“Phodišo Mokhubong wa Gago”

GO DUMELWA gore palo e kgolo ya malwetši a batho a bakwa ke kgatelelo ya maikwelo e bjalo ka poifo, manyami, mona, dikgopi, lehloyo le go ba molato. Ka baka la se, polelo ya Beibele e rego ‘go boifa Jehofa’ ke “phodišo mokhubong wa gago le tapološo marapong a gago” ke e homotšago gakaakang!​—⁠Diema 3:​7, 8, NW..

Marapo ke wona a thekgago mmele. Ka gona, Beibele e diriša lentšu ‘marapo’ ka tsela ya tshwantšhetšo bakeng sa go emela motho ka boyena​—⁠kudu-kudu ge a kgongwa ke maikwelo a tseneletšego. Eupša ke bjang go boifa Jehofa e lego “phodišo mokhubong wa gago”?

Diithuti tša Beibele di fapana ka dikgopolo mabapi le go bolelwa ga ‘mokhubo’ temaneng ye. Mohlalosi yo mongwe o re ka gobane o “karolong ya gare ya mmele,” ‘mokhubo’ o ka emela ditho ka moka tše bohlokwa. Seithuti se sengwe se šišinya gore lentšu ‘mokhubo’ le ka bolela kalana, bjalo ka ge le dirišwa go Hesekiele 16:⁠4 (PK). Ge e ba go le bjalo, Diema 3:⁠8 e ka ba e gatelela go nyakega ga gore re ithekge ka Modimo ka mo go feletšego​—⁠go fo swana le ge lesea leo le se la hlwago le belegwa leo le sa kgonego go itirela selo le ithekgile ka mmago lona bakeng sa go le fepa. Kgopolo e nngwe gape ke ya gore ‘mokhubo’ mo o ka be o šupa digoba le mešifa ya mmele. Go ya ka moko wa temana ye, e ka ba e le gore ditho tše di fapanywa le ‘marapo’​—⁠ditho tša mmele tšeo di tiilego kudu.

Go sa šetšwe gore tlhaloso e opago kgomo lenaka ke efe mo, go na le selo se tee se kgonthišeditšwego: Go bontšha poifo e nago le tlhompho ya go boifa Jehofa ke tsela ya bohlale. Go dumelelana le ditekanyetšo tša Modimo go ka tlaleletša go go phela gabotse ga rena mmeleng gona bjale. Go feta moo, go ka re tlišetša go amogelwa ke Jehofa, e lego seo se tlago go lebiša bophelong bjo bo sa felego le bja go phela gabotse​—⁠nameng le maikwelong​—⁠lefaseng la gagwe le lefsa leo le tlago.​—⁠Jesaya 33:​24; Kutollo 21:⁠4; 22:⁠2.

[Mothopo wa Seswantšho go letlakala 32]

Dr. G. Moscoso/SPL/Photo Researchers