Emang Ka Botlalo Le Ka Kgodišego E Tiilego

“Modiro wa Bokgwari bjo Bogolo”

GO TLOGA mehleng ya pele ya histori ya tšona ya mehleng yeno, Dihlatse tša Jehofa di ile tša bontšha kgahlego e tseneletšego go bjo bongwe bja boporofeta bja Jesu Kriste bjo bo rego: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:​14, NW) Ge 1914​—⁠mathomo a ‘mehla ya bofelo’​—⁠e be e batamela, Barutwana ba Beibele ba botegago ba ile ba thoma ka kgodišego e tiilego lesolo la lefase ka bophara leo le sa kago la ba gona pele la thuto yeo e theilwego Mangwalong a Makgethwa.​—⁠2 Timotheo 3:⁠1.

E le gore ba fihlelele morero wa bona wa go goelela ditaba tše dibotse lefaseng ka bophara, bahlanka ba ba Jehofa ba ile ba diriša mokgwa wo e bego e le o mofsa, wa sebete le wo o bonagalago. Gore re kwe mo gontši ka ona, anke re boeleng morago.

Tsela e Mpsha ya go Goelela Ditaba tše Dibotse

Ke January ya ngwaga wa 1914. Akanya o dutše gare ga ba bangwe ba 5 000 ka holong ya lefsifsana kua New York City. Ka pele ga gago go na le sekirini se segolo sa diswantšho tše di sepelago. Monna wa hlogo e tšhweu yo a aperego baki ya go fihla dikhurung o tšwelela sekirining. O šetše o kile wa bona difilimi tše di sa bolelego, eupša monna yo o a bolela, gomme o kgona go kwa mantšu a gagwe. O thoma go bona selo se sengwe sa bohlale bjo bofsa, gomme molaetša wa gona ke wa moswana-noši. Seboledi ke Charles Taze Russell, mopresidente wa pele wa Mokgatlo wa Watch Tower, gomme pontšho ke ya “Photo-Drama of Creation.”

C. T. Russell o ile a lemoga kgonagalo ya gore diswantšho tšeo di sepelago di ka fihlelela mašaba a batho. Ka gona, ka 1912 o ile a thoma go lokišetša “Photo-Drama of Creation.” Mafelelong, e ile ya feleletša e le tšweletšo ya diswantšho tša di-slide le diswantšho tšeo di sepelago ya botelele bja diiri tše seswai, e nago le mebala e feletšego le modumo.

Ka ge e be e hlametšwe go bontšhwa ka dikarolwana tše nne, “Photo-Drama” e ile ya tloga le babogedi tlholong go theoša le histori ya batho go ba go fihla seremong sa morero wa Jehofa Modimo bakeng sa lefase le batho bofelong bja Pušo ya Kriste ya Nywaga e Sekete. Go be go tla feta nywaga e mentši pele go dirišwa ga thekinolotši ka tsela e bjalo go be go ka dirišwa ka mo go atlegilego kgwebong. Lega go le bjalo, ba dimilione ba ile ba bona “Photo-Drama of Creation” ka ntle le tefo!

Go ile gwa lokišetšwa mmino wa maemo a godimo gotee le direkhoto tša dipolelo tšeo di bapalwago ka keramafomo tše 96 bakeng sa “Photo-Drama.” Di-slide tšeo di bontšhwago ka go hlatlagantšhwa di be di dirilwe ka diswantšho tše dibotse tšeo di bontšhago histori ya lefase. Go be go bile go nyakega gore go dirwe diswantšho tše difsa tša go thalwa tše makgolo. Tše dingwe tša di-slide tša mmala le diswantšho di be di thadilwe ka seatla ka kelohloko kudu. Le gona se se be se dirwa leboelela, ka ge go ile gwa lokišeletšwa disete tše 20 tša dikarolwana tše nne, ge nako e dutše e e-⁠ya. Se se ile sa dira gore go kgonege  go bontšha karolo ya “Photo-Drama” metseng e sa swanego e 80 letšatšing le ge e le lefe le tee!

Tša Moo go sa Bonwego ke Batho Bohle

Go be go direga’ng karolong e sa bonagalego nakong ya ge go be go bontšhwa “Photo-Drama”? Morutwana wa Beibele yo a bitšwago Alice Hoffman o itše: “Drama e be e thoma ka pontšho ya Ngwanabo rena Russell. Ge a be a tšwelela sekirining gomme molomo wa gagwe o thoma go šikinyega, keramafomo e be e thoma go bapala . . . gomme re be re thabela go theetša lentšu la gagwe.”

Ge a šupa pontšhong ya go akgofiša megato, Zola Hoffman o ile a gopola gore: “Ke be ke dutše moo ke tomotše mahlo ka go makala ge re le gare re bogetše diswantšho tša matšatši a tlholo. Go be go e-⁠na le matšoba ao a bego a thunya ganyenyane-ganyenyane re a lebeletše.”

Morati wa mmino Karl F. Klein wa Sehlopha se Bušago sa Dihlatse tša Jehofa o oketša ka gore: “Ka nako e swanago ge diswantšho tše di be di bontšhwa, di be di felegetšwa ke mmino o bosana, dikoša tša maemo a godimo tše bjalo ka Narcissus le Humoreske.”

Gape go be go e-⁠na le ditiragalo tše dingwe tšeo di sa lebalegego. Clayton J. Woodworth yo monyenyane o gopotše gore: “Ka dinako tše dingwe go be go e-⁠ba le diphošo tšeo di segišago. Lebakeng le lengwe go be go bapala rekhoto ya ‘Flee as a Bird to Your Mountain,’ gomme sekirining gwa tšwelela seswantšho sa mohuta wa gigantosaurus e kgolo, e lego phoofolo e kgolo kudu ya mehleng ya pele ga Meetse-fula”!

Ka ntle le “Photo-Drama of Creation” e tlwaelegilego, go se go ye kae ke ge go e-⁠na le disete tša “Eureka Drama.” (Bona lepokisi.) E nngwe e be e dirilwe ka dipolelo tšeo di gatišitšwego gotee le mmino wo o gatišitšwego. E nngwe e be e e-⁠na le bobedi direkhoto le di-slide. Gaešita le ge “Eureka Drama” e be e se na diswantšho tšeo di sepelago, e be e atlega kudu ge e be e bontšhwa mafelong ao a se nago batho ba bantši kudu.

Sedirišwa se Matla sa go Nea Bohlatse

Go ya bofelong bja 1914, “Photo-Drama” e be e šetše e bontšhitšwe batheetši ba fihlago go 9 000 000 kua Amerika Leboa, Yuropa le Australia. Le ge ba be ba se nene ka palo, Barutwana ba Beibele ba be ba sa hloke kgodišego e tiilego yeo e nyakegago bakeng sa go goelela ditaba tše dibotse ka mokgwa wo o mofsa. Ka lethabo ba ile ba neela ditšhelete tšeo di bego di nyakega bakeng sa go hira mafelo a swanetšego bakeng sa dipontšho tše. Ka go rialo “Photo-Drama of Creation” e dirile modiro o mogolo tabeng ya go tlwaelanya babogedi le Lentšu la Modimo le merero ya gagwe.

Lengwalong leo le ngwaletšwego C. T. Russell, motho yo mongwe o ngwadile gore: “Ketelo yela ya mathomo ya go yo bona Terama ya lena e bile nako ya phetogo e kgolo bophelong bja-ka; goba mo gongwe nka re, e bile nako ya phetogo e kgolo tsebong ya-ka ya go tseba Beibele.” Motho yo mongwe o itše: “Ke be ke nyakile ke sobelela go hlokeng tumelo gomme ke nagana gore ke phološitšwe ke ‘Photo-Drama of Creation’ yeo e bontšhitšwego mo selemong se se fetilego. . . . Ga bjale ke na le khutšo yeo lefase le sa kgonego go e nea le yeo ke bego nka se arogane le yona ka baka la mahumo a yona ka moka.”

Demetrius Papageorge, yo e lego setho sa kgale sa sehlopha sa bašomi ba ntlong-kgolo ya Mokgatlo, o hlalositše gore: “ ‘Photo-Drama’ e bile modiro wa bokgwari, ge re akanya ka palo e nyenyane ya Barutwana ba Beibele le tekanyo e nyenyane ya ditšhelete tšeo di bego di hwetšagalago. Ruri e ile ya thekgwa ke moya wa Jehofa!”

[Lepokisi/Diswantšho go letlakala 8, 9]

“Eureka Drama”

Dikgwedi tše seswai ka morago ga pontšho ya mathomo ya “Photo-Drama,” Mokgatlo o ile wa bona go nyakega gore o dire karolo e nngwe ya yona yeo e bitšwago “Eureka Drama.” Le ge “Photo-Drama” e feletšego e ile ya tšwela pele e bontšhwa metseng e megolo, disete tša “Eureka” di be di bontšha molaetša o swanago wa motheo metsaneng le mafelong a magaeng. Karolo e nngwe ya “Eureka Drama” e ile ya hlaloswa e le yeo e neago “dikgaetšedi sebaka se se kgethegilego” sa go bolela. Ke ka baka la’ng go le bjalo? Ka baka la gore lepokisi la yona la direkhoto tša keramafomo le be le imela dikhilograma tše 14 feela. Go ba gona, go be go tla nyakega gore go rwalwe keramafomo bakeng sa pontšho.