Tsebišo e Kgethegilego

MAFELELONG a seboka sa ngwaga le ngwaga sa Watch Tower Bible and Tract Society of Pennsylvania ka October 7, 2000, tsebišo e kgethegilego e ile ya dirwa ke modula-setulo John E. Barr wa Sehlopha se Bušago. Tsebišo ye e be e theilwe dipolelong tšeo di bego di neetšwe pejana letšatšing leo ke Theodore Jaracz le Daniel Sydlik.​—⁠Bona matlakala 12-16 le 28-31 a makasine wo.

Ngwanabo rena Barr o ile a tšweletša ntlha e bohlokwa kudu ka gore: “ ‘Molaki e a bôtêxaxo yo bohlale’ le Sehlopha sa gagwe se Bušago ba ile ba fiwa mediro e phagamego kudu le yeo e akaretšago dilo tše dintši kudu go feta yeo e neilwego mekgatlo ya molao. Ka lengwalong la molao-theo leo le hlalosago mediro ya o mongwe le o mongwe wa mekgatlo ya molao go na le ditaba tšeo di lekanyeditšwego morerong wa yona. Lega go le bjalo, Mong wa rena, Jesu Kriste o kgethile sehlopha sa molaki yo a botegago go laka ‘dilo’ tša gagwe ka moka, goba dikgahlego tša Mmušo mo lefaseng.”​—Mateo 24:​45-⁠47.

Mabapi le mokgatlo wa Pennsylvania, Ngwanabo rena Barr o okeditše ka gore: “Ga e sa le go tloga go hlongweng ga yona ka 1884, Watch Tower Bible and Tract Society of Pennsylvania e kgathile tema e bohlokwa historing ya rena ya mehleng yeno. Lega go le bjalo, e fo ba sedirišwa sa molao seo se lego gona bakeng sa go dirišwa ke ‘molaki e a bôtêxaxo yo bohlale’ ge go nyakega.”

Dipolelong tša bona, Banababo rena Sydlik le Jaracz ba be ba hlalositše gore taba ya gore “molaki e a bôtêxaxo yo bohlale” o neilwe dilo ka moka tša Morena mo lefaseng ga e thibele sehlopha sa molaki go dumelela banna bao ba swanelegago gare ga “dinku tše dingwê” bakeng sa go hlokomela maikarabelo a itšego a rulagantšwego a bolaodi. (Johane 10:​16) E bile ga go na le lebaka le ge e lefe le lengwe la Mangwalo leo le nyakago gore ka moka goba ba bangwe ba balaodi ba mekgatlo ya molao yeo e dirišwago ke Dihlatse tša Jehofa e be Bakriste ba tloditšwego.

Ngwanabo rena Barr o boditše batheetši gore morago bjale ditho tše itšego tša Sehlopha se Bušago sa Dihlatse tša Jehofa tšeo di bego di dutše di hlankela e le balaodi le bahlankedi di ithapetše go tlogela maemo a tšona mekgatlong ka moka yeo e dirišwago ke “molaki e a bôtêxaxo yo bohlale” kua United States. Banababo rena bao ba nago le boikarabelo ba sehlopha sa dinku tše dingwe ba ile ba kgethwa bakeng sa go tšea dibaka tša bona.

Phetho ye ke yeo e holago e le ka kgonthe. E dumelela ditho tša Sehlopha se Bušago go diriša nako e oketšegilego di lokišeletša dijo tša moya le go hlokomela dinyakwa tša moya tša borwarre bja lefase ka bophara ka ditsela tše dingwe.

Mafelelong, modula-setulo o ile a botša batheetši ba gagwe ba thabilego gore: “Le ge mediro e fapa-fapanego ya molao le ya bolaodi e abetšwe balebeledi bao ba nago le phihlelo, . . . ka moka ga bona ba hlankela ka tlase ka tlhahlo ya moya ya Sehlopha se Bušago. . . . Ka moka ga rena re lebelela go Jehofa ka thapelo gore a šegofatše maiteko a rena a kopanego go direng thato ya gagwe, bakeng sa go godiša le go tumiša leina la gagwe le legolo.”