Bagoeledi Ba Mmušo Ba A Bega

Latvia e Arabela Ditabeng tše Dibotse

BEIBELE e bontšha gabotse gore ke thato ya Modimo gore “batho bohle ba phološwê ba fihlêlê tsebô ya therešô.” (1 Timotheo 2:⁠4) Bao ba hlokišitšwego sebaka sa go kwa ditaba tše dibotse ka nywaga e mentši bjale ba a di kwa! Kua Latvia, bjalo ka dikarolong tše dingwe tša lefase, batho ba nywaga ka moka le ba ba tšwago maemong a fapa-fapanego ba arabela molaetšeng, bjalo ka ge diphihlelo tše di latelago di bontšha.

•Kua Rēzekne, toropo yeo e lego ka bohlabela bja Latvia, mma le morwedi wa gagwe yo a lego nywageng ya mahlalagading ba ile ba botšiša mosadi tsela setarateng. Ka morago ga go ba nea tsebišo, mosadi yo e bego e le yo mongwe wa Dihlatse tša Jehofa, o ile a ba laletša go tla dibokeng tša Dihlatse.

Ka ge mma gotee le morwedi ba be ba sekametše bodumeding, ba ile ba dira phetho ya gore ba ye dibokeng. Ge ba le tseleng ba ile ba dira tumelelano ya gore ge e ba ba be ba ka hwetša selo le ge e le sefe seo se sa swanelago moo, ba be ba tla tloga ka ntle le go senya nako. Lega go le bjalo, diboka e be e le tšeo di kgahlišago kudu mo e lego gore ga se ba ka ba nagana le ka go tloga. Ba ile ba amogela taletšo ya go ithuta Beibele gomme ba thoma go ba gona dibokeng ka mehla. Ka dikgwedi tše tharo feela, ba ile ba bontšha kganyogo ya go kopanela modirong wa boboledi gomme ba lebeletše pele bakeng sa go kolobetšwa.

•Motseng o lego ka bodikela bja Latvia, Hlatse e ile ya kopana le Anna wa nywaga e 85, yo a ilego a bontšha kgahlego ya kgonthe le go amogela thuto ya Beibele. Morwedi wa gagwe le ditho tše dingwe tša lapa ba ile ba mo ganetša o šoro. Eupša Anna ga se a ka a dumelela seo goba go ba ga gagwe yo a godilego ka nywaga le go se ipshine mmeleng di mo thibela go tšwela pele ka thuto ya gagwe ya Beibele.

Ka letšatši le lengwe, Anna o ile a botša morwedi wa gagwe gore o be a tlo kolobetšwa. Morwedi wa Anna o ile a araba ka gore: “Ge o ka kolobetšwa, ke tlo go iša legaeng la batšofadi.” Lega go le bjalo, tšhošetšo ye ga se ya ka ya nyemiša Anna moko. Ka baka la maemo a gagwe a mmele, o ile a kolobeletšwa legaeng la gagwe.

Morwedi wa Anna o ile a arabela bjang go se? Pelo e be e fetogile, gomme o ile a lokišetša mmagwe dijo tše di kgethegilego ka morago ga kolobetšo. Ka morago ga moo o ile a botšiša mmagwe gore, “Ka ge bjale o kolobeditšwe, o ikwa bjang?” Anna o ile a araba ka go re’ng? “Bjalo ka ngwana yo a sa tšwago go belegwa!”

• Ka December 1988, Dihlatse tše pedi di ile tša kopana le mohlankedi wa madira a yeo e kilego ya ba Soviet Union yo a rotšego mošomo. Ka ge a be a dumela go Mmopi, o ile a amogela thuto ya Beibele gomme mosadi wa gagwe o ile a mo tlatša ka morago. Ba ile ba tšwela pele ka lebelo gomme kapejana ya ba bagoeledi bao ba sa kolobetšwago. Selemong seo se latetšego, yo e kilego ya ba mohlankedi wa madira o ile a kolobetšwa. Lerato le legolo la banyalani ba la go rata dilo tša moya ke kgothatšo go bohle ka phuthegong. Go oketša moo, ba ile ba ikgafela modirong wa go fetošetša lefelo la bodulo la tikologong go ba Holo e botse ya Mmušo.