Balebeledi le Bahlanka ba Bodiredi ba Kgethwa ka Tsela ya Pušo ya Modimo
Balebeledi le Bahlanka ba Bodiredi ba Kgethwa ka Tsela ya Pušo ya Modimo
“Ka gona itoteng le lote le mohlape ka moka wo moya o mokgethwa o le beilego go ba balebeledi ba wona.”—DITIRO 20:28, PK.
1, 2. Jesaya 60:22 e phethagatšwa bjang?
NAKONG e telele e fetilego, Jehofa o ile a bolela e sa le pele gore selo se itšego se makatšago se be se tla direga mehleng ya bofelo. Go ile gwa bolelwa ka moporofeta Jesaya gore: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla. Ké Nna Morêna e ke tl’o xo dira tšeo ka pelá [“akgofiša,” NW] lebakeng la xôna.”—Jesaya 60:22.
2 Na go na le bohlatse bja gore boporofeta bjo bo a phethagala lehono? Ka kgonthe go bjalo! Nywageng ya bo-1870, phuthego e tee ya batho ba Jehofa e ile ya hlongwa kua Allegheny, Pennsylvania, U.S.A. Go tloga mathomong ao a manyenyane, go tšweletše diphuthego tše masome a dikete gomme di a atlega lefaseng ka bophara. Bagoeledi ba Mmušo ba dimilione—setšhaba se matla—ga bjale ba kopanela diphuthegong tše fetago 91 000 dinageng tše 235 lefaseng ka bophara. Ka ntle le pelaelo, se se kgonthišetša gore Jehofa o akgofiša go kgoboketšwa ga barapedi ba therešo pele ga ge go ka thoma ‘masetla-pelo a magolo,’ ao ga bjale a lego kgaufsi kudu.—Mateo 24:21; Kutollo 7:9-14.
3. Go bolela eng go kolobetšwa ‘leineng la Tate, la Morwa le la moya o mokgethwa’?
3 Ka morago ga go dira boineelo bja motho ka noši go Jehofa, le tumelelanong le ditaelo tša Jesu, batho ba ba dimilione ba ile ba kolobetšwa “Leineng la Tate le la Morwa le la Môya o mokxêthwa.” (Mateo 28:19) Go kolobetšwa “leineng la Tate” go bolela gore batho ba ba ineetšego ba lebelela Jehofa e le Tatago bona wa legodimong le Monei wa Bophelo le go ikokobeletša bogoši bja gagwe. Go kolobetšwa ‘leineng la Morwa’ go bontšha gore ba dumela Jesu Kriste e le Molopolodi, Moetapele le Kgoši. Gape ba dumela tema yeo e kgathwago ke moya o mokgethwa wa Modimo goba matla a šomago go hlahla maphelo a bona. Se se bontšha gore ba kolobeditšwe ‘leineng la moya o mokgethwa.’
4. Badiredi ba Bakriste ba kgethwa bjang?
4 Kolobetšong ya bona, barutiwa ba bafsa ba kgethwa bjalo ka badiredi ba Jehofa Modimo. Ba kgethwa ke mang? Ka tekanyo e itšego, mantšu a begilwego go 2 Ba-Korinthe 3:5 a a šoma le go bona: “E sexo xore re ka kxôna xo naxana selô se se kaxo tšwa xo rena; xo kxôna xa rena [bjalo ka badiredi] xo tšwa xo Modimo.” Ga go tlhompho e nngwe yeo ba bego ba ka e kganyoga go feta ya go kgethwa ke Jehofa Modimo ka noši! Ka morago ga kolobetšo ya bona, ba tla tšwela pele ba gola moyeng bjalo ka badiredi ba “ditaba tše dibotse” ge feela ba dutše ba amogela tlhahlo ya moya wa Modimo gomme ba tšwela pele go diriša Lentšu la gagwe.—Mateo 24:14; Ditiro 9:31.
Go Kgethwa ka Tsela ya Pušo ya Modimo—E Sego ka Tsela ya Pušo ya Batho
5. Na balebeledi ba Bakriste le bahlanka ba bodiredi ba kgethwa ka tsela ya pušo ya batho? Hlalosa.
5 Bolebeledi bjo bo budulego bja balebeledi ba swanelegago le thušo e nago le bokgoni ya bahlanka ba bodiredi di a nyakega bakeng sa go hlokomela dinyakwa tša moya tša palo e golago ya badiredi ba mafolofolo. (Ba-Filipi 1:1) Banna ba bjalo ba moya ba kgethwa bjang? E sego ka mekgwa e swanago le yeo e dirišwago Bojakaneng. Ka mohlala, balebeledi ba Bakriste ga ba kgethwe ka pušo ya batho, ke gore, ka go amogela dikgetho tša bontši bja batho bao ba kopanelago le phuthego. Go e na le moo, dikgetho tše di dirwa ka tsela ya pušo ya Modimo. Seo se bolela’ng?
6. (a) Pušo ya Modimo ya kgonthe ke eng? (b) Ke ka baka la’ng go kgethwa ga balebeledi le bahlanka ba bodiredi go dirwa ka tsela pušo ya Modimo?
6 Ge go bolelwa ka tsela e bonolo, pušo ya Modimo ya kgonthe ke pušo ka Modimo. Dihlatse tša Jehofa di ikokobeletša pušo ya gagwe ka go rata le go dirišana gotee bakeng sa go dira thato ya Modimo. (Psalme 143:10; Mateo 6:9, 10) Go kgethwa ga balebeledi ba Bakriste, goba bagolo le bahlanka ba bodiredi, go dirwa ka tsela ya pušo ya Modimo ka gobane mokgwa wa go bolelela le go kgethwa ga banna ba bjalo ba nago le boikarabelo o dirwa go ya ka thulaganyo ya Modimo bjalo ka ge e hlaloswa ka Mangwalong a Makgethwa. Le gona ka ge e le ‘hlogo godimo ga tšohle,’ Jehofa ka kgonthe o na le tshwanelo ya go laola kamoo mokgatlo wa gagwe o bonagalago o tla šomago ka gona.—1 Koronika 29:11; Psalme 97:9.
7. Dihlatse tša Jehofa di bušwa bjang?
7 Ka go fapana le dihlopha tše dintši tša bodumedi Bojakaneng, Dihlatse tša Jehofa ga di ikgethele sebopego sa bolaodi bja moya bjoo di šomago ka tlase ga bjona. Bakriste ba ba botegago ba katanela go kgomarela ditekanyetšong tša Jehofa. Balebeledi magareng ga bona ga ba kgethelwe modiro ka mohuta wa tshepedišo ya phuthego, ya sehlopha sa baruti goba ya dikereke. Ge e ba dikarolo tša lefase di tsoma go tsena-tsenana le dikgetho tše, batho ba Jehofa ba gana go kwanantšha. Ka go tia, ba boloka boemo bjo bo bontšhitšwego gabotse ke baapostola ba lekgolong la pele la nywaga ge ba be ba re: “Mo xo batho le Modimo, wa xo kwešešwa ke Modimo.” (Ditiro 5:29) Ka gona, Dihlatse di ikokobeletša Modimo dilong ka moka. (Ba-Hebere 12:9; Jakobo 4:7) Go latela tshepedišo ya pušo ya Modimo go tliša go amogelwa ke Modimo.
8. Ditshepedišo tša pušo ya batho le tša pušo ya Modimo di fapana bjang?
8 Bjalo ka bahlanka ba Mmuši yo Mogolo wa Pušo ya Modimo, Jehofa, re dira gabotse go dula re gopola diphapano tše di lego magareng ga tshepedišo ya pušo ka batho le ya pušo ya Modimo. Ditshepedišo tša pušo ka batho ke tšeo di nyakago gore go be le boemedi bjo bo leka-lekanago gomme gantši di hlaolwa ka go ba le masolo a go nyaka maemo le a go nyaka dikgetho ka go boutelwa ke bontši bja batho. Ditshepedišo tše bjalo ga di akaretšwe dikgethong tša pušo ya Modimo. Dikgetho tše ga di tšwe go batho; e bile ga di tšwe mokgatlong o itšego wa molao. Mohlomongwe e le ge a be a šupa go kgethweng ga gagwe ke Jesu le Jehofa bjalo ka “moapostola wa ba-ntlê,” Paulo o ile a botša ba-Galatia gore o kgethilwe ‘e sego ka go bewa ke batho, le ka go ba gona ka batho, eupša e le ka Jesu Kriste le ka Modimo Tatagwe yo a mo tsošitšego bahung.’—Ba-Roma 11:13; Ba-Galatia 1:1.
Go Kgethwa ka Moya o Mokgethwa
9. Ditiro 20:28 e re’ng mabapi le go kgethwa ga balebeledi ba Bakriste?
9 Paulo o ile a gopotša balebeledi bao ba dulago Efeso gore ba kgethilwe ke Modimo ka moya o mokgethwa. O itše: “Ka gona itoteng le lote le mohlape ka moka wo moya o mokgethwa o le beilego go ba balebeledi ba wona, gore le diše phuthego ya Modimo ye a itiretšego yona ka madi a [“Morwa wa gagwe,” NW].” (Ditiro 20:28, PK, mongwalo o sekamego ke wa rena.) Balebeledi bao ba Bakriste ba be ba swanetše go tšwela pele ba hlahlwa ke moya o mokgethwa ge ba le gare ba phetha mediro ya bona bjalo ka badiši ba mohlape wa Modimo. Ge e ba monna yo a kgethilwego go ba molaodi a se sa fihlelela ditekanyetšo tša Modimo, ge nako e dutše e e-ya moya o mokgethwa o be o šoma bakeng sa go mo tloša boemong bja gagwe.
10. Ke bjang moya o mokgethwa o kgathago tema e bohlokwa dikgethong tša pušo ya Modimo?
10 Ke bjang moya o mokgethwa o kgathago tema e bohlokwa? Sa pele, pego yeo e hlalosago tšeo di nyakegago bakeng sa bolebeledi bja moya e buduletšwe ke moya o mokgethwa. Mangwalong a gagwe ao a a ngwaletšego Timotheo le Tito, Paulo o ile a bontšha ditekanyetšo tšeo di swanetšego go fihlelelwa ke balebeledi le bahlanka ba bodiredi. Ka kakaretšo, o ile a bolela dinyakwa tše 16 tše sa swanego. Ka mohlala, balebeledi ba be ba swanetše go ba bao ba se nago bosodi, ba leka-lekanego mekgweng, ba hlaphogetšwego monaganong, ba nago le thulaganyo, ba go amogela baeng, ba swanelegele go ruta le go ba mehlala bjalo ka dihlogo tša malapa. Ba be ba swanetše go ba le teka-tekano go dirišeng dino tše di tagago, ba be ba sa swanela go ba barati ba tšhelete gomme ba be ba swanetše go ba le boitshwaro. Ka mo go swanago, ditekanyetšo tše phagamego di be di beetšwe banna bao ba katanelago go kgethwa bjalo ka bahlanka ba bodiredi.—1 Timotheo 3:1-10, 12, 13; Tito 1:5-9.
11. Ke ditshwanelego dife tše dingwe tšeo di swanetšego go fihlelelwa ke banna bao ba katanelago boikarabelo bja phuthego?
11 Go hlahloba ditshwanelego tše go bontšha gore bao ba etelelago pele borapeding bja Jehofa ba swanetše go bea mohlala boitshwarong bja Bokriste. Banna bao ba katanelago boikarabelo bja phuthego ba swanetše go nea bohlatse bja gore moya o mokgethwa o a šoma go bona. (2 Timotheo 1:14) Go swanetše go bonagala gore moya wa Modimo o tšweletša dienywa tša “lerato, lethabo, khutšo, go se fele pelo, botho, go loka, tumelo, bonolo le boitshwaro” go banna ba. (Ba-Galatia 5:22, 23, NW) Dienywa tše bjalo di tla bonagatšwa ditirišanong tša bona le badumedi-gotee le bona le ba bangwe. Ee, ba bangwe e ka ba ba tšwago pele go bontšheng dienywa tše itšego tša moya, mola ba bangwe ba ka fihlelela ditshwanelego tše dingwe bakeng sa bolebeledi ka tekanyo e phagamego kudu. Lega go le bjalo, mokgweng wa bona ka kakaretšo wa bophelo, bohle bao ba holofelago go kgethwa bjalo ka balebeledi goba bahlanka ba bodiredi ba swanetše go bontšha gore ke batho ba moya, bao ba fihlelelago tšeo di nyakwago ke Lentšu la Modimo.
12. Ke bomang bao go ka thwego ba kgethilwe ka moya o mokgethwa?
12 Ge Paulo a be a kgothaletša ba bangwe go ba baetši ba gagwe, o kgonne go dira bjalo ka bolokologi bja polelo ka gobane yena ka noši o be a ekiša Jesu Kriste, yo a ‘re tlogeletšego mohlala gore re latele dikgato tša gagwe kgaufsi.’ (1 Petro 2:21, bapiša le NW; 1 Ba-Korinthe 11:1.) Bao ba fihlelelago dinyakwa tša Mangwalo nakong ya ge ba kgethwa bjalo ka balebeledi goba bahlanka ba bodiredi go ka bolelwa gore ba kgethilwe ka moya o mokgethwa.
13. Moya o mokgethwa o thuša bjang bao ba bolelelago banna bakeng sa go hlankela ka phuthegong?
13 Go na le ntlha e nngwe yeo e bontšhago kamoo moya o mokgethwa o šomago ka gona go boleleleng le go kgethweng ga balebeledi. Jesu o itše ‘Tate wa magodimong o nea moya o mokgethwa bao ba o kgopelago.’ (Luka 11:13) Ka gona ge bagolo ba phuthego ya tikologong ba bokana bakeng sa go bolelela banna bakeng sa boikarabelo bja phuthego, ba rapelela moya wa Modimo gore o ba hlahle. Ba thea go bolelela ga bona go seo se boletšwego Lentšung la Modimo le le buduletšwego, gomme moya o mokgethwa o ba dira gore ba kgone go lemoga ge e ba motho yo a naganelwago bakeng sa go kgethwa a fihlelela dinyakwa tša Mangwalo. Bao ba bolelelago ba bangwe ga se ba swanela go tutuetšwa ka mo go sa swanelago ke ponagalo ya ka ntle, dilo tšeo di fihleletšwego ka thuto goba bokgoni bja tlhago. Ba swanetše go lebiša tlhokomelo kudu tabeng ya ge e ba motho e le monna wa moya, yoo ditho tša phuthego di ka se dika-dikego go mmatamela bakeng sa keletšo ya moya.
14. Ke eng seo re ithutago sona go Ditiro 6:1-3?
14 Le ge dihlopha tša bagolo di kopanela le balebeledi ba basepedi go boleleleng banababo rena bakeng sa go hlankela bjalo ka bagolo le bahlanka ba bodiredi, dikgetho tša kgonthe di dirwa go ya ka mohlala wo o beilwego lekgolong la pele la nywaga. Lebakeng le lengwe, go ile gwa ba le go nyakega ga banna bao ba swanelegago moyeng bakeng sa go hlokomela kabelo e bohlokwa. Sehlopha se bušago se ile sa nea taelo e latelago: “Hlaolang banna ba ba šupaxo, ba ba tsebyaxo xore ba lokile; ba ba tletšexo Môya-mokxêthwa le bohlale, ba re kaxo ba xafêla modirô woo.” (Ditiro 6:1-3) Le ge banna bao ba bego ba swaragane le boemo ka go lebanya ba ile ba bolelela ba itšego, dikgetho di ile tša dirwa ke banna bao ba ikarabelago Jerusalema. Go latelwa mokgwa o swanago lehono.
15. Sehlopha se Bušago se akaretšwa bjang tabeng ya go kgetha banna?
15 Sehlopha se Bušago sa Dihlatse tša Jehofa se kgetha ka go lebanya ditho ka moka tša Dikomiti tša Makala. Ge se kgetha gore ke mang yo a ka rwalago boikarabelo bjo bjalo bjo boima, Sehlopha se Bušago se gopola mantšu a Jesu a rego: “Yo a filwego tše ntši, go yena go tlo tsongwa tše ntši, gomme go yo ba mo a laeletšego tše ntši, ba tlo lata tše di fetišišago.” (Luka 12:48, PK) Go tlaleletša go kgethweng ga ditho tša Dikomiti tša Makala, Sehlopha se Bušago se kgetha bagolo ba Bethele le balebeledi ba basepedi. Lega go le bjalo, se laela banababo rena bao ba ikarabelago gore ba eme legatong la sona go direng dikgetho tše dingwe tše itšego. Gape go na le mohlala wa Mangwalo le tabeng ye.
‘O Kgethe ka mo ke go Laetšego ka Gona’
16. Ke ka baka la’ng Paulo a ile a tlogela Tito kua Kereta, gomme se se bontšha’ng mabapi le dikgetho tša pušo ya Modimo lehono?
16 Paulo o boditše mošomi-gotee le yena Tito gore: “Mola kè Xo šadiša Kereta e be e le xore O phêthê O tlatšê tše di bexo di sa hlaêla, O beê [“kgethe,” NW] baxolo Ò e-ya le metse ka mo ke xo laetšexo ka xôna.” (Tito 1:5) Ka morago Paulo o ile a hlalosetša Tito ditshwanelego tšeo a bego a swanetšego go di lebelela go banna bao ba bego ba tla swanelegela dikgetho tše bjalo. Ka mo go swanago, lehono Sehlopha se Bušago se kgetha banababo rena ba swanelegago makaleng go ema legatong la sona tabeng ya go kgetha bagolo le bahlanka ba bodiredi. Go dirišwa tlhokomelo e le gore bao ba šomago ka tsela ya boemedi legatong la Sehlopha se Bušago ba kwešiša gabotse le go latela ditaelo tša Mangwalo bakeng sa go dira dikgetho tše bjalo. Lega go le bjalo, ke ka tlase ga tlhahlo ya Sehlopha se Bušago moo banna ba swanelegago ba kgethelwago go hlankela diphuthegong tša Dihlatse tša Jehofa lefaseng ka bophara.
17. Ofisi ya lekala e swaragana bjang le go bolelelwa bakeng sa go kgethwa ga balebeledi le bahlanka ba bodiredi?
17 Ge go bolelelwa ga go kgethwa ga balebeledi le bahlanka ba bodiredi go newa ofisi ya lekala ya Mokgatlo wa Watch Tower, banna bao ba nago le phihlelo ba ithekga ka moya wa Modimo bakeng sa tlhahlo go direng dikgetho. Banna ba ba ikwa ba e-na le boikarabelo, ba lemoga gore ga se ba swanela go kitimela go bea monna le ge e le ofe diatla, e se be mohlomongwe ba kopanela dibeng tša gagwe.—1 Timotheo 5:22.
18, 19. (a) Dikgetho tše itšego di romelwa bjang? (b) Tshepedišo ka moka ya go bolelela le go kgethwa e dirwa bjang?
18 Dikgetho tše itšego di ka romelwa ka lengwalo leo le kibilwego setempe sa semmušo go tšwa go mokgatlo. Lengwalo le bjalo le ka dirišetšwa go kgetha banababo rena bao ba fetago o tee ka phuthegong.
19 Dikgetho tša pušo ya Modimo di tšwa go Jehofa ka Morwa wa gagwe le ka mokero wa Modimo o bonagalago wa lefaseng, e lego “molaki e a bôtêxaxo yo bohlale” le Sehlopha sa gagwe se Bušago. (Mateo 24:45-47) Tshepedišo ka moka e bjalo ya go bolelela le go kgethwa e hlahlwa ke moya o mokgethwa. Se se bjalo ka gobane ditshwanelego di hlalositšwe ka Lentšung la Modimo, leo le buduletšwego ka moya o mokgethwa, gomme motho yo a kgethwago le yena a nea bohlatse bja gore o tšweletša dienywa tša moya woo. Ka gona, dikgetho di swanetše go lebelelwa e le tšeo di dirwago ka moya o mokgethwa. Bjalo ka ge balebeledi le bahlanka ba bodiredi ba be ba kgethwa ka tsela ya pušo ya Modimo lekgolong la pele, go bjalo le lehono.
Go Leboga Tlhahlo ya Jehofa
20. Ke ka baka la’ng re e-na le maikwelo a swanago le a Dafida ao go ngwadilwego ka wona go Psalme 133:1?
20 Nakong ye ya katlego ya moya le koketšego ya pušo ya Modimo modirong wa go bolela ka Mmušo, re leboga gore Jehofa ke yena a ikarabelago ka go kgethwa ga balebeledi le bahlanka ba bodiredi. Thulaganyo ye ya Mangwalo e thuša go boloka ditekanyetšo tše phagamego tša Modimo tša go loka gare ga rena bjalo ka Dihlatse tša Jehofa. Go feta moo, moya wa Bokriste le maiteko a kgonthe a banna ba a tlaleletša kudu khutšong ya rena e kgahlišago le boteeng bja rena re le bahlanka ba Jehofa. Ka go swana le mopsalme Dafida, re tutueletšwa go goeletša ka gore: “A botse le thatêxô! xe bana ba motho bà dula ba kwana!”—Psalme 133:1.
21. Jesaya 60:17 e phethagatšwa bjang lehono?
21 Re leboga gakaakang tlhahlo ya Jehofa ka Lentšu la gagwe le moya o mokgethwa! Le gona mantšu a ngwadilwego go Jesaya 60:17 (PK), ke a kwagalago e le ka kgonthe gakaakang ge a re: “Ke tlo tliša digauta bakeng sa koporo, gomme bakeng sa tshipi ke tlo tliša disilifera, gomme bakeng sa dikwata ke tlo tliša koporo, bakeng sa mafsika ke tlo tliša tshipi; gomme ke tlo dira khutšo e be magoši a gago, le go loka e be mmuši wa gago.” Ka ge ditshepedišo tša pušo ya Modimo di tšwetše pele go phethagala ka mo go tletšego kudu gare ga Dihlatse tša Jehofa, re bile le maemo a ao a šegofaditšwego ka mokgatlo wa Modimo wa lefaseng.
22. Re leboga eng ka mo go swanetšego, gomme ke eng seo re swanetšego go ikemišetša go se dira?
22 Re leboga ka mo go tseneletšego dithulaganyo tša pušo ya Modimo tšeo di dirwago gare ga rena. E bile re leboga kudu mošomo o thata eupša e le o kgotsofatšago wo o dirwago ke balebeledi le bahlanka ba bodiredi bao ba kgethilwego ka tsela ya pušo ya Modimo. Re tumiša Tatago rena wa legodimong ka pelo ka moka, yoo a re neilego lehumo la moya gomme a re šegofatša ka mo go humilego. (Diema 10:22) Ka gona, anke re ikemišetšeng go sepedišana le mokgatlo wa Jehofa. Ka godimo ga tšohle, anke re tšweleng pele re hlankela gotee ka botee bakeng sa tumišo, theto le kgodišo leineng le legolo le lekgethwa la Jehofa.
O be o tla Araba Bjang?
• Ke ka baka la’ng re ka bolela gore go kgethwa ga balebeledi le bahlanka ba bodiredi ke ga pušo ya Modimo, e sego ga pušo ka batho?
• Banna ba Bakriste bao ba nago le boikarabelo ba kgethwa bjang ka moya o mokgethwa?
• Sehlopha se Bušago se akaretšwa bjang go kgetheng balebeledi le bahlanka ba bodiredi?
• Ke ka baka la’ng re swanetše go leboga Jehofa ge e le mabapi le dikgetho tša pušo ya Modimo?
[Dipotšišo tša Thuto]
[Diswantšho go letlakala 15]
Bagolo le bahlanka ba bodiredi ba hwetša tokelo ya go hlankela ka go kgethwa ka tsela ya pušo ya Modimo