Sepedišana le Mokgatlo wa Jehofa
Sepedišana le Mokgatlo wa Jehofa
“Eka ke ge Modimo wa khutšo . . . a ka le hlama ka selo se sengwe le se sengwe sa mohola gore le dire thato ya gagwe.”—BA-HEBERE 13:20, 21, NW.
1. Baagi ba lefaseng ke ba bakae, gomme ke ba bakae bao ba balwago e le ditho tša madumedi a itšego?
KA NGWAGA wa 1999, palo ya baagi ba lefase e fihlile go dimilione tše dikete tše tshela! The World Almanac e bontšha gore palong ye ba 1 165 000 000 ke Mamoseleme; ba 1 030-000 000 ke ma-Roma Katholika; ba 762 000 000 ke ma-Hindu; ba 354 000 000 ke ma-Buddha; ba 316 000 000 ke Maprotestanta gomme ba 214 000 000 ke ma-Orthodox.
2. Go ka thwe’ng ka boemo bja bodumedi bjo bo lego gona lehono?
2 Ka baka la go arogana ga madumedi le kgakanego e lego gona lehono, na dimilione tše ka moka di ka ba di dira ka go dumelelana le thato ya Modimo? Aowa, “xobane Modimo xa se Modimo wa thlakathlakanô; ke Modimo wa moláô.” (1 Ba-Korinthe 14:33) Ka lehlakoreng le lengwe, go thwe’ng ka borwarre bja lefaseng ka bophara bja bahlanka ba Jehofa? (1 Petro 2:17, NW) Nyakišišo ya kelohloko e hlatsela gore ‘Modimo wa khutšo o ba hlama ka selo se sengwe le se sengwe sa mohola gore ba dire thato ya gagwe.’—Ba-Hebere 13:20, 21, NW.
3. Go diragetše’ng Jerusalema ka Pentekoste ya 33 C.E., gomme ka baka la’ng?
3 Ka mo go lego molaleng, palo ya bao ba kopanelago le Dihlatse tša Jehofa ga se seelo sa go kgonthišetša ge e ba ba amogelwa ke Modimo; e bile Modimo ga a kgahlwe ke dipalo-palo. Ga se a ka a kgetha ba-Isiraele ka gobane e be e le setšhaba se segolo go “feta dithšaba tse dingwê.” Ge e le gabotse, e be e le “sethšaba se senyenyane” go tšona ka moka. (Doiteronomio 7:7) Eupša ka ge Isiraele e ile ya ipontšha e sa botege, ka Pentekoste ya 33 C.E., Jehofa o ile a fetišetša kgaugelo ya gagwe phuthegong e mpsha yeo e bego e bopša ke balatedi ba Jesu Kriste. Ba ile ba tlotšwa ka moya o mokgethwa wa Jehofa gomme ka mafolofolo ba tšwela pele ba tsebiša ba bangwe therešo e lego mabapi le Modimo le Kriste.—Ditiro 2:41, 42.
Go Gatela Pele ka go se Kgaotše
4. Ke ka baka la’ng o ka re phuthego ya pele ya Bokriste e be e gatela pele ka go se kgaotše?
4 Lekgolong la pele la nywaga, phuthego ya Bokriste e be e gatela pele ka go se kgaotše, e bula mašemo a mafsa, e dira barutiwa le go hwetša kwešišo e kgolwanyane mabapi le merero ya Modimo. Bakriste ba pele ba ile ba sepedišana le tshedimošo ya moya yeo e bego e newa ka mangwalo a buduletšwego ke Modimo. Ba kgothaditšwe ke go etelwa ke baapostola le ba bangwe, ba ile ba phetha bodiredi bja bona. Taba ye e hlatsetšwe gabotse ka Mangwalong a Bakriste a Segerika.—Ditiro 10:21, 22; 13:46, 47; 2 Timotheo 1:13; 4:5; Ba-Hebere 6:1-3; 2 Petro 3:17, 18.
5. Ke ka baka la’ng mokgatlo wa Modimo o gatela pele lehono, gomme ke ka baka la’ng re swanetše go sepedišana le wona?
5 Go swana le Bakriste ba pele, Dihlatse tša Jehofa tša mehleng yeno di godile go tloga mathomong a manyenyane. (Sakaria 4:8-10) Ga e sa le go tloga mafelelong a lekgolo la bo-19 la nywaga, go ile gwa ba le bohlatse bjo bo lego molaleng bja gore moya wa Modimo o šoma godimo ga mokgatlo wa gagwe. Ka ge re se ra ithekga ka matla a batho, eupša re ithekgile ka tlhahlo ya moya o mokgethwa, re tšwetše pele go dira kgatelopele kwešišong ya rena ya Mangwalo le go direng thato ya Modimo. (Sakaria 4:6) Ka ge ga bjale re le “mehleng ya bofêlô,” ke gabohlokwa gore re sepedišane le mokgatlo wa Jehofa wo o gatelago pele. (2 Timotheo 3:1-5) Go dira bjalo go re dira gore re kgone go boloka kholofelo ya rena e phela le go ba le karolo go neeng bohlatse mabapi le Mmušo o hlomilwego wa Modimo pele bofelo bja makgaola-kgang bo fediša tshepedišo ye ya dilo.—Mateo 24:3-14.
6, 7. Re tla hlahloba dikarolo dife tše tharo tšeo go tšona mokgatlo wa Jehofa o tšwetšego pele?
6 Gare ga rena go na le bao ba thomilego go kopanela le mokgatlo wa Jehofa nywageng ya bo-1920, bo-1930 le bo-1940. Nywageng yeo ya pele, ke mang gare ga rena yo a ka bego a ile a akanya kgolo e makatšago le kgatelopele ya mokgatlo go fihla lehono? Nagana ka ditiragalo tše dikgolo tšeo di fihleletšwego historing ya rena ya mehleng yeno! Ke mo go putsago e le ka kgonthe moyeng go naganišiša ka seo Jehofa a se phethilego ka batho ba gagwe bao ba rulagantšwego ka mokgwa wa pušo ya Modimo.
7 Dafida wa bogologolo o be a thaba kudu ge a be a naganišiša ka mediro e kgahlišago ya Jehofa. O itše: “Xe nka re ke a di bolêla, ka di anêxêla batho, di mpalêla xo di bala.” (Psalme 40:5) Re lebeletšane le go palelwa mo go swanago, re palelwa ke go anega ditiro tše dintši le tše tumišegago tša Jehofa mehleng ya rena. Lega go le bjalo, anke re hlahlobeng dikarolo tše tharo tšeo go tšona mokgatlo wa Jehofa o gatetšego pele: (1) tshedimošo e tšwelago pele ya moya, (2) bodiredi bjo bo kaonefaditšwego le bjo bo katološitšwego le (3) dipeakanyo tše di lego nakong megatong ya mokgatlo ya thulaganyo.
Go Leboga Tshedimošo ya Moya
8. Ka go dumelelana le Diema 4:18, ke eng seo tshedimošo ya moya e dirilego gore re kgone go se lemoga mabapi le Mmušo?
8 Mabapi le tshedimošo ya moya yeo e tšwelago pele, Diema 4:18 (PK) e ipontšhitše e le ya therešo. E re: “Mmila wa ba ba lokilego o phadima bjalo ka seetša se se felago se phadima go fihla mosegare o mogolo.” Re leboga gakaakang tshedimošo ya moya e tšwelago pele yeo re e amogetšego! Kopanong ya Cedar Point, Ohio ka 1919, go ile gwa gatelelwa Mmušo wa Modimo. Jehofa o diriša Mmušo go kgethagatša leina la gagwe le go lwela bogoši bja gagwe. Ge e le gabotse, tshedimošo ya moya e re dirile gore re kgone go lemoga gore go tloga go Genesi go fihla ka Kutollo, Beibele e hlatsela morero wa Jehofa wa go kgethagatša leina la gagwe ka Mmušo wo o bušwago ke Morwa wa gagwe. Moo ke gona mo go letšego kholofelo e kgolo ya barati ka moka ba go loka.—Mateo 12:18, 21.
9, 10. Ka bo-1920, go ithutilwe eng mabapi le Mmušo le mabapi le mekgatlo e mebedi e ganetšanago, gomme se se thušitše bjang?
9 Kopanong ya Cedar Point ka 1922, seboledi-segolo, J. F. Rutherford, se kgothaleditše batho ba Modimo gore “tsebatšang, tsebatšang, tsebatšang Kgoši le mmušo wa yona.” Sehlogong se se rego “Go Tswalwa ga Setšhaba” seo se gatišitšwego ka go Morokami (wa Seisemane) wa March 1, 1925, se ile sa lebiša tlhokomelo temogong ya moya mabapi le diporofeto tšeo di bego di šupa pele go hlongweng ga Mmušo wa Modimo ka 1914. Gape go ile gwa lemogwa ka bo-1920 gore go na le mekgatlo e mebedi e ganetšanago—wa Jehofa le wa Sathane. Ntwa e a kgatlampana magareng ga yona, gomme re tla ba ka lehlakoreng le le fenyago ge feela re sepedišana le mokgatlo wa Jehofa.
10 Tshedimošo e bjalo ya moya e re thušitše bjang? Ka ge Mmušo wa Modimo le Kgoši Jesu Kriste e se karolo ya lefase, le rena ka mo go swanago re ka se be karolo ya lona. Ka go dula re ikarotše lefaseng, re bontšha gore re ka lehlakoreng la therešo. (Johane 17:16; 18:37) Ge re bona mathata a raraganego ao a hlasetšego tshepedišo ye e kgopo, re leboga gakaakang gore ga re karolo ya mokgatlo wa Sathane! Gomme re ba lehlogonolo gakaakang bakeng sa go ba le tšhireletšego ya moya ka gare ga mokgatlo wa Jehofa!
11. Ke leina lefe la Mangwalo leo le ilego la amogelwa ke batho ba Modimo ka 1931?
11 Kopanong ya Columbus, Ohio ka 1931, go ile gwa bontšhwa tirišo e nepagetšego ya Jesaya 43:10-12. Barutwana ba Beibele ba ile ba amogela leina la bona leo le ba hlaolago la Dihlatse tša Jehofa. Ke tokelo e kgolo gakaakang go tsebatša leina la Modimo e le gore ba bangwe ba ka le bitša bakeng sa gore ba phološwe!—Psalme 68:4; Ba-Roma 10:13.
12. Ke tshedimošo efe ya moya mabapi le lešaba le legolo yeo e neilwego ka 1935?
12 Pele ga bo-1930, batho ba Modimo ba bantši ba be ba le kgakanegong mabapi le dikholofelo tša bona tša bophelo bja nakong e tlago. Ba bangwe ba be ba nagana ka bophelo bja legodimong eupša ba be ba kgahlišwa ke dithuto tša Beibele mabapi le lefase la paradeise. Kopanong ya Washington D.C., ka 1935, e be e le mo go kgahlišago go kwešiša gore lešaba le legolo la Kutollo kgaolo 7 ke sehlopha seo se nago le kholofelo ya lefaseng. Ga e sa le go tloga ka nako yeo, go kgoboketšwa ga lešaba le legolo go ile gwa gatela pele ka lebelo le legolo kudu. Na ga re leboge gore go hlaolwa ga lešaba le legolo ga se sephiri go rena? Go kgoboketšwa ga kgonthe ga batho ka dipalo tše dikgolo go tšwa ditšhabeng ka moka, merafong le malemeng ka moka go re tutueletša go šoma ka mafolofolo ge re dutše re sepedišana le mokgatlo wa Jehofa.
13. Ke kgang efe e kgolo yeo e ilego ya gatelelwa kopanong ya St. Louis ka 1941?
13 Kgang e kgolo yeo e swanetšego go kgoma lekoko la batho e ile ya gatelelwa kopanong ya St. Louis, Missouri ka 1941. Yona ke ya pušo goba bogoši bja legohle. Ye ke kgang yeo e swanetšego go rarollwa kgaufsinyane, gomme letšatši le legolo leo le boifišago la gore seo se dirwe le tla ka lebelo le legolo! Se sengwe gape seo se ilego sa gatelelwa ka 1941 e bile kgang e tswalanago le potego, yeo e re dumelelago go bontšha moo re emego gona re le motho ka o tee ka o tee ge e le mabapi le bogoši bja Modimo.
14. Kopanong ya ditšhaba-tšhaba ka 1950, go ile gwa ithutwa eng mabapi le dikgošana tšeo go boletšwego ka tšona go Jesaya 32:1, 2?
14 Kopanong ya ditšhaba-tšhaba ya 1950 kua New York City, dikgošana tša Jesaya 32:1, 2 di ile tša hlathollwa ka mo go nepagetšego. E bile nako e kgahlišago kudu ge Ngwanabo rena Frederick Franz a be a bolela ka sehlogo se gomme a hlalosa gore dikgošana tša nakong e tlago tša lefase le lefsa di be di le gare ga rena. Kopanong yeo le go tše di latetšego, go bile le mahlasedi a mantši a seetša sa moya. (Psalme 97:11) Re leboga gakaakang gore mmila wa rena o bjalo ka “seetša se se felago se phadima go fihla mosegare o mogolo”!
Go Gatela Pele Bodireding bja Rena
15, 16. (a) Re ile ra gatela pele bjang bodireding bja rena ka bo-1920 le bo-1930? (b) Ke dipuku dife tšeo di tutueditšego bodiredi bja Bokriste nywaga-kgolong ya morago bjale?
15 Tsela ya bobedi yeo mokgatlo wa Jehofa o gatetšego pele ka yona e mabapi le modiro wa rena o mogolo—go bolela ka Mmušo le go dira barutiwa. (Mateo 28:19, 20; Mareka 13:10) Go phetha modiro wo, mokgatlo o gateletše go rena bohlokwa bja go katološa bodiredi bja rena. Ka 1922 Bakriste ka moka ba ile ba kgothaletšwa gore ba be le karolo modirong wa boboledi. E be e le boikarabelo bja motho yo mongwe le yo mongwe go dira gore seetša sa gagwe se phadime gomme ka go rialo a be le karolo ka boyena go hlatseleng therešo. (Mateo 5:14-16) Ka 1927 go ile gwa gatwa megato ya go beela Sontaga ka thoko e le letšatši la bodiredi bja tšhemo. Go thoma ka February 1940, e ile ya ba mo go tlwaelegilego go bona Dihlatse ditarateng mafelong a dikgwebo di sepediša Morokami le Consolation (ye ga bjale e lego Phafoga!).
16 Ka 1937 go ile gwa tšweletšwa pukwana ya Model Study, yeo e bego e gatelela go nyakega ga go dira maeto a go boela bakeng sa go ruta ba bangwe therešo ya Beibele. Nywageng ya ka morago ga moo, modiro wa go swara thuto ya Beibele o ile wa gatelelwa kudu. Go ile gwa newa tutuetšo sebopegong se sa bodiredi ka go gatišwa ga puku ya “Let God Be True” ka 1946 le Therešo ye Išago Bophelong bjo bo sa Felego ka 1968 (ka Seisemane). Mo nakong ye, re diriša puku ya Tsebo e Išago Bophelong bjo bo sa Felego. Go akaretšwa ga puku ye go thea motheo o matla wa Mangwalo bakeng sa go dira barutiwa.
Go Gatela Pele ka Ditokišo tša Mokgatlo
17. Ka go dumelelana le Jesaya 60:17, mokgatlo wa Jehofa o gatetše pele bjang?
17 Tsela ya boraro yeo ka yona mokgatlo wa Jehofa o gatetšego pele e mabapi le ditokišo tša mokgatlo. Go ya ka Jesaya 60:17 (PK), Jehofa o holofeditše gore: “Ke tlo tliša digauta bakeng sa koporo, gomme bakeng sa tshipi ke tlo tliša disilifera, gomme bakeng sa dikwata ke tlo tliša koporo, bakeng sa mafsika ke tlo tliša tshipi; gomme ke tlo dira khutšo e be magoši a gago, le go loka e be mmuši wa gago.” Ka go dumelelana le boporofeta bjo, go ile gwa gatwa megato bakeng sa go kaonefatša tsela ya go hlokomela modiro wa go bolela ka Mmušo le wa go diša mohlape.
18, 19. Ke dipeakanyo dife tša mokgatlo tšeo di bilego gona go theoša le nywaga?
18 Ka 1919 go ile gwa kgethwa molaodi wa tirelo phuthegong e nngwe le e nngwe yeo e bego e kgopetše gore e rulaganywe bakeng sa tirelo ya tšhemo. Se se ile sa tutuetša bodiredi bja rena tšhemong. Go boutelwa ga bagolo le batiakone go ile gwa fedišwa ka 1932, gwa swaya go kgaogana ga rena le mekgwa ya pušo ka batho. Tiragalo e nngwe e bohlokwa e ile ya fihlelelwa ka 1938 ge bahlanka ka moka ka phuthegong ba be ba thoma go kgethwa ka go dumelelana kgaufsi kudu le dithulaganyo tša go kgethwa ka tsela ya pušo ya Modimo phuthegong ya pele ya Bokriste. (Ditiro 14:23; 1 Timotheo 4:14) Ka 1972 balebeledi le bahlanka ba bodiredi ba ile ba kgethwa gore ba hlankele, go etša ge banna ba bjalo ba be ba hlankela gare ga Bakriste ba pele. Go e na le gore go be le monna o tee feela yo a hlankelago e le molebeledi wa phuthego, Ba-Filipi 1:1 le mangwalo a mangwe a bontšha gore bao ba fihlelelago dinyakwa tša Mangwalo bakeng sa balebeledi ba bopa sehlopha sa bagolo.—Ditiro 20:28; Ba-Efeso 4:11, 12.
19 Ka 1975 go ile gwa thongwa thulaganyo ya gore dikomiti tša Sehlopha se Bušago sa Dihlatse tša Jehofa di okamele mediro ya lefaseng ka bophara ya mokgatlo wa Modimo. Go ile gwa kgethwa Dikomiti tša Makala gore di okamele modiro mašemong a tšona a fapa-fapanego. Ga e sa le go tloga ka nako yeo, tlhokomelo e ile ya lebišwa go nolofatšeng modiro ntlong-kgolo le makaleng a Mokgatlo wa Watch Tower e le gore ‘go kgonthišetšwe ka dilo tša bohlokwa bjo bogolo.’ (Ba-Filipi 1:9, 10, bapiša le NW.) Boikarabelo bjo bo beilwego magetleng a badiši ba ka tlasana ba Kriste bo akaretša go etelela pele modirong wa boebangedi, go ruta ka phuthegong le go diša mohlape wa Modimo ka tshwanelo.—1 Timotheo 4:16; Ba-Hebere 13:7, 17; 1 Petro 5:2, 3.
Boetapele bja Jesu bjo Mafolofolo
20. Go sepedišana le mokgatlo wa Jehofa go nyaka gore re lemoge eng ka boemo bja Jesu?
20 Go sepedišana le mokgatlo wa Jehofa o tšwelago pele go nyaka gore re lemoge boemo bjoo Jesu Kriste a bo abetšwego ke Modimo bjalo ka “hlôxô ya phuthêxô.” (Ba-Efeso 5:22, 23) Gape lengwalo le lengwe leo le lemogegago ke Jesaya 55:4, moo re botšwago gore: “Le tsebê, ke [Jehofa] beile yêna, xore e bê hlatse ya dithšaba, e bê yêna kêta-pele le molai wa dithšaba.” Jesu o tseba go etelela pele e le ka kgonthe. Gape o tseba dinku tša gagwe le ditiro tša tšona. Ge e le gabotse, ge a be a hlahloba diphuthego tše šupago tša Asia Minor, o ile a bolela ka makga a mahlano gore: “Medirô ya xaxo ke a e tseba.” (Kutollo 2:2, 19; 3:1, 8, 15) Jesu gape o tseba dinyakwa tša rena, go etša Tatagwe, Jehofa. Pele ga ge a ka nea Thapelo ya Mohlala, Jesu o itše: “Tataweno, tše Le di hlôkaxo ó a di tseba Lè sešo la mo kxopêla.”—Mateo 6:8-13.
21. Boetapele bja Jesu bo bonagatšwa bjang ka phuthegong ya Bokriste?
21 Boetapele bja Jesu bo bonagatšwa bjang? Tsela e nngwe ke ka balebeledi ba Bakriste, “dimpho tšeo e lego banna.” (Ba-Efeso 4:8, NW) Kutollo 1:16 e hlalosa balebeledi ba tloditšwego ba le ka letsogong le letona la Kriste, e lego ka tlase ga taolo ya gagwe. Lehono, Jesu o hlahla thulaganyo ya bagolo, go sa šetšwe gore banna ba bjalo ba na le kholofelo ya legodimong goba ya lefaseng. Bjalo ka ge go hlalositšwe sehlogong se se fetilego, ba kgethilwe ka moya o mokgethwa ka go dumelelana le dinyakwa tša Mangwalo. (1 Timotheo 3:1-7; Tito 1:5-9) Lekgolong la pele la nywaga, sehlopha sa banna ba godilego kua Jerusalema se ile sa bopa sehlopha se bušago seo se ilego sa okamela diphuthego le modiro ka kakaretšo wa go bolela ka Mmušo. Go latelwa mokgwa o swanago ka gare ga mokgatlo wa Jehofa lehono.
Sepedišana le Wona!
22. Ke thušo efe yeo Sehlopha se Bušago se e neago?
22 Dikgahlego tša Mmušo lefaseng di gafetšwe go hlokomelwa ke “molaki e a bôtêxaxo yo bohlale” yo a emelwago ke Sehlopha se Bušago sa Dihlatse tša Jehofa. (Mateo 24:45-47) Sehlopha se Bušago se lebišitše tlhokomelo kudu go neeng taelo ya moya le tlhahlo bakeng sa phuthego ya Bokriste. (Ditiro 6:1-6) Lega go le bjalo, ge barapedi-gotee ba kgomilwe ke dikotsi tša tlhago, Sehlopha se Bušago se kgopela mokgatlo o tee wa molao goba e oketšegilego go nea tlhakodišo le go lokiša le go aga lefsa dintlo tšeo di sentšwego gotee le Diholo tša Mmušo. Ge e ba Bakriste ba itšego ba swerwe ka tsela e šoro goba ba tlaišwa, go gatwa megato bakeng sa go ba aga moyeng. Le gona ‘lebakeng la mathata,’ go dirwa maiteko ka gohle bakeng sa go boloka modiro wa boboledi o tšwela pele.—2 Timotheo 4:1, 2, bapiša le NW.
23, 24. Go sa šetšwe gore batho ba gagwe ba lebeletšana le eng, ke eng seo Jehofa a se neago ka mehla, gomme boikemišetšo bja rena e swanetše go ba bofe?
23 Go sa šetšwe gore batho ba gagwe ba welwa ke eng, Jehofa ka mehla o nea dijo tša moya le tlhahlo e nyakegago. Modimo gape o nea banababo rena ba ikarabelago temogo bakeng sa go lokišeletša tšwelopele e oketšegilego le dipeakanyo mokgatlong wa pušo ya Modimo. (Doiteronomio 34:9; Ba-Efeso 1:16, 17) Ka ntle le go palelwa, Jehofa o nea seo re se nyakago bakeng sa go phethagatša thomo ya rena ya go dira barutiwa le go phethagatša bodiredi bja rena lefaseng ka bophara.—2 Timotheo 4:5.
24 Re na le kgodišego e feletšego ya gore Jehofa le ka mohla a ka se ke a lahla batho ba gagwe ba botegago; o tla ba phološa “tlaišexong e kxolo” e tlago. (Kutollo 7:9-14; Psalme 94:14; 2 Petro 2:9) Re na le mabaka ka moka a go boloka kholofelo yeo re bilego le yona mathomong go fihla mafelelong. (Ba-Hebere 3:14) Ka gona, anke re ikemišetšeng go sepedišana le mokgatlo wa Jehofa.
O be o ka Araba Bjang?
• Ke ka baka la’ng re ka re mokgatlo wa Jehofa o tšwela pele go gatela pele?
• Ke bohlatse bofe bjo bo lego gona bja gore batho ba Modimo ba thabela tshedimošo e sa kgaotšego ya moya?
• Ke bjang go bilego le dikaonefatšo bodireding bja Bokriste?
• Ke dipeakanyo dife tšeo di lego nakong tšeo di dirilwego ditshepedišong tša mokgatlo gare ga bahlanka ba Jehofa?
[Dipotšišo tša Thuto]
[Seswantšho go letlakala 17]
Ka go swana le Dafida, re ka se ke ra bala mediro ka moka ya Jehofa e makatšago
[Seswantšho go letlakala 18]
Mohlape wa Modimo o hotšwe ke dipeakanyo tšeo di lego nakong ditshepedišong tša mokgatlo