Batho ba Jehofa ba ba Tsošološitšwego ba mo Tumiša Lefaseng ka Bophara

“Ke tlo nea ba-dithšaba melomo-mesekexi [“leleme le le sekilego,” NW], xore ka moka ba bolê ’ina la Morêna.”​—TSEFANYA 3:9.

1. Ke ka baka la’ng melaetša ya phedišo e ile ya phethagatšwa godimo ga Juda le ditšhaba tše dingwe?

KE MELAETŠA e matla gakaakang ya kahlolo yeo Jehofa a buduletšego Tsefanya gore a e tsebatše! Mantšu ao a kahlolo a ile a phethagatšwa setšhabeng sa Juda le motse-mošate wa yona, Jerusalema, ka gobane baetapele le setšhaba ka kakaretšo ba be ba sa dire thato ya Jehofa. Ditšhaba tša kgaufsi, tše bjalo ka Filisita, Moaba le Amoni le tšona di be di tla welwa ke kgalefo ya Modimo. Ka baka la’ng? Ka baka la kganetšo ya tšona e sehlogo le ya nako e telele malebana le batho ba Jehofa. Ka baka lona leo, mmušo wa lefase wa Asiria o be o tla fedišwa, le ka mohla o se sa hlwa o tsošološwa.

2. Ke bomang bao go bonagalago go be go bolelwa le bona go Tsefanya 3:⁠8?

² Lega go le bjalo, go be go e-⁠na le batho ba sekametšego go lokeng kua Juda ya bogologolo. Ba ile ba lebelela pele go phethweng ga kahlolo ya Modimo malebana le ba kgopo, mohlomongwe e le bona bao go boletšwego le bona ka mantšu a rego: “Dulang Lè ntebeletše,​—⁠ó r’yalo Morêna,⁠—⁠xo bê xo tlê ’tšatši le ke tl’o xo tsoxa ka lôna kè le hlatše; ka xobane ké wôna moahlolêlô wa-ka: Ke phutha dithšaba, ke botha mebušô, ka e thšêla ka kxalefô ya-ka, ka tuka boxale sa ruri, è le mollô wa sehutla wa xo thšuma ’fase lohle.”​—⁠Tsefanya 3:⁠8.

“Leleme le le Sekilego” Bakeng sa Bomang?

3. Ke molaetša ofe wa kholofelo wo Tsefanya a bego a buduletšwe go o nea?

³ Ee, Tsefanya o ile a bolela melaetša ya Jehofa ya kahlolo. Eupša gape moporofeta o be a buduletšwe go akaretša molaetša o kgahlišago wa kholofelo​—⁠wo e bego e tla ba o homotšago kudu go bao ba tšwelago pele ba botegela Jehofa. Bjalo  ka ge go begilwe go Tsefanya 3:⁠9, Jehofa Modimo o tsebaditše gore: “Mohla woo ke tlo nea ba-dithšaba melomo-mesekexi [“leleme le le sekilego,” NW], xore ka moka ba bolê ’ina la Morêna, ba Mo hlankêla seôtlô [“ba bapelane ka magetla,” NW].”

4, 5. (a) Go be go tla direga’ng ka ba sa lokago? (b) Ke bomang bao ba bego ba tla holwa ke se, gomme ka baka la’ng?

⁴ Go be go tla ba le batho bao ba bego ba ka se ke ba newa leleme le le sekilego. Boporofeta bo bolela ka bona, bo re: “Mo xo wene ke tlo tloša ba ba bexo ba Xo kwêra, ba ikxoxomoša.” (Tsefanya 3:​11) Ka gona bao ba ikgogomošago bao ba nyatšago melao ya Modimo le bao ba dirago bokgopo ba be ba tla tlošwa. Ke bomang bao ba bego ba tla holega go se? Tsefanya 3:​12, 13 e re: “Ke [Jehofa] tlo ba ke šadišitše batho ba xo ipoetša, babôtlana, ba xo bôta ’ina la Morêna. Mašalêla a Isiraele a ka se hlwê a dira bobe; a ka se hlwê a bua maaká, mo xanong xa bôná xo tlo hlôkwa ’leme la xo fora; ka xobane ba tlo ba mohlape wa xo fula wa hutama, xò se se se o thšošaxo.”

⁵ Mašaledi a botegago a Juda ya bogologolo a be a tla holega. Ka baka la’ng? Ka gobane a dirile ka go dumelelana le mantšu a rego: “[Tsomang Jehofa, PK], lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya Morêna.”​—⁠Tsefanya 2:⁠3.

6. Go diragetše’ng phethagatšong ya mathomo ya boporofeta bja Tsefanya?

⁶ Phethagalong ya mathomo ya boporofeta bja Tsefanya, Modimo o ile a otla Juda e se nago tumelo ka go dumelela Mmušo wa Lefase wa Babele o e fenya gomme o iša batho ba yona bothopša ka 607 B.C.E. Ba bangwe, go akaretša le moporofeta Jeremia, ba ile ba šireletšwa, gomme ba bangwe ba ile ba dula ba botegela Jehofa kua bothopša. Ka 539 B.C.E., Babele e ile ya fenywa ke ba-Meda le ba-Peresia ka tlase ga Kgoši Korese. Mo e ka bago nywaga e mebedi ka morago, Korese o ile a ntšha taelo ya go dumelela mašaledi a ba-Juda go boela nageng ya gabo ona. Mafelelong, tempele ya Jerusalema e ile ya agwa lefsa, gomme baperisita ba ile ba boela ba ba boemong bja go ruta setšhaba Molao. (Maleaki 2:⁠7) Ka gona Jehofa o ile a atlegiša mašaledi a tsošološitšwego​—⁠ge feela a be a dula a botega.

7, 8. Mantšu a boporofeta a Tsefanya 3:​14-17 a ile a šoma go bomang, gomme ke ka baka la’ng o araba bjalo?

⁷ Tsefanya o boletše e sa le pele mabapi le bao ba bego ba tla thabela tsošološo yeo gore: “Hee ngwanenyana wa Tsione! Hlalala! Hee Isiraele! Xoloka! Hee ngwanana wa Jerusalêma! Thabá O hlakêlê ka pelo ka moka. Xobane Morêna ó xomišitše tše a bexo a Xo ahloletše tšôna, a raka lenaba la xaxo. Morêna Kxoši ya Isiraele ó xare xa lena. O ka se hlwê O bôna tša bošula. Mohla woo Jerusalêma xo tlo botšwa xwa thwe: Tsione, se boifê; O se kebišê ’atla tša xaxo. Morêna Modimo wa xaxo ó xare xa lena, Moxale-Mophološi; ó tlo Xo thabêla wa xo thaba, O tlo wa pelo à Xo rata, à Xo hlalalêla xare xa mekxolokwane.”​—⁠Tsefanya 3:​14-⁠17.

⁸ Mantšu ao a boporofeta a be a šupa go mašaledi ao a kgobokeditšwego go tšwa bothopša bja Babele gomme a bušetšwa nageng ya bo-rakgolokhukhu ba ona. Se se bontšhwa gabotse go Tsefanya 3:​18-20, moo re balago gore: “Ba ba nyamilexo bà le kxolê le monyanya, ke [Jehofa] tlo ba kxobêla; ke ba xeno bà il’alo bà rwele nyatšêxô. Ké Nna é! Mehleng yeo ke tlo kokobetša ba ba xo hlakišaxo, ka hlakodiša ba hlotšaxo, ka ba dira ba xo rêtwa dinaxeng ka moka, mo ba bexo ba nyadiwa. Mehleng yeo ke tlo le xoroša. Mehleng yeo ke tlo le kxobêla. Ke tlo le dira ba maina a xo rêtwa dithšabeng ka moka tša lefase; e tlo ba xo buša ba ba thopilwexo ba ba xeno, Lè ba bôna ka mahlô.​—⁠O r’yalo Morêna.”

9. Jehofa o ile a itirela bjang leina mabapi le Juda?

⁹ Akanya ka go tlabega ga bao e bego e le manaba a batho ba Modimo ditšhabeng tšeo di ba dikologilego! Badudi ba Juda ba be ba išitšwe bothopša ke Babele e matla, go se na kholofelo ya gore le ka mohla ba tla lokollwa. Go feta moo, naga ya bona e be e dutše e le lešope. Lega go le bjalo, ka matla a Modimo, ba ile ba bušetšwa nageng ya gabo bona ka morago ga nywaga e 70, mola ditšhaba tša manaba di be di lebane le tshenyego. Jehofa o ile a itirela leina le legolo gakaakang ka go bušetša mašaledi ao a botegago lefelong la ona! O ba dirile “maina a xo rêtwa ditšhabeng ka moka tša lefase.” Tsošološo yeo e ile ya tliša tumišo e kaakang go Jehofa le go bao ba rwelego leina la gagwe!

 Borapedi bja Jehofa bo a Godišwa

10, 11. Phethagalo e kgolo ya boporofeta bja tsošološo bja Tsefanya e be e tlo direga neng, gomme re tseba se bjang?

¹⁰ Tsošološo e nngwe e bile gona lekgolong la pele la nywaga Mehleng e Tlwaetšwego, ge Jesu Kriste a be a kgobokeletša mašaledi a Isiraele borapeding bja therešo. Seo e be e le go latswa e sa le pele seo se bego se sa tla, ka gobane phethagatšo e kgolo ya tsošološo e be e sa dutše e le ya nakong e tlago. Boporofeta bja Mika bo boletše e sa le pele gore: “Bofelong bya mabaka thaba ya Ntlo ya Modimo e tlo ba e thekxilwe xodimo xa dithaba, è beilwe xodimo xa meboto; ’me dithšaba di tlo thšoloxêla mo xo yôna.”​—⁠Mika 4:⁠1.

¹¹ Se se be se tla direga neng? Go etša ge boporofeta bo boletše, “bofelong bya mabaka”​—⁠ee, “mehleng ya bofêlô.” (2 Timotheo 3:⁠1) Se se be se tla direga pele ga bofelo bja tshepedišo ya gona bjale e kgopo ya dilo ge ditšhaba di sa dutše di rapela medimo ya maaka. Mika 4:⁠5 e re: “Sethšaba se sengwê le se sengwê sè [tla ya] ka tsela ya modimo wa sôna.” Gomme go thwe’ng ka barapedi ba therešo? Boporofeta bja Mika bo araba ka gore: “Rena re tlo fêla rè e-⁠ya ka tsela ya Morena Modimo wa rena ka mehla le xo ya xo ile.”

12. Ke bjang borapedi bja therešo bo phagamišitšwego mehleng ye ya bofelo?

¹² Ka gona, mehleng ye ya bofelo, “thaba ya Ntlo ya Modimo e . . . thekxilwe xodimo xa dithaba, è beilwe xodimo xa meboto.” Borapedi bjo bo phagamego bja therešo bja Jehofa bo tsošološitšwe,  bo theilwe ka go tia gomme bo phagamišeditšwe godimo ga mehuta le ge e le efe e mengwe ka moka ya madumedi. Go etša ge boporofeta bja Mika bo boletše gape e sa le pele, “dithšaba di tlo thšoloxêla mo xo yôna.” Gomme bao ba dirišago borapedi bja therešo ba tla ‘fela ba e-⁠ya ka tsela ya Morena Modimo wa bona ka mehla le go ya go ile.’

13, 14. Lefase le le tsene neng “bofelong bya mabaka,” gomme ke eng seo se bego se dutše se direga ga e sa le go tloga ka nako yeo mabapi le borapedi bja therešo?

¹³ Ditiragalo tšeo di phethagatšago boporofeta bja Beibele di bontšha gore lefase le tsene “bofelong bya mabaka”​—⁠e lego mehleng ya lona ya bofelo​—⁠ka ngwaga wa 1914. (Mareka 13:​4-10) Histori e bontšha gore Jehofa o thomile go kgobokeletša borapeding bja therešo mašaledi a botegago a batlotšwa, ao a nago le kholofelo ya legodimong. Se se latetšwe ke go kgoboketšwa ga ba “lešaba le lexolo . . . ba dithšaba ka moka, le meloko ka moka, le merafô ka moka, le maleme ka moka”​—⁠bao ba nago le kholofelo ya go phela ka mo go sa felego lefaseng.​—⁠Kutollo 7:⁠9.

¹⁴ Ga e sa le go tloga Ntweng ya I ya Lefase go ba go fihla mehleng ye, borapedi bja Jehofa bja bao ba rwelego leina la gagwe bo gatetše pele ka matla ka tlase ga tlhahlo ya gagwe. Ba oketšega go tloga go dikete tše sego kae ka morago ga Ntwa ya I ya Lefase, barapedi ba Jehofa bjale ba balelwa go mo e ka bago dimilione tše tshela, ba kgobokeditšwe diphuthegong tše e ka bago tše 91 000 dinageng tše 235. Ngwaga o mongwe le o mongwe, bagoeledi ba ba Mmušo ba diriša diiri tše fetago dimilione tše sekete ba tumiša Modimo phatlalatša. Go molaleng gore Dihlatse tše tša Jehofa ke tšona di phethagatšago mantšu a Jesu a boporofeta a rego: “Xomme Ebangedi yé ya mmušô wa maxodimong e tlo xoêlêlwa lefaseng ka moka xore e bê bohlatse mo xo dithšaba tšohle; ya tlo ba xôna bofêlô bo fihlaxo.”​—⁠Mateo 24:⁠14.

15. Tsefanya 2:⁠3 e phethagatšwa bjang gona bjale?

¹⁵ Tsefanya 3:​17 e re: “Morêna Modimo wa xaxo ó xare xa lena, Moxale-Mophološi.” Katlego ya moya yeo bahlanka ba Jehofa ba e thabelago mo mehleng ye ya bofelo ke mafelelo a lebanyago a go ba le yena ‘gare ga bona’ e le Modimo wa bona yo matla ka moka. Se ke sa therešo lehono go etša ge go bile bjalo tsošološong ya Juda ya bogologolo ka 537 B.C.E. Ka gona re ka bona kamoo Tsefanya 2:⁠3 e phethagalago ka karolo e kgolo mehleng ya rena ge e re: “Nyakang Morêna, lena babôtla bohle ba lefase.” (Mongwalo o sekamego ke wa rena.) Ka 537 B.C.E., lentšu “bohle” le be le akaretša mašaledi a ba-Juda ao a boilego bothopša Babele. Mo nakong ye le emela bao ba ikokobeditšego ba ditšhaba ka moka lefaseng ka moka, bao ba arabelago gabotse modirong wa boboledi wa Mmušo wa lefase ka bophara le bao ba kgeregelago ‘thabeng ya Ntlo ya Modimo.’

Borapedi bja Therešo bo a Atlega

16. Ke eng seo go bonagalago e le karabelo ya manaba a rena katlegong ya bahlanka ba Jehofa ba mehleng yeno?

¹⁶ Ka morago ga 537 B.C.E., ba bantši ditšhabeng tšeo di ba dikologilego ba ile ba tlabja ke go bušetšwa ga bahlanka ba Modimo borapeding bja therešo nageng ya gabo bona. Lega go le bjalo, tsošološo yeo e bile ka tekanyo e nyenyane kudu. Na o ka akanya seo ba bangwe​ —⁠gaešita le manaba a batho ba Modimo​—⁠ba se bolelago mo nakong ye ge ba bona kgolo e makatšago, katlego le kgatelopele ya bahlanka ba Jehofa mo mehleng ye? Mohlomongwe, ba bangwe ba manaba a ba ikwa go swana le Bafarisei ge ba be ba bona kamoo batho ba bego ba kgeregela go Jesu ka gona. Ba ile ba kgotsa ka gore: “Lebêlêlang! . . . lefase ka moka le mo šetše nthaxo.”​—⁠Johane 12:⁠19.

17. Ke eng seo mongwadi yo mongwe a ilego a se bolela ka Dihlatse tša Jehofa, gomme ke kgolo efe yeo di bilego le yona?

¹⁷ Ka pukung ya gagwe ya These Also Believe, Moprofesara Charles S. Braden o itše: ‘Dihlatse tša Jehofa di tloga di apareditše lefase e le ka kgonthe ka go nea bohlatse ga tšona. Ka kgonthe go ka bolelwa gore ga go na sehlopha se tee sa bodumedi mo lefaseng seo se bontšhitšego phišego le go phegelela mo gogolo boitekong bja go phatlalatša ditaba tše dibotse tša Mmušo go feta Dihlatse tša Jehofa. Mokgatlo wo ka ntle le pelaelo o tla matlafala o e-⁠ya pele.’ O be a nepile gakaakang! Ge a be a ngwala mantšu ao nywageng e 50 e fetilego, ke feela Dihlatse tše ka bago tše 300 000 tše di bego di dira boboledi lefaseng ka moka. O be a ka re’ng lehono, ge ba e ka bago ba palo yeo ge e balwa ga 20​—⁠ba ka bago dimilione tše tshela​—⁠ba bolela ditaba tše dibotse?

18. Leleme le le sekilego ke eng, gomme Modimo o le neile bomang?

¹⁸ Modimo o holofeditše ka moporofeta wa gagwe gore: “Ke tlo nea ba-dithšaba melomo-mesekexi [“leleme le le sekilego,” NW], xore ka moka ba bolê ’ina la Morêna, ba Mo hlankêla seôtlô [“ba bapelane ka magetla,” NW].” (Tsefanya 3:⁠9) Mo mehleng ye ya bofelo, ke Dihlatse tša Jehofa tšeo di bitšago leina la Jehofa, tšeo di mo hlankelago di kopane tlemong e sa kgaogego ya lerato​—⁠ee, “ba bapelane ka magetla.” Ke bona bao Jehofa a ba neilego leleme le le sekilego. Leleme le le le sekilego le akaretša kwešišo e nepagetšego le tebogo ya go leboga therešo mabapi le Modimo gotee le merero ya gagwe. Ke Jehofa a nnoši yo a neago kwešišo ye ka moya wa gagwe o mokgethwa. (1 Ba-Korinthe 2:​10) O neile bomang moya wa gagwe? “Ba ba Mo kwaxo” feela. (Ditiro 5:​32) Ke Dihlatse tša Jehofa feela tšeo di ikemišeditšego go kwa Modimo e le Mmuši dilong ka moka. Ke ka baka leo e lego baamogedi ba moya o mokgethwa wa Modimo le leleme le le sekilego, e lego therešo ka Jehofa le merero ya gagwe e kgahlišago. Ba diriša leleme le le sekilego go tumiša Jehofa lefaseng ka bophara ka tekanyo e kgolo le e oketšegago.

19. Go bolela leleme le le sekilego go akaretša eng?

¹⁹ Go bolela leleme le le sekilego ga go akaretše feela go dumela therešo le go e ruta ba bangwe eupša gape go akaretša go dumelelanya boitshwaro bja motho le melao le melao ya motheo ya Modimo. Bakriste ba tloditšwego ba etile pele go tsomeng Jehofa le go boleleng leleme le le sekilego. Nagana ka seo se fihleletšwego! Gaešita le ge batlotšwa ba fokotšegile ka palo go fihla go palo ya ka tlase ga ba 8 700, ba bangwe ba dimilione tše ka bago tše tshela ba ekiša tumelo ya bona ka go tsoma Jehofa le go bolela leleme le le sekilego. Ba ke palo e golago ya lešaba le legolo le tšwago ditšhabeng ka moka bao ba bontšhago tumelo sehlabelong sa Jesu sa topollo, ba dira tirelo e kgethwa lapeng la lefaseng la tempele ya Modimo ya moya, gomme ba tla phologa “tlaišexong e kxolo” yeo kgaufsinyane e tla tlelago lefase le leo le sa lokago.​—⁠Kutollo 7:​9, 14, 15.

20. Ke eng seo se letšego ka pele bakeng sa batlotšwa ba botegago le bakeng sa bao ba bopago lešaba le legolo?

²⁰ Lešaba le legolo le tla išwa lefaseng le lefsa la Modimo la go loka. (2 Petro 3:​13) Jesu Kriste le batlotšwa ba 144 000 bao ba tsošeditšwego bophelong bja legodimong go hlankela e le dikgoši le baperisita le yena ba tla bopa sehlopha se sefsa se bušago lefase. (Ba-Roma 8:​16, 17; Kutollo  7:⁠4; 20:⁠6) Baphologi ba tlaišego e kgolo ba tla šoma go dira lefase paradeise gomme ba tla tšwela pele go bolela leleme le le sekilego leo ba le neilwego ke Modimo. Ka kakaretšo, mantšu a a šoma go bona: “Baaxi ba xaxo ka moka ba tlo rutwa ke Morêna; ’me moláô wa bana ba xaxo e tlo ba o moxolo. Tokô e tlo Xo thêkxa.”​—⁠Jesaya 54:​13, 14.

Modiro o Mogolo wa go Ruta Historing

21, 22. (a) Go etša ge go bontšhwa ke Ditiro 24:​15, ke bomang bao ba tlago go nyaka go rutwa leleme le le sekilego? (b) Ke modiro ofe wo o sa bapišwego wa go ruta wo o tla dirwago lefaseng ka tlase ga pušo ya Mmušo?

²¹ Sehlopha se segolo kudu seo se tla newago sebaka sa go ithuta leleme le le sekilego lefaseng le lefsa ke bao go bolelwago ka bona go Ditiro 24:​15, yeo e rego: “Bahu ba tlo tsoxa, bohle, baloki le ba s’a lokaxo.” Nakong e fetilego, batho ba dimilione tše dikete ba ile ba phela gomme ba hwa ba sa hwetša tsebo e nepagetšego ya Jehofa. O tla ba bušetša bophelong ka mokgwa o nago le thulaganyo. Le gona bao ba tsošitšwego go tla nyakega gore ba rutwe leleme le le sekilego.

²² E tla ba tokelo gakaakang go tšea karolo modirong wo o mogolo wa go ruta! E tla ba modiro o mogolo kudu wa go ruta historing ya motho. Ka moka ga wona o tla phethwa ka tlase ga pušo e lokilego ya Kriste Jesu a le matleng a Mmušo. Ka baka leo, batho mafelelong ba tla bona go phethagatšwa ga Jesaya 11:⁠9, yeo e rego: “Xobane xo tseba Morêna xo tlo tlala ’fase lohle bo-ka meetse xe a nabile lewatleng.”

23. Ke ka baka la’ng o ka re re na le tokelo e kgolo ya go ba batho ba Jehofa?

²³ Re na le tokelo e kgolo gakaakang mo mehleng ye ya bofelo ya go lokišeletša nako e kgahlišago ya ge tsebo ya go tseba Jehofa e tla tlala lefase e le ka kgonthe! Le gona re na le tokelo e kgolo gakaakang mo nakong ye ya go ba batho ba Modimo, bao ba bonago go phethagala mo gogolo ga mantšu a boporofeta a begilwego go Tsefanya 3:​20! Moo re hwetša kgonthišetšo ya Jehofa e rego: “Ke tlo Le dira ba maina a xo rêtwa dithšabeng ka moka tša lefase.”

O be o tla Araba Bjang?

• Boporofeta bja Tsefanya bja tsošološo bo bile le diphethagalo dife?

• Borapedi bja therešo bo dutše bo atlega bjang mehleng ye ya bofelo?

• Ke modiro ofe o mogolo wa go ruta wo o tla dirwago lefaseng le lefsa?

[Dipotšišo tša Thuto]

[Seswantšho go letlakala 25]

Batho ba Jehofa ba boetše nageng ya gabo bona go yo tsošološa borapedi bjo bo sekilego. Na o tseba seo se bolelwago ke se lehono?

[Diswantšho go letlakala 26]

Ka go bolela “leleme le le sekilego,” Dihlatse tša Jehofa di nea batho molaetša o homotšago wa Beibele