Na o Phelela Boineelo bja Gago?

“Ka moka tše Le di diraxo, Le di dirê ka pelo e rataxo, e ke Le dirêla Modimo, e sexo batho.”​—BA-KOLOSE 3:23.

1. Go ya ka kwešišo ya lefase, lentšu “go ineela” le šupa’ng?

BO-RADIPAPADI ba fihlelela bjang tlhoreng ya go bapala ga bona? Papading ya thenese, ya kgwele ya maoto, ya kgwele-ntlatlana, ya baseball, ya bao ba kitimago, ya kolofo goba papading le ge e le efe e nngwe, dikgwari di fihla tlhoreng feela ka baka la boineelo bjo bo sa šišinyegego. Go tlwaetša mmele le monagano ke dilo tša bohlokwa kudu. Se se dumelelana gabotse le e nngwe ya ditlhaloso tša lentšu “ineetše,” e lego “go ikgafela ka mo go feletšego tseleng e itšego ya kgopolo goba ya boitshwaro.”

2. “Go neela” go bolela eng ka Beibeleng? Bontšha.

² Lega go le bjalo, “boineelo” bo bolela eng ka kgopolo ya Beibele? “Go neela” go fetolela lediri la Sehebere leo le nago le tlhaloso ya “go beela ka thoko; go arolwa; go ntšha.” * Isiraeleng ya bogologolo, Moperisita yo Mogolo Arone o be a rwala mmeseng wa gagwe “leswao le lekgethwa la boineelo” leo e bego e le lematšana le le phadimago la gauta e sekilego leo le bego le ngwadilwe ka mantšu a Sehebere gore “Bokgethwa ke bja Jehofa.” Seo e be e le kgopotšo go moperisita yo mogolo gore o swanetše go phema go dira selo le ge e le sefe seo se tlago go goboša sekgethwa “ka gobane kgetho ya oli ya setlolo ya Modimo wa gagwe [e be e le] godimo ga gagwe.”​—Ekisodo 29:6, NW; 39:​30, NW; Lefitiko 21:​12, PK.

3. Boineelo bo swanetše go kgoma bjang boitshwaro bja rena?

³ Boemong bjo re kgona go bona gore boineelo ke taba e bohlokwa. Bo bolela go itlhaola ka go ithatela o le mohlanka wa Modimo, gomme bo nyaka boitshwaro bjo bo hlwekilego. Ka gona, re ka bona lebaka leo ka lona moapostola Petro a tsopotšego Jehofa a re: “Bang ba bakxêthwa, xobane Nna ke e Mokxêthwa.” (1 Petro 1:​15, 16) Re le Bakriste ba ineetšego, re rwele boikarabelo bjo boima bja go phelela boineelo bja rena, go botega go fihla bofelong. Eupša ke eng seo se akaretšwago boineelong bja Bokriste?​—Lefitiko 19:2; Mateo 24:13.

4. Re fihlelela bjang mogato wa boineelo, gomme bo ka swantšhwa le eng?

⁴ Ka morago ga ge re hweditše tsebo e nepagetšego ka Jehofa Modimo le merero ya gagwe le ka Jesu Kriste le tema ya gagwe mererong yeo, re dirile phetho ya motho ka noši ya go hlankela Modimo ka pelo, monagano, moya le matla ka moka. (Mareka 8:​34; 12:​30; Johane 17:3) Seo se ka ba sa lebelelwa e le keno ya motho ka noši, e le boineelo bjo bo feletšego go Modimo. Boineelo bja rena ga se bja dirwa ka baka la go fo huduega maikwelong mo go itšego ga nakwana. Bo ile bja naganišišwa ka kelohloko le ka thapelo, ka matla a rena a go nagana. Ka gona, e be e se phetho ya nakwana. Re ka se ke ra swana le motho yo a thomago go lema tšhemo gomme a tlogela ge a le gare ka gobane e le mošomo o thata o montši goba ka gobane puno e bonagala e le kgole kudu goba go se na kgonthe ya gore e ka ba gona. Ela hloko mehlala ya ba bangwe bao ba ‘išitšego diatla tša bona mogomeng’ wa boikarabelo bja pušo ya Modimo ka tlase ga maemo a thata le a boima.​—Luka 9:​62; Ba-Roma 12:​1, 2.

Ga se ba ka ba Lahla Boineelo bja Bona

5. Ke bjang Jeremia e bego e le mohlala o mobotse-botse wa mohlanka yo a ineetšego wa Modimo?

⁵ Bodiredi bja Jeremia bja boporofeta kua Jerusalema bo tšere lebaka la nywaga e fetago e 40 (647-607 B.C.E), gomme e be e se kabelo e bonolo  le gatee. O be a tseba mafokodi a gagwe gabotse. (Jeremia 1:​2-6) O be a nyaka sebete le kgotlelelo go lebeletšana le batho ba dihlogo tše thata ba Juda letšatši le letšatši. (Jeremia 18:​18; 38:​4-6) Lega go le bjalo, Jeremia o ile a bota Jehofa Modimo, yo a ilego a mo matlafatša mo a ilego a itlhatsela go ba mohlanka wa Modimo yo a ineetšego e le ka kgonthe.​—Jeremia 1:​18, 19.

6. Moapostola Johane o re beetše mohlala ofe?

⁶ Go thwe’ng ka moapostola yo a botegago Johane, yo a ilego a lelekelwa sehlakahlakeng se sa seka-leganata sa Patimo nywageng ya gagwe ya botšofadi “molato è le Lentšu la Modimo è le xo hlatsêla Jesu Kriste”? (Kutollo 1:9) O ile a kgotlelela gomme a phelela boemo bja gagwe bja go ineela e le Mokriste ka nywaga e ka bago 60. O phetše go fihla ka kua ga tshenyo ya Jerusalema diatleng tša madira a Roma. O ile a ba le tokelo ya go ngwala Ebangedi, mangwalo a mararo a buduletšwego le puku ya Kutollo, yeo go yona a ilego a bona e sa le pele ntwa ya Haramagedone. Na o ile a tlogela ge a be a lemoga gore Haramagedone e be e ka se tle mehleng ya gagwe? Na o ile a felelwa ke kholofelo? Aowa, Johane o ile a dula a botega go fihla lehung la gagwe, a tseba gore gaešita le ge ‘lebaka le be le le kgaufsi,’ phethagatšo ya pono ya gagwe e be e tla ba nakong e tlago.​—Kutollo 1:3; Daniele 12:4.

Mehlala ya Mehleng Yeno ya Boineelo

7. Ke bjang ngwanabo rena yo mongwe e bilego mohlala o mobotse wa boineelo bja Bokriste?

⁷ Mehleng yeno, dikete tša Bakriste ba botegago di kgomaretše boineelo bja tšona ka phišego go sa šetšwe gore di ka no se phele go fihlela di bona Haramagedone. Motho yo mongwe yo bjalo e be e le Ernest E. Beavor wa Engelane. O bile Hlatse ka 1939 mathomong a Ntwa ya II ya Lefase, gomme a tlogela kgwebo ya gagwe e atlegilego ya go gatiša diswantšho e le gore a tsenele bodiredi bja nako e tletšego. Ka baka la go kgomarela boema-gare bja gagwe bja Bokriste, o ile a golegwa ka nywaga e mebedi. Lapa la gagwe le ile la mo thekga ka potego, gomme ka 1950 bana ba gagwe ba bararo ba ile ba ya Sekolong sa Beibele sa Watchtower sa Gilead bakeng sa tlwaetšo ya boromiwa kua New York. Ngwanabo rena Beavor o be a fišega kudu modirong wa gagwe wa boboledi moo bagwera ba gagwe ba bego ba mmitša Haramagedone Ernie. O ile a phelela boineelo bja gagwe ka potego e sa kwanantšhego, gomme go ba go fihla lehung la gagwe ka 1986, o ile a tsebatša go ba kgaufsi kudu ga ntwa ya Modimo ya Haramagedone. Ga se a ka a lebelela boineelo bja gagwe bjalo ka konteraka ya nako e lekanyeditšwego le Modimo! *​—1 Ba-Korinthe 15:58.

8, 9. (a) Ke mohlala ofe wo o ilego wa bewa ke masogana a mantši kua Sepania nakong ya pušo ya Franco? (b) Ke dipotšišo dife tšeo e lego tše di swanetšego?

⁸ Mohlala o mongwe wa phišego e sa felego o tšwa Sepania. Nakong ya pušo ya Franco (1939-75), Dihlatse tše makgolo tše ineetšego tšeo e sa  lego bafsa di ile tša ikemela e le Bakriste bao ba sa tšeego lehlakore. Ba bantši ba bona ba ile ba fetša nywaga e lesome goba e oketšegilego dikgolegong tša madira. Hlatse e nngwe e lego Jesús Martín, o ile a ba a hwetša dikahlolelo tšeo ge di kopane di dirago nywaga e 22 kgolegong. O ile a bethwa o šoro ge a be a golegilwe kgolegong ya madira Afrika Leboa. Ga go le e tee ya tše yeo e bego e le bonolo, eupša o ile a gana go kwanantšha.

⁹ Gantši, masogana a a be a sa tsebe gore a be a tla lokollwa neng ge e ba go lokollwa gona a be a tla ke a lokollwe, ka gobane a be a ahlolelwa dikahlolelo tše dintši le tše di latelanago. Lega go le bjalo, a ile a kgomarela potego ya ona gomme a boloka phišego ya ona bakeng sa bodiredi nakong ya ge a be a swerwe. Ge mafelelong boemo bo be bo thoma go kaonefala ka 1973, bontši bja Dihlatse tše, tšeo ka nako yeo di bego di le nywageng ya bo-30, di ile tša lokollwa kgolegong gomme tša tsenela bodiredi bja nako e tletšego, tše dingwe ya ba babulamadibogo ba kgethegilego gomme tše dingwe ya ba balebeledi ba basepedi. Ba ile ba phelela boineelo bja bona kgolegong, gomme bontši ba ile ba tšwela pele go dira bjalo ga e sa le ba lokollwa. * Go thwe’ng ka rena lehono? Na re botegela boineelo bja rena go swana le babotegi ba?​—Ba-Hebere 10:​32-34; 13:3.

Pono e Swanetšego ka Boineelo bja Rena

10. (a) Re swanetše go lebelela bjang boineelo bja rena? (b) Jehofa o lebelela bjang tirelo ya rena go yena?

¹⁰ Re lebelela bjang boineelo bja rena go Modimo bakeng sa go dira thato ya gagwe? Na ke selo sa pele bophelong bja rena? Go sa šetšwe maemo a rena, go sa šetšwe ge e ba re le ba bagolo goba ba banyenyane, re nyetše goba re sa nyala, re phetše gabotse goba re babja, re swanetše go katanela go phelela boineelo bja rena, ka go dumelelana le maemo a rena. Maemo a motho yo mongwe a ka mo dumelela go hlankela bodireding bja nako e tletšego e le mmulamadibogo, e le moithapi ofising ya lekala ya Mokgatlo wa Watch Tower, e le moromiwa goba a le bodireding bja bosepedi. Batswadi ba bangwe, ka lehlakoreng le lengwe, ba ka ba ba šila ba hlatlegile, ba hlokomela dinyakwa tša nama le tša moya tša lapa. Na diiri tša bona tše mmalwa tšeo ba di fetšago bodireding kgwedi e nngwe le e nngwe ke tša bohlokwa bjo bonyenyane mahlong a Jehofa go feta diiri tšeo di fetšwago ke mohlanka wa nako e tletšego? Aowa. Modimo le ka mohla ga a letele go tšwa go rena seo re se nago sona. Moapostola Paulo o ile a bolela molao wo wa motheo o rego: “Xobane xe thatô e botse è le xôna, xo tlo thabêlwa se motho a se swerexo; xe a hlaêlwa, xa xo taba.”​—2 Ba-Korinthe 8:12.

11. Phologo ya rena e ithekgile ka eng?

¹¹ Taba ke gore phologo ya rena ga se ya ithekga ka selo le ge e le sefe seo re ka se dirago, eupša e ithekgile ka botho bjo bo sa swanelago bja Jehofa ka Kriste Jesu, Morena wa rena. Paulo o hlalositše ka mo go kwagalago gore: “Ba dirile dibe bohle, ba hlaya letaxô la Modimo. Xe ba lokafala,  ké xo fo fiwa ka kxauxêlô ya xaxwe bà lopolotšwe ke Jesu Kriste.” Lega go le bjalo, mediro ya rena ke bohlatse bja tumelo ya rena e phelago ya go dumela dikholofetšong tša Modimo.​—Ba-Roma 3:​23, 24; Jakobo 2:​17, 18, 24.

12. Ke ka baka la’ng re se ra swanela go ipapetša le ba bangwe?

¹² Ga go nyakege gore re ipapetše le ba bangwe ge e le ka nako ya rena tirelong ya Modimo, go sepediša ga rena dipuku tša Beibele goba palo ya dithuto tša Beibele tšeo re di swarago. (Ba-Galatia 6:​3, 4) Go sa šetšwe seo re se fihlelelago bodireding bja Bokriste, ka moka ga rena re swanetše go gopola mantšu a Jesu ao a bontšhago boikokobetšo a gore: “Le lena, a e re xe Le dirile tšohle tše Le di laetšwexo Le tlê Le re: Xa re bahlanka ba selô, re fil’o dira tše re swanetšexo xo di dira.” (Luka 17:​10) Ke gakae re ka bolelago e le ka kgonthe gore re dirile ‘tšohle tše re di laetšwego’? Ka gona, potšišo ke gore, Boemo bja tirelo ya rena go Modimo e swanetše go ba bja mohuta mang?​—2 Ba-Korinthe 10:​17, 18.

Go Dira Letšatši le Lengwe le le Lengwe Gore e be la Bohlokwa

13. Ke boemo bofe bja kgopolo bjo re swanetšego go ba le bjona ge re phetha boineelo bja rena?

¹³ Ka morago ga go nea keletšo go basadi, banna, bana, batswadi le makgoba, Paulo o ngwala gore: “Ka moka tše Le di diraxo, Le di dirê ka pelo e rataxo, e ke Le dirêla Modimo, e sexo batho. Le dirê Lè tseba xore moputsô wa bohwa Le tlo o fiwa ke Modimo, xobane Le hlankêla Morêna Kriste.” (Ba-Kolose 3:​23, 24) Ga re hlankele go kgahliša batho ka seo re se fihlelelago tirelong ya Jehofa. Re leka go hlankela Modimo ka go latela mohlala wa Jesu Kriste. O ile a phetha bodiredi bja gagwe bja nako e nyenyane ka maikwelo a go akgofa.​—1 Petro 2:21.

14. Petro o ile a nea temošo efe mabapi le mehla ya bofelo?

¹⁴ Moapostola Petro le yena o ile a bontšha maikwelo a go akgofa. Lengwalong la gagwe la bobedi, o ile a lemoša gore mehleng ya bofelo go tla ba le bakweri​—bahlanogi le babelaedi​—bao go ya ka dikganyogo tša bona ka noši, ba bego ba tla  rotoša dipelaelo mabapi le go ba gona ga Kriste. Lega go le bjalo, Petro o itše: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô. Xomme ’tšatši leo la Morêna le tlo tla bo-ka lehodu le-tla-bošexo.” Ee, ka kgonthe letšatši la Jehofa le tla tla. Ka gona, re swanetše go tshwenyega letšatši le letšatši mabapi le go ba ga kgonthe le go tia ga tumelo ya rena dikholofetšong tša Modimo.​—2 Petro 3:​3, 4, 9, 10.

15. Re swanetše go lebelela bjang letšatši le lengwe le le lengwe bophelong bja rena?

¹⁵ Bakeng sa go phelela boineelo bja rena ka potego, re swanetše go diriša letšatši le lengwe le le lengwe go tumiša Jehofa. Mafelelong a letšatši le lengwe le le lengwe, na re ka lebelela morago go lona gomme ra bona kamoo re bilego le karolo ka tsela e itšego go tumišeng leina la Modimo le go tsebatša ditaba tše dibotse tša Mmušo? Mohlomongwe e be e le ka boitshwaro bja rena bjo bo hlwekilego, dipoledišano tša rena tše di agago goba go kgomega ga rena ka lerato ka malapa le bagwera. Na re dirišitše dibaka tše di bilego gona go abelana le ba bangwe kholofelo ya rena ya Bokriste? Na re thušitše motho yo mongwe go nagana ka mo go tseneletšego mabapi le dikholofetšo tša Modimo? Anke re kgobeleng selo se itšego sa bohlokwa ka tsela ya moya letšatši le lengwe le le lengwe, go be bjalo ka ge eka re ikgobelela lehumo pankeng ya moya.​—Mateo 6:​20; 1 Petro 2:​12; 3:​15; Jakobo 3:13.

Boloka Pono ya Gago e Hlwekile

16. Sathane o leka ka ditsela dife go fokodiša boineelo bja rena go Modimo?

¹⁶ Re phela mehleng yeo e bago thata kudu bakeng sa Bakriste. Sathane le baemedi ba gagwe ba leka go šira phapano magareng ga botse le bobe,  bohlweki le go se hlweke, boitshwaro le go hloka boitshwaro, se se swanetšego le se se sa swanelago. (Ba-Roma 1:​24-28; 16:​17-19) O dirile gore go be bonolo kudu go rena go šilafatša dipelo tša rena le menagano ka mananeo ao re a kgethago a TV goba ka go diriša Internet. Pono ya rena ya moya e ka fsifala goba ya širega mo e lego gore re ka palelwa ke go lemoga ditiro tša gagwe tša boradia. Boikemišetšo bja rena bja go phelela boineelo bja rena bo ka fokodišwa gomme go swarelela ga rena “moxomeng” gwa nyefišwa ge e ba re kwanantšha mehola ya rena ya moya.​—Luka 9:​62; Ba-Filipi 4:8.

17. Keletšo ya Paulo e ka re thuša bjang go kgomarela tswalano ya rena le Modimo?

¹⁷ Ka gona, mantšu a Paulo go phuthego ya Thesalonika ke ao a lego nakong kudu: “Se Modimo a se rataxo ké kxêthêxô ya lena, xore Le ilê bootswa. Mang le mang e lexo wa lena a tsebê mosadi e lexo wa xaxwe ka mokxwa wa kxêthêxô le wa xo mo xodiša; A e se bê ka phišêxô le kxanyoxô bo-ka ba-ntlê ba ba sa tsebexo Modimo.” (1 Ba-Thesalonika 4:​3-5) Boitshwaro bjo bo gobogilego bo dirile gore ba bangwe ba kgaolwe ka phuthegong ya Bokriste​—bao ba ilego ba se šetše boineelo bja bona go Modimo. Ba tlogetše tswalano ya bona le Modimo e fokola, moo e lego gore o be a sa hlwa a le bohlokwa maphelong a bona. Lega go le bjalo, Paulo o itše: “Se Modimo a re bileditšexo sôna xa se dithšila, ke kxêthêxô. Ké xôna, mo-nyatša-motho ó nyatša Modimo, e a Le neilexo Môya wa xaxwe wa ba mo xo lena.”​—1 Ba-Thesalonika 4:​7, 8.

Boikemišetšo bja Gago ke Bofe?

18. Boikemišetšo bja rena e swanetše go ba bofe?

¹⁸ Ge e ba re lemoga bohlokwa bja boineelo bja rena go Jehofa Modimo, re swanetše go ikemišetša go dira eng? Boikemišetšo bja rena bjo bo tiilego e swanetše go ba go kgomarela letswalo le lebotse bobedi boitshwarong bja rena le bodireding bja rena. Petro o kgothaditše ka gore: “Le dirê fao ka bolêta le ka xo boifa, letswalô la lena lé sa tsebe molato; xore ba ba Le pharaxo e ke Le disenyi, ba lewê ke dihlong, bôná-bao ba xo xoboša tsela e botse ye Le e swerexo Lè le ba Kriste.” (1 Petro 3:​16) Re ka swanelwa ke go tlaišega le go lebeletšana le go swarwa gampe ka baka la boitshwaro bja rena bja Bokriste, eupša go bile bjalo le ka Kriste ka baka la tumelo ya gagwe le go botegela ga gagwe Modimo ka go se kwanantšhe. Petro o itše: “Byalo ka xe Kriste a hlokofaditšwe mmele ka ’baka la rena, le lena ithlameng ka kxopolô e etšaxo yeo, ya xo re: e a hlokofatšwaxo mmele ó hlôbôxana le dibe.”​—1 Petro 4:1.

19. Ke eng seo re nyakago gore se bolelwe ka rena?

¹⁹ Ka kgonthe, boikemišetšo bja rena bjo bo tiilego bja go phelela boineelo bja rena bo tla re šireletša mereong ya lefase la Sathane leo le babjago moyeng, boitshwarong le nameng. Eupša go feta moo, re tla hwetša kgonthišetšo ya gore re amogelwa ke Modimo, e lego selo se sekaone kudu go feta selo le ge e le sefe seo Sathane le baemedi ba gagwe ba ka se neago. Ka gona, le ka mohla a go se ke gwa thwe re tlogetše lerato leo re bego re e-na le lona ge re be re thoma go tseba therešo. Go e na le moo, anke go bolelwe ka rena bjalo ka ge go ile gwa bolelwa ka phuthego ya lekgolong la pele la ngwaga ya kua Thiathira gore: “Medirô ya xaxo ke a e tseba, le leratô la xaxo, le xe O hlankêla ba bangwê, le kxôtlêlêlô ya xaxo, le xore medirô ya xaxo ya byale e phala ya kxalê.” (Kutollo 2:​4, 18, 19) Ee, anke re se be bololo boineelong bja rena, eupša anke re beng le ‘phišego moyeng,’ re be mafolofolo go fihla bofelong​—le gona bofelo bo kgaufsi.​—Ba-Roma 12:​11; Kutollo 3:​15, 16.

[Mengwalo ya ka tlase]

Na o a Gopola?

• Boineelo bo akaretša eng?

• Ke mehlala efe ya bogologolo le ya mehleng yeno ya bahlanka ba ineetšego ba Modimo yeo re swanetšego go e ekiša?

• Re swanetše go lebelela bjang tirelo ya rena go Modimo?

• Boikemišetšo bja rena mabapi le boineelo bja rena go Modimo e swanetše go ba bofe?

[Dipotšišo tša Thuto]

[Seswantšho go letlakala 15]

Jeremia o ile a dula a botega go sa šetšwe go swarwa sehlogo

[Seswantšho go letlakala 16]

Ernerst Beavor o ile a beela bana ba gagwe mohlala e le Mokriste yo mafolofolo

[Seswantšho go letlakala 17]

Dihlatse tše makgolo tša bafsa kua dikgolegong tša Sepania di ile tša dula di botega

[Diswantšho go letlakala 18]

Anke re kgobeleng selo se itšego sa bohlokwa ka tsela ya moya letšatši le lengwe le le lengwe