O ka Lebeletšana ka Katlego le go Nyama!

MONNA yo bohlale o kile a ngwala gore: “X’o nôlêxa môkô mohla wa tlalêlô, xôna matla ’axo xa se a selô.” (Diema 24:​10) Ge e ba o kile wa welwa ke go nyama, mohlomongwe o tla dumelelana le taba yeo.

Ga go na yo a sa hlaselwego ke ditla-morago tša go nyama. Tlhaselo e nyenyane ya go nyama e ka fetša letšatši goba a mabedi ke moka ya tloga. Eupša ge maikwelo a kwelego bohloko goba sekgopi di akaretšwa, bothata bo ka ba gona ka nako e teletšana. Bakriste ba bangwe bao ba bego ba botega ka nywaga e mentši ba ile ba nyama moo e lego gore ba ile ba ba ba kgaotša go ba gona dibokeng tša phuthego le go tšea karolo bodireding bja tšhemo.

Ge e ba o ikwa o nyamile, tia matla! Bahlanka ba botegago nakong e fetilego ba ile ba lebeletšana ka katlego le go nyama, gomme le wena o ka kgona ka thušo ya Modimo.

Ge ba Bangwe ba go Gobatša Maikwelong

O ka se ke wa letela go šireletšega lentšung le lengwe le le lengwe la bošaedi goba tirong ya go se naganele. Lega go le bjalo, o ka gana go dumelela go se phethagale ga ba bangwe go šitiša tirelo ya gago go Jehofa. Ge e ba motho yo mongwe a go gobaditše maikwelong, o ka hwetša e le mo go thušago go ela hloko kamoo Hanna, mmago Samuele, a ilego a lebeletšana ka gona le boemo bjo bo nyamišago.

Hanna o be a nyaka bana e le ka kgonthe, eupša e be e le moopa. Mosadi wa bobedi wa monna wa gagwe, Penina, o be a šetše a belegetše monna wa gagwe barwa le barwedi. Go e na le gore a kgomege ka boemo bja tlalelo bja Hanna, Penina o ile a mo tšea bjalo ka lenaba gomme a bontšha boemo bjo bjalo bja kgopolo go yena moo e lego gore Hanna o be “a lla, a lesa le xo ja.”​—1 Samuele 1:​2, 4-7.

Ka letšatši le lengwe Hanna o ile a ya tabarenakeleng go yo rapela. Eli moperisita yo mogolo wa Isiraele, o ile a bona melomo ya gagwe e bina-bina. Ka go se lemoge gore Hanna o a rapela, Eli o ile a phetha ka gore o swanetše go ba a tagilwe. O ile a re: “O tlo fela o tagilwe go fihla neng? A beine e ke e go tloge.” (1 Samuele 1:​12-14, PK) Na o ka akanya kamoo Hanna a swanetšego ga ba a ile a ikwa ka gona? O be a tlile tabarenakeleng go tlo hwetša kgothatšo. Ruri o be a se a letela go latofatšwa ka phošo ke yo mongwe wa banna bao ba nago le tutuetšo Isiraeleng!

Boemo bjo bo ka be bo ile bja dira gore Hanna a nyame kudu gabonolo. A ka be a ile a tloga tabarenakeleng gatee-tee, a ikana gore a ka se hlwe a boela gape ge feela Eli a sa dutše a hlankela e le moperisita yo mogolo moo. Lega go le bjalo, Hanna ka ntle le pelaelo o be a tšeela tswalano ya gagwe le Jehofa godimo. O be a tseba gore Jehofa o be a ka se thabe ge nkabe a ile a tšea tsela e bjalo. Tabarenakele e be e le lefelo la borapedi bjo bo sekilego. Jehofa o be a beile leina la gagwe moo. Eli le ge a be a sa phethagala, e be e le moemedi yo a kgethilwego wa Jehofa.

Karabelo ya go boifa Modimo ya Hanna tatofatšong ya Eli e nea mohlala o mobotse kudu bakeng sa rena lehono. Ga se a ka a itumelela a latofatšwa ka phošo, eupša o ile a arabela ka mokgwa wo o bontšhago tlhompho kudu. O ile a araba ka gore: “Aowa, Mong’a-ka; nna ke mosadi e a nyamilexo pelo; xa nka ka nwa morara le xe e le sedilá. Nna ke thšolotše tša pelong ya-ka fá pele xa Morêna. Nna molata wa xaxo O se kê wa nthsema sehlôla. Ke diexile mo kè boledišwa ke bonntši bya manyami le ma-setla-pelo a-ka.”​—1 Samuele 1:​15, 16.

Na Hanna o ile a itlhalosa gabotse? O dirile bjalo e le ka kgonthe. Lega go le bjalo, o ile a bolela le Eli ka bohlale, a sa nyake go mo sola bakeng sa tatofatšo ya gagwe ya maaka. Eli ka morago o ile a arabela go yena ka botho, a mo araba ka gore: “Sepela Ò rotše pelo; Modimo wa Isiraele O tlo Xo nea tše O di kxopetšexo xo Yêna.” Ka morago  ga ge taba e lokišitšwe, Hanna “a ikêla ka tsela ya xaxwe, a ja; xomme sefahloxô sa xaxwe sa se ke sa etša sa bô-malôba.”​—1 Samuele 1:​17, 18.

Re ithuta eng pegong ye? Hanna o ile a gata mogato kapejana bakeng sa go lokiša go se kwešišane, eupša o ile a dira bjalo ka tlhompho e tseneletšego. E le mafelelo a se, o ile a boloka tswalano e botse le Jehofa le Eli. Ke gantši gakaakang moo poledišano e botse le go diriša bohlale bjo bo naganelago go ka thibelago diphapano tše nyenyane gore e se be tše kgolo!

Go swanetše go lemogwa gore go lokiša diphapano le ba bangwe go nyaka boikokobetšo le go kobegela ka mahlakoreng ka moka. Ge e ba modumedi-gotee le wena a palelwa ke go arabela maitekong a gago a go lokiša phapano, o tla swanela ke go tlogela taba ka diatleng tša Jehofa, o holofetše gore o tla e lokiša ka nako ya gagwe le ka tsela ya gagwe.

Na o Lahlegetšwe ke Tokelo ya Tirelo?

Ba bangwe ba gateletšegile ka baka la ge ba ile ba swanelwa ke go tlogela tokelo yeo ba bego ba e tšeela godimo tirelong ya Modimo. Ba be ba thabela go hlankela banababo bona, gomme ge ba be ba lahlegelwa ke tokelo, ba ile ba ikwa gore ga ba sa na mohola go Jehofa goba mokgatlong wa gagwe. Ge e ba e le ka mokgwa wo o ikwago ka wona, o ka hwetša temogo ka go ela hloko mohlala wa mongwadi wa Beibele Mareka, yo gape a bitšwago Johane Mareka.​—Ditiro 12:12.

Mareka o ile a sepela le Paulo le Baranaba leetong la bona la mathomo la boromiwa, eupša ge ba le gare ga leeto, o ile a ba tlogela a boela Jerusalema. (Ditiro 13:​13) Ka morago, Baranaba o ile a nyaka gore ba sepele le Mareka leetong le lengwe. Lega go le bjalo, Beibele e re: “Paulo a bôna xò s’a swanêla xe ba ka tloxa le motho eo wa xo ba lahletša kua Pamfilia, a se ye le bôná modirong.” Baranaba o ile a gana. Pego e tšwela pele gore: “Ya ba kxang, [Paulo le Baranaba] ba bá ba kxaoxana, Baranaba a tloxa à na le Johane a ya Tsipero ka le-sela-watlê. Paulo a ithlaolêla Silase; a wêla tsela.”​—Ditiro 15:​36-40.

Mareka o swanetše go ba a ile a nyama kudu go lemoga gore moapostola Paulo yo a hlomphegago o be a sa nyake go šoma le yena le gore kgang ya mabapi le ditshwanelego tša gagwe e butše sekgoba magareng ga Paulo le Baranaba. Eupša taba ga e felele mo.

Paulo le Silase ba be ba sa nyaka motho yo ba tlago go sepela le yena. Ge ba fihla Lisitara, ba ile ba hwetša motho yo a tla tsenago legatong la Mareka, lesogana leo le bitšwago Timotheo. Ga bjale Timotheo a ka be a be a e-na le nywaga e mebedi goba e meraro feela a kolobeditšwe nakong ya ge a be a kgethwa. Ka lehlakoreng le lengwe, Mareka o be a dutše a kopanela le phuthego ya Bokriste ga e sa le go tloga ge e hlongwa​—ge e le gabotse, ka lebaka le letelele le go feta Paulo ka noši. Lega go le bjalo, Timotheo ke yena a ilego a fiwa kabelo ye e nago le tokelo.​—Ditiro 16:​1-3.

Mareka o ile a itshwara bjang ge a be a lemoga gore o be a tšeetšwe sebaka ke lesogana le lenyenyane leo le nago le phihlelo e nyenyane? Beibele ga e bolele. Lega go le bjalo, e bontšha gore Mareka o ile a dula a le mafolofolo tirelong ya Jehofa. O ile a diriša ka mo go holago ditokelo tšeo a bego a e-na le tšona. Gaešita le ge a be a sa kgone go hlankela le Paulo le Silase, o ile a kgona go sepela le Baranaba go ya Tsipero, yeo e bego e le tšhemo ya gabo Baranaba. Mareka gape o ile a hlankela le Petro kua Babele. Mafelelong, o ile a ba le sebaka sa go šoma le Paulo​—le Timotheo​—kua Roma. (Ba-Kolose 1:1; 4:​10; 1 Petro 5:​13) Ka morago Mareka o ile a ba a budulelwa go ngwala e nngwe ya Diebangedi tše nne!

Go na le thuto e bohlokwa go se ka moka. Mareka ga se a ka a tshwenyega gakaalo mabapi le tokelo e lahlegilego moo a ilego a palelwa ke go thabela ditokelo tšeo a bego a sa dutše a e-na le tšona. Mareka o ile a tšwela pele a swaregile tirelong ya Jehofa, gomme Jehofa o ile a mo šegofatša.

Ka gona, ge e ba o lahlegetšwe ke tokelo, o se ke wa nyama. Ge e ba o boloka boemo bjo bo nepagetšego bja kgopolo gomme o dula o swaregile, o ka newa ditokelo tše dingwe. Go na le mo gontši mo re ka go dirago modirong wa Morena.​—1 Ba-Korinthe 15:​58, bapiša le NW.

Mohlanka yo a Botegago o a Nyama

Ga go bonolo go hlabana ntwa e thata bakeng sa tumelo. Ka dinako tše dingwe, o ka nyama. Ke  moka o ka ba wa ikwa o na le molato mabapi le go nyama moo, wa phetha ka gore mohlanka yo a botegago wa Modimo ga se a swanela go ikwa ka tsela yeo le ka mohla. Nagana ka Eliya, yo mongwe wa baporofeta bao ba tumilego ba Isiraele.

Ge Kgošigadi ya Isiraele Isebele, mokgothaletši yo a fišegelago thoko wa borapedi bja Baali a lemoga gore baporofeta ba Baali ba bolailwe ke Eliya, o ile a ikana gore o tlo mmolaya. Eliya o be a ile a lebeletšana le manaba a magolo kudu go feta Isebele, eupša gatee-tee o ile a nyama kudu moo a ilego a ba a nyaka go hwa. (1 Dikxoši 19:​1-4) Se se ka be se ile sa direga bjang? O be a lebetše selo se itšego.

Eliya o be a lebetše go lebelela Jehofa e le Mothopo wa matla a gagwe. Ke mang yo a bego a neile Eliya matla a go tsoša bahu le go lebeletšana le baporofeta ba Baali? Ke Jehofa. Ka kgonthe, Jehofa o be a ka mo nea matla a go lebeletšana le bogale bja Kgošigadi Isebele.​—1 Dikxoši 17:​17-24; 18:​21-40; 2 Ba-Korinthe 4:7.

Motho le ge e le ofe a ka no tekema ka lebakanyana kholofelong yeo a holofelago Jehofa ka yona. Ka go swana le Eliya, ka dinako tše dingwe o ka lebelela bothata bjo itšego ka pono ya batho go e na le go diriša “bohlale byo bo tšwaxo xodimo” go lebeletšana le bjona. (Jakobo 3:​17) Lega go le bjalo, Jehofa ga se a ka a lahla Eliya ka baka la go šaetša mo ga gagwe ga lebakanyana.

Eliya o ile a tšhabela Bereseba ke moka a ya lešokeng moo a bego a nagana gore ga go le o tee yo a bego a ka mo hwetša. Eupša Jehofa o ile a mo hwetša. O ile a romela morongwa bakeng sa go yo mo homotša. Morongwa o ile a kgonthišetša gore Eliya o hwetša senkgwa se se sa tšwago go apewa e le gore a je le meetse a lapološago gore a nwe. Ka morago ga ge Eliya a khuditše, morongwa o ile a mo laela gore a sepele dikhilomithara tše ka bago 300 go ya Thabeng ya Horebe, moo a bego a tla matlafatšwa ka mo go oketšegilego ke Jehofa.​—1 Dikxoši 19:​5-8.

Thabeng ya Horebe, Eliya o ile a bona pontšho e matlafatšago tumelo ya matla a Jehofa. Ke moka, ka lentšu le le fodilego le la tlasana, Jehofa o ile a mo kgonthišetša gore o be a se noši. Jehofa o be a e-na le yena, gomme banababo ba bangwe ba 7 000 ba be ba e-na le yena, gaešita le ge Eliya a be a sa ba tsebe. Mafelelong, Jehofa o ile a mo nea modiro woo a swanetšego go o dira. O be a se a lahla Eliya bjalo ka moporofeta wa gagwe!​—1 Dikxoši 19:​11-18.

Thušo e a Hwetšagala

Ge e ba o fela o hlaselwa go se nene ke go nyama, mo gongwe o ka hwetša gore o tla ikwa kaone ge e ba o ka khutša ka mo go oketšegilego goba wa hwetša dijo tšeo di nago le phepo. Nathan H. Knorr, yo a ilego a hlankela e le setho sa Sehlopha se Bušago sa Dihlatse tša Jehofa go fihla lehung la gagwe ka 1977, o kile a lemoga gore gantši mathata a magolo a bonagala e le a manyenyane kudu ka morago ga go robala gabotse bošego. Lega go le bjalo, ge bothata bo phegelela ka mo go oketšegilego, sehlare se se bjalo e ka no se be seo se lekanego​—o tla nyaka thušo bakeng sa go lwantšhana le go nyama.

Jehofa o ile a romela morongwa bakeng sa go yo matlafatša Eliya. Lehono, Modimo o nea kgothatšo ka bagolo le Bakriste ba bangwe bao ba godilego tsebong. Bagolo ka kgonthe ba ka ipontšha e le “tšhireletšo ge phefo e foka.” (Jesaya 32:​1, 2, bapiša le PK.) Eupša bakeng sa go hwetša kgothatšo go bona, mo gongwe o ka swanelwa ke go gata mogato wa pele. A nyamile ka mokgwa woo, Eliya o ile a ya Thabeng ya Horebe bakeng sa go ya go amogela tlhahlo e tšwago go Jehofa. Re amogela thuto e matlafatšago ka phuthego ya Bokriste.

Ge re amogela thušo gomme re lebeletšana ka sebete le diteko, tše bjalo ka go kgopišega goba go lahlegelwa ke ditokelo, re swarelela ka lehlakoreng la Jehofa la kgang e bohlokwa. Kgang efe? Sathane o ile a tsoša kgang ya gore batho ba hlankela Jehofa feela ka baka la dikganyogo tša bona. Sathane ga a gane gore re tla hlankela Modimo ge dilo ka moka di re sepelela gabotse bophelong, eupša o tsoša kgang ya gore re tla tlogela go hlankela Modimo ge e ba re tsena mathateng. (Jobo, dikgaolo 1 le 2) Ka go tšwela pele ka go se tekeme tirelong ya Jehofa go sa šetšwe go nyama, re ka thuša ka go nea karabo tatofatšong ya Diabolo ya go thomeletša.​—Diema 27:11.

Hanna, Mareka le Eliya ka moka ba ile ba ba le mathata ao a ilego a ba amoga lethabo la bona ka  lebakanyana. Lega go le bjalo, ba ile ba lebeletšana le mathata a bona ka katlego gomme ba phela maphelo ao a atlegilego. Ka thušo ya Jehofa, le wena ka mo go swanago o ka lebeletšana ka katlego le go nyama!