Na o Dirile Therešo Gore e be ya Gago?

“Šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.”​—BA-ROMA 12:2.

1, 2. Ke ka baka la’ng go se bonolo go ba Mokriste wa therešo lehono?

GO BA Mokriste wa therešo mehleng ye ya bofelo​—⁠‘dinakong tše tše hlobaetšago tšeo go lego thata go lebeletšana le tšona’​—⁠ga go bonolo. (2 Timotheo 3:1, NW) Therešo ke gore motho o swanetše go fenya lefase gore a latele mohlala wa Kriste. (1 Johane 5:4) Gopola seo Jesu a se boletšego mabapi le tsela ya Bokriste: “Tsênang ka kxôrô e pitlaxanexo; xobane kxôrô e išaxo tahlexong ké e pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši. Xobane kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.” Gape o itše: “Xe motho a rata xo nthšala moraxo, a ikxafê, a rwalê [kota ya gagwe ya tlhokofatšo, NW] ka mehla, ’me a ntatêlê.”​—Mateo 7:​13, 14; Luka 9:23.

² Ge a hweditše tsela e tshese e išago bophelong, tlhohlo e latelago yeo Mokriste a lebanago le yona ke go dula tseleng yeo. Ke ka baka la’ng seo e le tlhohlo? Ke ka baka la gore boineelo bja rena le kolobetšo di re dira bahlaselwa ba ditiro tša boradia tša Sathane, goba maano a bohwirihwiri. (Ba-Efeso 6:​11; mongwalo wa tlase wa NW.) O lemoga mafokodi a rena gomme o tsoma go a diriša gampe ka maiteko a go senya boemo bja rena bja moya. Go ba gona, o ile a leka go wiša Jesu, ka gona o be a tla re tlogelela’ng?​—Mateo 4:​1-⁠11.

Maano a Sathane a Boradia

3. Sathane o ile a bjala bjang dipelaelo ka monaganong wa Efa?

³ Maano a mangwe ao Sathane a a dirišago ke go bjala dipelaelo menaganong ya rena. O nyaka moo ditlhamo tša rena tša moya di sa tiago gona. Mathomong-thomong, o dirišitše lona leano leo ka Efa, a botšiša gore: “Afá Modimo ó boletše a re: Dihlare tšohle tša thšemo yé Le se kê la di ja?” (Genesi 3:⁠1) Ka mantšu a mangwe, Sathane o be a re, ‘Na ruri ke therešo gore Modimo o le ileditše ka mokgwa woo? Na a ka le gana le selo se sebotse ka tsela ye? Moka gona, Modimo o tseba gore ka lona letšatši leo le jago sehlare se mahlo a lena a tla bulega gomme le tla swana le Modimo, la tseba botse le bobe!’ Sathane o ile a bjala peu ye ya pelaelo gomme a letela gore e mele.​—⁠Genesi 3:⁠5.

4. Ke dipelaelo dife tše di ka kgomago ba bangwe lehono?

⁴ Sathane o diriša bjang leano le lehono? Ge e ba re hlokomologa go bala ga rena Beibele, thuto ya rena ya motho ka noši, dithapelo tša rena le bodiredi bja rena bja Bokriste le diboka, re ka hlaselwa ke dipelaelo tšeo di rotošwago ke ba bangwe. Ka mohlala: “Re tseba bjang gore ye ke yona therešo yeo Jesu a ilego a e ruta?” “Na ye ka kgonthe ke mehla ya bofelo? Go feta moo, re šetše re le lekgolong la bo-21 la nywaga.” “Na re mollwaneng wa Haramagedone, goba na e sa le kgole?” Ge e ba dipelaelo tše bjalo di ka tšwelela, re ka dira’ng go di tloša?

5, 6. Re swanetše go dira’ng ge e ba dipelaelo di ka tsoga?

⁵ Jakobo o ile a nea keletšo e šomago ge a be a ngwala gore: “Xe mo xo lena xo ka ba le e a hlaêlwaxo ke bohlale, a a bo kxopêlê xo Modimo, Yêna wa xo nea bohle ka xo rata, à sa nyatše motho. A a kxopêlê a fiwê. A a kxopêlê ka tumêlô, a se dika-dikê; xobane e a dika-dikaxo ó swana le lephoto la lewatlê, le le tsošwaxo ke phefô la akxa-akxwa ke yôna. Motho yo byalo a se kê a re ó tlo fiwa selô ke Morêna; monna wa pelo-pedi, ditseleng tša xaxwe xa a loke.”​—⁠Jakobo 1:​5-⁠8.

 ⁶ Ka gona, re swanetše go dira’ng? Re swanetše go ‘tšwela pele re kgopela Modimo’ ka thapelo, re mo kgopela tumelo le kwešišo gomme re tiiše maiteko a rena thutong ya motho ka noši mabapi le dipotšišo le ge e le dife goba dipelaelo. Re ka ba ra kgopela thušo go bao ba tiilego tumelong, le ka mohla re sa belaele gore Jehofa o tla re nea thekgo yeo re e nyakago. Jakobo gape o itše: “Lobang-xê Le bušwê ke Modimo; Le lwê le Diabolo, ’me ó tlo Le thšaba. Batamêlang Modimo, le Yêna a Le batamêlê.” Ee, dipelaelo tša rena di tla timelela ge re batamela go Modimo ka go ithuta le ka thapelo.​—Jakobo 4:​7, 8.

7, 8. Dika tše dingwe tša motheo tša go hlaola mohuta wa borapedi wo o rutilwego ke Jesu ke dife, gomme ke bomang bao ba fihlelelago dika tšeo?

⁷ Tšea ka mohlala potšišo e rego: Re tseba bjang gore re mohuteng wa borapedi woo Jesu a o rutilego? Go araba se, ke dika dife tšeo di swanetšego go elwa hloko? Beibele e bontšha gore Bakriste ba therešo ba swanetše go ba le lerato la kgonthe magareng ga bona. (Johane 13:​34, 35) Ba swanetše go kgethagatša leina la Modimo, Jehofa. (Jesaya 12:​4, 5; Mateo 6:9) Le gona ba swanetše go tsebatša leina leo.​—Ekisodo 3:​15, PK; Johane 17:26.

⁸ Seka se sengwe seo se hlaolago borapedi bja therešo ke tlhompho ya go hlompha Lentšu la Modimo, Beibele. Ke puku ya moswananoši yeo e utollago semelo sa Modimo le merero ya gagwe. (Johane 17:​17; 2 Timotheo 3:​16, 17) Go oketša moo, Bakriste ba therešo ba tsebatša Mmušo wa Modimo bjalo ka kholofelo e nnoši ya batho bakeng sa bophelo bjo bo sa felego lefaseng la paradeise. (Mareka 13:​10; Kutollo 21:​1-4) Ba dula ba ikarotše dipolitiking tše gobogilego tša lefase le le tsela ya lona e šilafatšago ya bophelo. (Johane 15:​19; Jakobo 1:​27; 4:4) Ke bomang lehono bao ba fihleletšego dika tše e le ka kgonthe? Ditherešo di bontšha gore go na le karabo e tee feela​—Dihlatse tša Jehofa.

Go Thwe’ng ge e ba Dipelaelo di Phegelela?

9, 10. Re ka dira’ng gore re fenye dipelaelo tšeo di phegelelago?

⁹ Go thwe’ng ge e ba re ikhwetša re fenywa ke dipelaelo? Re swanetše go dira’ng? Kgoši Salomo yo bohlale o nea karabo: “Ngwan’a-ka! Xe O ka dumêla dikeletšô tša-ka, ’me wa hlôkômêla ditaelô tša-ka, xe bohlale O bo sêkêxêla tsêbê, wa lebiša pelo y’axo mo xo lexo thlaloxanyô, xe O ka bitša temoxô wa hlabošetša thlaloxanyô ’ntšu la xaxo, xe O ka e tsoma byalo ka leruô wa e nyakišiša bo-ka ’humô le le fihlilwexo, ké mo O tl’o xo tseba xo boifa Morêna, wa fihlêla xo tseba Modimo.”​—Diema 2:​1-5.

¹⁰ Na yeo ga se kgopolo e makatšago? Ge e ba re rata go ela hloko bohlale bja Modimo e le ka kgonthe, re tla “fihlêla xo tseba Modimo.” Ee, re ka  fihlelela tsebo ya Morena yo a Phagamego wa legohle ge e ba re ikemišeditše go amogela le go lebelela dipolelo tša gagwe e le tša bohlokwa. Seo se bolela go retologela go Jehofa ka thapelo le ka thuto ya motho ka noši. Mahumo a utegilego a Lentšu la gagwe a ka fediša dipelaelo le ge e le dife le go re thuša go bona seetša sa therešo.

11. Mohlanka wa Eliša o ile a kgongwa bjang ke pelaelo?

¹¹ Mohlala o mobotse wa mabapi le ka moo thapelo e thušitšego mohlanka yo a boifago le yo a belaelago wa Modimo o hwetšwa go 2 Dikxoši 6:​11-18. Mohlanka wa Eliša o be a hlaelelwa ke temogo ya moya. O be a sa kgone go lemoga gore madira a legodimo a be a le gona bakeng sa go thekga moporofeta wa Modimo, yo a bego a rakeletšwe ke madira a ba-Siria. Mohlanka o ile a goeletša ka poifo a re: “Yoo, Mong’a-ka! Xomme re tlo dira bya’ng?” Eliša o ile a arabela bjang? “Se boifê; ba ba naxô le rena ba feta ba ba naxo le bala.” Eupša mohlanka o be a tla kgodišwa ke eng? O be a sa kgone go bona madira a legodimo.

12. (a) Dipelaelo tša mohlanka wa Eliša di ile tša rarollwa bjang? (b) Re ka rarolla bjang dipelaelo le ge e le dife tšeo re ka bago le tšona?

¹² “’Me [Eliša] a rapêla a re: Morêna, mo ponyollê mahlô a bônê! Morêna a ponyolla mahlô a lesoxana, ’me la re xo iša mahlô la bôna thaba è tletše dipitsi le dikoloi tša mollô, di dikaneditše Elisa thokô tšohle.” Tabeng yeo Jehofa o ile a dira gore mohlanka a bone madira a legodimo ao a bego a šireleditše Eliša. Lega go le bjalo, ga se ra swanela go letela mohuta o bjalo wa thušo ya Modimo lehono. Gopola gore mohlanka yoo wa moporofeta o be a se na Beibele e feletšego bakeng sa go ithuta e le gore a matlafatše tumelo ya gagwe. Rena re na le Beibele. Ge e ba re e diriša ka mo go holago, tumelo ya rena ka mo go swanago e tla matlafatšwa. Ka mohlala, re ka naganišiša ka dipego tše mmalwa tšeo di hlalosago Jehofa a le kgorong ya gagwe ya legodimong. Se ga se nee sebaka sa go belaela gore Jehofa o na le mokgatlo wa legodimong wo o thekgago bahlanka ba gagwe modirong wa go ruta wa lefase ka bophara lehono.​—Jesaya 6:​1-4; Hesekiele 1:​4-28; Daniele 7:​9, 10; Kutollo 4:​1-11; 14:​6, 7.

Hlokomela Maano a Sathane!

13. Sathane o leka go nyefiša go swarelela ga rena therešong ka eng?

¹³ Ditsela tše dingwe tša Sathane tša go fokodiša boemo bja rena bja moya le go swarelela ga rena therešong ke dife? E nngwe ya tšona ke boitshwaro bjo bo gobogilego, ka dibopego tša bjona tše di fapa-fapanego. Lefaseng la lehono leo le gafišwago ke kopano ya botona le botshadi, seo  se bitšwago motho wa ka lehwafeng (e lego phefolo ya bohlotlolo) goba go ikutswa bošego bjo tee (bootswa bjo bo sa tshwenyego gakaalo), ke dilo tša letšatši le letšatši go moloko wo o phelelago lethabo wo o ikemišeditšego go ipshina go sa šetšwe eng goba eng. Dipaesekopo, TV le dibidio di kgothaletša mohuta wo wa bophelo. Diswantšho tšeo di kgothaletšago kopano ya botona le botshadi di apareditše mekerong ya ditaba, kudu-kudu ka go Internet. Bao ba nyakago go tseba ka tšona ba letetšwe ke teko.​—1 Ba-Thesalonika 4:​3-5; Jakobo 1:​13-15.

14. Ke ka baka la’ng Bakriste ba bangwe e ile ya ba bahlaselwa ba maano a Sathane?

¹⁴ Bakriste ba bangwe ba dumeletše go nyaka go tseba ga bona go ba fenya gomme ba sentše megopolo ya bona le dipelo ka go lebelela diswantšho tšeo di kgothaletšago kopano ya botona le botshadi le tšeo di bontšhago kopano ya botona le botshadi di sa ute selo. Ba itumeletše go wela moreong wa Sathane wo o goketšago. Go dira bjalo gantši go lebišitše go robegelweng ke sekepe ka tsela ya moya. Batho ba bjalo ba paletšwe ke go dula e le ‘masea bobeng.’ Ga se ba ‘gola ka mo go feletšego matleng a kwešišo.’ (1 Ba-Korinthe 14:​20, NW) Ngwaga o mongwe le o mongwe ba dikete ba buna dipoelo tša go se kgomarele melao ya motheo le ditekanyetšo tša Lentšu la Modimo. Ba hlokomologile go apara le go boloka “dithlamô tšohle tša Modimo.”​—Ba-Efeso 6:​10-13; Ba-Kolose 3:​5-10; 1 Timotheo 1:​18, 19.

Lebelela Seo re Nago le Sona e le sa Bohlokwa

15. Ke ka baka la’ng ba bangwe ba ka hwetša go le thata go leboga bohwa bja bona bja moya?

¹⁵ Jesu o itše: “La tlo tseba therešô, ’me therešô ya tlo Le lokolla.” (Johane 8:​32) Dihlatse tše dintši di ile tša swanelwa ke go tlogela mekgwa ya tšona ya kgale ya bophelo le ditswalano tša tšona tša bodumedi. Ka gona, ba ka lemoga kapejana tokologo yeo therešo e e tlišago. Ka lehlakoreng le lengwe, bafsa ba bangwe bao ba godišitšwego ke batswadi bao ba lego therešong ba ka hwetša go le thata go leboga bohwa bja bona bja moya. Ga se ba ka ba ba karolo ya bodumedi bja maaka goba ba ba karolo ya lefase le gotee le go gatelela ga lona go tsoma boipshino, go lemalela ga lona dihlare-tagi le boitshwaro bja lona bjo bo gobogilego. E le mafelelo a se, ba ka ba ba palelwa ke go bona phapano e kgolo magareng ga paradeise ya rena ya moya le lefase la Sathane leo le senyegilego. Ba bangwe ba ka ba ba ineela tekong ya lefase le ya go latswa mpholo wa lefase e le bakeng sa go bona gore ba fetilwe ke eng!​—1 Johane 2:​15-17; Kutollo 18:​1-5.

16. (a) Ke dipotšišo dife tšeo re ka ipotšišago tšona? (b) Ke eng seo re se rutwago le seo re kgothaletšwago go se dira?

¹⁶ Na ruri re swanetše go iphiša menwana e le gore re tsebe gore go kwa bohloko le go tlaišega go bjang? Na re ka se ke ra ithuta diphihlelong tše di sa lokago tša ba bangwe? Na re swanetše go ya “leraxeng” la lefase le go bona ge e ba re fošitšwe ke selo se itšego? (2 Petro 2:​20-22) Petro o ile a gopotša Bakriste ba lekgolong la pele la nywaga bao pele e kilego ya ba karolo ya lefase la Sathane gore: “Gobane go lekane ga re dirile mehleng ya go feta ya bophelo bja rena tše di ratwago ke ba ditšhaba, ka go sepela ka bohlotlolo, le ka dikganyogo,  le ka botagwa, le ka bohori, le mabjaleng, le mekgweng e ganwago ya tirelo ya medimo ya diswantšho.” Ka kgonthe, ga go nyakege gore re tsene ‘phetelelong ya bohlola’ ya lefase go bona kamoo bophelo bo ka gobogago ka gona. (1 Petro 4:​3, 4, PK) Ka mo go fapanego, re rutwa ditekanyetšo tša Jehofa tša boitshwaro tše di phagamego Diholong tša rena tša Mmušo, tšeo e lego mafelo a thuto ya Beibele. Gape re kgothaletšwa go diriša matla a rena a monagano gore re ikgonthišetše gore re na le therešo gomme ka go rialo re dire therešo gore e be ya rena.​—Jošua 1:8; Ba-Roma 12:​1, 2; 2 Timotheo 3:​14-17.

Leina la Rena ga se Leina Feela

17. Re ka ba bjang Dihlatse tša Jehofa tšeo di atlegago?

¹⁷ Ge e ba re dira therešo gore e be ya rena, re tla tsoma go e abelana le ba bangwe neng le neng ge go swanetše. Se ga se bolele gore re tla leka go e gapeletša bao ba sa bontšhego kgahlego. (Mateo 7:6) Go e na le moo, re ka se ke ra ba le dihlong tša go itsebiša re le Dihlatse tša Jehofa. Ge e ba motho a bontšha tlhase ya go ba le kgahlego ka go botšiša potšišo e tšwago pelong goba ka go amogela puku ya Beibele, re tla ba bao ba loketšego le go ikemišetša go abelana kholofelo ya rena. Ee, se se tla nyaka gore ka mehla re dule re e-na le dipuku tše itšego go sa šetšwe moo re ka bago re le gona​—ka gae, mošomong, sekolong, lebenkeleng goba mafelong a boitapološo.​—1 Petro 3:15.

18. Ke bjang go itlhalosa gabotse gore re Bakriste e ka bago mohola o mogolo bophelong bja rena?

¹⁸ Ge re itlhalosa gabotse gore re Bakriste, re matlafatša tšhireletšo ya rena malebana le ditlhaselo tša Sathane tše di sa lemogegego. Ge e ba go e-na le moletlo wa letšatši la matswalo goba wa Keresemose goba go petšha mošomong, bašomi-gotee le wena gantši ba tla re, “Le se ke la itshwenya ka yena. Ke yo mongwe wa Dihlatse tša Jehofa.” Ka lebaka le le swanago, batho ba ka tlogela go anega metlae e sa hlwekago ge re le gona. Ka gona, go dira gore boemo bja rena bja Bokriste bo tsebje ke mohola o mogolo maphelong a rena, bjalo ka ge moapostola Petro a bontšhitše: “Ké mang e a tl’o xo Le dira bošula xe Le phêxêlêla bothakxa? Fêla, xe Le hlokofatšwa molato è le tokô xôna Le ba mahlatse.”​—1 Petro 3:​13, 14.

19. Re tseba bjang gore re gare-gare ga mehla ya bofelo?

¹⁹ Mohola o mongwe wa go dira gore therešo e be ya rena ke gore re tla kgodišega gore ye ka kgonthe ke mehla ya bofelo ya tshepedišo ye ya dilo. Re tla tseba gore diporofeto tše dintši tša Beibele di fihla seremong sa tšona mehleng ya rena. * Temošo ya Paulo ya gore “mehleng ya bofelo go tla tla dinako tše hlobaetšago tšeo go lego thata go lebeletšana le tšona” (NW) e hlatselwa ka mo go tiilego ke ditiragalo tše di boifišago tša ngwaga-kgolo o fetilego. (2 Timotheo 3:​1-5; Mareka 13:​3-37) Taba ya kuranteng ya morago bjale mabapi le lekgolo la bo-20 la nywaga e be e na le sehlogo se se rego “Le tla Gopolwa e le Mehla ya go Hloka Tlhabologo.” Sehlogo se itše: “1999 e bile ngwaga wa dipolayano tše dintši kudu seripeng sa bobedi sa lekgolo la nywaga la dipolayano tše dintši kudu.”

20. Gona bjale ke nako ya go dira’ng?

²⁰ Gona bjale ga se nako ya go dika-dika. Tšhegofatšo ya Jehofa modirong o mogolo wa go ruta wa Beibele wo o bego o dutše o dirwa lefaseng ka moka e le bohlatse go ditšhaba, e bonagala gabotse. (Mateo 24:​14) Dira therešo gore e be ya gago gomme o e abelane le ba bangwe. Bokamoso bja gago bja ka mo go sa felego bo ithekgile ka seo o se dirago gona bjale. Go nyefiša letsogo go ka se swanelwe ke ditšhegofatšo tša Jehofa. (Luka 9:​62) Go e na le moo, ke nako ya go ‘tia matla, re sa tekeme, re tieletše modirong wa Morena mo go fela, re tseba gore go itapiša ga rena ga se ga lefeela Moreneng.’​—1 Ba-Korinthe 15:58.

[Mengwalo ya ka tlase]

Na o a Gopola?

• Re ka tloša bjang dipelaelo?

• Re ka ithuta’ng mohlaleng wa mohlanka wa Eliša?

• Ke diteko dife tša boitshwaro tšeo re swanetšego go dula re di phafogetše ka mehla?

• Ke ka baka la’ng re swanetše go itlhalosa gabotse re le Dihlatse tša Jehofa?

[Dipotšišo tša Thuto]

[Diswantšho go letlakala 10]

Thuto ya ka mehla ya Beibele le thapelo di ka re thuša go tloša dipelaelo

[Seswantšho go letlakala 11]

Dipelaelo tša mohlanka wa Eliša di ile tša rarollwa ka pono

[Seswantšho go letlakala 12]

Re rutwa ditekanyetšo tša Jehofa tša boitshwaro tše di phagamego Diholong tša Mmušo go swana le ye ya Benin