Kamoo ba Lebeletšanago ka Katlego le Kgateletšo ya Dithaka

KGANYOGO ya go amogelwa e tutuetša ba bantši go dumelelana le dikgopolo le ditiro tša dithaka tša bona. Seo bafsa ba se nyakago kudu-kudu ke matla a go gana mekgwa e kotsi, e bjalo ka go diriša dihlare-tagi gampe le boitshwaro bjo bo gobogilego bja botona le botshadi. Ba ka lebeletšana bjang ka katlego le kgateletšo ya dithaka?

Banenyana ba babedi ba nywaga ya mahlalagading ba Poland morago bjale ba ngwadile gore: “Moya wa lefase o bonagala gabotse gare ga dithaka tša rena tše dintši. Ba a hlalefetša dithutong tša bona, ba diriša polelo e sa hlwekago gomme ba rata diaparo tše di lego nakong le tša go bontšha go hloka mekgwa le mmino o gobogilego. Re thaba gakaakang go ba le dihlogo tšeo di bolelago le rena bafsa le go re šireletša tutuetšong ya bafsa bao ba sa kgotsofalago le ba marabele!

“Ga re na mantšu a go bolela tebogo ya rena ya go leboga dihlogo tša Morokami tšeo di gateletšego go rena re le bafsa gore re a nyakega e bile re a ratwa. Keletšo ya Beibele yeo re e amogetšego e re thušitše go gata megato e swanetšego e le gore re tšwele pele re thabiša Jehofa Modimo. Re kgodišegile gore tirelo ya potego ya go hlankela Jehofa ke tsela e phalago tšohle ya bophelo.”

Ee, bafsa ba ka lebeletšana ka katlego le kgateletšo ya dithaka. Ka go tlwaetša ‘matla a bona a go nagana,’ bafsa ba Bakriste ba ithuta go dira diphetho tše bohlale tšeo di sa bontšhego “môya wa lefase” eupša go e na le moo e le tše di bonagatšago “môya o tšwaxo xo Modimo.”​—⁠Ba-Hebere 5:​14, NW; 1 Ba-Korinthe 2:⁠12.