jesaya di phethagala lehono, gomme tše dingwe di tla phethagatšwa lefaseng le lefsa le le holofeditšwego la Modimo.”

Letšatši la Boraro​—⁠E-bang Badiri ba Lentšu la Jehofa

Letšatši la mafelelo la kopano le thomilwe ka go ahla-ahlwa ga temana ya letšatši. Ka morago go ile gwa latela tšhiedišano e rego, “Boporofeta bja Tsefanya bjo bo Bolelago go Gontši go Bao ba Dirago Thato ya Modimo.” Dipolelo tše tharo tša tšhiedišano ye di ile tša bontšha gore go etša ge a dirile mehleng ya Juda ya lerabele, Jehofa o tla tliša phedišo godimo ga bao mo nakong ye ba ganago go kwa temošo ya gagwe. Ka ge ba senyetša Modimo, ba tla sepela bjalo ka batho ba difofu ba sa kgonego go ikemela, bao ba sa kgonego go hwetša topollo. Lega go le bjalo, Bakriste ba therešo ba tšwela pele ba tsoma Jehofa, gomme ba tla šireletšwa letšatšing la bogale bja Modimo. Go feta moo, ba thabela ditšhegofatšo tše dintši gaešita le mo nakong ye. Ba na le sebaka se se šegofaditšwego sa go bolela “leleme  le le sekilego” la therešo ya Beibele. (Tsefanya 3:⁠9, NW) Seboledi se itše: “Go bolela leleme le le sekilego ga go akaretše feela go dumela therešo le go e ruta ba bangwe eupša gape go akaretša go dumelelanya boitshwaro bja rena le melao le melao ya motheo ya Modimo.”

Ba-tla-kopanong ba be ba letile ka tetelo-kgolo terama e rego, “Mehlala ya Temošo Bakeng sa Mehla ya Rena.” Terama ye ya moaparo o feletšego e ile ya bontšha kamoo ba-Isiraele ba dikete ba ilego ba loba maphelo a bona mollwaneng wa Naga ya Kholofetšo ka baka la gore ba ile ba lebala Jehofa gomme ba gokeletšwa ke basadi ba baheitene bootsweng le borapeding bja maaka. Yo mongwe wa baanegwa-thwadi​—⁠Jamini​—⁠mathomong o be a sa itsebe moo a emego gona magareng ga kgoketšo ya basadi ba ba-Moaba le boineelo bja gagwe go Jehofa. Kgopolo ya maaka le monagano wa bofora wa Simiri yo a sa boifego Modimo di ile tša tšwelela kudu, bjalo ka ge go bile bjalo le ka tumelo ya Finease gotee le boineelo bja gagwe. Kotsi ya go ikgweranya le bao ba sa ratego Jehofa e ile ya bontšhwa ka tsela e bonagalago gabotse.

Terama e ile ya ala motheo bakeng sa polelo yeo e ilego ya latela e rego, “Le se ke la ba Bakwi Bao ba Lebalago.” Tsheka-tsheko ya 1 Ba-Korinthe 10:​1-10 e ile ya bontšha gore Jehofa o leka go kwa ga rena bakeng sa go bona go swanelegela ga rena go ka amogela bohwa lefaseng le lefsa. Go ba bangwe, dikganyogo tša nama di fekeetša dipakane tša moya gaešita le mo nakong ye, re le kgaufsi le go tsena tshepedišong e mpsha. Bohle ba ile ba kgothaletšwa gore ba se ke ba lahlegelwa ke sebaka sa go ‘tsena khutšong ya Jehofa.’​—⁠Ba-Hebere 4:⁠1.

Polelo ya phatlalatša e be e e-⁠na le sehlogo se se rego, “Lebaka Leo ka Lona o Swanetšego go Ela Hloko Mediro e Makatšago ya Modimo.” “Mediro e makatšago” ya Jehofa e bontšha bohlale bja gagwe le bolaodi bja gagwe godimo ga tlholo e bonagalago yeo e re dikologilego. (Jobo 37:​14) Dipotšišo tše dintši tšeo di fatago tšeo di tšwago go Jehofa di be di lekane go ka bontšha Jobo matla a Mmopi yo matla-ohle. Jehofa gape o tla dira “mediro e makatšago” ya nakong e tlago legatong la bahlanka ba gagwe ba botegago. Seboledi se phethile ka gore: “Re na le mabaka a mantši a gore re ele hloko mediro ya Jehofa e makatšago​—⁠seo a se dirilego nakong e fetilego, seo a se dirago go re dikologa tlholong lehono, le seo a holofetšago go se dira bokamosong bjo bo lego kgaufsi.”

Ka morago ga kakaretšo ya sehlogo sa thuto ya Morokami bakeng sa beke, go ile gwa neelwa polelo ya go phetha ya kopano. E e-⁠na le sehlogo se se rego, “Tšeela Tokelo ya Gago ya go ba Modiri wa Lentšu la Modimo Godimo Kudu,” polelo ye e tutuetšago e ile ya gatelela gore go ba badiri ba Lentšu la Modimo ke kgodišo. (Jakobo 1:​22) Batheetši ba ile ba gopotšwa gore tokelo ya rena re le badiri ba lentšu la Modimo ke ya moswana-noši, gomme ge re e diriša ka nako e telele, ke moo re tlago go e tšeela godimo kudu. Bohle bao ba bego ba le gona ba ile ba kgothaletšwa gore ba bonagatše tlhohleletšo e holago yeo kopano ye ya selete e bilego le yona kganyogong ya bona ya go ba badiri ba Lentšu la Modimo ka mo go feletšego. Yeo ke tsela e nnoši ya go hwetša lethabo le legolo kudu le go feta.

[Lepokisi/Seswantšho go letlakala 25]

O ka ba Mogwera wa Modimo!

Ka Labohlano thapama poroutšha e mpsha e rego, O ka ba Mogwera wa Modimo! e ile ya lokollwa. Go na le go nyakega mo gogolo ga thuto ya Beibele e nolofaditšwego dikarolong tše dintši tša lefase, gomme poroutšha ye e tla dirišwa go kgotsofatša senyakwa seo. E tla tliša tšhegofatšo e kgolo go batho bao ba sa rutegago gakaalo goba bao ba sa kgonego go bala gabotse.

[Lepokisi/Seswantšho go letlakala 26]

Boporofeta bja Jesaya—Seetša Bakeng sa Batho ka Moka

Ba-tla-kopanong ba ile ba thabišwa ke go amogela Bolumo I ya sete ya dibolumo tše pedi tša Boporofeta bja Jesaya​—⁠Seetša Bakeng sa Batho ka Moka. Kgatišong ye, go gateletšwe kudu bohlokwa bja kgonthe bja boporofeta bja Jesaya bakeng sa mehla ya rena.